خانیم نه نه گئده نده
گویله ر بوتون توتولدو
یئرده ن گویه گئدنده
یئرین باغری اوزولدو
بولوتلارین دالیندان
گویده ن اولدوز توکولدو
گوزله ر یاغمور یاغارکه ن
اوزده ن سولار سوزولدو
ایگیتله رین قوچاقسا
اوجا قامت بوکولدو
کیم له ر قالدی آغلامادی
کونول له ری سوکولدو ...
دئرام : آنادیلی
آدمها : آنا ، دمیرچی ، آسلان ، آیدین ، جارچی و آذر
صحنه : کوهنه بیر ائو .
بیر گوشه ده اوشاق چتیری ، پالتاری ، کیفی هابویله بیر لوحه
وار اوستون گچ یوخسا کومور ایله یازماق اوچون .
بیر گوشه ده بیر کوهنه توفنگ گویدن آسلانیبدیر .
اوچومجو گوشه ده اسکی کوزه و چاناقلار قالانیبلار .
دوردومجو گوشه بوشدور .
1 .
آیدین : نه درین جوموبسان خیاللارا گوزل آنام !!؟
آنا : آیدین بالام خوش گلدین .
آیدین : یاریم ساهاتدان آرتیق اولار کسمیشم بورانی باخیرام اوزاقلارا باخان گوزلریین .
آنا : اوغولوم اوتورگینان .
آیدین : نه زاماندان گیریب اوتاقا چیخمیر ؟
آنا : اوچ دورد گون اولار .
آیدین : سوزو ندیر ؟
آنا : توتولموش دیلدن سس چیخماز بالا .
آیدین : ندن گرک توتولا ؟
آنا : جانا دوشموش دردوبالادان سونرا نه سوسدورار اینسانی ؟
آیدین : آخی بو اوشاقین نه یاشی وار ؟
آنا : بویله درده یاشلیدیر .
آیدین : آچ سوزو منیم آنام .
آنا : نه دئییم آخی .
آیدین : اولمویا بیری یولون کسیب هوشون آلیب آپاریب قیزین ؟
آنا : کس سسی یین ، نه یاشی وار بونلارا .
آیدین : آچماسان سوزو نئجه آلیم فیکیریمین قاباقین اوچماسین اوتای بوتایا ؟
آنا : اوچورتما خیاللاری کوتو وادیلره دردی کوتولردن اولسادا .
آیدین : دئمدین ، نه اولوب گیریب ایچری ؟
آنا : دردیم دردیمه قاریشیب ، نه دئییم آخی ، نه دئییم !
آیدین : من دانیشمامیشدان آنلاییردین حالیمی ، بیلیردین سوزلریمی ، نه اولوب به ایندی اونون سوزونو بیلمیرسن ؟
آنا : بالامی تانیرام من / هرسؤزون آنیرام من / یوخودا آه چکنده / اود توتوب یانیرام من .
آیدین :قویما قالیسن سینه نده اوزوجو فیکیرلر ، سویله آنام ، سویله .
2 .
آنا : نه اولوب گوزل بالاما ؟
آذر : ننه ! ننه ! های ننه ! / گوزلری مرجان ننه / گل اوتوروم دیزینده / سنه دئییم جان ننه .
آنا : اوشاق اولوب گنج بالام بیر داها ؟!
آذر : سن منی بسله دین اؤز قوجاغیندا / شیرین لایلا دئدین گول دوداغیندا / یاتمادان گئجه نین یاری چاغیندا / چکدین کئشیییمده زحمتیم آنا /
دونیادا ان بویوک نعمتیم آنا / آرخاما قوی الین الین قوربانی / آغزیما قوی دیلین دیلین قوربانی / رسمین اؤیره ت ائلین ائلین قوربانی / اونونلا
قایناسین قاناتیم آنا / دونیادا ان بویوک نعمتیم آنا / شیرین دیر سؤزلرین دوداغین آتددا / بال شکر دادی وار داماغین آتددا / قالیبدی جنت لر
آیاغین آتددا / گل اوپوم آیاغین جننتیم آنا / دونیادا ان بویوک نعمتیم آنا .
آنا : گوزل قیزیم بیر حسرت وار سسینده ، سویله گوروم ندندیر ؟
آذر : لایلا دئگینن آنا ، لایلان دوشوب یادیما ، اولارمی ؟
آنا : اینانیم دووران دونوب بالام قاییدیب اوشاق اولوب ؟!
آذر : لای لای دئییم یاتاسان / قیزیل گوله باتاسان / قیزیل گولون ایچینده / شیرین یوخو تاپاسان . 1
آنا : لای لای بالام گول بالام / من سنه قوربان بالام / کونلومو قان ائیلمه / گل منه بیر گول بالام ،،، نه اولوب سنه ؟
آذر : تاری تاری حق تاری / گل باجادان باخ باری / کیم بالامی سئومه سه / اونون ائوین ییخ باری .
آنا : هئچ کیمسه نین پیسین ایستمین بالام بویله لای لای اوخوسا یانان اورگینین قاداسین آلمالیدیر آناسی ، هانسی قانماز سئومدی مارال بالامی ؟
لای لای چالام اوجادان / سسیم گلیر باجادان / آللاه سنی ساخلاسین / چیچکدن قیزیلجادان .
آذر : ...
آنا : آللاه سنی ساخلاسین ، آنان سنه قوربان بالا ، نه اولوب سنه ؟ لای لای دئدیم گونده من / کؤلگده سن ، گونده من / ایلده بیر قوربان اولار / سنه
قوربان گونده من .
آذر : اوخو آنا ، اوخو .
آنا : لای لای بئشیگیم لای لای / ائویم ائشیگیم لای لای / گور ایشیقسان عومرومه / یاراشیقسان کونلومه / لای لای جئیرانیم لای لای / لای لای
جانانیم لای لای .
آذر : بیر سئوینج وار سسینده / اوزونده نفسینده / نه دادلی دیر یاشاماق / آنانین کولگه سینده .
آنا : لای لای منیم ببگیم / بیر آرزوم بیر دیلگیم / دار گونده پیس آیاقدا / سنسن منیم کومگیم .
آذر : آنا یادیندا دئییردین
لای لای دیلین دوز بالام / دیل آچگینان تئز بالام / شیرین شیرین سوز بالام / من اوتوروم سن دانیش !
آنا : یادیمدان چیخماز سنه اوخودوقوم لایلالار گوزلیم .
آذر : بیلیرم ......................................................
آنا : شیرین سوز بالام نیه دئمیر آناسینا سوزون ایندی ؟ لای لای آهو گوز بالام / لای لای شیرین سوز بالام / گوزللیکده دونیادا / تکدی منیم اوز
بالام .
آذر : شیرین سوز اولسایدیم نئجه اوخولدا روسجا دانیشماقیمی لهجه لی بیلیب اله سالدیلار منی ؟
سایانمیرام بیر ایکی / منی قیناییر ننه م / اوخولوموز یوخدور کی / اوز دیلیمی اویره نم ،
آنا جان بوگون من بویله بیلدیم آنادیلیم ابدی نیسگیلیمدیر ، گورن آنادیلیمده اوخویوب یازاجایام ؟ اوندا اوزگه دیلین دانیشا بیلمسمده
اوتانمارام ، قاچیب اوخولدان چیخمارام ، سوزلریمی بولبول کیمی سویله رم .
اوشودوم ها اوشودوم / داغدان آلما داشیدیم / آلماجیغیمی آلدیلار / منه ظولوم سالدیلار / من ظولومدان بئزارام / درین قویو قازارام .
آنا : ظولومون ائوی ییخیلسین بالا ، ائوی ییخیلسین ، آتاندا چوخلو ظولوم گوردو ...
آذر : آنا آتام ایله نئجه تانیش اولدون ؟
3 .
جارچی : یول وئرین ، گویلر خانینین گنج قیزی کئچیر .
آسلان : گویلر خانی ؟
جارچی : گویلر خانی ، ائللر خانی .
آسلان : هانسی ائللر ؟
جارچی : بویوک ائللر .
آسلان : کیم اولا بو ؟
جارچی : آک اوزلو بیر گوزل خانیم .
آسلان : آدی ؟
جارچی : آد قویماسی من ایله اولسا ، خیال .
4 .
آسلان : سئوگی ، درده سالان یوخو ، ببکلر آلمیش رویا ، جانیمی آلان منیم اینجه بئللی ، اوجا بویلو ، خینا اللی ، اوزون ساچلی ، قارا گوزلو ، چاتما
قاشلی ، افسانلره قاناد وئرن کونولو ماوی گویلره اوچوردان بیر مارال اولدو ، باخدیم ، باخمیردیم دئمه ، گورسمده جننت بیل گوردوغومو ،
بیر اوزو گول ، رنگی لاله ، زولفو تر / گشته چیخیب ، درر تازه بنووشه / دسته دسته سانجیب بوخاغ یانینا / یاراشیبدیر او شاهبازا بنووشه .
آنا : هانسی اوباداسان ؟ هانسی ائلده سن ؟ / کیمین اورهیینده ، هانسی دیلده سن ؟ / هانسی ماهنیداسان؟ هانسی تئلده سن ؟ / من سنه حسرتم ،
من سنه آرزی / یوخلوغون چئویریب ائدیب تامارزی .
آسلان : یاشی اون سککیزه یئنیجه یئتمیش / گوزللیکده تامام خلقی مات ائتمیش / گشته چیخمیش یار گلدیین ائشیتمیش / داغا سالیب بیر آوازا
بنووشه . 2
آنا : ایستیرم اوزومو چایا تاپشیرام / گوزلرین کئفلیدی یاپیش آشیرام / سنه ساریلمیشام ، سنده یاشیرام / من سنه حسرتم ، من سنه آرزی /
یوخلوغون چئویریب ائدیب تامارزی .
آسلان : سن ساللانیب قاباغیمدان گئده نده / هرگز قالماز صبر و اختیار منده / واقف زلف لرینی تعریف ائده نده / گرکدیر کی اول یازا بنووشه .
آنا : اورگیم دلینیب ، داملاییر دامیر / اوزونده بیر داملا سئوگی ساخلامیر / قارییب یوخلوغون ، کؤنلوم توختامیر / من سنه حسرتم ، من سنه آرزی /
یوخلوغون چئویریب ائدیب تامارزی .
5 .
آیدین : دردی پس دیل دردیدیر ؟ اوخولدا روسجا دانیشماقین هویدا هویدایا قویوبلار !!؟ آی دمیرچی سن نه آختاریرسان ؟!!!
آنا : هله دمیرچی ایله هارایا یئتیشدی ایشین ؟
آیدین : ایکی قیچین سوخوب بیر باشماقا دئییر اوخوللاریمیزی دوزلتمک اوچون بو یئرلر بیزیم اولماسا سویون قاباقین آلاجایام اکینچیلر سوسوز
قالالار ، قوی قوروسون یئرلر .
آنا : دییردین ناموسلمان آللاهین یئرینی قویوردورسان اوز دئدیغیین یئتیرسن ؟
آیدین : بویله دیر احوال ، دالا چکیلمیر .
آنا : آغاجلار سولور داها .
آیدین : اونا فرقی یوخ .
آنا : بیزه نئجه ؟
آیدین : دئییر بو یئرلردن کوچون گئدین .
آنا : نئجه اولار آخی بو ایش ؟ نئجه اولار آدام مینلر ایللیک آتا بابالاردان قالان یئرلری اوتوره کوچه گئده ؟
آیدین : آغلاما آنام ، آتام بورانین گویو اولدوغو کیمین بو یئرلر منه سنین کیمی آنادیر ، دمیرچی بیر ایش باشا آپارا بیلمز .
آنا : اولموش آنا توپراقلارا گئدر .
آیدین : من اولسم بلکه م .
آنا : بیر الدن سس چیخماز .
آیدین : بو ایشی منه تاپشیر .
آنا : اونو من سندن یاخچی تانیرام .
آیدین : آنلادسان منده تانییارام ، اونلا دانیشماق اوچون لازیمدیر بو .
6 .
دمیرچی : بوتون یئرلرییز .
آنا : نه اوچون ؟
دمیرچی : اوخول دوزلدمک اوچون .
آنا : سیزین دیلی یایماق اوچون بیزیم یئرلر گرک گئده الدن ؟
دمیرچی : سوز بونلارا گلمز ، سیزین یورددا بیزیم اولوب ایندی ، سیز بیز گوتورولوب آرادان ، روس دیلی گرک هر یئرده اوخونوب یازیلا ، روسیه
بویله ایسته ییر .
آنا : بیز ایستمسک ؟
دمیرچی : بونا امین دئییلم .
آنا : بیز گرک امین اولاق .
دمیرچی : سن آسلانین قادینی دئییلسن می ؟
آنا : تانیییرسان ...
دمیرچی : من ایله آسلانین یولداش اولماقیندان خبرین وار سنین ، آمما ، ندن آسلانین یولداشی ایله یولا ایستمیرسن گلن ؟
آنا : آسلان توپراقینا عاشیقیدی ، او اولسایدی بو توپراقدان چورک چیخارتماقی ایستردی بیزدن .
دمیرچی : اوخول دوزلسه چیخان چورک یاغلی چورک اولار .
آنا : سیزین دیلده ؟ سیزین چورک ؟
دمیرچی : نه فرقی وار هانسی دیلده ؟
آنا : باخ دمیرچی سنده بیلیرسن منده بیلیرم بورالاردا یاشیانلاردا بیلیر بو اولکه ده بیزیم یئریمز چوخ دئییل هم اکیله هم اوخول دوزله ، بورالاردان
چورک چیخسا بیزه قالمالییک یوخسا اولوم قوناقدیر بیزه ... 3
دمیرچی : سیز موسلمانلار کی دئییرسیز چورگی تانری وئریر !؟
آنا : اوزوموز ترپشمسک یوخ ، ترپشندن سونرا هه ، سوز او سوزلره گلمز ، اوخولدا روس دیلینی اویرنمکدن قاباق ائوینده دیری قالا گرک بو خالق .
دمیرچی : وئرمسز اوزوموز باشلاریک آلماقی .
آنا : گل شئیطانین ائششگیندن دوش دمیرچی .
دمیرچی : ناغیلا فورصتیم یوخ .
آنا : بیزی آج اولدورمگه نئجه ؟
دمیرچی : آیری سوزون قالسا دئگینن ، گئدیرم باشلایام ایشیمی .
آنا : قان اییسی گلیر بو گئدیشدن .
7 .
دمیرچی : سیزی کولتور ایله شعر ایله ماهنیلا دوغورزدوراجاغام ، بو خالق یئنی حیاتیندا ، چاغداشلیغا و یئنیلیکلره دوغرو ، آیدین و گوجلو
یؤنلتدیریلاجاق بوندان بویانا .
آیدین : میه بونلار بیزده یوخ ؟
دمیرچی : بورالاردان سوسیال تجروبه لری چیخاجاق ، بیلگیلر یاییلاجاق ، گرچک آنلاملار پایلاشاجاق دونیایا ، ماهنیلاردا سئوگی ...
آیدین : سئوگیدن قاباق تورک خالقین تاریخین ، کیملیگین ، کولتورون یاراتماق گرکدیر بوگون بیزلره .
دمیرچی : اولا بیلر اوز دیلییزده ده یازیلماسا آیری دیللرده یارانا دوشونجه لرییز .
آیدین : بو ایش ساده جه دیلده یازما دئییل ، بورالی اینسانلارین آنایوردلاریندان چیخان آنا میراثلارین یایماقدیر .
دمیرچی : روس دیلی بو ایشی یوخاری یئرلرده باشا آپارماقیلا سیزین وارلیغییزی یاییب گوسترر دونیا خالقلارینا .
آیدین : بیر کئچمیشی آرخاسی کولتورو ده یرلی اولان خالقین آنلاملاری اوز دیلی ایله دوشون دونیاسیندا گؤزللیکله حیاتی تعریف ائدرکن
یئنله شمگی ایچریلردن باشلاییب ائشیگه چیخار .
دمیرچی : سیزین دیل رعایا دیلی اولاراق یئنی دونیادا یوخاری دیللری آنلامایان بیر دیلدیر .
آیدین : یوخاری دیللری آنلامایان ؟
دمیرچی : تورک دیلی دانیشما دیلی اولاراق کئچمیش دونیانین دیلیدیر .
آیدین : دوز موسلمان مکتبلرینده قرآنین عربجه یازیلماسینا گوره تورکجه اوخودولمازیدی آمما بیزیم دیل یازی دیلی اولاراق اسکی زامانلاردان
یازیلیب و اوخونوبدور .
دمیرچی : کئچمیشلر کئچیب گئدیب ، سوزو اوزالتما ، ایندی بو یولدان دونمک گرکدیر سیزه ، بو یولدا دوشمانلار طرفیندن دوستاغا ، سورگونه و
حتی اؤلومه راستلاشما وار .
آیدین : هانسی دوشمانلار طرفیندن ؟
دمیرچی : دوشمانی تانیماق لازیم دئییل هله ، بو یولون بویله اولدوقونو بیلسز کیفایت ائدر ، دالا قالماق بسدیر داها .
آیدین : بویله اولسادا بوگون تورک دیلی اولوسال کیملیگین بیلمک اوچون اوزوندن کئچمیش قهرمانلارا ائحتیاجی وار ، ایندی تورک دیلینه هووییت
وئرن یازیچیلار تورک کیملیگینی و میللی یتینی قوروماق موباریزه لرینده دالا قالمیش مارکاسی کومونیستلر طرفیندن آلسالاردا بوگون
اونلارین تورکچولوک ، وطنپرورلیک ، اولوسچولوقلاری و اولوسال شعور و دوشونجهلری ، ان آزی اونلارین اوز دیلینده تورک اثرلری
یازیلمالیدیر ، بیز تورک دیلیله یازماقلا آذربایجان تورکلرینی یاشاتدیراجاییک ، چون کی بیزلرده اولوسال شعور واردیر ، اولوسال شعورونا
صاحب اولان بیر اولوس کندینه زورلا قبول ائتدیریلن یابانجی دیله باش ایمز .
دمیرچی : آتان آسلان بیزله یولداش اولاندا بویله فیکیرلشمیردی !
آیدین : آتالاریمیزی آلدادیب یوردوموزو بولدوز ، اینقیلاب آدیلا قول ائیلدیز اوز زمیلریمیزده بیزلزی ، ایندی نه آختاریرسیز یاری اولموش
جانیمیزدان ؟
دمیرچی : شوروی جمهورلوقوندا یاشاماق اولوسال شعور و لیاقت ایسته ییر ، ائیله بیل چوخلاریندا یوخ آمما ...
آیدین : دوننجاق خالقین قاناجاقی و لیاقتی شوروی نی شوروی ائدمیشدی ایندی داها شوروی دی خالقا لیاقت وئرن ؟
دمیرچی : سوزو بوروشدورما ، منیم سوزوم بودور کی بو اولکه نین گلجکینی گوزللیکلره ساری آپارماق اوچون کؤهنهلیکلری آرادان قالدیرماقلا یئنی
دوشونجلر توکولملیدیر بئیینلره .
آیدین : هر اولوسون دوشونجهلری و آرزولاری اوز تاریخیندن چیخیر ، بویله کی باخیرام سیز یازان دوشونجلردن بو خالقا گلجک چیخماز .
دمیرچی : بویله اولسادا سیزلری درینلشدیرمک اوچون منصوب ائدیبلر منی ، بو موجادئلنی قورتارماق گرکدیر ، دئییرسن آرخان وار ؟ اوندان یاپیش
یالنیز بوراخماسین ریقابت مئیدانیندا سنی آمما هر زامانین یارانماقی کئچمیشیدن اولسادا ایندیسیندن یول آلمالیدیر . 4
آیدین : ایندیمیز سیزین دیلده یارانان اوخوللاردان چیخسا اوز آرخامیزین دیلیمیزین کولتوروموزون یئری هارالاردا ؟
دمیرچی : هر دیلین بیر یئری وار ...
آیدین : منده یئرین سوروشدوم دیلیمین ...
دمیرچی : زامانا ایستمسه ائوده قالمالیدیر .
آیدین : زامانادان منظورون اوزویوزسوز ؟!
دمیرچی : یوخ ، اگر دیلین داییره سی محدود اولسا ، اگر بیر دیل یاشاییشی دریندن اؤیرندیرمسه ، اونون یاراتدیغی یئنی یاشاییشدان اوزاق
اولاجاقدیر ، بونون ترسسی بویله دیر اگر بیر دیل یاشاییشی دریندن تانیتدیرا بیلسه دانیشانلارینین منافعینی اله گتیرر .
آیدین : حیاتی دوزگون اینعیکاس ائدن دیللر اونو دانیشان اینسانلارین الینده قووتلی سلاح اولور و بویله اولاندا بوتون خالقلارین ، بوتون بشریتین
حاققینین یولوندا موباریزه ده بؤیوک رول اویناییر ، کیم دییه بیلر بیزیم دیلده بو اثر یوخ ؟
دمیرچی : هر اولوسو اولوس ائدن ان اؤنملی اساسلاردان بیری او اولوسون دیلینین اولوسلار آراسیندا تانینماقیدیر ، روس دیلی دونیادا تانینمیش
دیللردندیر سیزین دیل هارادا ؟
آیدین : تورک دیلینه دوشمان اولان روسلار تورک تاریخینی تحریف و یالنیش ائدهرک کئچمیشین آرادان آپاریب ، ایندیسینه شک یارادیب ،
گلجکین ...
دمیرچی : یوخ گلجک بو دیله ...
آیدین : گلجک بیزه سیز روسلارین ایستدیکلری و ایشلرینه گلدیگی یازیلمیش چرچیوه لر کیمی دئییل ، بیز تاریخه و حیاتا اولوسچولوق
دوشونجه میزی ترویج ائتدیگیمیز حالدا دیلیمیزی ائولرده اوخوللاردا دانیشیب یازیب و دونیایا یایاجاییک ، کئچمیشیمیزده اولان یئرلری
بوش آتا آنالار بوگون اورکلرده یاشاییر ، تورک دونیاسینین اولوسچو شاعیرلری ، تورکلره بؤیوک ظفرلر قازانان قهرمانلارین حیاتلاری و
موباریزه لری و تورکلرین یاراتدیغی شانلی تاریخ آرادان گئدن دئییل ، سیزین شووینیستی روسچولوق تفککورو بیزی یولوموزدان چیخاردا
بیلمز .
دمیرچی : خالقی سوسیالیزمله بوتونلشدیرمه بیزیم سیاستیمیزدیر ایندی ، شوروی سیزین ایستکلره باش ایمز .
آیدین : بیزده سیزه ...
دمیرچی : دئییردیم بلکه م آتان آسلان اولسه یولون داوام ائدن اولماز داها آمما گورورم منده یولو ترسه گئدمیشم .
آیدین : آتامین اولمگیندن نه بیلیرسن ؟
دمیرچی : دئمک ایسته ییرم اوزومده بونو ، اولا بیلر سنین گوزون آچیلا .
آیدین : منیم گوزوم آچیخدی .
دمیرچی : سوزلریمی ائشیدمک ایسته ییرسن یوخسا ائشیدممیش آپاریم سنی ؟
آیدین : دانیش .
8 .
دمیرچی : کونلونده نه وار یولداش ؟
آسلان : یوردومدا باریش اولا بیرده جاهاندا .
دمیرچی : بو بوتون خالقلارا اییی بیر دیلک ، به به بورا باخ بورا ، نه گوزلدیر اولکه ن .
آسلان : چک زحمت گور لذذت .
دمیرچی : دئییرم بو اولکه نین باشی اوجادیر ، گل اوبیریسی اولکه لریده بویله ائیلمک اوچون کوچ بورالاردان .
آسلان : ائششکین ساتان کوششک آلانماز .
دمیرچی : دئمیرم سات ، دئییرم خالقلارا یاخچیلیک پایلاش .
آسلان : ایگنه هاممینی بزر اوزو لوت گزر ، هله بورالاردا گورممیش ایشیم چوخدور .
دمیرچی : گل اونلارین الیندن یاپیش یئتیر بورالارا سونرا ال اله وئرین گئدین آرزون اولان یئرلره .
آسلان : خوروز یوخویدو سحر آچیلمیردی ؟
دمیرچی : بیر سیرا خوروز وار اولماسا سحر آچیلماز .
آسلان : واختسیز بانلایان خوروزون باشینی کسرلر .
دمیرچی : دووروبریین باخ ، سیزین اولکه دن سونرا هر یئر یابان ! یولداشلارین گرک الیندن توتان .
آسلان : قونشو پایی یاخچیدیر بیرگون سنده بیرگون منده ! اونلار دوشمان اولماسین یولداشلیخلاری پئشکئش .
دمیرچی : سندن کدرلی اولارلار . 5
آسلان : آجیقلی دیلنچینین تورباسی بوش قالار .
دمیرچی : الیندن قاپارلار .
آسلان : آرالیق مالی آرادا یئییلر .
دمیرچی : دویوشوب آلارلار .
آسلان : اوردگی سو ایله قورخوتمازلار .
دمیرچی : یوردون داغیلاندان سونرا اونلارین اولماسادا سنینده اوزون گولمز .
آسلان : آخیردا گولن یاخشی گولر .
دمیرچی : یاخچی سن اونلاردان تئز باشلا ، اونلاری اوز خالقین ائیله ، چوخلو اولکه لر سنین اولسون .
آسلان : آز اولسون ، دوز اولسون .
دمیرچی : گلجکه اونلاردان تئز یئتیشمک اوچون گرک قاچان .
آسلان : آستا گئدن یورولماز ، یوروین یولدا قالار .
دمیرچی : بیرگون اللری قاباقا دوشر یئریین توتارلار .
آسلان : اوردک گلیب قاز اولماز ، گلین گلیب قیز اولماز .
دمیرچی : دئییم ها تک قالاجاقسان .
آسلان : مرد ایگید تک قالماقدان قورخماز .
دمیرچی : من دئملیلری دئدیم سونرا مندن گورمه .
آسلان : مرد اوزوندن بیلر ، نامرد یولداشیندان .
دمیرچی : بویله اولسا ایسته ییرم منیمده ائو اوشاقیمی اوزوندن بیلسن ، بیر قوناق کیمی بورالارا گلریک بیزلر .
آسلان : قوناق برکت گتیرر ، قوناقسیز سفره برکتسیز اولار .
دمیرچی : آکیشی اوتورمویه سن ائشیه ؟
آسلان : قیلیش یاراسی ساغالار ، دیل یاراسی ساغالماز .
دمیرچی : شوخلوق ائیلدیم یولداش کدرلنمه .
آسلان : کولک کیمی هردم بیر یانا اسمه ، کدرلنمدیم آمما سنده پیس شوخلوق قویما اورتایا .
دمیرچی : ایندی کی بویله دیر اوقدر قوناق گتیریم یئر قالماسین اوزویوزه .
آسلان : سولار حرکتلیدیر ، تورپاق برکتلی .
دمیرچی : بودا بو یوردون قیسمتی .
آسلان : قیسمتده وار ، هیممتده وار .
9 .
آنا : اوغول آتان بو یولدا اولدو بس .
آیدین : قانی یئرده قالماز .
آنا : دمیرچی چوخ ظالیم .
آیدین : بیزده ظولوملره باش ایمز .
آنا : قوللارین آچیق اولاردی کئشگه .
آیدین : آچیلار بیر گون ، داریخما آنام .
آنا : من اولندن سونرا ؟
آیدین : اولمز اولوبسان کونولومده ، هله ده آتام گلیر خیاللاریان قوناق ؟
آنا : آز یوخ .
آیدین : دئمیر یول هانسیدیر ؟
آنا : دئییبدیر بونو .
آیدین : سویله آنام ، سویله .
10 .
آنا : نه اوموبسان اوفوقلاردا ؟!
آسلان : اولوس لار آراسیندا باریش یاغدیرماق اوچون هوسلنیب کونولوم . 6
آنا : بیر بیرین جانینا هوسلیدیر اولوسلار ، هانسی باریش ؟
آسلان : بویله قالماز ، دویوشلردن سونرا باریش گرکدیر ، سئوینجله دولو یاغمورلو بولوتلاری سئوسه گویلریمیز گلر باریشلی یازلار .
آنا : ایشلر گئدیر قاباقا آخی ؟
آسلان : یوللارا داش آتان چوخ ، یوللاری بوراندا وار البت ، چوخدا اولسا بو ایشلر باریش یاغمورو قالماز یاخچیلیک یایان بولوتلارین اته یینده .
آنا : به نه زامان ؟ اورالاردان کوچوب بوتایا گلنده گورورسن یوردلاری ، اوبالار چوله دونوب ، اللر باغلی ، هاممی قول ، دیللر کسیلی ، هارادا قالیب
تانری ؟
آسلان : تانری دئییب چئویرمرم ائللره یازدیغیم یازیلاری اوزلری چئویرمسه یاشاملارین ، دیللر گرک آچیلا سونرا اللرده آچیلار .
آنا : هارایا به ؟
آسلان : قالا بیلمز روحوم بورالاردا ، گرک گئدم .
آنا : یئتیشمه میش ؟
آسلان : زامانسیزلیکدا یئر گوی بیر .
آنا : منه یوخ آمما .
آسلان : اویرنملیسن مارالیم .
آنا : نئجه سنسیزلیک اویرنملی ؟
آسلان : بورالاردا دئییلم می ؟
آنا : اولاندا ایشلر دوز ، اورگیم امین ، اولمویاندا ............................................
آسلان : سوسموش دوداقلاردان بال سوزسه نه اولار ؟
آنا : سوچو یوخ دوداقلارین ، اورک دوز دئمیر .
آسلان : اوزاقلیقیم یئنی بیر ایش اولسایدی حاقلی بیلردیم سنی .
آنا : اورک توتولما اسکی یئنی ایستمز .
آسلان : گرکدیر گئدمک ، قالمالی دئییلم ...
آنا : دئییلسن ، بیلیرم .
آسلان : بویله کدرلی یولا سالما منی .
آنا : گلیشین یوخو ، گئدیشین قورخولو کابوس ، اورتادا من اوزولموش بیر اینسان .
آسلان : گوروشوم ؟
آنا : گوزل بیر خیال .
آسلان : ندن کدرلیسن به ؟
آنا : یادیندا بیر سیرا دمیرچیله دانیشماقیندان دئدین منه ؟
آسلان : نئجه ؟
آنا : منه بویله گلیر سوزلرینده هر نه دئییبسن اونا ، حاییف آمما دئمه ییبسن بیله تورپاقدان پای اولماز .
آسلان : بارلی آغاجا داش آتارلار .
آنا : اونلار آغاجی کوکدن چیخارتدیلار .
آسلان : دئدیم ائوین یاراشیغی اوشاقدیر سفره نین یاراشیغی قوناق ، بیلمدیم تولکو دورو سودان قایماق توتار .
آنا : اوزولمه .
آسلان : اوزو ییخیلان آغلاماز .
آنا : گئدمه هله .
آسلان : باخ اوفوقلارا .
آنا : گونش چیخیر .
آسلان : باتاندا گلمیشدیم .
آنا : بیر گئجه ، اودا قیسسا !
آسلان : عومور کیمی .
آنا : سن یوخسان داها بو دونیادا ایندی نئیلملیدیر ائلین ؟
بیر سیرا اسکی تپه لردن تصویر . 7
حسنلی تپه سینین قیزیل جامی تصویره چکیلیر .
لوور موزه سینده ساخلانان آشیقین مجسمه سی یاواش یاواش
اوستن یئنیر آششاغایا .
آسلان : عاریف آتالاردان ، دوشونجلی آنالاردان گتیردیغیم سازی آل ، وئر آذر قیزیما ، اعجازلی بارماقلارین ایشه سالسین ، اونون هر چالدیغی و ایفا
ائتدیگی هاوا گرک ائشیدنلری یاشام گوجویله تانیشلاندیریب یئری گویو اونلارا تانیتدیرا .
آنا : آیدین اوغولوم روسلو دمیرچی الی ایله دوستاق اولوب ، آذر قیزیم بیر اوتاقدا اوزونو گیزلتمیش ، باخ گئجه دیر ، هاممیدا یاتیب ایندی !
آسلان : اویانمالیدیر هاممی ،،، یادیندا دئدیم ، قوی من اؤلوم سن تک یاشا ، دمیرچی منی اولدوردو آمما سیزله ایشی اولمادی .
آنا : ایلک باهار چاغیندا خسته کونلومه / سئوگیدن اوخودون سن حزین حزین / گلدی باخیشلارین دالغالار کیمی / پوزدو حیاتیمدان غملرین ایزین
، بیلمدیم آیریلیقین بویله چتین یوخسا ایستردیم ترسسین ،،، دمیرچی ساخلادی بیزلری اولوسلاری گولدوره بویله دیلسیز یاشامیمیزا .
آسلان : جننتده بیر اولاندا هر نه چیخار یاددان ، گئدیم ملکلر گوزله ییر منی ،،، دیلسیز میللت چکر ذیللت ، اوغولوم ایله قیزیما دئگینن بونو .
11 .
آذر : خوروز خوروز جان خوروز / گوزلری مرجان خوروز / قانادلاری قیرمیزی / قویروغو الوان خوروز / باشیندا آل تاجین وار / دیللره دستان خوروز /
قوققولوقو دیلینده / سسینده فرمان خوروز / هارای سالیرسان هردن / آچیلمامیش دان خوروز / یاتانلاری دبردیب / وئریرسن اذان خوروز .
آیدین : دینلگین آقالار ، دینلگین بیکلر / سوراریم بونلاری بیرگون اولورکی / آدام اولوپ قوچ قیرآتا میننده / قیراریم بئللری بیرگون اولورکی / آراریم بیکلری
بیرگون اولورکی / آل یاناغیم قیزیل قانا بولاندی / آخان قاندان جوشقون سولار بولاندی / دشمن نه سویلهدی بیکیم ایناندی / آراریم بونلاری بیرگون
اولورکی / آراریم بیکلری بیرگون اولورکی .
آنا : لای لای دئییم یاتاسان / قیزیل گوله باتاسان / قیزیل گولون ایچینده / شیرین یوخو تاپاسان ،
لای لای بالام گول بالام / من سنه قوربان بالام / کونلومو قان ائیلمه / گل منه بیر گول بالام ،
تاری تاری حق تاری / گل باجادان باخ باری / کیم بالامی سئومه سه / اونون ائوین ییخ باری ،
لای لای چالام اوجادان / سسیم گلیر باجادان / آللاه سنی ساخلاسین / چیچکدن قیزیلجادان ،
لای لای دئدیم گونده من / کؤلگده سن ، گونده من / ایلده بیر قوربان اولار / سنه قوربان گونده من ،
لای لای بئشیگیم لای لای / ائویم ائشیگیم لای لای / گور ایشیقسان عومرومه / یاراشیقسان کونلومه / لای لای جئیرانیم لای لای / لای لای
جانانیم لای لای ،
لای لای منیم ببگیم / بیر آرزوم بیر دیلگیم / دار گونده پیس آیاقدا / سنسن منیم کومگیم .
لای لای دیلین دوز بالام / دیل آچگینان تئز بالام / شیرین شیرین سوز بالام / من اوتوروم سن دانیش !
سون
93.03.10
آس اولدوز . آس اربایجان . ایری آنا .
8
گونله ر
قاطار قاطار اوچان قوش
کئچه ر
گویله رده ن
اولدوزلارلا اوپوش اوپوشه وئره رکه ن
گئده ر
عومور کیمی
یئل گیبی
بیر سورو
ایکی سورو
سوروله ره اوخشار گونله ریم
کئچیب گئدمکلره باخیر گوزوم
بویله دیر عوموروم ...