قریب ...

هاممینین  ائوی   

بورادیر  بورا 

بیر  بیزیم  ائوله ر   

اوزاق  دوشوبدور ! 

کیمی  دیندیرسه ن  ائوی   بورادور 

جیزیق  چه کیبدور  

بیزیم  دووره یه !  

تورکو  اوباما  نه قشه  چه کیبدور !

قالمیشام  حئیران   بویله   دونیایا 

قریب  جانیم   هئی 

قریب  ایلیشدیک ! 

گوره سه ن   بیزیم  ائوله ر  هایاندا ؟  

ائومیز وار اصلن ؟ 

یوخسا   

یوواسیز   

قریب  میسکینیک ؟ 

قوناق ...

آشکدان اوزاقام  بو  گونله ریمده 

یئره  یاخینام  

گویده ن  چوخ  اوزاق !

بو  دونیایا  مه ن  قوناق  اولموشام ! 

دئرام متنی : بالاجا قارا بالیغ ...

دئرام : بالاجا قارا بالیغ  .

               ( صمد بئهرنگین بالاجا قارابالیغ ناغیلینا بیر باخیشلا ) .                                    

                           پئرسوناژلار : آرتیم ، بیریمجی ، ایکیمجی ، اوچومجو ، دئو ، آشیق ،

                               قیرجالا ، اوغلان یولداشی ، آغ بالیغ ، تورچو  و  بالیغلار  .

                                                                                  صه حنه ایشلی ینه باغلیدیر .

ایشیق   .

                   آرتیم اوچ یولداشی ایله تانری یا یالوارماق اویناماقین اویناییرلار .

                           دئو بیر گوشه ده یاتیبدیر ، هردن باشین قووزاییر اوینویانلارا باخیر گولور و

                                                                                   باشین قویور یئره یاتیر .

آرتیم : یاغموردان قاردان سوراغ یوخ کی یوخ ، یالوارماقدان یورولماساقدا اوز باشی سویوخلوقوموزدان یورولاق گرک .

اوچومجو : بیز باشی سویوغوک ؟

آرتیم : اولماسایدیک شوردنیز قوروماقا باشلامازدیر  .

ایکیمجی : بیز تانری یا یالوارماقداییک دا .

آرتیم : ایشدن قاباق آمما !

بیریمجی : نئجه ؟! آنلامادیم !

ایکیمجی : دئییر ایشدن قاباق ، نه ایشی ؟

آرتیم : تانری بیزلره ال وئریب ایشلمک اوچون  ، قیچ وئریب گئدمک اوچون ، فیکیر وئریب یول تاپماق اوچون ...

بیریمجی : بیزلر بیر بالاجا آرتیمیا یارانمیشیک ، بیزیم الیمیزدن نه ایش گلیر ؟

آرتیم : الیمیزدن هئچ ایش گلمسیدی تانری بیزی نه اوچون یارادیردی به !

بیریمجی : من دئمدیم هئچ ایش ...

آرتیم : پس بیر ایشلر گلیردا !

بیریمجی : ...

اوچومجو : آرتیم دئدیغی بویوک سوزدور ، همده دوز سوز !

آرتیم : یولداش یادیندا دئییردین بیر آرتیمیاآشیقی وار هر دردین داواسین بیلیر ؟

                               دئو آشیقین آدی گلنده یوخودان دورور اویان بویانا باخیر و سوزلره قولاق

                                                                                    آسیر .

بیریمجی ، ایکیمجی و اوچومجو : سوس ، اوغلان اویاتما یاتان دئوی .

آرتیم : کیمی ؟

بیریمجی : یاتان دئوی اوغلان ، یاتان دئوی ...

آرتیم : او کیمدیر ؟

ایکیمجی : آی هوو ...                                                          1

اوچومجو : آرتیم باخ ، آشیق ایشیق آچاندیر ، قارانلیق سئون دئو خوشو گلمیر بیرکیمسه اونون آدین چکه یادا اونا ساری گئده .

آرتیم : نیه ؟

بیریمجی : کیم بیلیر نیه سین ؟ اوتوردا .

ایکیمجی : بو سوزلر بیزه گلمی ییبدیر .

آرتیم : نیه گلمی ییبدیر ؟ سیز ندن قورخورسوز ؟

بیریمجی : باخ مندن دئمک ، سونرا دئمه  دی ین  اولمادی ، دئو ائشیدسه سسی یین گلر سنی اولدورر ...

آرتیم : اولدورر ؟ میه بو راحاتچیلیقدادیر ؟! بیرده هر نه یین سونو اولومدور ، اوتورساقدا گئدسکده ، یاتساقدا باتساقدا ، آنجاق هر حالدا اولوم بیرگون

             وار ، نه یاخچی آدام گئده گوره بیله باشا دوشه و الیندن بیر ایش گلسه گوره سونرا اوله ، بیربئله قورخاق اولمایین ...

ایکیمجی : باخ بیر  یئکه یئکه دانیشما ، یئگینن ایچگینن سونرادا تانری یان شوکور ائیله  ، یاشام یانی بو ...

آرتیم : آخی میه یاشام بیر گئدیب گلمک و یئییب ایچمکدیر ؟ آیری جور یاشاماق یوخدور ؟

بیریمجی : یاشام ائیله بودور ، خوشون گلمیر باشی یین وور داشا اول .

آرتیم : منه بوجور گلیر بو دوز اولا بیلمز ...

بیریمجی : یوخدا ؟!

ایکیمجی : آخیرالزمان دووره سیدیردا ...

بیریمجی : اوزوموزدن خیردادان گرک سوز ائشیدک ...

ایکیمجی : بیزه درس وئریر ...

بیریمجی : ایلیشمیشیکدا ...

اوچومجو : نیه به سیز شولوغ ائیله ییرسیز  ، بو هله بیر سوز دئمی ییبدیر کی ...

ایکیمجی : هله دئمی ییب ؟ به نه دی یرلر ؟

بیریمجی : یوخ گلسین مینسین بیزیم بئلیمیزه ...

ایکیمجی : بیزه فیلسوف اولوبدور ...

بیریمجی : واه واه واه ...

آرتیم : فیلسوف اولمامیشام ، یالان یالان خوش اولمالاردان یورولموشام ، باخین شور دنیز گون به گون خیردالاشیر ، الیمدن گلسه نیه گرک اونا بیر ایش

             گورمویم ؟

ایکیمجی : ائشید ، بو ایسته ییر شوردنیزه بیر ایش گوره ، هاهاها ...

بیریمجی : بونا باخ اونا باخ ...

آرتیم : یئکه لیکله بالاجالیک اصل دئییل ، اینام اصلیدیر هر ایشده .

ایکیمجی : دئییردین !

آرتیم : مسخره ائیلمکدن هئچ یئره یئتیرمزسن ایکیمجی یولداش .

بیریمجی : بو بویله دئییلدی ، گورن کیم یولدان چیخاردیبدیر بونو !

اوچومجو : کئشگه منده بونجاق قاناردیم ...

آرتیم : یوخ ، منده سیز کیمینم ، من فقط ایستمیرم قوجالاندا حاییف دی یم عومورومه ، ایستییرم بیر ایش گورم قوجالام ...

بیریمجی : سنین باشین هاوالیدیر ...

ایکیمجی : گرکده دیسین بیر داشا بلکه م دوزله سن .

بیریمجی : قینیندان چیخمامیش گور نلر دانیشیر ...

ایکیمجی : بیلیرسن یولداش بونون یاشی یئتیرمیر بیله نه وار دونیادا نه یوخ ...

بیریمجی : هارادان بیلجک آخی ...

ایکیمجی : دوز دئییرسن هارادان بیلجک ، بونون یادینا گلمز بیر زامان بو دنیز بویوک دنیزه یاپیشمیشدی ، یادینا گلمز دئو نه جور دنیزی بولدو و        2

                  بالیغلارین نئجه نسلینی کسدی !

                              دئو گولور .

بیریمجی : بو نه بیلیر دئو نیه بورانی بویوک دنیزدن آیری سالیبدیر ؟! بونو گرک بیر قولاق بورمایلا یولا گتیرک .

اوچومجو : یولو بو دئییل ...

ایکیمجی : بو یولا گلمسه سنیده بیزیده یولدان چیخاردار !

بیریمجی : اصلن بوندان سوروش دنیز خیردالیر بونا نه وار آخی ؟

ایکیمجی : بیر بو بورادا یاشاییر ؟

بیریمجی : اولمویا دنیز دده سینین ارث میراثیدیر ؟

ایکیمجی : دوغروداندا سنه نه وار بو آرادا ؟

آرتیم : نئجه منه نه وار آخی  ؟ بوندان آرتیق بورا شور اولسا بیز اولجیک !

ایکیمجی : توتاق سن دی ین دوزدور ، هارادان بیلیرسن آشیق دنیزین دردینین درمانین بیلیر ؟

بیریمجی : به !!!  اودا بیر ایش گوره بیلمز .

ایکیمجی : بیرده بیز داها عادت ائیله میشیک بویله شور سویا ، بوندان آرتیق شور اولسادا یئنیده عادت ائیلریک .

اوچومجو : یوخ داها ، یاواش یاواش چتین اولور ، اوزویوزده بیلیرسیز بوندان آرتیق شور اولسا اولملی ییک ...

بیریمجی : منیم سون سوزوم بودور ، من دئوله ایشیم یوخ ...

ایکیمجی : دئییرم ها بوندان آرتیق دئودن دانیشسا بیز گئدجییک  ...

آرتیم : یاخچی بابا دئوی اوتوردوم ، آشیقین یئرین بیلن وار هله ؟

بیریمجی و ایکیمجی : آی هوو ...

آرتیم : آیری سوز دئمک ایسته ییرم ...

اوچومجو : دینمه یین گورک نه دئییردا ، دانیش آرتیم .

آرتیم : بلکه م دئوله ایشی اولمویان بیر یول گوستردی بیزه آخی ، باخ بیریمجی یولداش سنده ایکیمجی یولداش همده سن اوچومجو یولداش بیز گئدیب

             آشیقی گورمکله هئچ نه الدن وئرمریک آمما گئدمسک گرک اوتوراق و اولومو گوزلویک .....................................................

بیریمجی : سنین باشین آغری ییر واللاه .

ایکیمجی : دئییبلر آغریمی یان باشا دستمال باغلامازلار ها .

آرتیم : اوتورماقدان نه چیخار ؟ اولمه ک وار ها بورالاردا !

اوچومجو : اوزاقلاردادیر ها ، تومروآس آنانین شهرینده !

آرتیم : من گئدمک ایسته ییرم ...

اوچومجو : منده  .

بیریمجی : اورمو دنیزقیراقیندان تومروآس آنانین شهرینه چوخ یولدور ، بیلیرسیز بونو ؟

آرتیم : آشک اولسا اوزاق یول گوزه گلمز .

اوچومجو : بورادا قالساق گرک اولومو گوزلویک ، گئدریک بلکه م بیر یول تاپابیلدیک  ، قالیب اولمک گوزلمکدن نه چیخار ، ، ، یولدا اولسکدا

                   اولموشوک ، اولوم اولومدور ، یا اوجور یا بوجور ،،، دوش یولا یولداش .

بیریمجی : امینسیز بو ایشی گورجه ییز ؟

آرتیم : من هیه ...

اوچومجو : منده هیه .

بیریمجی : سنین سوزون ندیر ایکیمجی یولداش ؟

ایکیمجی : نه دئییم آخی !

بیریمجی : بیر سوز دئدا ...                                                    3

اوچومجو : سوزدن هئچ ایش چیخماز .

آرتیم : من گئتدیم ...

اوچومجو : منده گئتدیم ............................

ایکیمجی : دورون ، منده گلیرم .

بیریمجی : تک قالمادان فایدا یوخ ، منیده آپارین یولداشلار .

آرتیم : آرتیمیالار آشیقی گورسه سوزه قولاق آسان وار یولون گوسترر بو ایشین ، گئدک .

بیریمجی : آخیرده اوز ایشی یین گوردون ها ...

اوچومجو : گئدک .

                              دئو یئریندن دورور آیاقا .

قارانلیق  . ایشیق  .

                    آرتیمیالار آشیقی گلیر اوتورور بیر داش اوسته و باشلاییر ناغیل دئییر .

                            آرتیمیالار اوتوروبلار داشین دووره سینده ناغیلا قولاق آسیرلار .

                            دئو اوزاقدا دوروبدور و سوزلره قولاق آسیر .

آشیق : بیری واریدی بیری یوخویدو ...

آرتیم : آی آشیق ...

بیریمجی : اوغلان ناغیل دئییر ها .

اوچومجو : سنیله اونون نه فرقی ؟

بیریمجی : نئجه ؟

ایکیمجی : قویمادین گورک نه ایسته ییر دئسین !

اوچومجو : سنده اونون کیمی سوز کسن اولماسایدین ایندی سوزو قورتولموشدو .

بیریمجی : سوزون دئسیندا ، او آشیقین سوزون کسیب من پیس اولدوم ؟

آشیق : آرتیم سوزویون دئگینن .

آرتیم : آی آشیق دئییرلر سن هممشه  ناغیل باشلی یاندا دئییرسن بیری واریدی بیری یوخ ، دئییرم بلکه ایکیسیده واریمیش آخی !

اوچومجو : بلکه مده هئچ بیری یوخویموش !

بیریمجی : هر نیی سوز ائیلیین ها .

ایکیمجی : آشیق ناغیلی دئگینن ، بو آرتیم هر ندن بیر سوز چیخارداندی ، آتاسینین بیر میلیون امانتیندن آناسی بیر بونو دونیایا گتیریب ...

بیریمجی : اونا گوره ده آزدان چوخدان بوجور دوزسوز بارا گلیب ، سن اوزویون ناراحات ائیلمه .

آشیق : من ناراحات دئییلم کی هئچ خوشومادا گلدی ، آرتیم گوزو یومولو هر سوزه باش ایه ن دئییل ، اونون سوزو منیم یادیما صمدعمیدن بیر ناغیل

            سالدی ، بالاجاقارابالیغین ناغیلین ، او ناغیلدا بیر قارا بالیغ ایسته ییردی گئدسین دریایا یئتیرسین ، ایسته میردی گوزو یومولو قولاق وئرسین اونون

            بونون سوزونه ، اوزو ایسته ییردی بیلسین کیم کیمه دیر بو دونیادا ...

آرتیم : صمد عمینین بالاجاقارابالیغین ناغیلی ...

بیریمجی ، ایکیمجی ، اوچومجو : قولاق آس سوزه اوغلان .

آشیق : قویون سوزونو دئسین ، اولمویا ائشیدیبسن او ناغیلی ؟

آرتیم : هن آشیق .

آشیق : لاب گوزل ، سن او ناغیلی بو یولداشلاری یاندا دئگینن ، آمما بیزیم ناغیل ...

آرتیم : آشیق ...

بیریمجی و ایکیمجی : آی هوو ...                                             4

آشیق : سویله اوغلان .

آرتیم : آشیق بیر ناغیل دئگینن شوردنیزین سویو آزالماسیندان ..................................................................

اوچومجو : ندن سوسدون آشیق ؟

بیریمجی : آرتیم قویور دانیشا آخی ؟!

ایکیمجی : سوساردا ، منده اولسام سوسارام .

بیریمجی : او آغزین آچمامیش بو دانیشیر ، اه ...

ایکیمجی : آرتیم آشیقی سوسدوردودا ...

آشیق : یوخ ، آرتیم منی سوسدورمادی ، سوزو بویوک سوزویدو ، فیکیره سالدی بیلمی .

آرتیم : آشیق دئییرلر سن هر دردین درمانین بیلیرسن ، شوردنیزین سویو آزالیبدیر درمانی نه اولاجاق ؟

بیریمجی : اوغلان یئتیشمکله باشلادین سوز آچماقا ؟ قوی آشیق بیر ناغیل دئسین سونرادا ...

ایکیمجی : بیر دوزلو ناغیلدان اوتری اولموشمدا ...

آشیق : داها ناغیل دئمک الیمدن چیخدی ، آرتیم بویوک بیر ایشی یادیما سالدی ، هر گون اوتوراردیم بورادا فیکیرلشردیم ، اوزومه دی یردیم داها سون

             گونلریمیزدیر ، ایسته ییردیم ناغیل دئمکله سیزلری شاد ائیلی یم ، گوروردوم هئچ کیمسه شوردنیزین فیکرینده دئییل ، اوزومه دئییردیم نه اولار

              آخی ، بیرگون دونیایا گلمیشیک بیرگونده گئدجییک دونیادان ، ناغیللارلا بیر نئچه گون خوش اولاریک ، اولنده ده اولریک ،،، آرتیم سنین

              سوزون گوستردی یوخ من ائیلدیقیم فیکیر دوز دئییلمیش ، وار شوردنیزه فیکیر ائلی ین ، یاشا اوغلان ، یاشا ...

آرتیم : آشیق دردیمیزین درمانی وار ؟؟؟؟؟؟؟؟ سوسما آشیق دانیش .

آشیق : سینه دن سینه یه گلن ناغیللار ، آغ ساققال آتالار و آغ بیرچک آنالار دئدیغی سوزلر دوورانلار دولانیب ، آشیقلار سیمیندن سیمینه ، زورناچیلار

            دوز _ اله سیندن دوز _ اله سینه ، شاعیرلر شعریندن یازیچیلار یازیسینا قوناق اولوب بوگون یئتیریبدیر بیزه ! من او ناغیللاارا قاناد وئریردیم اوزوم

             ایسته دیگیم ائیله ییردیم  ، بویله اولاندان سونرا  اوچوردوردوم قوناق یوللویوردوم اورکلره ،،، هاممیدا قولاق وئریردیلر سازیمین سوزونه ! آمما

             اونلار دئییردیلر بلکه م عشقدن اوخویورام ، ائشیدیردیلر سوزومو دئییردیلر نه سازدیر آشیقین کئفی !

             آرازین داشقینا باخ              قیز منی دیندیر      یار منی دیندیر

              سربازین مشقینه باخ         قیز منی دیندیر      یار منی دیندیر

              اوخورام درد الیندن           قیز منی دیندیر      یار منی دیندیر

              دئییرلر عشقینه باخ              قیز منی دیندیر      یار منی دیندیر  .

              بیر کیمسه اولمادی سوزومون دالیسیندا دردیمی گورسون ، گولوشومون دالیسینا گوز یاشیمی گورسون ، اولمادی بیری دئسین آشیق دردین

              ندیر ؟ اورکی ین سوزو ندیر ؟ اولمادی  ، دئییردیم اولار بیری قانا سوزومو ، اولمادی ، اولمادی ...................................................

اوچومجو : آغلاما آشیق ، آغلاما .

آشیق : بیر بو آغلاماق قالمیشدی سیزین گولوشلو آشیقی ییزه ، بیر بو آغلاماق .

ایکیمجی : بیزیده آغلادیرسان سن .

بیریمجی : گورورسن آرتیم بی !

آرتیم : گورورم ، و ، سئوینیرم ...

بیریمجی : سئوینیرسن ؟

ایکیمجی : آشیقین آغلاماقینا ؟!

بیریمجی : آقا سئوینیر ...

آرتیم : هن ، سئوینیرم ، سئوینیرم یالان گولوش یوخ دردلی آشیقین اوزونده ، سئوینیرم ایچین گوستریر بیزه ، آشیق سویله دردیمیزی سازینداکی

            سوزلریله !

                               آشیق ساز چالیر .

آرتیم : چال آشیق چال سازی یین ...                                          5

اوچومجو : چال آشیق ، دیندیر سازی یین ...

آرتیم : آل اله تئللی سازی آشیق ...

اوچومجو : قویما قالسین تئلی سسسیز ...

آرتیم : دیندیر اونو ...

اوچومجو : دیندیر سازی آشیق ...

آرتیم : ائلیمیز درده قالیب ...

اوچومجو : الیمیز باغلی قالیب ...

آرتیم : چال آشیق سازی سسلندیر آماندیر یوخو آلدی گوزومو ...

اوچومجو : گون قارانلیق سو بورانلیق اولوب یوردوموز دومانلیق ...

آرتیم : چال آشیق سازی سسلندیر آماندیر یوخو آلدی گوزومو ...

اوچومجو : چال آشیق ، دیندیر سازی یین ...

آرتیم : دئگینن سودان ...

اوچومجو : یاغموردان ...

آرتیم : سولو سولو بولوتلاردان ...

اوچومجو : ائلدن ، تانریدان ، شوردنیزدن ...

آرتیم : چال آشیق چال سازی یین ، دئگینن اورمو دنیزین بویله قوروماقینین درمانی ندیر ؟!

اوچومجو : سویله آشیق ، سویله ...

آشیق : اورمو دنیزینین دردینین درمانین گئدین آرازدان آلین !

آرتیم : آرازدان ؟

                               آشیق آراز _ آراز ماهنیسین اوخویور .

آشیق  :                          

                                      آراز آراز خان آراز سولطان آراز خان آراز

                                       سنی گوروم آخاسان بیر دردیمی قان آراز

                                      آراز سندن کیم کئچدی

                                      کیم غرق اولدو کیم کئچدی

                                      سنی گوروم آخاسان

                                      بیر دردیمی قان آراز  !

                 آرازا دونون ، آرازا ، او آخار سویا ، آرازدان سوروشون دردین درمانین ، او بیلیر ، گئدین آرازین اتگینن یاپیشین .

اوچومجو : آی آشیق شوردنیزدن آرازا یول یوخدور ؟!

آرتیم : نئجه گئدک اورالارا ؟

آشیق : ایسترسیز یولداشیم قوشو چاغیرارام سیزی دیمدیگینده آپارار آرازا .

بیریمجی : من یوخام !

ایکیمجی : قوشون دیمدیگینه گیرمک هامان قارنینا گئدمک هامان .

اوچومجو : قولاق وئرین گورک آشیق نه سویله ییر ...

آرتیم : آشیق یولداشین قوشا امینسن ؟

آشیق : قوشلار بیزدن چوخ دردی گورورلر ، اونلار گویده اوچورلار و بیلیرلر نه گلیب باشیمیزا ، دئدیغیم قوش یولداشیمدیر ، آرتیمیادا یئمز ، او منی

            نئچه سیرا آپاریب گویدن باخمیشام دنیزه ، چوخو قورویوب آزی قالیب ، یولداشیم قوشدان سیزه پیسلیک گلمز .

بیریمجی : او بیزی یئمسه ده بیز اونون دیمدیگینده آج و سوز قالیب اولریک .             6

ایکیمجی : بلکه مده گویدن دوشدوک یئره !

آشیق : بیر ایشی باشدان ائیلمک اوچون یول چوخ تاپیلار ، گورمک اوچون بیر یول وار آمما ، او ایش گورمک .

بیریمجی : سن نیه به بیزله گلمیرسن ؟

ایکیمجی : دوز دئییر سنده گلدا !

آشیق : من قوجالمیشام ، ال آیاقا دولاشماقدان سونرا ایش گلمز الیمدن ...

آرتیم : قوشو چاغیر گلسین ، من اونلا گئدرم آرازین گوروشونه .

اوچومجو : منده گئدیرم .

                               دئو یئرینده اوز دووره سینه دولانیر ، سانجیلانیبدیر .

بیریمجی : من یوخ آمما .

ایکیمجی : منده یوخ .

قارانلیق  . ایشیق  .

                              آرتیم ایله اوچومجو آرازدا اوزورلر .

                           دئوین حالی خاراب اولوبدور .

آرتیم : بو سو نه شیریندیر !

اوچومجو : بیزده کی شوردنیزدن گلمیشیک لاب چوخ بیلیریک بونو .

آرتیم : گوردون قیرجالا نئیلدی ؟

اوچومجو : یوخ ، ، ، یورولمادین ؟

آرتیم : هم یورولموشام همده باش آغری توتموشام !

اوچومجو : قوش بیزی گتیردی بورا ساق اولسون آمما دئمدی سویو بویله شیریندیر !

آرتیم : بیلمیرمیش بیز بو سویا عادت ائیلممیشیک !

اوچومجو : ایندی نئیلملییک ؟

آرتیم : باش آغریم قویسا فیکیرلشیب ...

                              قیرجالا داشین آلتیندان چیخیر آرتیمین سوزون کسیر .

قیرجالا : کیمین باشی آغری ییر ؟ منده درمانی وار گل گوروم بویانا !

آرتیم : یاشاسین یولداش ، وئر گلسین !

قیرجالا : گل بویانا آلدا .

آرتیم : گوردوم سن قورباغانی توتدون یئدین ، گلمرم اوتایا .

قیرجالا : بیر بئله قورخاق اولما ، گل قاباقا ، من قورباغالاردان خوشوم گلمیر اونو یئدیم ، سن اوزون بیزیم عائله دنسن ، بالاجا قیرجالاسان ، گل .

آرتیم : ایندی کی قوهوم چیخدیک دئگوروم آراز هایاندا ؟

قیرجالا : آراز ؟

اوچومجو : بیز گلمیشیک آرازی تاپاق !

قیرجالا : قریبسیز ؟

آرتیم : هن ...

قیرجالا : اوزوده آرازی آختاریرسیز ؟

آرتیم : هن ...

قیرجالا : گلین بیزده قوناق اولون ، یورولوقویوز چیخسین اوزوم آپاریم آرازی گوستریم سیزه .

آرتیم : بئواقت اولار اوندا ...                                                7

قیرجالا : آرازلا سیزین نه ایشی ییز وار بویله تله سیرسیز ؟

اوچومجو : شوردنیز قورویور ...

آرتیم : آرازدان کومک ایسته ییریک .

قیرجالا : بیر آزدا یاخینلاشسام توتوب یی یه بیلرم بونلاری ،،، گلین قاباقا گوروم نه دئییرسیز منیم قولاقیم آغیردی ...

آرتیم : سن یان یانی یئریمکینله بیزه یاخینلاشیرسان بیزی توتان ؟ گوره بیلمزسن ، قاچ اوچومجو یولداش  ، قاچ !!!!!!!!!!!!!!!!!!!!!!!!!!

                              قیرجالا ایسته ییر آرتیم ایله اوچومجون توتا ، قاچیرلار .

اوچومجو : آز قالمیشدی توتسون ها !

آرتیم : او سودان ائشیکدکین گورورسن ؟

اوچومجو : هن اوغلان یولداشیدیر !

                              اوغلان یولداشی گلیر قاباقا .

آرتیم : سلام اوغلان یولداشی !

اوغلان یولداشی : سلام ! سیز هارا بورا هارا ؟

اوچومجو : سن بیزی تانی ییرسان ؟

اوغلان یولداشی : هن ، سیز شوردنیزین آرتیمیاسیسیز ، بورالاردا نه یاخچی ؟

آرتیم : بیز گلمیشیک آرازدان کومک آلاق آخی ...

اوغلان یولداشی : هن بیلیرم شوردنیز قورویور ...

اوچومجو : سن نه چوخ بیلنسن .

اوغلان یولداشی : بو دونیادا ایه ایسترسن آیریسینا قول اولمویاسان یا تئز باشی یین الدن وئرمی یسن گرک هرندن باشین چیخسین ...

آرتیم : سن کی بیر بئله بیلیرسن بیزه دئییرسن آراز هارادا ؟

اوغلان یولداشی : آراز ؟

اوچومجو : هن آراز .

اوغلان یولداشی : سیز آرازین ایچیندسیزدا .

آرتیم : بورا آرازدیر ؟

اوچومجو : بورا آرازدیر ، بورا آرازدیر .

                              آرتیم ایله اوچومجو اویناییرلار .

اوغلان یولداشی : یولداشلار منیله ایشی ییز یوخ ؟

اوچومجو : گئدیرسن یولداش ؟

اوغلان یولداشی : اوزویوزو گوزله یین ، بورالاردا چوخلاری وار سیزین دوشمانی ییز اولا بیلرلر .

آرتیم : یولداش بیز نئجه آرازلا دانیشا بیلریک ؟

اوغلان یولداشی : آراز ایندی سیزده دیر ، سیز اوزویوز اولوبسوز آرازین ووجودوندان بیر پارا .

آرتیم : یاخچی ، ایندی نئجه آرازی آپارا بیلریک شوردنیزه ساری ؟

اوغلان یولداشی : سیز گرک بوتون بالیقلاری ییغاسیز بیر یئره ، سونرا بیرلیکده اوزه اوزه یول آچاسیز آرازی دوندرسیز شوردنیزه ساری ، بو ایش

                            هاممی ییزین کوم اولماقین ایسته ییر ، سیز بیر اولساز آراز سیزله بیرلیکده دونر هایانا ایستسز ، من گئتدیم .

آرتیم : هارا گئدیرسن بوجور تله سیرسن ؟ قال بیزه کومک ائیله !

اوغلان یولداشی : بیر اوخچو  یولداشیم اووو توفنگیله گول له ووروبدور گئدیرم اونا یئتیرم .

                              اوغلان یولداشی گئدیر .

اوچومجو : نئیلملی ییک ؟

آرتیم : بالیغلاری گرک ییغاک بیر یئره !                                         8

                              آرتیم ایله اوچومجو بالیغلاری ییغیرلار و اونلارلا دانیشیرلار .

                           بالیغلار بیرلیکده اوزورلر و اوزلرینه یول آچیرلار .

                           بیر بالیغ تورو یوللاریندا وار ،  بالیغلاردان نئچه سی ایلیشیر تورا و

                           باشلاییرلار آغلاماقا .

آرتیم : آغلاماقی ییز نه اوچوندور به ؟

آغ بالیغ : سیز بیزی بوگونه سالدیز ، یئئییب ایچیب دولانیردیک ، ایندی ایلیشدیک بو تورا ، هاممیمیز اولملی ییک !

اوچومجو : نیه اولملی ییک ، زور وئرین بو تورو باغلانان یئرلردن آچاق .

آغ بالیغ : اولان دئییل من بیلیرم .

آرتیم : سنیله اولسا گرک اوتوراق تورچونو گوزلویک گلسین بیزی آپارسین یئسین .

آغ بالیغ : گوزلمک لازیم دئییل اوزو گلدی ،،، آی تورچو قارداش بیزه یاززیقین گلسین ، بیزی اوتوردا نه اولار آخی !

تورچو : به جانیم ، سیزه یاززیقیم گلجک ! هوم ! به به ! نده چوخدور !

آغ بالیغ : تورچو قارداش بیزیم گوناهیمیز یوخدور ، هاممی گوناهلار بونلاریندیر ، ایجازه وئر بونلاری توتاق سنه وئرک سنده بیزی اوز آقالیقی یان ، اوز

               بویوکلوقوین ، اوز کیشیلیقی ین ، اوز ان بویوک تورچولوقویان باغیشلا .

تورچو : هن سن نه گوزل سوزلر باشاریرسان جانیم ، آمما گوزل آغ بالیغ سیزی اوتورسم اوزوم آج قالارام ، من ایندی سیزی توتارام آپارارام بونلاری

              یا پیشیریب یییرم یادا ساتارام ، سنی البت ساخلی یارام حوووضدا منه دانیشاسان ، اولدو ؟

آغ بالیغ : اولدو .

آرتیم : سن بونو آپار ساخلا ، اوزو ایستدیغی کیمین آمما بیزی اوتور گئدک .

تورچو : آخی نیه اوتوروم زیرنگ بالام هن ؟!

آرتیم : بیزیم اتیمیز یئملی دئییل ، یئسن اولرسن ، زهرلیدیر !

تورچو : یوخدا !

اوچومجو : به !

تورچو : من سیزدن زیرنگم ، یئمرم آپاریب ساتارام ، اولسده اوزگلر اولر اوزوم اولمرم .

آرتیم : سن چوخ نامردسن .

تورچو : زامانا منی بوگونه سالیبدیر ، آج قالیبسیز بیلسیز نئجه چتیندیر ؟

اوچومجو : سن بیر قارنییان فیکیرله شیرسن ، بویله اولماسایدی سیز آداملار گرک گئدردیز شوردنیزه فیکیرله شردیز نه کی بیزلر !

تورچو : شوردنیزه !!!

آرتیم : قوروماقین گورمویوبسن ؟

تورچو : آی جانیم منیم الیمدن نه ایش گلیر ، اوتوردا ، کئفی ییز سازدیر سیزین ها ، بیرده شوردنیزده بالیغ یوخدور کی ، قوروسوندا ، منه نه وار آخی ،

               بئواقت اولدور ها ، قوی آچیم آپاریم سیزی .

اوچومجو : آرتیم حاضیر اول .

آرتیم : بالیغلار حاضیر اولون .

تورچو : آهان بویانی آچدیم ، اویانیدا آچسام تامامدیر ...

اوچومجو : تورون بیر قیراقین آچیب .

آرتیم : اوشاقلار ایندی زور وئرمک چاغیدیر ، بیر ایکی اوچ !

                              بالیغلار زور وئریرلر و تورو آچیب قاچیرلار .

                           تورچو اوچومجویله آغ بالیغی توتور .

                           آرتیم ایسته ییر قاییدسین !                9

اوچومجو : قاییدما آرتیم ، گئد ، من اولسمده اولموشم ، سن گئد آرازی یئتیر شوردنیزه ، گئد ...

آرتیم : سنسیز اولماز ...

اوچومجو : اولمویان ایش یوخدور بو دونیادا ، بالیغلار آرازی شوردنیزه دوندرن دونیادا بیر آرتیمیا هر ایش گوره بیلر  ،،، گئد .

آرتیم : یولداشیم !

اوچومجو : مندن نیگران قالما ، من یولومو تاپارام گلرم سنین یانییان ! گئد آرتیم یولداش ، گئد ...

آرتیم : اوزویون قورتار یولداش ، گوزلویجم سنی ...

اوچومجو : سنده اوزویون گوزله یولداش ...

                              آرتیم ایسترایستمز بالیغلارلا یولا دوشور گئدیر .

                           بالیغلار تورو جیرماقا بیر ماهنی اوخویورلار .

                           دئو سانجیلانیبدیر ، اوز دووره سینه دولانیر .

آرتیم : بو بیزه بیر بویوک شرفدیر ، بیز تورچونون تورون جیردیک و ایندی بیلیریک الیمیزدن هر ایش گلر ، بیز آرازی شوردنیزه دوندرملی ییک ، اوخو

            یولداش ، اوخو ،،، یاشاسین ! یاشاسین ! یاشاسین !

                              بالیغلار بیرلیکده اوزورلر و آراز آراز ماهنیسین اوخویورلار .

بالیغلار  :              

                                      آراز آراز خان آراز سولطان آراز خان آراز

                                       سنی گوروم آخاسان بیر دردیمی قان آراز

                                      آراز سندن کیم کئچدی

                                      کیم غرق اولدو کیم کئچدی

                                      سنی گوروم آخاسان

                                      بیر دردیمی قان آراز  !

                                                                                                                                                      سون .

                                                                                                                                               90.09.17