تورکجه دئرام پیسی: ناشینال بانک...

صحنه: بیر بانک سالونو.

پرسوناژلار: رئیس، بؤیوک اوغرو، کیچیک اوغرو، مودیر، کیچیک ایشچی، بؤیوک ایشچی، خانیم دوکتور، پوللو، پولسوز، قاپیچی.

مکان: بانکین سالونو.

ایشیق.

کیچیک ایشچی: نه قدر دئدینیز؟

خانیم دوکتور: یوز میلیون یوز مین تومن وئرین، بی. ام. و اوچون، قالانی حسابیمدا قالسین...

کیچیک ایشچی: من ده عاشیقم، البته، مئرسدس‌دن داها چوخ خوشوم گلیر. دوغرودان، قورخمورسونوز، بو قدر پول اوستونوزده اولارکن ائشییه چیخیرسینیز؟؟؟ چانتانیزی قاپا بیلرلر ها.....

خانیم دوکتور: مگر خالق الی بوشدور، منیم چانتامی قاپسین، ایشینیزه باخین ایشچی....

کیچیک خانیم: وئرین بؤیوک ایشچی، قول چکسین، لوطفن.... لاغلاغی، لوطفا....

مودیرین بلندگودان سه‌سی: کیمسه باشقاسینین دالیسینجا دیلینی چیخارماسین، لوطفن...

کیچیک و بؤیوک ایشچی بیرلیکده: باش‌اوستده، مودیر...

خانیم دوکتور: نه اولدو به...

بؤیوک ایشچی: نه قدر یازدینیز؟ یوز اون مین تومن....

خانیم دوکتور: یوز میلیون یوز مین تومن...

بؤیوک ایشچی: دئییرم آخی بو....

خانیم دوکتور: تئز اولون، لوطفن...

بؤیوک ایشچی: هامی ایری رقم یازار، سیز نه یاخشی...

خانیم دوکتور: او یوز مین موشدولوقدور...

پولسوز: نه‌یین موشدولوغودور؟

خانیم دوکتور: ایتمیش پیشیییمین تاپیلماسی اوچون‌دور...

پولسوز: علامتلرین دئیین، ناهارا کیمی گتیریم....

خانیم دوکتور: سیزین الینیزدن گلمز! (یا دا-  سیزه یاراشماز)

پولسوز: بیر پیشییی تاپماق آدامین پار-پالتارینا نه دخلی وار، آخی منه بئله باخیرسینیز، ائله ایتکین قالماسی یاخشیدیر...

پوللو: خانیم، بیز تله‌سیریک ها...

خانیم:  باغیشلایین. آغا، چابالایین، یوباندیق ها...

بؤیوک ایشچی: بیزده بو قدر پول هاردایدی...

خانیم دوکتور: البته، چلیک صاندیغینیزدا!!!

باش ایشچی: یوخ، اوراداکی پوللار دا بو قدر اولماز...

خانیم دوکتور: بو نه دئمکدیر؟

بؤیوک ایشچی: یعنی، یوخدور...

خانیم دوکتور: آخی بئله بیر شئی اولار؟

کیچیک ایشچی: نییه اولماسین؟

خانیم دوکتور: سیزینله دئییلدیم...

بؤیوک ایشچی: منیمله ایدی...

کیچیک ایشچی: هئچ کیم منی سایمیر...

پولوز: هله آلله‌ینا شوکور ائت، منیم کیمی سنی ده آلچاتمیرلار...

خانیم دوکتور: آغا، بیر ایش گؤرون آخی...

بؤیوک ایشچی: ایسته‌ییرسینیز، بو مساله‌نی مودیرله دانیشین...

خانیم دوکتور: اونونلا نه ایشیم وار، سیز بانکین صاندیقچی‌سیسینیز.

کیچیک ایشچی: صاندیقچی منم...

خانیم دوکتور: اونونلا دانیشیردیم...

پوللو: خانیم، ایشینیز باشقا ایشچی‌یه عاییدیرسه، قیراغا چکیلین، بیزیم ایشیمیزی یولا سالسینلار.

پولسوز: هه‌یه والله، چوخدان سیرادایام...

یوخسول وارلینی قیراغا ایته‌له‌مک ایسته‌ییر، وارلی دا یول وئرمیر.

پوللو: سیراداییق ها...

خانیم دوکتور وارگوجو ایله چیغیریر...

خانیم دوکتور: آغا مودیر!!!

قاپیچی یوخودان آییلیر. مودیر تله‌سیک ایچه‌ری گلیر.

مودیر: نه اولوب؟ کیم خانیما یاراشمایان آتماجا آتیب؟

پوللو: اوندا کی چیغیرمیردیلار...

پولسوز: بس نه ایش گؤروردولر؟

پوللو: خوشونا گلیردی...

خانیم دوکتور: بو نه حالدیر آخی؟

مودیر: من او ادبسیز آدام طره‌فیندن سیز حؤرمتلی خانیمدان عذر ایسته‌ییرم....

خانیم دوکتور: بو تارتان – پارتان نه‌دیر، آغا؟

مودیر: دئیه‌سن، بو آغا دوز دئییردی...

خانیم دوکتور: سیز بانکین مودیریسینیز؟

مودیر: قوللوغونوزداییق...

خانیم دوکتور: آغا، بورا نه‌جور بیر بانکدیر؟

مودیر: هه، بورا بیر عادی بانکدیر.

خانیم دوکتور: یوخ، بئله دئییل، آغا...

مودیر: خانیم، من مودیریت مدرکیمی سویون او طره‌فیندن آلمایشام کی، دئینده کی بورا بیر ....

خانیم دوکتور: بورا حتتا بیر عادی و سیرادان بیری بانک اولسایدی بئله، موشتریلرینه وئرمک اوچون پول اولمالی ایدی، نه‌اینکی ده‌یرسیز نئچه میلیون وئره بیلمه‌سین...

قاپیچی: ائله چیغیردی، دئدیم بلکه گئجه‌قوشو قولدورو اونو توتوب. آی جانیم، مورگومو پوزدو، ده‌لی.... گئدیم یاتیم...

مودیر: چکینیزی منه وئرین، لوطفن.... بیر میلیون یوز مین تومن.... بو کی....

بؤیوک ایشچی: یوز میلیون....

مودیر: نه یاخشی هوشون باشیندا، سنی سیناییردیم (سینییردیم)، گئت ایشینین باشینا...

خانیم دوکتور: آغا، قاباقجادان سینامالی‌یدینیز... ایندی یوخ...

مودیر: هارادان بیلیرسینیز، سینامامیشیق، خانیم؟!

خانیم دوکتور: سیناسایدینیز، بئله اولمازدی...

مودیر: ائله سینادیغیمیز اوچون بو گونه قالمیشیق...

کیچیک ایشچی: سیز دئییردینیز، بؤیوک ایشچینی تاپیشیریبلار و سیناماق لازیم دئییل...

مودیر: گئت ایشینین باشینا، مایماق، شوعورسوز قانماز...

قاپیچی: وای ده‌ده، چیغیر ما دا...

مودیر: باخین حؤرمتلی خانیم، بیز بو قدر پولو بورادا ساخلاماریق، آمما سیز ده نیگاران اولمایین، سیز منیم اوتاغیمدا بیر چای ایچینجه، من سیزین ایشلری قایداسینا سالارام.

خانیم دوکتور: قهوه لوطفن...

پولسوز: منه ده بیر چای یئتر...

مودیر: سیز نه یاخشی؟

پولسوز: دئدیم، بلکه هامی‌یا وئریرسینیز ده، مودیر جان...

مودیر: قوهوم‌جانلی اولمایین، به‌لی... سیز بیر چای ایچینجه...

پولسوز: قهوه تاپشیریبلار...
مودیر: آی جانیم، کیچیک ایشچی، بو آدامین ایشینی تئز یولا سالین کی، صبریمی توکتدی...

پوللو: من اوندان قاباغام...

پولسوز: ائشیتدین، مودیر نه دئدی، او، مدرکینی سویون او تاییندان آلماییب کی... ایشینی بیلیر...

پوللو: منیم سیرام اونون مدرکینه نه دخلی وار؟

پولسوز: من آنجاق بیر سوال سوروشاجاغام، تامام...

پوللو: چکیل قیراغا، آغا...

مودیر: آرانی قاریشدیرمایین. کیچیک ایشچی، بونون ایشینی گؤر... هه‌، دئییردیم کی، سیز منیم اوتاغیمدا بیر چای ایچه‌نه کیمی....

خانیم دوکتور: قهوه...

قاپیچی: قهوه یوخدور....

خانیم دوکتور: نه اوچون؟

مودیر: پولوموز یوخدور دا...

خانیم دوکتور: وای دده، نه دیلنچی بانک‌دیر، ایندی بیر آخماق اوغرو بورانی چاپماغا گلسه، گؤر نئجه اولار....

بانکین قاپیسی شاققیلتی ایله آچیلدی و اوزلرینی باغلایان او اوغرو ایچری گیریرلر.

رئیس: کیمسه یئریندن چابالاماسین، دوغرودان، بیر اوغرولوقدور...

خانیم دوکتور: وای، آلله‌یم، بو سؤزو من هانسی فیلمده ائشیتمیشم؟

کیچیک اوغرو: بیر فیلمده، فیلمده، بئیین دئییل کی، زهره قاتیم(پئهین‌دیر)...

بؤیوک اوغرو: ... ایالت‌ین مرکزی بانکیندان بؤیوک اوغرولوق فیلیمنده...

پولسوز: پولوم یوخ ایدی، گئدیب گؤرم.

رئیس: او فیلمی گؤروب، گؤرمه‌مه‌یین هئچ نه‌یی ده‌ییشمز، بو دانیشیق اؤز یازیچیمیزیندیر... ایندی هامی اللرینی قالدیرسین!

خانیم دوکتور: دوغرودان؟

رئیس: هه، دوغرودان!

خانیم دوکتور باییلیر و هوشدان گئدیر.

مودیر: بیری سو گتیرسین.

یئنیدن یوخودان دوران قاپیچی سو گتیریر

قاپیچی: آی، کیشی، سن ده بیر چیغیرما گؤرک، اؤلدوردون ده....

رئیس: رئیس، آدیم رئیسدیر.... یاخشی، یاخشی، هامینیز آمانسیزلیغی گؤردونور... چابالامایین...

بؤیوک و کیچیک اوغرو: جانا بالا...

پولسوز: قارداش، من گلمیشدیم، گؤروم، قورعه‌ده آدیم چیخیب یا یوخ، اؤنملی دئییل، سونرا دا گله‌ بیله‌رم... ایندی گئده بیله‌رم؟

کیچیک اوغرو: اوتور یئرینده...

رئیس: هوی، سیز بانک ایشچیسی‌سینیز، مگر یوخ؟؟؟ دانیشمایین، آنجاق باشینیزلا دئیین: هه، یا یوخ. بس سیز بانک ایشچیسی‌سینیز، تئز اولون، بوردا اولان صاندیقداکی و آرخادا اولان چلیک صاندیقداکی بوتون پوللاری بو چانتالارا بوشالدین. بؤیوک و کیچیک اوغرولار، سیزینله‌یم ها....

رئیس‌ین موبایلی زنگ چالیر، و جاواب وئریر. بوندان سونرا رئیس دانیشمادیغی حاللاردا او موبایل ایله دانیشیر.

کیچیک اوغرو: رئیس، دئمیشدیم، بونون زیپی‌ خارابدیر، قولاق آسمادین دا...

رئیس: بوش وئر، موهوم دئییل...

کیچیک اوغرو: نئجه موهوم دئییل...

بؤیوک اوغرو: رئیس ایله دارتیشما...

کیچیک اوغرو: اده، آخی سن بئله سان کی، نئچه میلیون اولدوغونو بیلمه‌دیییمیز پوللاری بو چانتایا تؤکدوم، سونرا خیاباندا قاچارکن، سایینی بیلمه‌دیییمیز پوللار بیردن خیابانا تؤکولنده، راحات خیاللا اوتوروب اونلاری توپلایا بیلریک؟؟؟

کیچیک ایشچی: هه، نه‌یه لازیمدیر، آدام راحات خیاللا خیاباندا اوتورورب پوللاری ییغسین، سن ناراحات خیاللا اوتور...

بؤیوک اوغرو: دانیشمایین، گؤرورسن، سنین بوش سؤزلرین بیزی گؤر هارا آپاریر...

کیچیک اوغرو: من اونونلا دئییلدیم کی، بورنونو بیزیم ایشه اوزالتدی...

رئیس: بوش‌بوغازلیق و یوباندیرماق یئرینه پوللاری توتون، آهای...

بؤیوک اوغرو: پوللاری...

کیچیک اوغرو: پوللاری...

کیچیک ایشچی: هله باشلامامیشیق کی...

بؤیوک ایشچی: هله باشلامامیشیق کی....

بؤیوک اوغرو: نه‌یی؟

کیچیک اوغرو: نه‌یی؟

کیچیک ایشچی: جاماعاتدان پول آلماغی...

بؤیوک ایشچی: جاماعاتدان پول آلماغی...

بؤیوک اوغرو: دئییرسینیز، اورادا هئچ پول یوخدور؟

کیچیک اوغرو: دئییرسینیز، اورادا هئچ پول یوخدور؟

کیچیک ایشچی: یوخ...

بؤیوک ایشچی: یوخ...

بؤیوک و کیچیک اوغرو: رئیس، صاندیقدا هئچ پول یوخدور...

رئیس: اؤزونوز آختارین، آهای...

پولسوز: آغا، من گلمیشدیم، گؤروم، قورعه‌ده آدیم چیخیب، یا یوخ، موهوم دئییل، سونرا دا گله‌بیلرم. قویورسونوز گئدم؟

کیچیک اوغرو: اوتور یئرینده.

بؤیوک اوغرو: گئت، اورادا دور...
کیچیک اوغرو: گئت، اورادا دور...

بؤیوک ایشچی: من گئدیم، اورادا دوروم؟

بؤیوک اوغرو: نه فرق ائدیر؟

بؤیوک ایشچی: خطر بیلدیرمه کیلیدینه یاخیندیر، بلکه بیر ایش گؤره بیلدیم...

رئیس: اوغلان، اونو کس، هوی...

بؤیوک اوغرو: اوغلان، اونو سوسدور...

کیچیک اوغرو خطر بیلدیرمه کیلیدینین سیمینی کسیر.

کیچیک ایشچی: من گئدیم، اورادا دوروم؟

بؤیوک اوغرو: اورادا دا خطر بیلدیرمه کیلیدی وار؟

کیچیک ایشچی: یوخ، پنجره‌یه یاخیندیر. دئدیم، سیز ایشینیزی قورتارینجا، من ده بورادان ائشییه باخیم...

بؤیوک ایشچی: یالان دئییر...

بؤیوک اوغرو: دئمک، باشیندا بیر فیکیرلر وار...

کیچیک ایشچی: هوی، بو دولودور؟

بؤیوک اوغرو: ایسته‌ییرسن، قافانا سیخیم، آرخایین اولاسان؟

تزه هوشو باشینا گلن خانیم دوکتور، باشینا سیخیم سؤزونو ائشیتمکله، یئنه ده هوشدان گئدیر.

قاپیچی سو گتیریر.

بؤیوک ایشچی: بوشلا، اونون او قدر ده هوشو یوخدور، باشینا فیکیرلش...

بؤیوک اوغرو: بس نییه دئدین: یالان دئییر؟

بؤیوک ایشچی: او، ایسته‌ییر، گئدیب، منیم یئریمده اوتورسون...

بؤیوک اوغرو: یاخشی، نه اولسون؟

بؤیوک ایشچی: آخی، رؤیالاریندا اؤزونو منیم یئریمده گؤرور....

کیچیک ایشچی: لاپ اوره‌ییندن اولسون، من گئدیب، سنین یئرینده اوتوروم کی، ایچینه آفتافا....

رئیس: آی کیشی، آغزینی سویا چک...

کیچیک ایشچی: آخی آدامی حیرصلندیریر....

پولسوز: آغا، من گلمیشدیم، گؤروم، قورعه‌ده آدیم چیخیب، یا یوخ، موهوم دئییل، سونرا دا گله‌بیلرم. قویورسونوز، گئدم؟

کیچیک اوغرو: اوتور گؤروم....

رئیس: دی نه اولدو آخی؟؟؟؟؟

بؤیک و کیچیک اوغرو صاندیقلاری آختاریرلار

بؤیوک اوغرو: بورادا بیر پول یوخدور...

کیچیک اوغرو: بورادا بیر پول یوخدور...

رئیس: یقین، بیری پوللارین هامیسینی گؤتوروب، له‌له کؤچوب، یوردو قالیب...

پولسوز: آغا، من گلمیشدیم، گؤروم، قورعه‌ده آدیم چیخیب، یا یوخ، موهوم دئییل، سونرا دا گله‌بیلرم. قویورسونوز گئدم؟

کیچیک اوغرو: اوتور گؤروم....

بؤیوک اوغرو: رئیس، هئچ کیمین جیبینده و چانتاسیندا پول یوخدور...

کیچیک اوغرو: رئیس، هئچ کیمین جیبینده و چانتاسیندا پول یوخدور...

رئیس: خانیمی آختاردینیز؟ آی کیشی، سنینله‌یم، بورادا بیر خانیم وار، اونو دئییرم، یوخسا سن کی خانیم دئییلسن، سن ائله بایاقکی خانیمسان، خانیم...

بؤیوک اوغرو: بویورمایین، رئیس.

کیچیک اوغرو: بویورمایین....

رئیس: آختارین، دئییم.... او خانیم...

بؤیوک اوغرو: آختار...

کیچیک اوغرو: خانیم...

خانیم دوکتور آلا-یاریمچیق هوشا گلمیشدی.

خانیم دوکتور: قاییتدین، منیم عشقیم؟

کیچیک اوغرو: منیمله‌سینیز؟

بؤیوک اوغرو: سن گل گئت بو یانا، ائله بیل منیمله‌دیر خانیم...

خانیم دوکتور: بیلیردیم، گلیب، دئیه‌جکسن: گؤردوکلریمدن پئشمانام...

بؤیوک اوغرو: پئشمان دئییلم، آما بوندان یاخشی ایش تاپسایدیم، بو ایشین دالیسینجا گئتمزدیم...

خانیم دوکتور: من سنی باغیشلادیم...

بؤیوک اوغرو: سیزین گئنیش اوره‌یینیز وار...

خانیم دوکتور: بو گئنیش اورکده بیلیرسن، نه وار؟

بؤیوک اوغرو: هله دئمه‌ییبسن کی....

خانیم دوکتور: بیر سؤز دئ...

بؤیوک اوغرو: آخی من نه دئییم... هارادان بیلیم؟

خانیم دوکتور: دوشون.... تئز اول... تئز اول...

بؤیوک اوغرو: اورکده معمولا، قان اولار، بیر ده...

قاپیچی: معمولنی بوراخ با، بونون حالی یاخشی دئییل...

بؤیوک اوغرو: تامامیله معمولیدیر، سنه ده دخلی یوخدور، گئت، اوتور اورادا.....

خانیم دوکتور: سنین یئنه ده قیسقانجلیغین جوشوب ـ داشدی، غئیرتین وولکان کیمی پوسکوردو، جانیم؟

بؤیوک اوغرو: جانیم؟!!! وای دده، بیری منی توتسون!!!..............آی آلله...

پولسوز: آغا، من گلمیشدیم، گؤروم، قورعه‌ده آدیم چیخیب، یا یوخ، موهوم دئییل، سونرا دا گله‌بیلرم، قویورسونوز گئدیم؟

کیچیک اوغرو: اوتور یئرینده، گؤرمورسن، هیندی فیلمه باخیریق...

خانیم دوکتور: یارامازلیق بسدیر، ایندی فیکیرلش، گؤر منیم اوره‌ییمده نه وار؟

بؤیوک اوغرو: یاخشی، قوی گؤروم، یاخشی شئیلر...

خانیم دوکتور:  آی باراکاللا، یاخشی شئیلر، هم ده چوخ یاخشی...

بؤیوک اوغرو: دئییرسن؟

قاپیچی: صمیمی اولماق اوچون بیر آز تئز دئییل؟

بؤیوک اوغرو: سن ایتیل او یانا....

رئیس: یادیما سال، بو ادبسیزلییین اوچون سنی تنبه ائدیم... آی کیشی، نه‌ییندیر سنین؟ سنین تنبه ائتمه‌یین کسیندیر(قطعیدیر).

خانیم دوکتور: آخی سن تاپاجاقدین...

بؤیوک اوغرو: سیز قویسانیز...

خانیم دوکتور: بورا بابا...

بؤیوک اوغرو: ایسته‌ییرم، اؤز آغزیندان ائشیدم....

خانیم دوکتور: همیشه اولدوغو کیمی قافانی چالیشدیرما ها... یاخشی اؤزوم دئیه‌رم... بو اورکده یالنیز بیر شئی وار، او دا یالنیز، آنجاق سنین عشقیندیر جانیم...

بؤیوک اوغرو: آخ گولوم، وای... منیم اوره‌ییم بیر آز اینجه‌دیر، بئله دئمه‌یین، قلبیم دایانار ها...

خانیم دوکتور: ده‌ییشمه‌یینه سئویندیم. بیرینجی، سنه دئدیکلریمی هئچ سایمیردین، سنه موهوم دئییلدی؛ اؤزون دئمیشکن، اوندان ـ بوندان چوخ ائشیتدییین اوچون ....

بؤیوک اوغرو: رنگین ده‌ییشیر، جانیم، بونلاری بوراخ، عشقدن دانیشاق...

خانیم دوکتور: قادان آلیم، سنین ده‌ییشمه‌یینه اینانیم؟

بؤیوک اوغرو: گؤرورسن ده، بیرینین قاداسینی آلان اولسا دا، او منم، سن یوخ...

خانیم دوکتور: وای من نه قدر موتلویام (خوشبختم)...

بؤیوک اوغرو: منیم کیمی...

بیژ - بیژ پیشیکجییم (pişihciyim)، پیشییی دئییرم، ایتیب...

بؤیوک اوغرو: آخی هم منیم آدیم، هم ده کیچیک بیژینین آدیدیر...

خانیم دوکتور: سنه دئمیشدیم، سنی چوخ ایسته‌دیییمدن آدینی او حیوانجیغا قویموشدوم؛ بیژی – بیژی ایتیب، باشا دوشورسن؟! ایندی او یوخدور، قاتیغی بیسکویته یاخام، وئرم یالییا، منه تاپارسان اونو؟

بؤیوک اوغرو: اونو تاپماسام دا، سنه بیر آیری پیشیک گتیره‌رم کی، بوز دولابینداکی بوتون قاتیقلاری یالاسین...

خانیم دوکتور ایله بؤیوک اوغرو ایکی صندل اوستوندن بیر – بیرینین یانیندا اوتورورلار، عاشیقجه‌سینه بیر-بیرینه باخیرلار، هامی صحنه‌یه شاشقین – شاقین باخیر، رئیس باشا دوشور و باغیریر.

رئیس: بورادا نه اولوب؟؟؟؟

خانیم دوکتورون ایندیجه هوشو باشینا گلیر، بؤیوک اوغرو ائله‌جه صندل اوستونده اونون یانیندا اوتورموشدور.

خانیم دوکتور: بورادا نه خبردیر؟

کیچیک اوغرو: خوش خبرلر...

قاپیچی فیت چالا-چالا موبارک بادا ماهنیسینی ایفا ائدیر و رقاصلاری یامسیلاییر.

رئیس: بیر آز ادبلی اول، کیشی... آمان بو آروادین الیندن...

خانیم دوکتور: آغزین دئیه‌نی قولاغین ائشیتسین، آغا...

رئیس: کیم سیزینله‌دیر، خانیم؟

خانیم دوکتور: بورادا مندن باشقا آرواد یوخدور کی...

رئیس: اؤز آروادیما دئییرم، تئز-تئز تلفون ائدیر، قویمور ایشیمی گؤرم.... الو، دردین نه‌دیر، الو....

پولسوز: قارداش، من گلمیشدیم، گؤروم، قورعه‌ده آدیم چیخیب یا یوخ، اؤنملی دئییل، سونرا دا گله‌ بیله‌رم... ایندی گئده بیله‌رم؟

کیچیک اوغرو: اوتور یئرینده...

بؤیوک اوغرو: اونلاری بوش وئر، جانیم...

خانیم دوکتور: وای آلله‌یم،

بؤیوک اوغرو: نه اولدو عشقیم؟

خانیم دوکتور سیلله ایله بؤیوک اوغرونون اوزوندن وورور.

کیچیک اوغرو: جانینا سینسین...

خانیم دوکتور: ادبسیز، اوزسوز...

بؤیوک اوغرو: بایاق منه «جانیم»، دئیه چاغیران سن دئیلدین می؟؟؟

خانیم دوکتور: سن یوخ، سیز...

بؤیوک اوغرو: هه، سن دئین...

خانیم دوکتور: من سنه «جانیم« دئدیم؟!!!!

بؤیوک اوغرو: من ده دئدیم: سه‌سینی کس...

رئیس: نئچه یول دئدیم، جاماعانلا ادبلی اولون؟؟؟ الو، زهرمار اؤزونه، تای‌ـ‌کئشیک، بو گونلر سنی بوشایاجاغام....

خانیم دوکتور: سنه نه‌سن، من هئچ کیششینین قارشیسیندا دالی چکیلمم، اونو «جانیم»‌چاغیرمام، آلله‌ا شوکور، او قدر پولوم واردیر، هئچ کیشی‌یه ساری گئتمه‌یم...

بؤیوک اوغرو: مگر بیر قادینین پولو اولماسا، باشقا کیشی‌یه ساری گئدر؟

خانیم دوکتور: کیشیلرین هامیسی بیر بئزین قیراغیدیر، آنجاق زور دئییب، هده‌له‌ییرلر...

بؤیوک اوغرو: والله، آرالاریندا آرواد قدری بیلن ده تاپیلیر...

خانیم دوکتور: ووش، (سنه قدیر آغاجی اکه‌جه‌یم).

کیچیک اوغرو: یعنی، باس باییرا، سندن خوشو گلمه‌دی.

رئیس: سنین سؤیوش وئرمه‌یینله بیر شئی ده‌ییشمز... گئدین چلیک صاندیغین سوراغینا...

کیچیک اوغرو: ائشیتدین کی...گؤرسه، گئتمه‌میشیک، اؤلدوره‌جک ها...ایندیدن دئییم...

بؤیوک اوغرو: من اؤز باختیما تپیک آتیب، بونو الدن وئرمم....

کیچیک اوغرو: گؤرورسن کی، سندن یان گزیر، سنه پیس جور باخیر...

بؤیوک اوغرو: قادینلارین هامیسی اولده ناز ائدر...

کیچیک اوغرو: بس بئله، بونلار نازلایان و سیغاللایان بارماقلارین ایزیدیر؟ بارماقلارینین نازلاماسی منی دلی ائدیر، هاوالاندیریر، منی باشا سالیر...

بؤیوک اوغرو: نه پیس اوخویورسان.. سن اؤز ایشینه باخ، سنه نه دخلی وار آخی...

کیچیک اوغرو: منه دخلی یوخدور، آمما عاشیق اولماق اوچون هئچ ده اویغون زامان دئییل...

بؤیوک اوغرو: عاشیق اولماق واخت تانیماز کی....

کیچیک اوغرو: تانیماز؟ اوغلان، نئجه تانیماز! بئله دوشون کی، میقدارینی بیلمه‌دیییمیز بو بانکین پوللارینی گؤتوروب، گئتمیشیک، سونرا آرامیزدا بؤلوشموشوک، هر کس ده نئچه میلیون اولدوغونو بیلمه‌دییمیز پایینی آییریب، وئرمیشیک، او دا گئدیب ایشینین دالیسینجا، اوندا عاشیق اولماق واختیدیر، اوندا من سایینی یبلمه‌دیییم پوللاری گؤتوروب، بیر ماشین آلارام، اونونلا دنیز کنارینا گئدیب، بیر ویلا آلارام و ناهاردان سونرالار دنیزین قیراغیندا اوزانیب، هر گون بیرینه، یا بیر نئچه‌سینه عاشیق اولارام، بلکه ده هر ساعاتدا بیرینه....

کیچیک اوغرو صندلی اوستونه سؤیکه‌نیر، اؤز خیاللارینا دالیر.

پولسوز: قارداش، من گلمیشدیم، گؤروم، قورعه‌ده آدیم چیخیب یا یوخ، اؤنملی دئییل، سونرا دا گله‌ بیله‌رم... ایندی گئده بیله‌رم؟

کیچیک اوغرو: قانماز آدام، ایتیل گئت، بیر طرفده اوتور دا، بوتون عاشیقلرین آبیرینی آپاردین، ده‌لی شیطان دئییر، وور....

رئیس: کیچیک اوغرو، سنین سون دفعه‌ندیر منیمله ایشله‌ییرسن، سنی ایشدن چیخاریرام، بیله‌سن، خالقلا پیس داورانماق آدامین باشینا نه اویون آچار... ایندی ایسته‌دیین قدر سؤی،،، بلی، اؤز جانین، بی‌بین جانی، تلفونو کسیرم، حالینی توتام، ایندی اؤزباشینا دانیش... گوجله ده اولسا، بو واخت تانیمایان آروادین الیندن دینجلدیم.... چلیک صاندیق نه اولدو؟

بؤیوک اوغرو:  آچاری یوخدور کی...

رئیس: بو بانکین مودیری کیمدیر؟

کیچیک اوغرو: من دئییرم، بو آدامین قیلیغی مودیره اوخشامیر، ائله بودور...

پوللو: من؟! منیم هارام مودیره اوخشاییر(اوخشویور)؟

رئیس: سیز ایکینیز هله‌لیک گئدین، چلیک صاندیقلا مشغول اولون، اگر آچاری دا تاپماساق، هئچ اولمازسا، واختی الدن وئرمه‌یک. سیز ایکی ایشچی ده بونلارین کؤمه‌یینه گئدین، سن قاپیچیسیان؟ سن ده گئت، بورا کیمین وظیفه‌نی یاخشی یئرینه یئتیریبسن...

قاپیچی: بونو مودیر به‌یه دئیین کی، هر آی علاوه ایش اوچون منیمله باش‌ـ‌باشا قویماسین...

رئیس: یاخشی دا، گئت...

بؤیوک اوغرو: گئدک...

بؤیوک و کیچیک اوغرو، بؤیوک، کیچیک اوغرو و قاپیچی صاندیغا طرف گئدیرلر.

رئیس: صاندیغین آچارینی وئرین، گؤروم....

پوللو: آغا، من بو بانک‌ین مودیری دئییلم، من ده موشتری‌یم....

رئیس: آغالار، خانیملار، بو آدام دوز دئییر، یا یوخ؟

مودیر: نییه به دانیرسینیز. جناب رئیس، بانکین مودیری بونون اؤزودور...

خانیم دوکتور: آما...

رئیس: هه، صاندیغین آچارینی گتیرین، لوطفن..... اه، یئنه ده منیم موبایلیم زنگ چالدی.... الو، آی بالام، سن نییه آغلاییرسان آخی؟

خانیم دوکتور: مودیر به‌ی، دوغرودان، هامیدان اوتانمالیسینیز، بو قدر آدامین قارشیسیندا یالان دانیشدینیز...

مودیر: من سیزه گؤره بو ایشی گؤردوم، اؤزوم اوچون یوخ...

خانیم دوکتور: اوز دئییل کی....(دابان......)

پوللو: اوزه باخ،،،، بیزیم اوچون؟

مودیر: او، صاندیغی آچیب، اورادا بیر شئی اولمادیغینی گؤرسه، بیلیرسینیز، نه اولار؟

پوللو: یعنی چلیک صاندیقدا هئچ پول یوخدور؟

خانیم دوکتور: دئدیم، بورا دیلنچی بانکدیر. ایندی توتاق، سن دئدییین اولدو، اوندا نه اولاجاق؟

مودیر: بو آدام صاندیغی آچیب، اورادا بیر شئی اولمادیغینی گؤرن کیمی هامیمیزی اؤلدورر.......

رئیس: آغلاما، قادان آلیم، سن آغلاما، گئجه گئدریک، «بانکدا ناشی‌لار» تئاترینا، آهان، هه، همین «ناشینال بانک». اوندا گئجه یوخ، صاباح دونیانی گزمه‌یه آپارارام. راضی اولدون؟؟؟ قادان آلیم، من سنی چوخ سئویرم، سن ده اؤزونو قورو(qoru)... قاداسی..... وای دده، آدامین آروادی ده‌یمه دوشر اولسا، آدام اونون قارشیسیندا اسکیک گتیرر...

خانیم دوکتور: خوش حالینا...

رئیس: بیرـ بیریمیزله چوخ واخت دارتیشساق دا، همیشه یاخشی یئتیشیرم اونا...

خانیم دوکتور: خوش حالینا...

رئیس: آدام جانیندان توتموش تویوق سودونه کیمی تاپیب گتیریرم...

خانیم دوکتور: خوش حالینا...

رئیس: ویلا، ماشین، شخصی اوچاق، بیر عایله‌وی آدا (جزیره)...

خانیم دوکتور: خوش حالینا...

رئیس: ائله بو کئچن هفته دئدی: ایسته‌ییرم، نؤمره وئرمه‌ین اوستادیمین باشینی که‌سه‌سن، آخی خانیم درس اوخویور، من ده باشینی کسدیم. گئجه خبرلرینده ده آدینی دئدیلر؟ ائشیدیبسینیزمی؟

خانیم دوکتور: خوش حالینا...

رئیس: بله ده، آلله بیزی بئله یارادیب دا، بیر ایش گؤرمک اولماز... آخی، یازیق آغلاییردی...

مودیر: بونلار بونا گؤره‌دیر کی، پولون وار، پولون اولماسایدی، بو ایشلری گؤره بیلمزدین. مثلن، بیزلر کیمی، دولت ایشچیسی‌نین پولو ایله بئله اولماق اولارمی؟ بیز ایشچیلیک پولو ایله ایلدن ایله اؤلکه‌داخیلی سفره ده چیخا بیلمیریک، هله خاریجی سفر بورجوموز اولسون....

خانیم دوکتور: بو هئچ ده وارلی و وارسیز اولماغا دخلی یوخدور. آدامین ذاتیندا اولمالیدیر...

رئیس: خانیم دوز دئییر...هله اؤتور بونو... یاخشی، مودیر به‌ی، آچاری لوطفن...

پوللو: من دئدیم کی، مودیر دئییلم...

خانیم دوکتور: بو، دوز دئییر...

مودیر: چلیک صاندیقدا بیردن پول اولماسا، نئیله‌یه‌جکسینیز؟

رئیس: گرک حاققیندا دوشونم، بو گونه کیمی بئله اولمامیشدیر...

کیچیک و بؤیوک اوغرولار قاییتمیشدیلار

بؤیوک اوغرو: چلیک صاندیقدا ایکی اؤلو سیچاندان باشقا بیر شئی یوخ ایدی...

مودیر: نئجه آچدینیز؟

رئیس: هن، بس سن مودیرسن؟؟؟ قورخاق، بیر آیریسینی گودازا وئرمک ایسته‌ییردین؟؟؟ شوعورسوز، آنلاقسیز...

بؤیوک اوغرو: هوشسوز، آنلاقسیز...

کیچیک اوغرو: هوشسوز، آنلاقسیز...

خانیم دوکتور: هوشسوز، آنلاقسیز...

پوللو: هوشسوز، آنلاقسیز....

رئیس: آغالار، خانیملار، من دیلیمین قاباغینی آلا بیلمه‌ییب، پیس سؤز دیله گتیردیییم اوچون عذر ایسته‌ییرم. بونو دا بوراخین، واخت قویماغا ده‌‌یمز، او بیریلر هانی؟

بؤیوک اوغرو: دئدیم چیلیک صاندیغین ایچینه گیرسینلر کی، نومایشین میزانسئن‌لرینه موزاحیم اولماسینلار...

رئیس: بس، بورادا بیر پول یوخدور...................................................

رئیس آتلانیب ایشچیلرین بیرینین میزینین اوستونده اوتورور

پوللو: نه ایش گؤرورلر؟

بؤیوک اوغرو: فیکیرله‌شیرلر....

خانیم دوکتور: نییه بس بئله؟

کیچیک اوغرو: رئیس داها چوخ، توالتده فیکیرله‌شر، آما ایندی ایش باشیندا اولدوغو اوچون ایشله‌مک وجدانی قویمور، ایشدن قاچسینلار، بورادا بو جور اوتوروبلار، موهوم مساله‌لره فیکیرله‌شیرلر...

مودیر: هه، توالت اوزاقدا دئییل، بو یاخیندا...

بؤیوک اوغرو: ایش وجدانی ایله یاناشی امنیتی مساله‌لر ده وار...

مودیر: آها...

کیچیک اوغرو: زاماندا قناعت و زامانین فایدالی مصرفی..

بؤیوک اوغرو: مودیریتین موهوم مساله‌لری، دقیق پلانلاشدیرما، کامیل تشکیلات قورولوشو، یوکسک هماهنگ‌لیک، عملیاتین دوغرو کونترولو...

کیچیک اوغرو: موهوم استراتژیلر...

بؤیوک اوغرو: اساس متودلار...

کیچیک اوغرو: اساس سیاستلر...

بؤیوک اوغرو: یوکسک هدفلر...

کیچیک اوغرو: بو فعالیتلریله ریسکی ده آزالدیرلار...

بؤیوک اوغرو: هم ده گرگین شرایطی دینج ساحیله ساری آپاریر...

کیچیک اوغرو: بیر ده رئیس اؤزونون بؤیوک ایش‌یاراتمالارینی بئله گؤرور...

خانیم دوکتور: بیز دوکتورلاردان خبرسیز هانسی ایشلری گؤروب‌لر کی، ایندی بئله اوتوروبلار...

بؤیوک اوغرو: هله بو، رئیسین هنرینین بیر تیکه‌سیدیر...

مودیر: بو، مودیریت مدرکینی هانسی دانیشگاهدان آلیب؟

کیچیک اوغرو: بو رئیس اؤزو ایندی اصلی مدرک وئرنلردن‌دیر...

مودیر: اونونلا دانیشمالییام...

رئیس میزین اوستودن قالخیر

رئیس: گلین بیرلیکده فیکیرله‌شک..... سیز ده اوتورمایین اورادا، گئدین فیکیرله‌شین... نه اولوب؟ نییه منه بو جور باخیرسینیز؟ فیکیر ائدیرسینیز، بیز ده داغ دالیندان گلمیشیک؟ یوخ جانیم، بیز دمکراسی‌نین بوتون اصللرینی بیلیریک، اونلارا اینانیریق...

بؤیوک اوغرو: دوزدور....

کیچیک اوغرو: دوزدور...

رئیس: گؤرورسووز کی، ایندی راحات خیاللا گئدین، اؤز طالعینیز حاققیندا مشورت ائدین، سیزین نظرینیز بیزه چوخ موهومدور...

بؤیوک اوغرو: بو ایشلری خطرلی دئییل کی؟

کیچیک اوغرو: مثلا، نه جور خطر؟

رئیس: اونلار او قدر قورخوبلار کی، اونلاری بوشلاساق، قاپیدان ائشییه چیخا بیلمزلر، هله خطر ده یاراتسینلار؟! دئییرسینیز، نه ائیله‌ییم؟

بؤیوک اوغرو: سیز هر نه دئسه‌نیز...

کیچیک اوغرو: دوز دئییر...

رئیس: من بیر نتیجه‌یه چاتمادیم...

بؤیوک اوغرو: اینانمیرام!!!!!!

کیچیک اوغرو: وای، اؤزومو لاپ مغلوم اولموش کیمی حیس ائدیرم...

رئیس: سن، بوش یئره، اؤزونو مغلوب حیس ائدیرسن...

کیچیک اوغرو: من آنلامیرام، اؤزومو مغلوم حیس ائدیرم...

رئیس: من دئمه‌دیم، سن آنلامیرسان، دئدیم، سن بوش یئره ائله فیکیرله‌شیرسن... بو پیس سؤز نه‌دیر، دئییرسن؟

بؤیوک و کیچیک اوغرو بیرلیکده:  پیس سؤز یوخدور...

رئیس: یوخدور... ایندی دئیرسینیز، نه ائدک؟

بؤیوک اوغرو: سیز بیلمه‌سه‌نیز، بیز هارادان بیلک؟

رئیس: بیر دفعه ده سیز قافانیزی ایشله‌دین باری...

بؤیوک اوغرو: دئییرم، هامیسینی اؤلدورک...

رئیس: کی نه اولسون؟

بؤیوک اوغرو: نهایت بیر ایش گؤرک...

رئیس: قازانجی اولان بیر ایش گؤرک...

کیچیک اوغرو: اونلارین جیبینده ده پول یوخ ایدی، آنجاق بیر بو قالیر کی، سویوندوراق، پالتاریلارینی آپاریب ساتاق...

بؤیوک اوغرو: آخی کیم پالتارینی آلار؟

کیچیک اوغرو: تاناکورادا آلارلار...

رئیس: چرچیلیک ائتمه‌یه واختیمیز یوخدور....

بؤیوک اوغرو: دئییرم، اونلار دا گنگه‌شیرلر (مشورت ائدیرلر)، اونلارین اؤزوندن سوروشاق، یاخشی اولماز؟

کیچیک اوغرو: اوندا دئییرلر، باشیمیزدا دوغرو-دوزگون عاغلیمیز یوخ ایدی، بیر یول – یولاجاق تاپاق...

رئیس: هم ده بیزی آلدادیب، تله‌یه سالا بیلرلر... هرچند او قدر ده شوعورلو گؤرونمورلر...

بؤیوک اوغرو: دئییرسینیز، اونلارا دئیک، گئدیب ائولریندن پول گتیرسینلر؟

کیچیک اوغرو: یا حسابلاری اولان بانکلاردان آلیب گتیرسینلر؟

رئیس: دوغرودان دا، آخی اونلار گئتسه‌لر، قاییتمازلار کی............................ .آما..............آما.......... یاخشی، بیتدی....

کیچیک اوغرو: نه بیتدی؟

بؤیوک اوغرو: یعنی ایشیمیز، دوغرودان بیتیب‌دیر؟

کیچیک اوغرو: رئیس من ائو کیرامی نئچه آی اولار وئرمه‌میشم ها....

بؤیوک اوغرو: ائو کیراسی بیر طرفدن دورسون، هله بیزیم ائوده یئمک – ایچمه‌یه بیر شئی یوخدور..

کیچیک اوغرو: آروادیم دئییب: پول گتیرمه‌سن، ائوه قاییتما....

بؤیوک اوغرو: من گله‌جک اوچون یاخشی فیکیرلریم وار، آما پولسوز اولماز کی، رئیس...

رئیس: قورتارین دا، اَه، کیم دئییر، گئدیریک، ایشیمیز هله تزه باشلاییر........................... آغالار، خانیملار، بیز موشکوللریمیزین حل ائتمه‌سینین بیر یولو اولان نئچه ساعات بیرلیکده گنگشمکدن سونرا بو نتیجه‌یه چاتدیق کی، سیز ائوینیزه، رئیسلرینیزه، یا دا اؤزونوز مصلحت بیلدییینیز بیر نفره بئله بیر خبر وئره‌سینیز: بیز سیزی گیرو ساخلامیشیق، اونلار دا سیزی قورتارماق اوچون نئچه میلیارد خرجله‌سینلر...

بؤیوک و کیچیک اوغرو: بودور باخ...

بؤیوک و کیچیک اوغرو اویناماغا باشلاییرلار

رئیس: اوشاقلار، یئتر....................................................................... هه، سیز ده باشلایین گؤرک....

مودیر، خانیم دوکتور و پوللو آدام هره‌سی بیر یئره زنگ ائتمه‌یه باشلاییرلار.............. هله هئچ بیر دبیللی جاوب آلا بیلمه‌ییبلر.

بؤیوک اوغرو: قیلیقلارا بیر باخ...

کیچیک اوغرو: لاپ منی آرواد ائودن قوواندان سونراکی قیلیغیما اوخشویور....

رئیس: یاخشی، عزیزلریم، نئجه اولدو؟

پوللو: کؤپک اوغلولار، سانکی بئله فورصت آختاریردیلار، ائله مساله‌نی دئین کیمی، بیر فاتحه اوخویوب، منه کفن بیچیب، قویلاماغا و مره‌تی بؤلمه‌یه گئدیبلر...

رئیس: کیملر؟

پوللو: آرواد-اوشاق... او بالاجا، من فیکیرله‌شیردیم کی، منی چوخ سئون او بالاجا، تلفوندا آناسینا دئدی: میراث پایی ایله بیر اوچاق آلماق ایسته‌ییر کی، صاباحلار یاریم ساعات چوخ یاتسین، آخی اوچاغین سورعتی اونا بو امکانی وئریر، مدرسه‌یه گئجیکمه‌سین، گؤرورسونوز، آندیرا قالمیش بو سویخا، هر نه‌یی بو تئزلییه اونوتدو....

رئیس: ائله همیشه بئله ایدی، ایندی سیز قانینیزی قارالتمایین....

پوللو: خوش حالینیزا، آروادینیز، آغزی گؤیچک اولوب، دایم سیزینله دارتیشسا دا، آما ایشلر گرگینله‌شنده سیزین اوچون آغلاییر، یالواریر، آما منیم آرواد- اوشاغیم بو تئزلییه منی اونوتدو....................

رئیس: یاخشی، ایندی آغلاما....

خانیم دوکتور: یئنه سیزین دئیه‌جه‌یینیز، اوماجاغینیز  آدامینیز وار، من یازیق، نه ائدیم، نه آنا...نه.

بؤیوک اوغرو: قادان جانیما....

خانیم دوکتور: یوخ بابا....

بؤیوک اوغرو: قادان جانیما...

خانیم دوکتور: نه قوهوم‌، نه قونشو...

بؤیوک اوغرو: قادان جانیما....

خانیم دوکتور: نه بیر کیمسه...

بؤیوک اوغرو: قوربان اولوم...

خانیم دوکتور: او مایماق اوغلوم دا وار-یوخومو گؤتوروب، قاچیب، هئچ تلفونوما جاواب دا وئرمه‌دی...

کیچیک اوغرو: بو امکداشیم سنه قوربان....

بؤیوک اوغرو: او حئیوره جامیش قوربان اولسون....

خانیم دوکتور: یوخ بابا، او قدر ده کؤک دئییلدی، یازیق آریق و بیر دری – بیر سوموک ایدی، بو-بو، بو کیشی کیمی....

کیچیک اوغرو: باجی، آلله ائله‌مه‌سین بیزیم کیمی اولسون، هئچ اولماسا، بیز کیشیییک، مرامیمیزدا اؤلسک ده،  خیانت ائتمه‌ریک...

خانیم دوکتور: کیم دئدی، سن بو قیلیق ایله اونا بنزه‌ییرسن؟

کیچیک اوغرو: ائله بیله‌سن، سنین حاققین ایمیش، طرف ائششه‌یی کؤرپودن کئچندن سونرا آلدادیب قاچسین.

خانیم دوکتور: اوهوی، بامبیلی...

رئیس: آی جانیم، خانیم، بیر آز نظاکتلی، ادبیلی اولون، خانیم....

خانیم دوکتور: نظاکتین آتاسینین گورونا، آغزیمی باغلی توتاراق اؤزومو عاغیللی آپارماقدان بئزدیم، قوی، نئچه دنه آغیزدولدوران سؤیوش گؤندریم کی، باشا دوشسون، گؤیلو بالیق ایسته‌یه‌نین هاراسی سودا اولار...آلچاق، مایماق، بامبیلی اوغرو...

بؤیوک اوغرو: حاققیندی دا، سن بئله مؤحترم خانیمین کئچمیش بوخچالارینی نییه سؤکورسن ..... حؤرمتلی خانیم، باخین بیر، سیزین کئچمیشینیز منه موهوم دئییل، من حاضیرام....

خانیم دوکتور: گئت، قاپیندا اوینا، بونا باخ....

رئیس: یولدان چاشمیشیق، قورتارین دا........................... مودیر به‌ی، سیز نئجه؟ سیزین عایله نه دئدی؟

مودیر: اونلار خاریج سفرینده، موبایللاری خط وئرمیر....

رئیس: بو وضعیتله بیر یولوموز قالیر....... مودیر یوخاری مقاملارا خبر وئریسین، اونلاردان کؤمک آلسین....

هامی بیرلیکده: یاشاسین....

رئیس: سیزه قوربان، تشکوره ده‌یمز...

مودیر: بئله یئرلرده بیر مودیر باجاریغینی گؤسترر....

رئیس: قوربان، اختیار صاحابیسینیز...

مودیر: بیر گون قوللوغونوزا گلیب، سیزدن بو یول‌-‌یولاجاغی اؤیره‌نمه‌لیییک....

رئیس: همیشه قوللوغونوزدا وارام.

مودیر: هر بارماغینیزدان بیر اینجه‌لیک یاغیر....

رئیس: کیچیییزی (kiçiyinizi) سیغاللاییرسینیز؟ عزیزیم....

پوللو: رئیس – مه‌ییس‌لر، لوطفن، بیر-بیرینین قولتوغونا قارپیز وئرمک یئرینه، تاترین قالانینی اوینایین...

رئیس: سیز حاقلیسینیز...

مودیر: منجه ده، هر زامان موشتری حاقلیدیر.

رئیس: بو دا گؤستریر کی، سیز مودیریت علمینی منیمسه‌مه ده نه قدر باجاریقلیسینیز....

مودیر میز اوستونه آتیلیر

مودیر: هر موشتری بیزیم ان بؤیوک سرمایه‌میزدیر...

رئیس: البته....

مودیر: گله‌جه‌یین آچیق اوفوقلرینه چاتماق بیزیم، موشتریلرین نه دره‌جه ده قوللوغوندا اولماغیمیزدان آسیلیدیر...

رئیس: یاشاسین....

مودیر: هر موشتری بیر قیزیل فورصت دئمکدیر...

رئیس: تام دوغرو....

مودیر: بیز ده موشتری‌قولو ایشچیلریک...

رئیس: به به...

مودیر: من مدرکینی فیلان(....) بیلیم‌یورددان (دانیشگاهدان) آلان بیر مودیر کیمی...

پوللو: آغالار شؤهرتبازلیغی قورتارین، تئاتر....

رئیس: مودیر جان، چوخ باغیشلا، میزدن آشاغای ائنیب، گئدین یوخاری مقامینیزین سورغینا...

مودیر میزدن ائنیب، تلفونلا دانیشیر. بؤیوک و کیچیک اوغرو دیواردان بیر ساعاتی گؤتوروب، عقربه‌لرینی نئچه دفعه فیرلادیب، سونرا یئرینه قویورلار. مودیر تلفونو بیتیریب، آغلاماغا باشلاییر.

مودیر: یازیق اولدوم...

رئیس: نه اولوب، عزیزیم...

مودیر: منه دئمه، عزیزیم، بوتون گوناهلار سنینیدیر...

خانیم دوکتور: ایندی دئ گؤرک، هله نه اولوب آخی؟

مودیر: نه ایسته‌ییردین اولسون...

پوللو: هله آغلاما، بیز ده بیلک...

مودیر: نه‌یی بیله‌سینیز هان؟ نه‌یی باخ؟

رئیس: وای دده، بو هامیلا ساواشیر...

مودیر: هه‌یه، هامیلا ساواشارام دا، نییه ساواشماییم؟ آخی باجاریقسیز اوغرو....

بؤیوک و کیچیک اوغرو: هوی، آغزی گؤیچک، آغزین دئیه‌نی قولاغین ائشیدیر؟

رئیس: اوشاقلار، بیر آز ادبلی اولون...

بؤیوک اوغرو: او منه اهانت ائدیر آخی...

رئیس: آما بو، الیمیزده بهانه اولماز کی، بیز اوصلوموزو آیاق آلتینا آتاق، اولارمی؟

کیچیک اوغرو: رئیس حاقلیدیر...

خانیم دوکتور: نه کیلاسلی بیر چته‌دیر!

بؤیوک اوغرو: دئمیشدیک کی، چوخ دا پیس دئییلیک....

پوللو: یئنه باشلاما، سن آلله....

کیچیک اوغرو: دوز دئییر، تکراری فیلیم جانیمیزا سینمیر...

رئیس: بوش بوغازلیق بسدیر... سن، هله یاخشی اغلان اول، بیزه ده دئ، یوخاری آدامینیز نه دئدی؟

مودیر: نه ایسته‌یردین دئسین، منی ایشدن چیخاردیلار...

بؤیوک اوغرو: وای دده، من دئدیم بلکه هله نه اولولب...

کیچیک اوغرو: دوز دئییر، والله، چخریبلار کی، چیخاریبلار... دئییرسن، صاباحدان گل اؤز یانیمدا خوده‌ییم (xodəyim) اول، سن او مؤعتبر مدرکینله هئچ واخت ایشسیز قالمازسان...

مودیر: ایتیلین گؤروم...

خانیم دوکتور: سیزین ایشدن چیخاریلمانیز او قدر ده موهوم دئییل.... دئمک ایسته‌ییرم، سونرا گئدرسن یانینا، موشکولونوزو چؤزرسینیز، هله گیوو گؤتورمک حاققیندا نه دئدی؟

پوللو: هاچان پوللاری گؤنده‌ره‌جک؟

رئیس: بو موهومدور باخ...

مودیر: هانسی پوللار، آغا...او دئدی: بو آندان بانکین بو شعبه‌سی اونلارا باغلی اولان شعبه‌لرین لیستیندن چیخیب، دئدی: زور پولو وئرمکله اؤز آبیری ایله اوینایا بیلمز...

رئیس: ائله بو؟!!!!

مودیر: ائله بو؟!!!!

هامی دئدی: بو؟!!!!

مودیر: هه، ائله بو....

پوللو: زور پولو نه‌دیر، بو بویدا آدامین جانی خطرده....

خانیم دوکتور: بس آند ایچمه‌یی نه اولاجاق؟

مودیر: هانسی آند ایچمک؟

خانیم دوکتور: مگر سیزلرده آند ایچمه مراسیمی اولمور کی، هر شئدن اول انسانلارین جانینی قوروماغی دوشونه‌سینیز؟

مودیر: بیز دوکتور دئییلیک کی، خانیم...

کیچیک و بؤیوک اوغرو: مرام نئجه؟ او دا یوخدور؟

پوللو: هئچ اولمازسا، بیر آز گوذشت، باغیشلاما...

رئیس: یا دا موشتری حاققی، ال آلتی حاققی...

خانیم دوکتور: انسانلیق...

مودیر: بیزیم گؤستریشلرده، امرلرده بئله سؤزلردن ایز یوخدور، من سیز دئدیکلرینیزی باشا دوشمورم...

رئیس: هه، بو دا بوندان........................منیم کی عاغلیم کسمیر......

هامی: بیزیم ده....

رئیس: من گئدیرم................... بلکه ائشیکده باشقا خبرلر وار؟

مودیر: مثلا، نه خبر اولاجاق؟

رئیس: نمایش‌نامه‌نی یازان بو اثرده داها آیری سؤزو یوخدور، آما یازمایا بیلمز کی، ائده بیلر؟ گئدک....

بؤیوک و کیچیک اوغرو: بیز ده گلیریک....

پوللو: من ده او ائوه قاییتمیرام...... دؤزون من ده گلیم...

مودیر: سنجه، بیر ایشه یارایا بیله‌رم؟؟؟ گلسم، پیس اولماز ها......

خانیم دوکتور: یاخشی، منیمله پیس داورانان اوغلانا ساری گئتمه‌سم، یاخشی اولار... دئدییینیز سؤزلر حاققیندا دوشونمه‌لییم... گئدک؟

رئیس: آی اوغلان، گئت، چلیک صاندیقدا اولانلارلا دانیش، بلکه اونلار دا گلدی....  

                                                             تورکجه یه چئویرن: میرعلی رضائی

سون