دئرام متنی: جوانمردلر ...

آداملار:شعبان، رجب، حقوئردی، مولود، علی حسین، صبرعلی، قربان علی، عسگر، نادر، صمد، اکبر، عباس، محمود، حسن، بایرام و قوجا.

                                                         یئر گوی آغ بویانمیش.

شعبان: بیز اون بئش نفرییدیخ. اون بئش ایگید. اون بئش جوانمرد. تفنگسیز. باروتسیز.

قوجا: گوروردوم گلیرسیز. کمین وارییدی. یول گونده کی یول، هاوا هامان هاوا، اللرده اولان تفنگلر آمما بیلیردی بوگون فرقلی گوندور. کمین

        قورانلار اوچ اون نفرییدی. اوچ اون تفنگچی. کمینه دونلر اون بئش نفر.

                                                         پادگانین قاباقی.

                                                         شعبان قوجا راننده ایله دانیشیر.

شعبان: اون بئش نفر.

قوجا: نئچه؟

شعبان: ائشیدمیرسن؟

قوجا: باتری سی قورتولوب. قیچیم یوخ گئدم آلام. آی قوجالیق هئی...

شعبان: سمعک تاخیرسان دئملی. چوخدا قوجا دئییلسن ها آکیشی. دئدیم بیز اون بئش نفریخ.

قوجا: اوغول منیم جیبیم چوخ گوتوسه آلتی نفری گوتورر. اون بئش نفر یوخ کی.

شعبان: یاخچی گورخ نه اولور دا. نئچه آلاجاقسان هله؟

                                                         اوزاقدان بیر سیرا آرواد اوشاق پادگان دان ائشی یه چیخیر.

قوجا: بونلار کیمدیر؟ آرواد، اوشاق.

شعبان: بیز قالمالی اولدوخ. بونلاری آپاران گرک.

قوجا: جلدیان پادگانی لاپ بوشالدی ها. قاچیرلار بونلار. سیز ندن قاچیرسیز؟

شعبان: بونلار کی گلیر بیزدن واجب دیلر. بونلاری گوتور سن. ائو اوشاقلارین گوندریرلر پادگان دا قالان افسر لر. بیز قاچمیریخ، واللاه بیر آی

          تامام دی بوراداییخ. دئدیخ گئدخ آرواد اوشاقا باش ووراخ گلخ.

قوجا: بونلار چوخدولار. اوتوز نفر اولارلار. من گئدیم پسوه ده کاک قادرین مینی بوس نا دئییم گلسین. سیزده گئدمه یین بیر آیری جیب له گلیم،

        ایکی جیب له سیزیده بیز گوتورریخ.

شعبان: سن قاییداناجاق گرک قالاق بورادا. بونلارین ارلری پادگان دا، بیز بوردا قالاق دموکرات گلسه ده گورسون بیزی یاخین دوشمسین بونلارا.

قوجا: دموکرات ایندی گلمز. گئجه لر گلر باسقین سالار.

شعبان: بیر آی دان چوخدو چاللاشیرلار بو پادگانی آلالار. گئجه گوندوزلرین حارام ائدمیشیخ.

قوجا: آللاه کمک اولسون سیزلره. واللاه گلمسیدیز پادگانی حتمن آلمیشدیلار. دئییرلر مهابادین پادگانین بیر گئجه ده تالادیلار. من گئتدیم. تئز

         گلرم. پسوه بودو بورادی دا.

شعبان: گوزلویوروخ.

                                                         یئر گوی آغ بویانمیش.

شعبان: بیز اون بئش نفرییدیخ. اون بئش ایگید. اون بئش قوچاق نبی. اون بئش ایلدیریم. انقلابییدی. تزه انقلاب. بیر سولدوزلو افسر گلدی سولدوز

         جوانمردلرین گتدی جلدیانا. بیزلری. اون بئش ایگید. سولدوز ماحالی تاریخ بویو تورک اولادلارینین آلینماز قالاسیدی. بیز اون بئش

         نفرییدیخ. اون بئش ایگید. اون بئش جوانمرد.

قوجا: ماهابادین پادگانی دوشموشدو دموکرات لارین الینه. پسوه ایله جلدیان پادگانیندا دا، افسرلر، سربازلار، گروهبان لار قاچمیشدیلار. انقلابییدی.

                                                         پادگانین ایچری سی.

شعبان: اوچ دئدیم او پرچمین میله سینی دور ووروب گلیبسیز ها. بیر، دورما قاچ، اودور ها، ترپش تنبل ترپش، ایکی، سستلاشما گوروم، قاچ قاچ

          قاچ، اوچ. اوتورون. قارخ آیاقا. اوتورون. قارخ آیاقا. اولومه گوروم. اولمه. نه اولوب هله. اوچ دنه اوتوروب قارخیبسان دا. اوتورون. ندن  1

          بوراداسیز؟ سربازسان؟ سرباز کیمی یاشا. باش اوجا. دوش قاباق. باخیش بیر قارتال باخیشی. دور آیاقا. باش اوجا. اوزودور ها. باخ او اوجا

          داغلارا. باخما جلدیان پادگانین قیراغیندا کی تپه لره. بوراسی آذربایجان. هر یاخینی اوزاقی داغ. باخیشین اوجا ذیروه لری گورسون. ندن

          بوراداسان؟ پول اوچون؟ بو مملکت ده نظامین پولو هر بیر ایشدن آزدی. بیلیرسیز بونو. ندن بوراداسان؟ ندن الینده تفنگ اوره گینده

          چیرپینتی، دامارلاریندا قانین جوشور؟ توپراق دئدین جان دئدین. دین دئدین شرف دئدین. بو اولکه بیزیم یوخ، آتا بابالاردان قالان مین ایل

          باش اوجا قالان روح دور، جانیمیزدیر، شرفیمیزدیر. تاریخ بویو ناموس لا یاشایان آنالاردان قالان ناموسوموزدور.

          اوچ دئدیم پادگانین دیوارینا ال ووروب گلیبسیز. بیر.

رجب: نفس دن سالدین ها.

شعبان: بویون نفس دن دوشمه سلر صاباح دموکرات لار نفس دن سالار.

رجب: ملا حسنی نه دئییردی؟

شعبان: مهابادین پادگانین دا گول له تفنگ قالمییب. تالانیب هاممی سی. دئییردی سیز سولدوزلو جوانمردلر گلمه سیدیز پسوه له جلدیان پادگانی دا

          تالانمیشدی.

رجب: آرتش اوچون یاخچی باخیش یوخ انقلاب اهالیسینده ...

شعبان: اوجور دئییل. بیر سیرا شاها باغلی آرتشی اوچون یاخچی باخیلمیر آمما هاممی بیلیر آرتش اولماسا مملکت بادا گئدر.

رجب: منده دئییرم مرزلرده آرتش اولماسا بو مملکت داوام گتیرمز کی.

شعبان: رجب قمقمه لاری دولدور. سوسوز گلیرلر فرمانده سیز قالان سربازلار.

رجب: دئییرسن دموکرات بورایا دا هجوم چکجخ؟

شعبان: چکمسه گرک اونلارا شک ائدخ. قمقمه لاری سو ایله دولدور دئدیم آخی. نیه سودان دانیشان دا رنگین آتیر؟

رجب: دبه نین سویو گورجخ بو قمقمه لاری؟

                                                         یئر گوی آغ بویانمیش.

شعبان: آتاسی یالقیز قالمیشدی. رجب اولاندا یئرین سویونا بونلا گئدیردی. چولچولر بیلیر سوسوز اکینچی بیر تفنگسیز سرباز کیمین دیر. سو یئرین

          قوروموش جانینا بیر یئنی نفس وئریر. دیریلدیر. اولو یئری دیریلدیر. رجب آتاسین یالقیز اوتوروب گلمیشدی جلدیان تک قالمییا. بیز اون

          بئش نفرییدیخ. اون بئش ایگید. اون بئش جوانمرد.

قوجا: چوخلاری آتالاریندان آنالاریندان، یوردلاریندان، ائولریندن کئچدی دوشدو چوللره. داغ لارا. دموکرات لار هر یئری توتموشدولار.

                                                         پادگان دا بیر آسایشگاه.

رجب: حقوئردی سن دئییردین مولود بوغولوردو سن اونو سودان توتدون؟

حقوئردی: من دئمیردیم، علی حسین دئییردی. اودا مولود یوخ بابا. ائله بیل صبرعلی بوغولورموش.

مولود: هارادا؟

علی حسین: قیرخ پیلله ده.

صبرعلی: یالانچینین؟ علی حسین یالانچی نین او ...

قربان علی: یوخ ها صبرعلی. یوخ ها. سویمه ها.

عسگر: منده اینانمیرام.

نادر: نیه عسگر؟

صمد: عسگر له صبرعلی قوهومدو آخی.

اکبر: صمد قوهومچولوقا نه ربطی وار آخی.

عباس: عباس قاغام، اکبر دئییر یانی عسگو اونا تعصب ساخلییر دا.

محمود: پاپیرین باغچاسینین یانی دئسیدین منده اینمازدیم علی حسین، منتهی قیرخ پیلله ده ممکن دی.                                                           2

حسن: اولان محمود، عباس سیز قاتیشمایین علی حسین دولاشیر صبرعلی یه. بایرام دینمیرسن؟

بایرام: صبرعلی گادار سویو ایچیب واللاه منده اینانمیرام قیرخ پیلله ده ده بوغولا.

رجب: اولان قیرخ پیلله چوخ دریندیر ها.

حقوئردی: آقا اجازه وئرین علی حسین بیزه ده تعریفلسین دا.

مولود: به دا. اوندا قره گوتله آغ گوتون فرقی بللی اولار.

صبرعلی: دوز تعریفلمه سن اغزیین ...

عسگر: اوتور تعریفلسین داها.

حقوئردی: علی حسین سنده دوز تعریفله ها.

علی حسین: آقا من له صبرعلی گئتدیق چیمخ. گونده گئدیردیخ دا. صبرعلی چیخدی اوستن شیرجه وورا، بیلمیرم باشی گیجللندی، قیچی پیتدی،

                آنجاق نجور اولدو یادیمدا دئییل، او اوستن کی شیرجه ووردو دوشدو سویا، دا چیخمادی. اولان صبرعلی دن خبر اولمادی. ووی. بیر

                آزجا گوزلدیم، خئیر ها خبر یوخ. اوزومو ووردوم سویا. گئتدیم ترکه. گوردوم بیر یئکه ناققا صبرعلی نی توتوب آپاریر.

صبرعلی: دده، باخ یالانین یئکه لیقینه ها. بابا سیز دئیین علی حسینین زورو منه چاتار منی سودان چیخاردا؟ اودا ناققا ایله منی؟!

علی حسین: نیه چاتمیر. دئییر همدان اوزاق کردی سی یاخین. گل زور بازویا.

قربان علی: صبرعلی دوز دئییر دا. گلین گولشین گورخ کیم ییخاجاق، ایه علی حسین ییخسا اوندا سودان دا چکیب چیخاردا بیلر.

نادر: ناققالی ماققالی.

صبرعلی: منیم سوزوم یوخ کی.

علی حسین: منیم ده.

                                                         صبرعلی ایله علی حسین گولشیرلر.

                          هرکیمسه بیرین تشویق ائدیر.

صبرعلی: هه، نه اولدو به علی حسین، به منی ییخیردین.

عسگر: ساغول عمواوغلو. ساغول واللاه.

نادر: آقا انصافا بتر گولشیر بو صبرعلی.

صمد: کیشی دی کیشی.

اکبر: علی حسین اوزو ییخمادی ها البتده.

عباس: سریمه گورخ.

محمود: عباس من اولوم بیرده بونو گه. نه بتر دئدین سریمه گورخ.

عباس: ائله بوجور یا اوخویا اوخویا.

حسن: اوخویا اوخویا دا.

بایرام: بودا دنبک.

رجب: یاخچی دی واللاه. او سو دببه سین دلسز منده سیزی ...

حسن: عباس دا رجب ایشه دوشممیش اوخو گورخ به.

حقوئردی: چال بایرام چال.

                                                         عباس ماهنی اوخویور.

                                                         صبرعلی له علی حسین و نادر له صمد باشلاییرلار اویناماقا.

مولود: جانیمسیز با.

علی حسین: تویوندا اوینویوم.

صبرعلی: منده. حسن گل گورخ.

قربان علی: بایرام دوز چال گورخ.                                            3

بایرام: بویور سن چال دا باشاریرسان قربان علی.

قربان علی: وئر منه گوروم.

عسگر: بودور ها قربان علی کیشی. آی جان.

نادر: واللاه ساغول.

صمد: عباس چئویر یاللی یا.

اکبر: هیه واللاه.

عباس: دالان؟

محمود: دالان.

حسن: سولدوز یاللیسی فقط دالان.

بایرام: چک حیته.

رجب: اولان دببه دلیندی.

حقوئردی: رجب بیر گوندور ها. اوتور گورخ سنده.

مولود: یاشاسین سولدوز یاللی سی گئدن لر.

محمود: یاشاسین.

علی حسین: شاباش گه گوروم آخی.

صبرعلی: اولان یاللی باشی فقط اوزوم.

قربان علی: ها ماشالاه.

عسگر: بیزیم صبرعلی عمواوغلو ساغ اولسون.

نادر: صمد به نه اولدو نفس دن دوشدون؟

صمد: یوخ واللاه. قیچیم چکیلیب.

اکبر: وای دده، بیلیرسن نه یادیما دوشدو؟

صمد: جهنلم اول دا.

بایرام: من دئییم؟

اکبر: عباس بیر آز نفس آل، ایندی بایرام صمدین قیز آلماقین تعریف ائلییندن سونرا بیر غملی ماهنی اوخومالیسان.

عباس: اولدو دا.

محمود: منده ائشیدمیشم قیچی چکیلمخ جریانی.

حسن: بایرام تعریفله گورخ به.

بایرام: گونلرین بیر گونونده منم صمددی بیرده داییم اوغلو رحمتلیک غلامحسین دی گئدیریخ ناخیرا. آقا خرمن ده اود قالاییب چای قویموشدوخ

         گوردوخ اوچ دنه قیز باغ دا ِیارپاق ییغیرلار. غلامحسین ایستدی صمدی اله سالا. صمد اوشاقلیقیندان بیزیم کنده گلردی، باباسی گیله، منتهی

         هاممی نی تانیمیردی کی. قیزلاری دا هئچ. آقا مخلص غلامحسین رحمتلیک دئدی صمد بو باغ میرزه حیدر گیلین باغی دی آمما بو قیزلار

         بیزیم کندین قیزلاری دئییل. من قیزلا دانیشا بیلمم، بایرام دا گئدر قاوالار خوش اولماز، سن گئد قیزلارا دئگینن بیزیم باغدان چیخین گئدین.

         صمد دئدی بو ائیله اوز ایشیم دی. یولا دوشدو گئده میرزه حیدرین قیزلارین اوز باغلاریندان چیخاردا ائشیه. ایندی صمد گئدیب گولشن له

         دانیشیر. گولشن میرزه حیدرین وسط قیزییدی، بویوک قیزی خاتین قیچین چکردی، گلمزییدی باغا بستانا. ترلان لا زینب ایستدیلر بیر سوز

         دانیشالار، گولشن گوز ائیلدی دانیشمایین. اوزو صمد له دانیشدی. صمد دئدی بیزیم باغدان یارپاق ییغیرسیز گئدز دولما دولویاز آمما من

         راضی دئییلم. گولشن دئدی اوغلان سن کیمین اوغلوسان؟ صمد دئدی میرزه حیدرین. قیز دئدی باخ ایشه ها، من نذر ائیلمیشدیم سیزین

         کندین آغ ساققال سئییدین اوغلونا گئدم. میرزه حیدرین اوغلونا. پس او اوغلان سنسن؟ صمدین دیلی توتولدو.

صمد: هئچ ده اوجور دئییل ...

اکبر: صمد قوی گورخ نه دئییر آخی.                                             4

بایرام: مخلص بو کی صمدین دیلی توتولدو. قیز گوردو بو هئچ قیز میز لا دانیشمیب دئدی من سنین دردیندن اولورم. ایندی نذری مه گوره گرک

        گله سن منی آلاسان. صمد دیلی توتولا توتولا دئدی آخی سن کیمسن؟ کیمین قیزیسان؟ گولشن دئدی من خاتینام. اوز کندیمیزین

        میرزه حیدرینین بویوک قیزی. قیزلار گوله گوله باغ دان چیخدیلار گئتدی لر. صمد باشلادی سوز اوخوماقی. آغلاماقی. داها عاشق

        اولموشدودا. اونلار کی گئتدی غلامحسین آشدی جریانی دئدی. دئدی کی اولان باغ اونلارین اوزلرینینییدی. صمد گوردو بتر بارا

        قویوب دیر. ایندی خرمن ده صمد دوشوب غلامحسینین دالیسینا، صمد قاچیر غلامحسین قاچیر. مخلص صمد اوگوندن بوتایا دئدی گرک

        خاتینی منه آلاسیز. منله غلامحسین ده شوخی توتدوخ دئمدیخ بابا او گولشنییدی. صمد ائلچی گوندردی. میرزه حیدر ده آللاهیندانییدی

        خاتین گئده اره. آلان یوخویدو قیچینا گوره. صمد توی گونو قیزی جیبدن دوشوردنده گورور قیز قیچین چکیر. اوزو اوتولو گلین هله اوزون

        آچمامیشدی کی. صمد دئییر نه اولوب؟ خاتین دئییر هئچ قاپی نی یئل ووردو باغلاندی دیدی قیچیما. اینجییب. آقا دا نه دئییم صمد اتاقدا

        گورور ووی خاتین هارا گولشن هارا. آمما کیشی اوغلو کیشی بوشادی دا. میرزه حیدر دادگاه دا دئییرمیش بو خاتینا ائلچی گلیب منده

        وئرمیشم دا. صمد جریانی قاضی یه تعریف ائدنده قاضی گولور میرزه حیدری راضی سالیر بوشاندیرا خاتینی. مخلص هر زامان بیرینین

        قیچی آغری یاندا صمدین تویو دوشور یادیمیزا.

صمد: من اوزوم یاددان چیخاردمیشام سیز ال چکمه یین ها.

حسن: دئییرم اکبر دئملی ایندی گرک بیر غملی هاوا اوخونا.

                                                         شعبان گیریر ایچری یه.

شعبان: غملی هاوانی ساخلایین هله. دورون گوروم. دموکرات گلیب پادگانی محاصره ائدیب. دورون تئز گئدخ.

مولود: من بونلارا دئدیم اولان شعبان گئدیب پسوه پادگانیندان مهمات گتیره گلیب گورسه اوخویوب اوینویورسوز واللاه قورتولمویاجاییز ها

        الیندن.

شعبان: ائشیدیردیم. اوتورموشدوم او ستونون دالیندا. منتظرییدیم. گئدممیشدیم پسوه یه.

قربان علی: نیه به؟

شعبان: ایسته ییردیم گئدم خبرچیلریمدن بیری گلدی دئدی قراردی بوگون ده حمله اولا. دئدی دموکراتین برنامه سی وار گئجه میزه. سیزده دورون

          آیاقا، تئز اولون گوروم.

حقوئردی: یاللا دئگینن گوروم.

عسگر: ایندی گئدخ؟

نادر: دوز دئییر. میه دئمه دین گئجه حمله اولاجاق؟ ساهات هئچ یئتدی اولمویوب ها.

شعبان: دئدیم گئجه حمله اولاجاق، دوز، منتهی گرک مهمات تفنگ آپاراخ. یئرلری تاپیب سنگر قوراق.

حقوئردی: ترپش گوروم به.

رجب: قمقمه لاریزی وئرین منه سو ایله دولدوروم.

شعبان: تئز اولون گوروم.

حقوئردی: جناب سروان زمانی له هماهنگ اولوبسان؟

شعبان: جریان دادیر. بی سیم لر یاددان چیخماسین.

حقوئردی: نییاران قالما.

شعبان: اوزون باشلاری اوسته اول.

                                                         یئر گوی آغ بویانمیش.

شعبان: بیزیم ائل لر تاریخ بویو ساواشا دوشوب. باسقینا دوشوب. تالانیب. ساواشیب. قان وئریب. قان توکوب. یاشیم بو یئره یئتیشیب ائشیدممیشم

         ساواشلاردان قاچا. آنجاق قانیندادیر. آرامش ایله صلح ایستسه ده مجبور اولاندا ساواشار. تاریخین بوراسی بیزیمدی. بو ساواشی. بونلاری

         دئدیم اوشاق لارا. سربازلارادا سروان زمانی دانیشدی. گوزل بیر دانیشیخ. هاممی حاضرلاندی گئجه ساواشا. دموکرات لار نئچه سری هجوم

          چکمیشدیلر، بو گئجه ده گلیردیلر پادگانی آلالار. گلسینلر گورخ دا، دئدیم اوزومه.                                                                5

قوجا: سابلاغ پادگانی راحات آلیندی. انقلابییدی دا. پسوه ایله جلدیان آلینمادی. نئچه سری هجوم چکیلدی آلینا بو ایش باش توتمادی.

                                                         پادگانین دوره سینده کی نگهبانلیق برجکلرین قاباقی.

شعبان: یاتین سنگرلرده. اوجا یئرلرین دالیسینی اوزویوزه سنگر ائدین.

عسگر: منیم تفنگیم گیر ائیلییب.

حقوئردی: آی هوووووو.

عسگر: اوزوم ایستمیشم؟

شعبان: یاخچی هله. گئد علی حسین دن آیری تفنگ آل.

بایرام: تئز قایید بورایا.

رجب: داریخدین؟

صمد: قورخور گول له ییه یاراسین باغلایان اولمویا.

حسن: دیلی یین دیشله.

مولود: رجب سو وار؟ سپیم اوزومه یوخوم قاچسین.

اکبر: گه قمقمه نی.

بایرام: منه ده.

عباس: سوسوز اولمویه سیز صلوات.

نادر: داها گوز گوزو گورمور ها.

محمود: من کی پادگانین او طرفین ده گورورم.

صبرعلی: چال تاختایا نظر دیمه سین.

علی حسین: دئییرم دا وقتیدی گله لر ...

قربان علی: اونلار چوخدان گلیب لر. هر داشین دالیسیندا بیر دموکرات یاتیب.

رجب: دوغوردان؟

حقوئردی: قورخودما اوشاقی قربان علی.

قربان علی: دئدیم هوشیار اولالار بابا.

شعبان: گوزلرییزی آچین. هر نفره اون دموکرات اولا بیلر.

نادر: فقط بیز واریخ؟

شعبان: پادگانین بو طرفین بیز گوزلویوروخ. سربازلارلا قاچیب گئدمی ین کادرلاردا نئچه یئرده واردیلار.

عباس: هئچ کیمسه لازیم دئییل. اوزوموز کونتارات توتاردیخ کئشگه.

محمود: والسلام

شعبان: شوخلوق بس. ایندی حواس لاری ییغین دوشمنه ساری. ایسته میرم بیر نفر سیم خاردارلارین اللی مترلیقینه یئتیره حتی. بیلدیز؟

هاممی: بیلدیخ.

شعبان: حاضر اولون. بی سیم کیمده؟

حقوئردی: منده. علی حسین له عسگرده گلدی.

شعبان: سن گل بورایا.

علی حسین: بیزده گلدیخ.

عسگر: منده حاضر آماده یم.

مولود: بتر یوخوم گلیر منیم آمما.

شعبان: اوز یئرییزی تاپین گوروم.                                             6

حقوئردی: ائیله بیل سنی چاغیریرلار بی سیم له.

                                                         یئر گوی آغ بویانمیش.

شعبان: بی سیم له خبر وئردیم بیز حاضریخ. او گئجه بئش یوز دموکرات پادگانی آلماق اوچون هجوم گتیرمیشدی.

قوجا: بی سیم ده سسلرین ائشیدمک اوچون گئتدیخ اونلار دانیشان یئره. تورکجه دانیشیردیلار آمما رمز له. او گئجه بیلیندی بورانی ساخلییان لاری

        سنگرده اولدورمک اولماز. بئش یوز دموکرات آلابیلمدی پادگانی.

                                                         پادگانین قاباقی.

حقوئردی: اوجوز دئییردی ها.

شعبان: نئچه وئردین؟

حقوئردی: سوزون ساغی مندن پول آلمادی.

شعبان: ...

حقوئردی: چوخ دئدیم آل. آلمادی.

شعبان: نه دئییم واللاه.

حقوئردی: دئدی سیز اولماسایدیز منیم توکانیم، اوزوم، واریم یوخوم دا یوخویدو ایندی. بیر اویونجاق گلین ندی ایندی من سندن اونا پول آلام.

              دئدی وئر قیزییان دئگینن منیم کادوم دی اونون اوچون.

شعبان: گنه ائوی آباد.

حقوئردی: گوزل دی هله؟

شعبان: قیزین کیمین گوزل دی.

حقوئردی: مینی بوس گلیر.

شعبان: خوش اولدو. اوشاق لارا دئگینن حاضرلانسین لار. منده گئدیم افسرلرین آرواد اوشاق لارین میندیریم مینی بوسا.

حقوئردی: تئز اول دا. باجی قیزین بیلسه داییی سی باعث اولدو گلین بئوقت یئتیشه الینه کوسر ها شعبان دایی.

شعبان: شعبان دایی قربان کسیدی او مارالین شیرین دیللرینه. سنین ده اورگین دوزمور شعبان دایی نی باهانا ائد آت اورتایاها.

حقوئردی: آتا آتا دیین دیللرین داریخمیشام واللاه.

شعبان: منده.

                                                         یئر گوی آغ بویانمیش.

شعبان: نئچه ایل سونسوزلوقدان سونرا آللاه بیر گوزل قیز وئرمیشدی یولداشیم حقوئردی یه. آدی مارال. اوزو آذربایجان داغلارینین مارالی. باجیم

         حقوئردی منله گلنده دئدی آی قارداش بونون جانی سنین جانین ها، من بو قیزی یئتیم بویوده بیلمرم. دئدیم کس سسی یین جانیم. بو نه

         سوزدور. آغلادی دئدی آللاه آمانیندا.

         بیز اون بئش نفرییدیخ. اون بئش ایگید. اون بئش جوانمرد.

قوجا: بیر یولدا مبارزه ائدمک اوچون احساسات لا یاشاماقی بوراخماق گرکدیر. آداملار اولسون. یول یئرینده قالسا یئتر. من بویله فکرله شیردیم. منه

        اولمک له اولدورمک بیرییدی. دموکرات لار خودمختارلیک ایسته ییردیلر.

                                                         پادگانین دوره سینده کی نگهبانلیق برجکلرین قاباقی.

شعبان: اوچ طرفدن هجوم گتیریب لر. بی سیم له دئگینن بورانین وضعی خوش دور.

حقوئردی: دئدیم.

شعبان: اونلاردان دا سوروشدون؟                                              7

حقوئردی: دئدیلر او طرفلرده خوش وضعیت ده.

شعبان: دموکرات لار فکر ائیلمیردیلر قاباق لاریندا دایانان اولاجاق.

حسن: عاغیللاری گئدیب مهاباد پادگانینا.

شعبان: اکبر سن سینه خیز گئد او سنگره. موغایات اول گول له یاغیر.

اکبر: گول له لریمین سسی سنه خوش گلمدی قاغام؟

شعبان: جهنلم اول گئد دا.

محمود: یوز دفعه دئدیم گول له لرین سسی له توی هاواسی چالسان دئمزلر گئد اوتایا قولاق آسمادین دا.

شعبان: محمود سریمه گورخ. قاتیشیبسان بو اکبره سنده. ایندی شوخلوق وقتیدی؟

اکبر: شوخلوقون وقتی یوخ کی شعبان قاغام. هر زامان جاواب وئریر دا.

شعبان: یاخچی گئد دا.

حسن: اولان بو مولود دئییل؟

حقوئردی: یا ابوالفضل.

شعبان: گنه حتمن یوخودا یول گئدیر.

حسن: یوخودا اولماسا نیه بوجور یول گلیر. یئر گویدن گول له یاغیر.

شعبان: گول له لر اونو سوکممیش گئدیم چکیم سنگر دالیسینا. قربان علی بو سمتی باغلا رگبارا گوروم.

                                                         یئر گوی آغ بویانمیش.

شعبان: مولود فرقی یوخ ساواش دا یا تویدا، یوخوسو گلنده یاتاردی. یاتاندادا یوخودا یول گئدردی. گئتدیم چکم سنگرین دالیسینا. آغزین یاواش

          گتدی قولاقیمین دیبینه دئدی نییاران اولما. دئدیم به اویاخدی. دئدیم مسخره ساواشداییخ ها! گوردوم یوخ یوخودا. چکیردیم سنگرین

          دالیسینا بیرده باشلادی دانیشماقا دئدی نییاران اولما بیز بورادا اولمویه جییخ. بیز بیر داغ دوشوندن اوچاجاییخ گویلره. قوشلار کیمین. بیز

          بورادان ساغ گئده جییخ آمما ائوه یوخ. دئدیم به مفته دانیشیر سنگرین دالیسیندا اویاتدیم. دئدیم نه دئییرسن؟ دئدی هانی تفنگیم؟ اوز

          تفنگیمی وئردیم دئدیم آل آت. بیلمیردی یوخودا نه دئییب.

قوجا: ائله بیل بو کابوس دان دورماق ممکن دئییلمیش. نئچه سری هجوم آپاریلمیش پادگان اله کئچمیردی. ایچری دن بیر قدیم افسرله ارتباط

        باغلادیم. دئدی جوانمرد آدی اولان نئچه ایگید گلیب پادگانا. دئدی من کماندولارلا دا بیر پادگان دا خدمت ائدمیشم آمما بونلار کیمین

        ایگیت دویوشجو گورممیشم. دئدیم بونلار کیمدیلر؟ دئدی سولدوز ماهالیندان گلمیش قوچاق تورک اوغلو آدلاندیریرلار اوزلرین. دئدیم هر

        زامان ایستسه لر پادگاندان چیخیب ائوله رینه گئده لر خبر وئر منه.

                                                         بیر داغ دوشونده جوانمردلر جیبلردن یئره دوشورلر.

شعبان: به نیه ساخلادین؟

قوجا: باخیم گوروم جیبه نه اولوب دئییم.

حقوئردی: نه اولوب؟

رجب: اولان بولاغ دا سویا باخ.

عسگر: منه ده گتی.

مولود: بورا منه چوخ تانیشدی. بورانی یوخودا گورمیشم ائله بیل.

عباس: دئمدیز نیه چوندوخ بو فرعی یولا.

شعبان: دوآب گردنه سینی دموکرات لار باغلاییب لار. راننده دئدی بورادان گئدیم. دئدیم بو فرعی یولدان گئدسخ او طرفدن اوشنو خانا یولویلا

          گئده بیلریخ سولدوزا.

علی حسین: کئشگه تفنگلری گتیرردیخ با.                                       8

صمد: آی دئدین، او دموکرات لاری قاوالییاردیخ تا عراقین ایچینه.

حقوئردی: بورادان گئدمخ اولار سولدوزا ساری؟

حسن: هیه بو طرفدن گئدمخ اولار ده شمس دربنده ساری.

نادر: جیب داغ داش تانیمیر کی. گئده بیلر دا.

صبرعلی: گئدر هیه.

محمود: به ماشینا نه اولوب دورموشوخ؟

علی حسین: هاوادا ایستی دی ها.

عسگر: یایین اورتا آییدی دا. ایستی اولاجاق دا.

رجب: آی ایندی دریا خوش گلر ها.

صمد: آی دئدین ها. منه ده بولاق سویوندان وئر.

صبرعلی: قیرخ پیلله ده ایندی آدام الیندن ایینه سالماق اولماز.

مولود: نه کی سنده قیرخ پیلله ده بوغولمویاجاقسان.

رجب: اولان سن گاداری دریا ایله بیر بیلیرسن؟

بایرام: منده دریایا هوسلنیرم واللاه.

رجب: ووروب بئینیمه دا.

اکبر: یانی یئتیشدین کنده آت داشقاسین گوتورجخسن گئدن دا تلووا؟

قربان علی: گئدن ده منی دا آپار. ننه مه دئمیشم آپاراجاقام اونو دریایا قیشلارینا گوره.

بایرام: هله دریا قویروق دوغاناجاق وقت وار.

حسن: ائله بیر وقت قالمیب اونادا.

رجب: مردادین اون بئشینه نئچه گون قالیب؟

صبرعلی: کیمین یادیندادی آخی. پادگان دا هئچ بیلدیخ گوندوز ندی گئجه نه.

محمود: اشهدان باللاه هیه.

عسگر: سو قالیب رجب؟

رجب: سنین پایین وار. ایچیرسیز دولدوروم بولاق دان؟

صمد: به نه اولدو ماشین؟

اکبر: دوزلمه دی پیادا گئدخ.

محمود: وارام بونلا.

قربان علی: منده.

حقوئردی: منده گلرم واللاه.

مولود: آز قالیر وقته. تلسمه یین. وقت گلدی.

علی حسین: مولود یوخودا دانیشیر گنه؟

مولود: یوخ داها لاپ اویاقام.

بایرام: شعبان گور جیب دوزلمدی؟

شعبان: آقا نه اولدو به؟ جیبین نه اییدی؟

قوجا: جیبین هئچ نه ایی دئییل. منتهی منیم سیزیله ایشیم وار.

                                                         قوجا ساققالین قوپاردیر، بیر جاوان اوغلاندیر.

                                                                قوجانین الینده بیر تفنگ وار.

                                                         قوجا تفنگ له هاممی نین اوستونه رگبار آچیر.                  9

                                                         هاممی گول له یئییب ییخیلیر.

                                                         مولود قانلی قانلی یول گئدیر. ائیله بیل یوخودا یول گئدیر.

                                                         یئر گوی آغ بویانمیش.

قوجا: بیر آی چکمدی بوتون ساققالیم باشیم آغاردی. ائیله بیل اولدوم یوز یاشیندا بیر قوجا. بیز پادگانی آلا بیلمدیخ آمما اون بئش سولدوزلونو

         ائولرینه گئدنده یولدا گول له یه باسیب اولدوردوخ. من اوگوندن بوتایا گئجه لر یاتا بیلمدیم. تک تکینه گول له ووردوخ اولدولر آمما بیری

         یول گئدیردی. اولموشدولر آمما بیری دیری آدام کیمین یول گئدیردی. ها گول له ووروردوخ اونا اثر ائدمیردی. دانیشا دانیشا یول گئدیردی.

         یولداشلارینین دوره سینه دولانیب دانیشیردی. اول گولوردوخ. بیرده گول له آتیردیخ اونا. سونرا من گئتدیم قاباقا گوروم نه دئییر. گوردوم

         دئییر اوشاق لار دورون آیاقا. دئمیشدیم دا بیز بیر بولاقین قیراقیندان اوچاجاییخ گویلره. دورون دا. یئتیشمیشیخ ایندی. سلاحسیز اون بئش

         نفری اولدورنده بیلمدیم آمما او یول گئدیب دانیشانین سوزلرین ائشیدندن سونرا ائیله بیل ذئهنیم دوردو. بیر لحظه باخدیم گوردوم

         یولداشلاریم دالا چکیلیرلر. یول گئدن اوغلان آمما اوجور دانیشیب یولداشلارینین دوره سینه دولانیردی. بیر آی تامام اوغلان منیم

         گوزلریمین قاباقیندایدی. گوروردوم. هر یئرده. بیر سیرا خیاباندا گوردوم. داها قاتیشدیرمیشدیم. دئدیم گئدیم یاپیشیم یاخاسیندان دئییم اوتور

         منی. اوتور منی. اوتور منی. نیه ال چکمیرسن مندن؟ هان؟ اوداها گنه گلدی. نه ایسته ییرسن مندن هان؟

                                                         قوجا بیر ماشینین ترمز سسی ایله ییخیلیر یئره. ائیله بیل ماشین ووروب اونا.

                          مولود دانیشا دانیشا کئچیر.

                                                         قوجا ایسته ییر یاپیشا مولودون یاخاسیندان. الی یئتیشمیر.

                          اون بئش جوانمرد بیر سیرادا یول گئدیرلر داغین ذیروه سینه ساری.

                          مولود دانیشا دانیشا سیرانین اوولینده دیر.

                          قوجا حسرت له باغلانیب یئره یول گئده بیلمیر.

                                                         مولود یولداشلاری ایله دانیشا دانیشا یول گئدیرلر. اوجالارا ساری.

شعبان: بیز مولود کیمین اولموشدوخ. یوخودا یول گئدیردیخ. گویلره ساری.

                                                                                      پایان

                                                                                 1400.10.28

                                                                   آس اولدوز. آس اوربایجان. اورآنا.

             10