آداملار :آشیق ،یهود ، یازار ،آغ گئییملیلر ( قاراباغ اهالیسی ، اوروز ، باسات ، عباس میرزا ، ابراهیم بیگ ) و قارا گئییملیلر ( ائرمنیلر ، تپه گوز ، پری ، سیسیانوف ، زوری )
صه حنه : بیر اوجا داغین دوشودور .
چوخلو اوشاق ، قوجا ، قادین و کیشی بیر بیرینه قاریشیب اوتایا بوتایا
قاچیرلار ، تانکلارین سسی گلیر ، آداملار چیغیریر ، باغیریر و بیر بیرینی
قیچ آلتیندا ازیرلر .
تانکلارین و تانک آلتیندا ازیلنلرین سسی هر یئردن قولاقا یئتیشیر .
ائرمنیلر ایله روسلار قادینلاری ، اوشاقلاری و کیشیلری تپیکله ووروب
بورادان اورایا ، اورادان بورایا آپاریرلار .
آشیق اوتوروب داش اوسته .
آشیق : او گؤرونن آغدامدی / قارا دامدی ، آغ دامدی / یار ، یولونا باخماقدان / گؤزلریمه آغ دامدی !
مودهیش گونلردن سوز آچماق چتین گلیر آداما ، او گونلردن بیری خوجالیدا روسلار و ائرمنیلر الیله اوز وئریب ، اوزامان کی اونلار گئجه
ایکن خوجالیدا اهالییه هوجوم ائتدیلر ، دئییرلر او گون دونیانین ان آللاه سیز گونویدو ، یوخ من دئییرم ان ایبلیسلی گونویدو ، آخی ایبلیس
اینسان اولان یئرده وار آللاه اورادا اولماسادا ، ایبلیسین بارماقلارینین ایشاره سی ایله او گون اینسانلارین اؤلوم ایله حیات آراسیندا
موباریزه سی کئچیردی ، گئجه دن سحره قدر قاراباغدا اولوم قوشو قاناد آچمیشدی ،
دیلین یانسین ، دیل یییه سی / سؤز دئمه یه دیلیم گلمز / بو نه سیردی ، سیر یییه سی/ گئدن گئدر ، گلن گلمز ؟! / دونیا ، یوللارین
یورولسون / سولارین آخسین ، دورولسون / ائو ییخان ، قاپین وورولسون / بو قاپییا گلین گلمز / گؤیده بولود دولار گئدر / قوشلار قاناد سالار
گئدر / اوغوللاری آلار گئدر / آنالارا اؤلوم گلمز !
توپخانالار گول له لرله ال اله وئریب آداملارین جانین آلیب گویلره آپاریردی ، بو عصرین ان بؤیوک فاجیعه لریندن بیری اوز وئرمده ایدی .
قیز ، گلین ، قادین ، کیشی و اوشاقلار اوتایا بوتایا قاچیرلار .
یوزلرجه قیز گلین اسیر آلیندی ، گوزلر آغلار قالدی ، داغلار دره لر اوشاق قوجا گنج مئییتلرییله دولدو ، کیم قیریلدی کیم قالدی ؟
ائرمنیلر توفنگلریله قیرا قیرا کئچیرلر .
دئییرلر او آنلار بیر طرفده خوجالیدان باش گؤتوروپ قاچان اینسانلار داغلاری دره لری دولدورموشدو بیر طرفدنده قالیب اولنلر ، هئی آمان ،
چاغیر هئی دومانلی داغلاریم هارای ، دومانلی گونلریم هارای .
بیر اوشاق قیز قاچا قاچدا آناسیندان اوزاق دوشور .
کیم بیلیر اوشاقلاریندان اوزاق دوشن آنا نئجه بایاتی اوخویار ؟
آنا : قان آتلانسین / چال نئشتر ، قان آتلانسین / عزراییل ، اینصاف ائیله / قوی کؤرپم قاناتلانسین !
آشیق : نئجه یانماسین بو سوزلره یانیق کونول ؟! نئجه یانماسین ؟!
موروولا خاچین آغلار / ترلانلا لاچین آغلار / بالاسی اؤلموش آنا / چنگه لر ساچین ، آغلار !
اوشاق قیز : اؤز آنام / قوینو دولو کؤز آنام / یاد آغلار ، یالان آغلار / قوی آغلاسین اؤز آنام !
آشیق : بیر سازام ، سؤزه حسرت / بیر یولام ، ایزه حسرت / گؤزلریم گؤزلرینه / اوزوم ده ، اوزه حسرت !
وای دئدیم وای دئییب ساچین یولان اوغولسوز قالان آنالارا .
آنا : سنگرلرده گونش دوغور / اویان ، اویان ، یاتان اوغول / هانی توفنگ توتان اوغول ؟ / یارالی اللری هانی ؟!
آشیق : کیم بو یوردا غم داشیدی ؟ / بو داغ دئییل ، باش داشیدی / بو گؤل دئییل ، گؤز یاشیدی / بس بونون گؤللری هانی ؟!
قیز : بولود گلدی گؤی باشینا / دئدی : آنام ، دؤی باشینا / هر کنددن هر ائو باشینا / اوغول گئتدی ، قاییتمادی !
آشیق : نه داوادان بالان گلدی / نه ائوینه گلین گلدی / گؤزون آیدین ، دردلی آنا / آچ قاپینی ، اؤلوم گلدی !
خینالی گلینلر گورمدی یارین اوزونو ، الینی ، ائوینی ، هارای ظالیم فلک الیندن هارای ...
گلین : بیر دومانلی یوخو گؤردوم / یوخومدان دوشدو بو دومان / بیر آه چکدیم آییلاندا / آهیمدان دوشدو بو دومان !
آشیق : توتدو یولومو ، ایزیمی / اوددو نئچه عزیزیمی / بلکه ده آغلار گؤزومون / آغیندان دوشدو بو دومان !
سوروشان وارمی کیم سالدی بویله دومانی ائللریمیزه ؟
گلین : نه او داغین آدینا یاز / نه بو داغین آدینا یاز / اورگیمین چالین چارپاز / داغیندان دوشدو بو دومان !
آشیق : عزیزیم ، یولوم بودور / درد بودور ، ظولوم بودو / من آغلارام ، یاد گولر / اؤلوملو گونوم بودور ! 1
یانیر اورگیم یانیر ، یانیر ایچیم یانیر ، جانیم یانیر کولوم یانیر ، گوزلریمده یاش قالمادی سینه مده آه ، اولوم اولسون پیس گونلری یازانلارا ،
اولوم .
یهود ایله یازار گلیب اوتورورلار داش اوسته .
یهود : قوناق ایسته میرسیز ؟
آشیق : ائرمنیلر کیمی قوناق اولسان یوخ ...
یهود : ائرمنی ، مسلمان ، یهود ، کافیر ! اوتور بونلاری باخ ، یوخ گورورم یاخچی بازار آچیبسان آشیق یولداش .
آشیق : تاپیلدین گلدین یئنیده بویله سوزلره ؟! دئییرم اولماز بیز بیر یئرده اولاق سن میخ اولمویاسان ؟
یهود : هله ندن سوز آچمیشدین ؟
آشیق : نه دئییم سنه خوش گله یهود ؟
ائل کؤچور ائی قاراباغدان / گاه بو داغدان ، گاه او داغدان / داها بیرده اوزاقلاردان / هاوالانماز خانین سسی / قاراباغین شیکسته سی !
گزمه مندن آرالی / کونلوم سندن یارالی / گوزلرینه قوربانام / قاراباغین مارالی ،
قیزلار کوزه اللرینده کئچیرلر .
سن بولاق اوسته گلنده / قیقاجی باخیب گولنده / آلدین صبر و قراریمی / قاراباغین مارالی ،
قاراباغین گوزللری یاندی اسیر گئتدی اولدو یوخ آمما تبریزدن گلن ! هئی بو گونلره هئی !
من قوربانام گوزلره / شیرین شیرین سوزلره / بیر قوناق گل بیزلره / آی تبریزین مارالی ،
کئشگه اوتایدان بیر سس گلردی اوخویاردی بونو منیله ،
اوگونه قوربان کسرم / گلمسن سندن کوسرم / گزمرم سندن آرالی / قاراباغین مارالی ،
یهود : گوزل اوخودون آمما دئمدین نییه سینی ؟!
آشیق : گوزل قاراباغ یئرلرینین میللی سویقیریمیندان سوز آچمیشام ، خوجالی سویقیریمیندان .
یهود : آهان ! بنگار کاتب ، بنگار ، دئدیم یازار یازا ، سن سویله منده یازدیراجاقام ، گورک کیمین سوزو دیللرده دستان اولوب دولانار .
آشیق : ال چک یالان یازمالاریندان یهود ، ال چک .
یهود : ایشینده اول آشیق ، ایشینده اول ، سن شیفاهی سویله یازماق قالسین بیزلره ، بنگار کاتب .
آشیق : بیلیرم نئجه یالان یازاجاقسان ، ایشین بودور ، اسکی چاغلاردان بری بویله دیر ایشین ،
عزیزیم ، اوزو قانلی / آیاغی ، دیزی قانلی / اؤلن بیز ، قیریلان بیز / توتورلار بیزی قانلی !
یهود : هاهاها ، یاخچیدیر سازین سوزون ، آمما ، قالاندیر منیم سوزوم ، دردلری آچدین توکدون ، آمما ، سو ایچمیر منیم گوزوم ! به به ، منده اوزوم
اوچون بیر آشیقام ها ، بنگار کاتب ، ناغیلیین دالین توتمورسان یولداش ؟ مسلمان خالقین قاراباغینین الدن گئدمسی ائشیدملیدیر ، اوخو ...
آشیق : یوخ یهود پیس گونلردن سوز آچسامدا سنی سئویندیرمک اوچون دئییل ، بویون قاراباغا قارا گون یازیلیب دوز آمما من کئچمیش آغ و قارا
گونلردن سوز آچاجاقام گلجکده بو اولکه نین اوولادی گونش آختارا گئجه نین قارانلیقین اولدورمک اوچون ، بو منه آتام قاراباغلی اسد اوغلو
آشیق صادیق جاندان قالیب ، او آس اولکه سیندن کوچن سومئرلی آشیقلار کیمی سازی دیز اوستوندن گوتوروب قویدو سینه سی اوسته ،
ساز چالدی سوز قوشدو ، ایندی سوزده سازدا منیمدیر ، منده اوغورلو گونلردن باشلارام ، کوتو گونلردنده دانیشارام ، آتام دده قورقود سازی
امانت قویوب گئدنده دئییب یاشامین یاخچیسینداندا دئیین پیسیندنده ، خالق یاخچیسین اویرنسین پیسین آتسین .
یهود : قولاقیمیز سنده ایه سازیین دیللندیریب سوزویون سویله سن .
آشیق : بیری واریدی بیری یوخ ، تانریدان سونرا بیر کیمسه یوخ ، گونلرین بیرگونونده اوغوز ائلی امنیتده یاشایان بیر زامان بیردن بیره اوستونه
دوشمن توکولدو ، گئجه ایدی ، چالدی چاپدی تالادی گئتدی ، اوغوز طایفاسی بو اولکه لردن دیدرگین دوشدو ، اوغوزخان آدامی اورآس
آددا بیر قوچاقین آدی دیللرده اوروز سسلنیردی ، نئجه کی اوغ آسلارا اوغوز دئییلیر ، آنجاق ، اوروز اوغوز ائلینده یاشاییردی ، ائلده قاچاقاچ
دوشنده هاممی قاچدی اوروزون اوغلو یاددان چیخدی قالدی .
یهود : اولمویا اوغوزخانی بسله دن قورد گلیب بونودا ساخلاییب ؟
آشیق : یوخ اونو بیر آسلان تاپدی آپاردی .
بیر آسلان گلیر و چولده قالان اوشاقی دیشینده آپاریر ، آسلان اوشاقی
بسله دیر و بویودور .
یهود : تانری نئجه اوتورمور سیزلری .
آشیق : ائل قاییداندان سونرا اوروز اوغلونو آسلانلار مئشه سینده تاپیر گتیریر ائل ایچینه ، دده قورقوددا گلیر آدین قویور باسات ، 2
اوتایدان ائل قاچاندا چوبان اوغلو چوبان یارسیز قالمیشدی ، بیر گون بولاق باشیندا اوزاقلاردان گلمیش پریلری گورور ، پریلری ایبلیس
گتیرمیشدی اوغوز ائلین یوخودا ساخلایالار دوشمن اونلاری تالییا ، آنجاق چوبان بیر پرینی توتور اونلا یاخینلاشیر ، پری بیر ایلدن سونرا
اونون امانتین گتیریر .
پری : آل بو امانتیین چوبان اوغلو چوبان ، آمما بیل اوغوز ائلینه زاوال گتیردین ، آدی اولسون تپه گوز .
آشیق : چوبان تپه گوزو چولده قویور اوزو قاچیر ، بوتایدان اوروز تپه گوزو تاپیر و آسلان ساخلایان اوغلو باسات ایله اونو بیر یئرده بویودور .
تپه گوز اوشاقلارلا اویناییر ، اونلاری وورور ، دویور و قولاقلارین یئییر ،
آمما باسات ایله گولشنده ییخیلیر .
اوروز : اوغول باسات سن نه اوچون تپه گوزو ووروب آغلادیبسان ؟ او بیزه بیر قوناقدیر .
باسات : او اوشاقلاری دویوب اونلارین قولاقلارین بورونلارین یئییردی آتا .
اوروز : ایندی کی سن اوشاقلاری وورورسان ، قولاقلارین بورونلارین چیخاردیب یئییرسن داها ساخلاماق اولماز ائلده سنی ، چیخ گئد .
تپه گوز : بو ایشله اوغوز ائلینه زاوال گتیردین اوروز کیشی .
تپه گوز گئدیر .
پری گلیر تپه گوز ایله دانیشیر .
پری : اوغول بو اوزوک بارماقیندا اولسون ، ایبلیسدن قالیب بیزلره ، داها سنه اوخ باتماز ، بدنییینده قیلینج کسمز ، سن قال بو ائللری جانا گتیر .
تپه گوز : بیر گون قاییدارام اوغوز ائلینی بو توپراقلاردان قاوالارام ، ایندی یوللار منیمدیر ، کسرم پیچرم آسارام یییرم .
تپه گوز آداملاری یوللاردا توتوب یئییر .
قوشون گئدیر تپه گوزون اوستونه ، هئچ نه اونا اثر ائیلمیر ، قوشونو
داغیلدیر .
آشیق : اوغوز یئتدی سیرا قوشون چکدی تپه گوزه باتا بیلمدی ، دده قورقود آتام گلدی اونلا دانیشدی سوز وئردی اونا کسیم وئریله ، دانیشیلدی
گونده ایکی آدام بئش یوز قویون وئریله تپه گوز یئسین ، بویله اولدو ، دورد اوغولو اولان بیرین وئردی اوچو قالدی ، اوچ اوشاقی اولان بیرین
وئردی ایکیسی قالدی ، ایکیسی اولان بیرین وئردی بیری قالدی ، سیرا دوندو یئتیشدی باساتا ، باسات اوشاقلیقدان تپه گوز ایله بویوموشدو ،
اونلا دویوشوب گولشمیشدی ، اوندان قورخوسو یوخویدو ، باسات اوغوزخاندان ایذن آلدی گئده تپه گوزله دویوشه ، قارا گونه دوشموش
خالقی قورتارا کوتو تپه گوزون الیندن ، قاریشدی داوارلارا گئتدی اونلا ووروشا .
تپه گوز داوارلاری توتوب یئییر .
باسات داوارلارین دریسیندن پالتار گئییب ، سورودن چیخیر ، تپه گوزلیه
توتاشیر ، بوغوشور ، ووروشور و دویوشور ، اوخلاری تپه گوزه اثر
ائیلمیر ، تپه گوز باساتا زور گلیر ، باسات باخیر گورور اونون بارماقیندا
بیر قاشلی اوزوک وار .
باسات : تپه گوز بو اوزوک ندیر ؟
تپه گوز : بو اولماسایدی اوغوزلولارین اوخلاری جانیمی سوکموشدو ، آنام پری وئریب جانیما هئچ نه اثر ائدمسین ، سنین اوخون داغی سوکردی
آمما گوردون اثری اولمادی منده .
باسات : قاشی قارالیب ، وئر سورتوم داشا پاریللاسین .
تپه گوز : نه اوچون ؟ هانسی داشا ؟
باسات : گیزلتمیشم ، آنایین یادیندان چیخیب دئسین سنه اوزوکون قاشی قارالسا ایش وئرمز داها .
تپه گوز : سن بونو هارادان بیلیرسن ؟
باسات : دده قورقود اویردیب منه بونلاری .
تپه گوز : سوزون دوز اولماسا پیشیرممیشدن قاباق ییجاغام سنی .
باسات : وئر منه گوروم .
تپه گوز : یالان دئسن ؟
باسات : زورون مندن آرتیق ، وور اولدور اوندا .
تپه گوز اوزوکون وئریر باساتا .
آشیق : باسات اوزوکسوز تپه گوزو اوخلا وورور اولدورور آمما تپه گوزون اوشاقلاری قالیر ، اونلارا اوروز تپه گوزو بسلدیغینه گوره اوروس دئییرلر . 3
یهود : یوخ بونلاری قویمارام خالق اوخویا ، من اوزوم بیلیرم نلر یازدیرام ، بنگار کاتب ، سونرالاردان دئگینن آشیق .
آشیق : بیزیم ائلین یئتدی مین ایلدن آرتیق تاریخی کئچمیشی وار ، بو توپراقلار چوخلو ایشلر هونرلر گوروبلر بو ائلدن ، تزه سوز دئییل بو ، نئچه
مین ایللیک ائلین سوزو ناغیلی چوخ اولار ، ائشیددیگین آتام دده قورقوددان بیزه یئتیشمیش ایدی ، آز قالسادا ناغیللاری آنجاق بیر
سیراسی قالیبدیر ، ایندی قولاق آس بونا ،
هوجوم ! هوجوم ! / ارنلرین نعره سینه / یئر تیتره دی ، گؤی گورلادی / اوجا داغلار دوعا ائدیپ / ارنلری اوغورلادی ! / دوشمن قاچیر ،
بیزیمکیلر تعقیب ائدیر !
یهود : بنگار کاتب .
عباس میرزا ایله سیسیانفون قوشونو دویوشور .
سیسیانوفون قوشونو دالا چکیلیر .
عباس میرزا : سون گونودور دوشمنین ، هارای قوشونوم هارای ، گئدین داللاریجاق ، بو اولکه هر کوتونون یئری دئییل .
سیسیانوف : قوشونو چکین ابراهیم بیگین قالاسینا ساری ، او عباس میرزا ایله بیر اولوب بیزله دویوشه گیرمدی ، اولا بیلر اونلا دوشمانچالیق
باشلاییب .
ابراهیم بیگ دوربین ایله اوزاقلارا باخیر .
ابراهیم بیگ : اوروسلو سیسیانوف گلیر .
سیسیانوفون قوشونو یئتیریب قالانین دیبینه .
سیسیانوف : ابراهیم بیگ عسکرلیق شرفیم سنین الینده ...
ابراهیم بیگ : قارشیندا دوران قوشون کیمین ایدی ؟
سیسیانوف : بیلیرسن ، عباس میرزانین .
ابراهیم بیگ : به نه اولدو ؟
سیسیانوف : گلیر دالیمجاق .
ابراهیم بیگ : گورورم عباس میرزا پیس گونه سالیب بیله یین ؟
سیسیانوف : ابراهیم بیگ بیزی بو معرکدن قورتارسان قولون اولارام .
ابراهیم بیگ : اوروس قوشونو بویله چوخ اولا اولا نئجه قاچار موحاریبه دن ؟
سیسیانوف : ایندی بو سوزلرین یئری دئییل ، آچ قالانین قاپیسین اول آقام .
ابراهیم بیگ : سوز وئر ...
سیسیانوف : قوشونوم داغیلیر ، نه ایسته ییرسن ؟
ابراهیم بیگ : قاجار حکومتی تورک خالقیندان گون به گون اوزاقلاشیر ، اونلار افغاندان گلنلری دولدوروبلار دربارلارینا ، بو اولکه نین خانی اولماق
اوچون قوشونوم اولا گرک ، بیلیرم اونلارلا ساواشمالییام بیرگون ، سوز وئر قوشونوما دویوش گونو یاردیمچی ییغاسان ، اوردولاریمی
دولدوراسان ...
سیسیانوف : اوروسلاری ائرمنی لری گتیریب سنه قول ائیلرم ، سوز وئریرم .
ابراهیم بیگ : نئچه نفر ؟
سیسیانوف : بو اولکه نین توتانی قدر .
ابراهیم بیگ : آچین قاپیلاری .
سیسیانوفون قوشونو گیریر قالانین ایچینه .
عباس میرزا یئتیریر قالانین دیبینه .
عباس میرزا : دایانین ، سیسیانوفون قوشونو چکیلدی ابراهیم بیگین قالاسینا ، گرک ابراهیم بیگ ایله دانیشام ، آهای ابراهیم بیگ .
ابراهیم بیگ : ائشیدیرم عباس میرزا .
عباس میرزا : بیلیرسن کیمه پناه وئردین قالاندا ؟
ابراهیم بیگ : بیلیرم ، اوروس قوشونون باشچیسی سیسیانوفا .
عباس میرزا : بونودا بیلیرسن منیم الیمدن قاچیبدیر ؟
ابراهیم بیگ : ایندی منیم قوناقیمدی . 4
عباس میرزا : نادرشاه اولندن سونرا آتان قاراباغلی پناه علی خان جوانشیر شوشادا خانلیق قوردو ، ایسته ییردی بویوک ایری آنادان آیریلدا بو
اولکه نی ، اوخو داشا دیدی ، ایندی سن بو اولکه ده ایسته ییرسن آتایین یولونا داوام ائدسن ؟
ابراهیم بیگ : بویوک ایری آنا یئتدی مین ایلدن سونرا تورک خالقین الیندن چیخمادادیر عباس میرزا ، آقالیق گئدیر قارانلیق گلیر ، آق تورکلرین
یئرینده قارا هندولار اوتوروبلار ایندی ، افغانلیلاری هر یئره دولدوروبسوز ...
عباس میرزا : افغانلی نه قدرده چوخالسا بیزه آقا اولا بیلمز ...
ابراهیم بیگ : ایری آنا توپراقلاریندا غلبه ماهنیسی اوخورلار افغانلیلار ، ائشیدمیرسن ؟
عباس میرزا : ایندی آیری سوزون یئریدیر ...
ابراهیم بیگ : دئییبلر بوستانچی قولاقی آغیر ائشیدر ...
عباس میرزا : سوزومون دالیسینا قولاق وئر ، بوگون اولمویان ایش گوردوم سندن ، سن اوروسلاری دولدوردون قالایان ، اوزون بیلیرسن نه ایش
گوروبسن ؟
ابراهیم بیگ : سن دئگینن بیلیمدا ...
عباس میرزا : اوز سوزویون دئملییم ، اونلارا مئیدان وئرسن صاباح آقا اولاجاقلار سنه ...
ابراهیم بیگ : دئگینن قول ، منه سوز وئیب .
عباس میرزا : اولان ایش دئییل بو ، اوروس سوزو اوسته دورماز الی قاباق اولسا .
ابراهیم بیگ : یوخ عباس میرزا اولاندیر ، سوز آلمیشام اوروسلار ائرمنیلریده قوشا قوشونوما قارشی دورام سیزله .
عباس میرزا : ابراهیم بیگ خانلیق هئچ بو سئودا بیگلیغیینده آلار سندن .
ابراهیم بیگ : سوز وئریرم سن شاه اولاندان قاباق من یوخاری یئرلری آلاجاقام .
عباس میرزا : بیج گونلره بویلو گورورم دونیایین .
ابراهیم بیگ : نه اولسادا بیلیرم افغانلیلارا قول اولماقدان یاخچی اولاجاق گونلریم .
عباس میرزا : گوجسوزلوغویون بونلارین گوجویله دولدورما ، بویله قاباقا گئدسن سایسیز حئسابسیز فاجیعه لر باش وئرجکدیر ، ال چک بو ایشلردن ،
قالانین قاپیلارین آچ گلیم ایچریده دانیشاق .
ابراهیم بیگ : قوناقی تسلیم ائدن دئییلم ، گئد .
عباس میرزا : بویله قوناق ائویین صاحابلانار .
ابراهیم بیگ : گلجکدن کیمسه نین خبری یوخ ، قالساق گورریک سنین الیندن گئدیر ائوین یوخسا منیم .
عباس میرزا : نه اولار ، آچسان قاپینی اوتوراریک سنینده سوزلریین قولاق آساریک .
ابراهیم بیگ : یوخ گئد آمما بونو بیل منیم سوزلریم اونودولمامالیدیر .
عباس میرزا اوزاقلاشیر .
آشیق : سیسیانوف قاف آسا گیرندن سونرا ابراهیم خلیل خان ایسته ییردی اونلا بیرلشه و گوج آلیب ایری آنایا شاهلیق ائده ، سیسیانوف بیر پیس
تولکویدو ، او باشلادی ائرمنیلرین قیچین آس اربایجانین قاراباغینا آچماقا ، ابراهیم خلیل خان بیرگون اوزونه گلدی کی هر نه الدن
چیخمیشدی ، سیسیانوف اوز ایشین گورموشدو ، ظالیم فلک هئی ، بیر زامان گلدی او و اوزو ایله گتیردیغی ائرمنیلر قاراباغ منطقه سینه
صاحابلاندیلار .
یهود : بنگار کاتب ، دئییرم سیسیانوفدا یاددا قالمالی آددیر .
ابراهیم بیگ زینجیره چکیلیبدیر .
ابراهیم بیگ : هان کوتو اوروس گولورسن ، دئییبلر گئدر بو گوزللیک سنده قالماز ...
سیسیانوف : سنین کیمی آخماقلارا گولم گرک ، گولملی دئییلسن ؟
ابراهیم بیگ : اللریمی آچ بیره بیر اولاندا گورک کیم کیمه گولجک .
سیسیانوف : اللرین آچیق اولاندا عباس میرزا کیمین آدامین اللریندن چکدین اونلاری ، هوم ایندی قیزاریلمیش دمیر گرکدیر بو اللره آچیق اولماق
یوخ .
ابراهیم بیگی ایشکنجه ائدیرلر .
ابراهیم بیگ : نئیله ییرسن ائیله ، گوزومده یاش دیلیمده آخ گورسن سن اوغورلوسان .
سیسیانوف : بلکه م اود آخ گتیرمیه دیلیین آمما چوخ یوللار باجاریرام هله .
ابراهیم بیگین آداملارین گتیریب گوزونون قاباقیندا بیر به بیر 5
اولدورورلر .
ابراهیم بیگ : تورک اوولادین بویله دیزی اوسته اوتورتماق اولماز .
سیسیانوف : سای کیشی ، بیر ، ایکی ، اوچ ...
ابراهیم بیگ : عومور بویودور ساییرسیز بودا اوستونده .
سیسیانوف : اون بئش ...
ابراهیم بیگ : چتیندیر بو آن گوزلرین آچیق اولا اللرین باغلی ، آچین اللریمی ، آچین ، ظولوم عرشه دایاندی ، الیم باغلی گوزوم آچیق ، هله باخیرام
بویله ظالیم یاشاما .
سیسیانوف : اوتوز ایله اوتوز بیری سایمالیام ، ابراهیم بیگ اورگین داشداندا اولسا قیزینلا آروادین اولنده سیناجاقدیر امینم .
ابراهیم بیگ : گئدیرسیز سون ائوییزه ، موبارک اولسون ، گوزلری ییز یولدا اولسون ، گلرم منده تئزلیکله .
سیسیانوف : سینمادین ، کوتو آدام دئییرسن بلکه م باشین اوجا قالسا نه اولاجاق ؟
ابراهیم بیگ : هاممی اولدو بیر قالدیم من بیرده ............
سیسیانوف : قالانی وار ؟
ابراهیم بیگ : اولدور قورتار منیده جعفرقولوخانیدا ، قالماسین بیزدن اثر ...
سیسیانوف : جعفرقولوخان ؟!
ابراهیم بیگ : نوه م ...
سیسیانوف : او سنی چوغوللادی بیزه ، دئدی ایسته ییرسن ایری آنایا سوز وئرسن ، بیزله بیر اولماقدان پئشمان اولوبسان ، دئدی عباس میرزا ایله
بیر اولماق نظرین وار .
ابراهیم بیگ دیزلری اوسته دوشور یئره و آغلاییر .
ابراهیم بیگ : آغاجی اوز ایچیندن قورد یئمسه ییخلماز ، آغریلار دولور جانیما ، سن ناحاق قان ائیله دین ، گؤر نئجه جانیمی ویران ائیله دین ، نئجه
قییدین اوغول ؟ منی ییخا بیلمزیدی اوروس ، سن ییخدین سن ، جانیم بیر گونش کیمی ایچیمین دوغوسوندان چیخیر ایندی ،
یاشیل یایلاقلاردا یاشیل باغلاردا اوچور جانیم ، الوان غونچالاری گورورم آمما باخ گولوم غونچاسیندا یاندی ، بولبوللر افغان ائیله دی ،
باخ ایندی بزم ایچینده من فغانا گلمیشم ، هر یئره باخدیم غفلتلردن اویانمادی قارا باختیم ، یاشام ایندی منه قارا گلدی ، یاشاییرام
زحمت ایله ، چتینلیکله ، ذیللت ایله ، داها گئدمک اوچون قیچیم یوخ ، ییخدین سن منی ، منه قنیم اولدو یوللار ، پریشان اولوبدور
جانیم ، کسیلدی داها ایختییاریم ، سارالیب سووولوب گوللریم ، ایچیم ، اونودا اولدور گورمسین گوزوم .
سیسیانوف : یوخ ، او اولملی دئییل .
ابراهیم بیگ : بیلیرم حتمن اونا سوز وئریبسن منیم یئریمده قالا .
سیسیانوف : سوز وئرمیشدیم ، آمما ، بیزیم اوزوموز اوچون قانونلاریمیز وار ، او اوز باباسی ابراهیم خلیل خانا خیانت ائیلدی نئجه بیزه ائیلمسین ؟
ابراهیم بیگ : نه اولدورورسن نه تاختا میندیریرسن ، بو نئجه قانون ؟
سیسیانوف : اونو سیبری یه یوللامالییام ...
ابراهیم بیگ : بورالار کیمه قالار ایندی ؟
سیسیانوف : سنه سوز وئرمیشم ، اوستونده وارام ، ائرمنیلرله دولدوراجاغام بورالاری .
ابراهیم بیگ : عباس میرزا ایله آس اربایجانین ایری آنانین تورک ارنلری قویماز بویله اولسون ...
سیسیانوف : ایری آنانین تورکو آزالا گرک ، آراس چاییندان اوسته بیزیم اولاجاق ، عباس میرزادا بونا بیر ایش گوره بیلمز داها ، انگلیس ایله روس
بوندا سوزبیرلشیبلر ، گور نه زامان سوز وئردیم سنه .
ابراهیم بیگ : کوتو دونیا سنین اعتیبارین یوخ ایمیش ! فلک ائتدین تاجی تاختیمی تاراج ، بیر سویله گوروم خانیمانی نئیله دین ؟ ویران قویدون
قاراباغی ، اولوم اولسون سنه فلک ! ایندی هانسی بولبول اوخویار قاراباغ شیکسته سینی ؟
آشیق قاراباغ شیکسته سی اوخویور .
آشیق : ابراهیم بیگ اولدو گئتدی سون ائوینه ، اونون عباس میرزا ایله دویوشو بو اولکه یه چوخا باخدی ، زاوال گتیردی باشینا .
یهود : بنگار کاتب ، قاراباغ شیکسته سینی یاخچی اوخودون آمما .
آشیق : ایندی اورالاردا کیم اوخویار بیزیم هاوالاری ؟
یهود : اوخویان واریمیش بوندان قاباق ؟
آشیق : چوخلاری . 6
یهود : سای .
آشیق : یاشاسین یوردومون تورک آشیق لاری ، تورکی شاعیرلری ، تورک اوخوینلاری ، شعردن موسیقیدن سوز آچیلاندا جوشغون سئل تک دالغا
ووروب داشارام ، جوشارام ، آخارام سولار کیمی ، چایلار کیمی ، سیزه دئملییم قاراباغ موسیقی سیندن ، شعریندن ، گوزل شاعیریندن ،
موسیقی ساحصینده قاراباغ شیکسته سیندن دئملی یم ، بیرده قاراباغلی شاعرلردن آشیقلاردان شعر و موسیقی ساحصینده اوخویوب ایش
گوسترنلردن سوز آچماق گرکدیر منه ، آدلارین دئسم کاغیذلار توتماز ، ملاپناه واقف ، میرمحسن نواب ، قرهباغلی صفی قلیخان واله ،
خورشید بانو ناتوان ، آشیق پری ، کربلایی صفی محمد اوغلو ، آشیق حسین جعفر اوغلو بوزآلقانلی ، آشیق میرزا ، آشیق شمشیر قربان اوغلو
، بویوک آشیق صادق جان آدلانان صادق اسد اوغلو ، قرهباغلی علی عسکر ، خراط قلی ، حاجی حوسو نفتعلی اوغلو ، مشهد جمیل
امیراصلان اوغلو ، محمد مشهدی خلیل اوغلو ، حسین اوغلو کربلایی لطیف ، مشهد عیسی ، جبارقاریاغدی اوغلو ، حمید امامقلی اوغلو ،
اسلام عبدل اوغلو ، صمد اوغلو آدیگوزلوف ، خان شوشینسکی آدلانان اسفندریار اصلان اوغلو جوانشیروف ، اشرف جلال اوغلو عباسوف ،
ثریا صدرالدین قیزی قاجار ، سلیمان ایوب اوغلو علی عسکروف ، ابوالفتح اسد اوغلو علیف ، فکرت مشهدی جمیل اوغلو امیروف ، ذاکر جواد
اوغلو باقروف ، خانلار محمد اوغلو حقوردیف ، سلطان اسماعیل اوغلو حاجی بیگوف ، عاشیق بستی ، افراسیاب بدل بیگ اوغلو بدل بیگوف ،
بولبول آدلا آدلانان مرتضی مشهدی رضا اوغلو محمدوف و بویوک اوزئییر عبدالحسین اوغلو حاجی بیگوف ایله قارداشی ذوالفقار ، یاددان
چیخانی چوخ ، روحلاری باغیشلاسین گلمسه آدلاری دیلیمه ، علی آقا واحید دئییر ،
یاشاسین قیرمیزی شهرتلی سووت قانونی / بو سخاوت نئچه مین حاتم دورانه دیر / قیلدی هر یئرده بنا موسیقی مکتبلرینی / نغمه نین
فایده سی ایندی هر انسانه دیر / خلقیمیز موسیقی علمین اوخویور مینلرجه / اؤلکه میز چون بو شرف مهر درخشانه دیر / موسیقیله منی
دفن ائیله سلر واحد اگر / قبریمین تورپاغی مین روضه رضوانه دیر .
یهود : کئچن کئچیب گئدیب ، بوگون سیزین دئییل آمما قاراباغ ، بنگار کاتب .
آشیق : یاشامین ایلک گونونده بیزیم اولدو ، اولماسادا بوگون بیزیم ، یاشامین سون گونونه قدر بو توپراقلار بیزیمدیر .
یهود ایله یازار چیخیر ائشیه .
خوجالیدان باش گؤتوروپ قاچان اینسانلار یورقون دوشوب اوتورورلار .
آنا : بالا وای / بال یئمه دیم ، بالا وای / چؤپ ییغدیم یووا قوردوم / اوچورتمادیم بالا ، وای !
آشیق : وئرن سن / آلان سنسن ، وئرن سن / گاه ائولر بزه دیرسن / گاه ائدیرسن ویران سن !
اوشاق قیز : من گئتدیم ، آنام قالدی / اودوما یانان قالدی / نه دونیادا گون گؤردوم / نه بیر نیشانام قالدی !
آشیق : دوزولو یاتاقلاری / جئهیز دولو بوخچاسی / قییمتلی البیسه سی / ترک ائتدی ، بیزده قالدی !
آنا : باغچادا باریم قالدی / هئیوایلا ناریم قالدی/ ائی ظالیم ، غدار فلک / من سنه نئیله میشدیم / بئشیکده کؤرپه بالام / یاتاقدا یاریم قالدی !
آشیق : دوه لر دوزده قالدی / یوکو تبریزده قالدی / بالام باش آلدی گئتدی / بالاسی بیزده قالدی !
گلین : قیزیل گول هشم اولدو / درمدیم هشم اولدو / یوردومدان آیریلالی / آغلاماق پئشم اولدو !
آشیق : گئدیرم ، اؤلکه ، سندن / قورخوم یوخ یول کسندن / گل بیر ده گؤروشه لیم / آیریلدیم بلکه سندن !
آنا : یات ، بالا ، گؤزونو یومماغی اؤیرن / بوشو دولو کیمی اممگی اؤیرن / دونیا سود گؤلودو ، گؤرونمور گؤزه / یاتیپ سود گؤلونده چیممگی اؤیرن !
آشیق : یات ، بالا ، بوش یئره اؤزونو یورما / آغلاما بوش یئره ، سودوموز آزدی / بوشلوغو بو بویدا باشا دوشمه سن / باشین دا بو بویدا هئچ
آغریمازدی !
آنا : هئچ سنین عاغلینی کسدیرمک اولمور / هئچ سنه سییاست یئریتمک اولمور / بیزی بوش عؤمورنن یاشاتماق اولور / سنی بوش دؤشونن
کیریتمک اولمور !
آشیق : به اونون اوز آناسی یوخ سود امدیره اونا ؟
آنا : ناموسونو قوروماق اوچون اؤزونو قایادان آتدی !
آشیق : بویله احوالا هئچ کیمسه بیر ایش گورمویجکدیر ؟
هاممی : دوشمن یامان آمانسیزدیر !
آنا : نئیله مه لی ؟
آشیق : دیشیمیزله داش قیرمالی !
هاممی : هانی بیزیم او گوجوموز ؟
آشیق : اوندا آتا بابالارین شرفینی دوشمنه می تاپشیرمالی ؟
هاممی : یوخ ، یوخ ، اولوم بوندان یاخچی ... 7
آشیق : آتا بابالاریمیز بویله گونلرده ، یوردلاریندان ال اوزمویوبلر ، عومور بویو بو اولوب سوزلری ،
عزیزیم ، سؤزه قالدی / بیر شیرین سؤزه قالدی / یاد قووولدو داغلاردان / یورد یئنه بیزه قالدی !
هاممی : سوزلرین دوز ، آتا آنالاریمیز بویله روزیگار کئچیردیبلر ، بیز نئیلملییک ؟
آشیق : ایندیده بیزیم سیرادیر ، بیزده گرک یئنیدن ال اله وئرک ، بو توپراقلاری تانری بیز اوچون یارادیب ، ائرمنیلر بیزیم ابدی دوشمنلریمیز
اولماسادا ایندی بیزه کوتو دوشمندیرلر ، بوگون قاچماق بیزه گرک دئییل ، ائرمنلیلرله ساواشماق ایسه موقدس وظیفه میزدیر !
هاممی : بویله دیر ، بویله دیر ...
آشیق : بو پیس حالدان قورتولماساق نه سونگولنن کؤرپه لرین ، نه ناموسونا تجاووز ائدیلمیش آنا باجیلاریمیزین ، نه ده اوغروموزدا جانلارینی قوربان
وئرن شهیدلرین روحلاری بیزی باغیشلاماز ، دوشمنلرله ساواشا وارمیسینیز ؟
هاممی : ساوالاندا تؤکولن داشلاری دیندیر دانیشارلار / سالسا آشیق نفسین کوللارا آلیشارلار / ده ده قود سازی چالسا / دلی دومرول باش اوجالدار /
بلی البته کی یولداش باشینی یولداش اوجالدار / سسله آشیق سازی چالسین / سسیمیز بیرده اوجالسین / قوی وئره ک سس سسه با هم
اوخویاق بیرده کوراوغلو دلیسیندن / هجرین قوچ نبی سیندن / اوکی ظالیملری مظلولارین اوستونده ازردی / او کی آسلان کیمی داغلاردا
یاتیب باغدا گزردی / اوخو عاشق اوخو / گوچ آلاق قوی دلی لردن / باج آلاق اجنبی لردن .
آشیق : ایندی چاغیرمالییک کوراوغلونو ...
هاممی : کوراوغلو .
آشیق : ایندی هر کیمسه کوراوغلو اولمالیدیر .
هاممی : کوراوغلو .
زوری ایله ائرمنیلر بیر تابوتی گتیریرلر .
زوری : من ائرمنستانلی زوری بالایانام ، شاعیرم ، یازارام ، بابالاریمیز کیمی روحوموزو گویلره اوچورتماق اوچون تورکلری دارماداغین ائتدیک ، ایندی
سیزدن بیر اولو گتیرمیشیک گوسترک نئجه داغیلدا بیلریک ، باخین و عیبرت آلین ، بو توپراقلار بیزیمدیر .
قاراباغ اهالیسی شهیدین تابوتون دوره لییب کوراوغلونو چاغیریرلار .
هاممی : گوراوغلو ، گوراوغلو ، گوراوغلو .
شهید تابوتدان چیخیر ،
اونو یاندیریب و بدنین داغیلدیبلار .
پایان .
92.08.15
آس اولدوز . آس اربایجان . ایری آنا .
8