دئرام متنی : یاشام ...

دئرام : یاشام  .

                   صه حنه ایشلی ینه باغلیدیر .

                           پئرسوناژلار : آدام ، حووا ، هابیل ، قابیل ، آستورا ، آغلایار ، پیریم آتا ،

                                                                                   نئریمان ، آسام ، توکومدن ، زاراتوشدو ، آراس ، تومروآس ، کوراوغلو   

                                                                                   و  دده قورقود .                                                                                            

ایشیق  .

                   دده قورقود ساز الینده اوتوروب بیر داش اوسته .

دده قورقود : آس ائللرین بیر ناغیلی وار دئییلممیش ، من دده قورقودام ، آس ائللرین پیری یم ، تاریخ بویو یاشامیشام ، ایندی بورادایام ، بیر اسکی ناغیل

                      ایله ، قولاق آسین آدام اولادلاری نین بو ناغیلینا .

یازی : آس .

شکیل : تانرینین یاراتدیغی دونیا بیر ایشیق ایله باشلانیر ، گوی و اولدوزلار  .

یازی و سسلر : آس ، آسیم ، آسیمسان ، آسیمان ، آسمان .

                           یارانانلار اویناییرلار .

                           بوتون یارانانلار تانری یا باش اییبلر .

                           دئو اویناییر .

                           فیریشته لر اونا باخیر .

                              آدام و حووا باغدا اویناییرلار .

یازی و سسلر : آسام ، آتام ، آدام ، آقام ، آبام ، آنام .

                              فیریشته لر آدام ایله حووانی دووره لی ییرلر .

                           دئو تک قالیبدیر .

                           دئو اوز دووره سینه دولانیر و آداملا حووانی گوز آلتینا آلیر .

                           آدام و حووایا گویدن بیر پارلاق اولدوز وئریلیر ، اللرینده ساخلاییبلار .

                           بوتون فیریشته لر آداملا حووایا باش اییرلر .

                                                                                  دئو باش ایمیر .

یازی : چیخیش .

                           دئو باغدان ائشی یه چیخیر .

                           دئو ایلان شکیلینده گلیر و آداملا حووانی باغدان چیخاردیر ائشی یه .

                           آدام و حووا چولده ایتیرلر  ، سونرا بیربیری تاپیرلار .                   1

                           آدام و حووا پارلاق اولدوزو ساخلاییبلار ، دئو ایسته ییر آلسین ، آلابیلمیر .

شکیل : بویوک بیر پارتلاماق ایله دئو هر یئری دومانا دولدورور .

                           هابیل و قابیل دونیایا گلیرلر .

یازی و سسلر : هابیل ، قابیل .

                           هابیل و قابیل آغلایار ایله آستورانی گورورلر .

یازی و سسلر : آستورا ، آغلایار .

                                                                                   هابیل و قابیل آشیق اولورلار .

شکیل : هابیل آستورا ایله و قابیل آغلایارلا ائولنیبلر .

آستورا : خان !

هابیل : خانیم !

آغلایار : آقا !

قابیل : خاتین !

                              هابیل ایله آستورا و قابیل ایله آغلایار اویناییرلار .

یازی و سسلر : ائو ، اووا ، اوبا ، آباد .

                           دئو بیر گوزل شکیل اوزونه وورور و قابیلین گوزونه گوروشور .

                           هابیلین گوزل قوربانلیغین آللاه قبول ائدیر و قابیلین پیس سونبوللرین یوخ .

                           دئو قابیلی یولدان چیخاردیر و هابیلی اونا پیس گوستریر .

                           قابیل هابیلی اولدورور .

                              آستورا بیر قارتالین اوچماقی کیمی اویناییر .

شکیل : بیر قوشون اوچماسی .

                                                                                  هابیلدن سوراغ یوخ ، آستورا یوللارا باخیر .

                           دئو آستورانی قابیله گوستریر .

                           قابیل اوزونه بیر شکیل وورور و دوشور آستورانین دالیسینا ، آستورا قابیلین

                                                                                  الیندن اوزونو قورتاریر ، قابیل ایستریر آستورانی توتسون ، آستورا اوزونو

                                                                                  اولدورور .

شکیل : قان ایچینده بیر قادین گویه باخیر .

یازی و سسلر : آستورا : اسطوره .

                           قابیل گئدیر آغلایارا ساری ،  آغلایار قابیلی قاوالی ییر و آستورایا آغلاییر .

                           قابیل اوزونو اولدورور .

                           آغلایار آغلاییر .

شکیل : آغلایارین گوزوندن دوشن داملالار بیرلشیر و یولا دوشورلر ، چای دوزلیر .

یازی و سسلر : آرآس .

                           دئو اویناییر .                          2

شکیل : اینسانلار آراسین قیراقیندا چوخالیب و یاشامی باشلاییبلار .

                           دئو آداملاری گورور اوز دووره سینه دولانیر .

                           دئو بولوتلاری چکیر گونشین قاباقینا .

قارانلیق  .

شکیل : آراس دونوبدور   .

ایشیق  .

                           پیریم آتا جانینا اود وورور بولوتلار یاغیر .

شکیل : ایلدیریم ، اود ، پیریم آتا اود الینده .

یازی و سسلر : پیریم آتا : پرومته .

شکیل : آرازین دونو آچیلیب و یولا دوشوبدور .

اینسانلار : آراس آراس خان آراس  ...

                           دئو پیریم آتانی زینجیره چکیر .

                                  دئو  بیر قارتال اولور پیریم آتانین جی یارین یئییر .

شکیل : قافقاز داغلاری ، پیریم آتا ، زینجیر و قارتال  .

یازی و سسلر : قافقاز داغلاری .

                           اینسانلار یئره بئل وورورلار ، ال اله وئریرلر و اویناییرلار .

شکیل : یاللی ، بوغدالیک .

                           دئو اوز دووره سینه دولانیر .

شکیل : چول  .

یازی و سسلر : کو یئر : کویر ، یابان : بیابان  .

                           دئو اینسانلاری زینجیره چکیر سالیر قاباقینا آپاریر .

شکیل : بیر سورو داوار .

                           نئریمان زینجیرین قیریر .

شکیل : بیر قوچ ایله بیر نئری .

یازی و سسلر : نئری ، نئریم ، نئریمان .

                           دئو نئریمانی آسیر .

شکیل : دار آغاجی .

                           آغلایارین روحو کئچیر ، اوزون جیزیر و آغلاییر .

                           آسام نئریمانین زینجیرین آلیر الینه یولا دوشور .

یازی و سسلر : آسام ، سام .

                           اینسانلار زینجیر اللرینده دوشورلر آسامین دالیسینا .

یازی و سسلر : آس ، آسی ، عاصی ، عیصیان  .                            3

                           توکومدن زینجیرین قیریر .

یازی و سسلر : توکومدن : تهمتن .

                           دئو اینسانلاری قیریر توکور یئره .

شکیل : ساواشلار  .

                           آغلایارین روحو اولولرین آراسیندان کئچیر ، اوزون جیزیر و آغلاییر .

                           دئو اویناییر .

                           آس زاراتوشدو قاتلاری گویدن آلیر قالان اینسانلارا وئریر .

یازی و سسلر : آس زاراتوشدو ، زرتشت .

                           اینسانلار قاتلاری آلیرلار ائولرینین اوستونه قویورلار .

یازی و سسلر : ائواوسته ، اوستا .

                           دئو آس زاراتوشدونو اولدورور .

                           دئو ائولری اودا چکیر .

شکیل : یانان قالالار .

                           تومروآس هوجوم گتیرنلرین بیرینین باشین کسیر .

یازی و سسلر : تومروآس .

                           دئو یئرین اوسته جیزیق چکیر و اینسانلاری جیزیقلارین ایچینه سالیر  .

اینسانلار : آس ، گل آسیم ، گل آسیم آسیم آسیم ، آسیم هانی ؟ آسیم هان ...

                           آراس بیر داغ اوسته کامان الینده اوخ آتیر .

شکیل : اوخچو .

اینسانلار : آرآس ؟!

یازی و سسلر : آلپ آراس : آلپ اوروس : آلبروس :  البرز .

شکیل : البرز داغلاری  .

                           دئو اوز دوره سینه دولانیر ، آراسی اولدورور و آداملاری زینجیره چکیر .

                           کوراوغلو قیلینج الینده داغا چیخیر .

شکیل : نئری و قوچ  .

یازی و سسلر : قوچ کوراوغلو .

                            دئو توفنگ الینده کوراوغلونو اولدورور و اینسانلاری زینجیره چکیر .

                            اینسانلار هاممی کوراوغلو اولوبلار و زینجیرلری قیریرلار .

                            دئو اینسانلارا هوجوم گتیریر .

شکیل : اتم پارتلاماقی  .

                           آغلایارین روحو آداملارین آراسیندان کئچیر ، اوزون جیزیر و آغلاییر .

                           دئو اویناییر .

                           دومان .                                4

قارانلیق  .

                   دده قورقود کیتابین باغلاییر .

دده قورقود : بیر گون بو قارانلیقدا بیر سس گلدی .

                              موذن زاده نین اذانینین سسی گلیر .

                           دئو اوز دووره سینه دولانیر .

                           آدام و حووا پارلاق اولدوزو ساخلاییبلار ، دئو ایسته ییر آلسین ، آلابیلمیر .

                           گونش چیخیر .

شکیل : گونبذ .

                           آدام و حووا پارلاق اولدوز اللرینده گویه ساری گئدیرلر .

ایشیق  .

                                                                         سون   .

                                                                       90.09.13

اولوم ...

اولومده  وار  یاشامدا 

آمما 

اولوم  اولومله  بیر  دئییل ! 

بیری  گویه 

بیری  یئره  گئدیر ! 

گوله گوله  

اوچا اوچا  

اولدوغو کیمی !

یادا  بیلمه میش  

گولمه میش 

دینمه میش 

اولمادیغی  کیمی !

ناغیل ...

ناغیللار  یازیلیب  بوتون  دوورانلاردا 

یئتیشیبدیر  بیزه  بوگون  آنجاق 

آق 

قارا 

یاشیلیدا  وار 

ماویسیده ! 

بوز  قورددان 

قارتاللاردان 

داوار کیمی  یاشی یان  اینسانلاردا  وار ! 

پیس  

یاخچی 

کوتوسوده  وار ! 

آیری  آیری 

قاریشیبدیر  هه رده نده   ناغیللار ! 

گورورسه ن   کوراوغلو  داغلارین  باشین  آلار 

های  سالار 

قاچاق  نه بی  آتین   قووار 

بابه کی  وار  دار   اوستونده ! 

صمد عمی   ناغیل  دی یه ر 

ستارخانلار  گول له  آتار 

باقیرخاندا  وار  بورادا ! 

دده قورقود   سازین  کوکله ر 

سارای خانیم  تئلین  دارار 

آراز آخار 

خه زه ر   یاتار ! 

اورمو  گولو  گوله ر  اوردا 

سولدوزلولار  قارشی  دورار 

دوشمانلارا  

کوتوله ره ! 

ناغیل  وار  آغلادار  بیزی 

گولوشلو  اولسا   

گول بیته ر   دوداقلاردان ! 

ماهنی  اوخونار 

یاللی  توتولار 

اویناماقلار  باشا  گئده ر ! 

آس ائل له رین   ناغیلی  چوخ 

کوکو کیمی 

ناغیللارین  ایپی  اوزون  

دیبی  ده رین 

سویو  سه رین ! 

اوره کله ره  وئره ر  هه وه س 

ماراقلاندیرار  بیزی  ناغیللاریمیز ! 

بیز 

قولاق  وئریریک  اونلارا ! 

دئییره م    

بیزده ن   نئجه سی  قالاجاقدیر  گه له نله ره ؟ 

داوار  ناغیلی ؟ 

یوخسا 

گویده  اوچان  قوشلار  ناغیلی ؟ 

قافلان  ناغیلی ؟ 

قارتال  ناغیلی ؟