سویوخ ...

سویوخ  اولور  هاوالار 

قیش  گه لیر   انگار   

یاواش یاواش

ایستی  بیر  نه فه س  جانیمی  قیزدیرسا  نه  اولار ؟ 

هانی  آمما ...

متن فیلمنامه : آسلان کیشی ...

گئجه . ایچری . آسلان کیشینین ائوی .

ترلان خالا _ قیرخ یاشیندا _ شامین قابلارین ییغیشدیریر .

آیدین _ ییرمی دورد یاشیندا _  اوتوروبدور تئلویزیونونا باخیر .

آسلان کیشی _ قیرخ سکگیز یاشیندا _ دایانیبدیر یاستیغا و سیگار چکیر .

ترلان خالا             آی کیشی بیر دور ال آتدا .

آسلان کیشی          اوغلان دور آنایان کومک ائیله .

آیدین                   تئلویزیونا باخیرام ، نود باشلانیر .

آسلان کیشی          آی هوو ، بوتون زیندیگیمیز اولوبدور فوتبال ، دور قوجا آروادا بیر کومک ائیله گوروم .

آیدین میتدانا میتدانا دورور آیاقا و آناسینا یاردیم ائدیر .

نود باشلانیر .

فردوسی پور علی دائی ایله دانیشیر .

آسلان کیشی چکیلیر قاباقا تئلویزیونا باخیر .

دالیسی . توپ مئیدانی . یوخو .

آسلان کیشی بارسلونون پالتاریندا مئیداندا توپ اویناییر .

ترلان خالا گوزل پالتارلارلا اونو تشویق ائیله ییر .

آسلان کیشی قول وورور .

آسلان کیشی قاچا قاچا گلیر و ایسته ییر مرببیسینی قوجاقلی یا ،

مورببی اوزونو دوندریر اونا ساری ،

آسلان کیشی باخیر او  اوغلو آیدیندیر ، قوجاقلاشیر اونلا .

کمالوند الین قویور آسلان کیشینین چیینینه .

آسلان کیشی دونور و کمالوندی گورور .

کمالوند تیراختورون پالتارین وئریر آسلان کیشی یه .

دالیسی . آسلان کیشینین یوخو اوتاقی .

آسلان کیشی  دیسکینیر و یوخودان  دورور .

ترلان خالا یوخودا بیر سوقابینی گوتورور توتور آسلان کیشی اولان طرفه .

آسلان کیشی یوخولو یوخولو سوقابینی آلیر چکیر باشینا و بیرده یاتیر .

                                                        تیتراژ : تیراختور ماهنیسی  .

گوندوز . ایچری . آسلان کیشینین ائوی .

آسلان کیشی ناماز قیلیر .

آسلان کیشی          ایکی روکعت صوبح نامازی قیلیرام ...

ترلان خالا دستناماز آلیر .

                                                                1

دالیسی . هامان یئر .

ترلان خالا تلفن لا دانیشیر .

ترلان خالا         الوو ، سالام اوغول ، نئجه سن آیدین بالام ، ساغ اول ننه ، آتان ؟ هن ائوده دیر ، ایشین وار !؟ چاغیریمدا .

ترلان خالا گوشینی قویور میزین اوسته .

گئدیر اوتاقا ساری .

آسلان کیشی اوتاقدا اوتوروبدور سازینین سیملرین باغلاییر .

ترلان خالا گیریر اوتاقا .

آسلان کیشی اوتاقدان چیخیر ائشی یه ، گلیر و گوشینی گوتورور .

ترلان خالا آسلان کیشینین دالیسیجاق گلیر و دورور میزین یانیندا .

آسلان کیشی         الوو ، سالام اوغول ، نئچه ؟ هارادان آلیم ؟ آی هوو ، بو دانیشگاهین خوابگاهی یوخدور سن ائو توتورسان ؟ هان ؟

                         گورومدا ، زنگ وورارام ، یاخچی ، خوداحافیظ .

آسلان کیشی گوشینی قویور یئره و باخیر حه یه ته ساری و گئدیر فیکیره .

ترلان خالا            نه دئییردی ؟

آسلان کیشی         نه دی یه جخ ! پول ایسته ییر ، ائو توتور یولداشلاریلا .

ترلان خالا            ننه ن  اوله یدی بالا ...

آسلان کیشی ترلان خالایا باخیر .

آسلان کیشی         گوره ن گئتدی ایش دالیسیجاق ؟ گئدسه یدی مندن نیه پول ایسته ییردی آخی ...

ترلان خالا            درسی چوخدوردا حتمن ، سنده اونو چوخ قیناما ، سیخما بوغما وئرمه .

آسلان کیشی          یاخچیدیر واللاه ، او منی سیخیر یا من اونو ؟ ایندی پولو هارادان تاپیم ؟ تزه شهریه سین وئرمیشدیم .

ترلان خالا             یوخوندور ؟

آسلان کیشی          سن ناهاری یین فیکیرینده اول ، گئدیب تاپاجامدا .

ترلان خالا             گئد یاغیبدان آل .

آسلان کیشی اوزاقلاشیر و گئدیر اوتاقا ساری .

آسلان کیشی           باجاناقدان قوهوم اولماز آرواد ، نئچه سیرا دئمیشم من یاغیبدان بورج آلان دئییلم ، اوزوم تاپارام .

ترلان خالا سوپورگه نی یئردن گوتورور .

ترلان خالا              اوزون بیلرسن .

آسلان کیشی           یوخوسون گورموشدوم ها .

ترلان خالا باخیر آسلان کیشی اولان طرفه .

گوندوز . ائشیک . دانشگاه .

آیدین سولماز _ ییرمی ایکی یاشیندا _ ایله اوتوروبلار دانیشگاهین محوطه سینده  صندلی اوسته .

 آیدین             هرندن قاباق پولدور پول .

 سولماز            بیر ائوین اولسایدی .

 آیدین              باشلادی .

 سولماز            به پولو نئیله ییرسن ؟

 آیدین              اوولده گرک بیر ماشین آلام .

 سولماز             هن دولانماقدا خوشدور .

 آیدین              اوستونده قیرمیزی بویایلا یازاسان تیراختور دوشسن خییاوانلارا ، اونا چیراغ وئرسن بونا چیراغ وئرسن .         2

 سولماز             شیشه نی چکسن آششاغی یا ، بوراجاق چیخاسان ائشی یه میلله ته ال ائیلیسن .

آیدین سولمازا بوزاریر .

آیدین              به سنین کلاسین یوخدور ؟

            سولماز            سن چیراغ وئرنده خوشدور ؟

سولماز دورور آیاقا آیدینه بوزارا بوزارا گئدیر .

گوندوز . ائشیک . خییاوان .

آسلان کیشی ساز الینده خییاواندا گئدیر .

نرمان _ ییرمی ایکی یاشیندا _  و  قفر _ ییرمی بیر یاشیندا _  موتور اوسته کئچیرلر و آسلان کیشی یه ال قووزاییرلار .

آسلان کیشی دالدان اونلاری چاغیریر .

نرمان موتورلا دوور وورور قاییدیر و آسلان کیشینین قاباقیندا ساخلاییر .

نرمان                  جانیم آسلان دائی ؟!

قفر                     آسلان دایینین کئفی ؟ ( ال آتیر سازا ساری )

آسلان کیشی          ال وورما بونا ، بو یوز سیرا ،  نرمان موعامیله ن واریدی دوزلدی ؟

نرمان                   هانسی موعامیله ؟

قفر                      آیدین پول ایستی ییب یئنیده ؟

نرمان                   آهان آلمالارین موعامیله سی ؟ یوخ واللاه ، دده نده کیشیدیر ، ایندی کی پولا گئتمیر آلما .

قفر                      آسلان دایی او آیدینی ساخلاماق حضرت فیل ایشیدیر ، آی جانیم بیربئله ده پول خرج ائیلمک اولار ؟ نامرد اوغلو .

آسلان کیشی          جئبیندن بیرقیران چیخمی یاجاق جاماهاتین دده سین نامرد ائیلمه ، گئد .

آسلان کیشی یولا دوشوب گئدیر .

نرمان                    دده نده کیشیدیر .

دالیسی . ائشیک . سولطان عمینین قهوه خاناسینین قاباقی .

آسلان کیشی قهوه خانانین قاباقیندان کئچیر .

قهوه خانا بوشدور ، سولطان عمی _ آتمیش یاشیندا _ بیر تخت اوسته اوزانیب یاتیبدیر .

آسلان کیشی باخیر و باشین توولاییر و یولون توتور گئدیر .

آتابی _ اللی یاشیندا _  آسلان کیشینین قاباقینا چیخیر .

آسلان کیشی :          سالام آتابی .

آسلان کیشی یولون توتور گئدیر .

آتابی :                    هارا به ؟

آسلان کیشی            ( قهوه خانانی گوستریر ) بوشدور ، گئدیم بیر پارکا .

آتابی                      چال سازی بلکه سسی جاماهاتی چکدی گتیردی .

آسلان کیشی             قهوه خانایا گلن کیمدیر آخی ؟ آخشاملار یالان دوغور نئچه نفر اولور ، گئدیم .

آتابی                      گل اوتور منیم توکانیمدا بیر باشماقلاری یان واکس ووروم .

آسلان کیشی             سنینده مندن سونرا موشترین اولماز کی .

آسلان کیشی باشماقلارینا باخیر .

آتابی یولا دوشور  و آسلان کیشی اونلا گئدیر .                           3

دالیسی . آتابیین توکانی .

آسلان کیشی اوتوروبدور صندلی اوسته .

آتابی ساماواردان چای توکور .

گوندوز . ایچری . خوابگاه .

آیدین اوتوروب تخت اوسته ، چای ایچه ایچه موبایلا دانیشیر .

آیدین            بو سیرا فرق ائیلی ییر ، دئییمدا ، قولاق آس فرقین دئییمدا ، آخی ماجال وئر ، آی هوو ، آی قیز قولاق وئردا ، باخ من

                   گئتدیم تی شرت آلدیم ، تیراختوروندا بایراقین آلدیم ، قولاق وئر بیر ، بابا فوتبال ندیر ؟! بونلاری آپاریرام ساتام ، باخ

                   آخشام بیری قالماز ، قالسا نه دئسن دئدا ، حئسابلامیشام بوتون اویونلاردا بو ایشی گورسم  میلیاردئر اولاجام ، بابا نه

                   چاخماقی ! میلیونئر کی اولا بیلرم ، ایناندا سوزه ، ویی ، دئییره م ایندی پول بوندا ، سن اینانمادا ، آتام یوللویاجاق ،

                   دانیشمیشام ، دئدیم اونا ائو توتاجام ، یالان دئدیمدا ، بونون پولونو بورج آلمیشام ، قازانسام اونون پولونون اوسته قویوب

                   وئرجمدا ، ایندی گلیرم خوابگاهین قاباقیندا اول ، گوروم گئدیم ، ایستیرم سنین شانسیلا گئده م ، به سن منیم شانسیم                 

                   دئییلسن ؟ ساتیلماسا آتاما نه جوابابیم وار ! ؟ سن نیه منفی باخیرسان ؟ ساتیلاجاق ، بیلیرمدا ، آمان سنین الیندن ، گلیرم .

گوندوز . ایچری . آسلان کیشینین ائوی .

آسلان کیشی و ترلان خالا ناهار یئریرلر .

آسلان کیشی        ال لرین آغریماسین ، اینصافن یئملی پیشیریبسن .

ترلان خالا           سن نه زامان پیس ناهار یئییبسن کی ؟ نوش جان .

آسلان کیشی         اینصافن هئچوقت ، ایشین دوزدور آرواد .

ترلان خالا            نه فایدا .

آسلان کیشی         نئجه ؟

ترلان خالا           کئشگه آیدینده بورادا اولاردی  بیر تیکه یییردی ، بالام آللاه بیلیر ناهار یئییر ، یئمیر ، آلاه بیلیر واللاه .

آسلان کیشی        یوخ یئمیر .

ترلان خالا           کیشی دوغوردان دئییرسن ؟

آسلان کیشی        آرواد آخی ناهار یئمسه به نه جور قالیر ؟ هاوا یئییر ؟

ترلان خالا           ننه ن اولسون بالا ، ننه ن اولسون ، آجیندان اولمسه یاخچیدیر .

آسلان کیشی باشین توولاییر و ترلان خالا اوزونه توتان تیکه نی اونون الیندن آلیر آپاریر اوز آغزینا ساری .

دالیسی . ائشیک . سولمازین خوابگاهینین قاباقی .

سولمازین الی آیدینین الینه بیر نایلون وئریر .

           آیدین             بو ندیر ؟

             سولماز            کوفته .

 آیدین              واللاه ساغ اول ، نئیله ییم .

 سولماز            آپار مئیداندا توپ عوضینه شوتده ! ناهار کی یئمی ییبسیز  آپارین یئییندا ، آللاه توتوب .

 آیدین              بیر سوز دئمدیم کی سوزه باسیرسان بیلمی .

 سولماز            تبریز کوفته سیدیر ها .                         4

 آیدین             آی جان .

 سولماز :          ال له ریم آغریماسین .

 آیدین :            ال لرین آغریماسین .

 سولماز            نوش جان ،،، ایندیدن گئدیرسیز ؟

 آیدین              هله بئوقتده اولوبدور ، بایراقلاری گرک ساتاق .

 سولماز            دئییره م بیزده گلخ ؟

 آیدین              هارا ؟

 سولماز            دئییرلر سهندین یئدی یارمئیدانی دولور قیزلا .

 آیدین              کیم بو یالانلاری دئییر ؟ میه قیزلاری قویارلار ورزیشگاه ؟

 سولماز            یاخچیدا نیه به وورورسان ، گلمدیخ ،،، بلکه ده گلدیخ .

 آیدین             یئری گوروم ایچری ، یئری .

سولماز بوزارا بوزارا گئدیر ایچه ری یه .

آیدین گوزله ییر سولماز گئدیر ایچه ری یه و سونرا نادیرله _ ییرمی ایکی یاشیندا _ کی اویاندا دوروبدور یولا دوشورلر گئدیرلر .

دالیسی  . ائشیک . خییاوانلار .

آیدینله نادیر خییاواندان کئچیرلر .

ماشینلار چیراغلارین  یاندیریبلار و  تیراختورون قیرمیزی بایراقلاری  شیشه لریندن  چیخیب ائشی یه .

جاوانلار بایراقلاری  دولویوبلار اوزلرینه گئدیرلر .

آیدین و نادیر گیریرلر بیر توکانا .

نئچه جاوان بایراق ال لرینده ماشینلاردان توشورلر و خییاوانین قیراغیندا باشلاییرلار اویناماقا .

آیدین و نادیر بایراقلارین بسته لری ال لرینده توکاندان چیخیرلار ائشیه .

دالیسی . ائشیک . سهند یئدی یار مئیدانینین قاباقی .

سهندین قاباقی شولوخدور .

میللت دسته دسته کئچیرلر ، دسته لرین بایراقلاری اویناییر ، بیر سیراسی پارچادا اوز شهرلرینین آدین یازیب آچیبلار و اونون دالیسیندا گئدیرلر : اورمو ، مرند ، میانا ، اردبیل ، تیکاب ، پلدشت و ...  .

چوخلاری گئدیر ، چوخلاری گلیر ، نئچه سیرا دوروب .

بیر اوتوبوس آششاغیدا ساخلاییر ، اوستونده یازیلیبدیر : سولدوزلو .

اینتیظامی نیرولاری هریئرده دوروب و کنتورولا مشغولدورلار .

بیر زورناچیلا دونبک چالان اوتوبوسدان دوشورلر و چالیرلار .

اوتوبوسدان دوشن سولدوزلولار  ال اله وئریب یاللی توتوبلار .

میللت یاللی گئدنلری تشویق ائیله ییر .

نئچه ایگیت باشلاییرلار اویناماقا .

آیدین و نادیر بسته لر الینده گلیرلر و بیر قیراقدا بساط قورورلار .

بایراقلار ساتیلیر .

ایگیت و گنج اوغلانلار بایراقلاری آلیرلار ، بیر سیراسی اوزلرینه دولویورلار یادا بوینولارینا آتیرلار ، بیر سیراسی آغاجا سالیب اللرینده اوینادیرلار .

ایکی نفر اینتیظامی مامورو گلیر و آیدینله نادیرین بساطینداکی بایراقلارا باخیرلار .                                                               5

آیدین          سرکار بویور ، بیرینده سیز آلین وورون ماشینی ییزین اوستونه .

نادیر           جاماهات گل آپار ، گل قالمادی تیراختور بایراقی .

افسر _ اوتوز یاشیندا _ بیر بایراق گوتورو و وئریر گروهبانا .

افسر            آچ گوروم بونو .

آیدین           سئچمه دئییل ها .

افسر             ساتماقیندا اول .

گروهبان _ ییرمی دوققوز _ دووروبره ییغیشان آداملاری داغیدیر و بیر بایراقی گوتوروب آچیر افسره وئریر .

افسر            ( گروهبانا ) ییغیشدیر .

آیدین           نه یی ؟

افسر             خالامین چارقادلارین !

نادیر             نئجه ییغیشدیرا بیلرسیز کی ؟

گروهبان بایراقلاری ییغیشدیریر .

افسر              نئجه سی پاسگاهدا بیلله نر .

نادیر              جیناب سروان هاممی ساتیر بیزده بیری .

افسر              اونلارادا  باخمیشیق .

آیدین              اونلار ساتیردا ، ییغیشدیران یوخدور کی .

افسر               بونلار فرق ائیله ییر .

نادیر               نه فرقی ؟

افسر               چوخ دانیشیرسان ها ...

نادیر               گرک بیلمدا ، پول وئرمیشمدا ...

افسر               اونلارینکیندا تیراکتور یازیلیبدیر ، انگلیسی سی ایله ، بونلاردا تیراختور یازیلیب ایکس ایله .

آیدین              تیراکتور آیری تیمدیر ؟

نادیر               تیراختورلا تیراکتورون فرقی وار ؟

افسر               توشون یولا پاسگاهدا دانیشاریخ .

آیدین             جیناب سروان بیز دانشجویوخ .

نادیر               بونلارادا بیر عالم پول وئرمیشیخ .

افسر               بونلاری ساتماخ جورمودور ، گئده غین .

افسر آیدین و نادیری یولا سالیر آپاریر .

آیدین              جورمودور ؟! نادیر بو نه دئییر ؟

نادیر                وای دده م ، بدبخت اولدوخ آیدین .

آیدین              قورخما ، یاخچی اولار اینشالاه .

نادیر                پوللار باتسا دده م ائوه قویماز منی .

آیدین              سوزومون اوسته وارام ، شریکیخ .

نادیر               دده ن پول وئرمسه ؟

آیدین نادیره باخیر .

آیدین              دئدیخ میلیونئر اولاجاییخ ، آی ...

نادیر باشین توولاییر .   

          گروهبان           میلیونئر آقالار توشون یولا گورخ ...          6

دالیسی . اینتیظامی ماشینینین ایچی .

آیدین و نادیری ماشیندا آپاریرلار .

دالیسی . یول .

نادیر گوزلرین یوموب ، باشی اللرینین ایچینده دیر .

آیدین یولا باخیر .

داغلارین اوستونده قیزلار تیراختورون بایراقی اللرینده گئدیرلر .

آیدین نیگران سولمازی آختاریر .

آیدین            نادیر قیزلارا باخ .

گروهبان         اوغلان گوزویون یوم پیس ایشدیر .

آیدین            اونلاردان بیری سولماز اولمویا ...

نادیر باشین توولاییر .

دالیسی . سهند یئدی یارینین قاباقی .

سولماز و نئچه قیز اوغلان پالتاریندا اینتیظامی نیرولارینین الیله توتولوبلار و ماشینا میندیریلیرلر .

میلله ت هوی چکیر .

اینتیظامی نیرولاری میللتی ورزیشگاها ساری یولا سالیرلار .

آخشام . ایچری . قهوه خانا .

میلله ت  سولطان عمینین قهوه خاناسیندا اوتوروبلار و تیراختورلا  اوبیری  تیمین اویونونا باخیرلار .

آسلان کیشیده فوتبالا باخیر .

نرمان و قفر قهوه خانانین اورتاسیندا اوتوروبلار چاهارپایا اوسته و توخوم چیدلیا چیدلیا تئلویزیونا باخیرلار .

سولطان عمی  _ اللی یاشیندا _ نرمانین توخوم چیدلاماغینا باخیر .

قفر سولطان عمینین غضبلنمغین گورور و نرمانی دیرسکلی ییر .

قفر                   اوغلان نرمان توخومون قابیغینی توکمه یئره .

نرمان                 سنه نه دخلی وار ؟

قفر                   ( یاواشجا نرمانین قولاقینا ) اده سولطان عمی گوز قویوب بیله میزه ، باخ ، هانی سیغارآلتیسی به ؟

نرمان                 دور تاپ گتیر ، قویماز باخاخ ها .

قفر                    گلدو ، گلدو ، آهان آهان ، گل ، گل ، آی جان .

سولطان عمی        اوغلان نه های قویوبسان سن ؟

قفر                    گل ، گل .

نرمان                  آی جان تیراختور ، یاشاسین ، جان بیر هئچ .

قفر                    یاشا ، گوردون کررارین پاسین ؟

نرمان                 دده سیده کیشیدی واللاه ...

آسلان کیشی        هارالیدیر ؟

قفر                   عراقلیدیر .                                   7

نرمان                  کیشی اولمویان یئرده البتده .

آسلان کیشی         یاخچی اویونچودور ائیله بیل یوخ ؟

سولطان عمی چای گتیریر نرمانا وئریر و توخوملارین قابیغین اونا گوستریر .

نرمان                  ایندی ییغارام ، قفر ( قابیخلاری گوستریر )

قفر                     یاخچی ، تئلویزیوندا بیللنمیر آسلان دایی ، گئدسن سهنده ، اورادا باخاسان ها ، گور نئیله ییر .

نرمان                  دوز دئییر ،، آهان آهان ، آز قالمیشدی بیرینده وورا ، اوغلان قفر دئدیم او چوبوق آلتین وئر توخوملارین قابیغین

                         توکوم ...

قفر دورور یئریندن و گئدیر میز اوستوندن سیغارآلتیسین گتیریر و اوتورور چاهارپایا اوسته .

قفر                     آسلان دایی آدامین ایکی قولاقی اولمویا ، قولاقی ها فقط ، ائشیده ، بوراسین دئییه م ، قولاقی اولمویا آمما

                          تیراختوردا توپ اوینویا .

نرمان                   آدامدا گره ک شانس اولا ، من پیس اوینویوردوم ؟ سنله یم ، من پیس اویونچویدوم ؟

قفر                     یوخ واللاه .

نرمان                  دده نده کیشیدی ، شانسیم اولسایدی ایندی تیراختوردا توپ ووروردوم .

سولطان عمی        یوخ ایندی مئسی ایله ایتالیانین تیمیندیدین ، چهارپایالاری قویون یئرینه ، آدام کیمین اوتورون صندلده دا .

آسلان کیشی         مئسی کی ایتالیادا اوینامیر اسپانیانین تیمینده دیر .

قفر                    آرژانتین ...

آسلان کیشی        اوغلان قفر اسپانیادادیر ...

نرمان                 اسپانیادا بارسلون تیمینده اویناییر ، اوزو آرژانتینلیدیر .

آسلان کیشی        او مارادونادیر .

قفر                    بودا اورالیدیر ، آهان ، آز قالمیشدی ها ...

سولطان عمی        اوغلان دئدیم صندل اوسته اوتورون .

قفر                    صندل حال وئرمیر ، اوزاقدیر .

آسلان کیشی         مورببیلری کیمدیر ؟

نرمان                  دده سیده کیشیدیر ، توپ بوواردیولا ...

قفر                     پپ گوواردیولا .

نرمان                  دده نده کیشیدی .

آسلان کیشی         بو کی ایرانلیلارا اوخشاییر هاراسی پوپ اولا بیلر ؟

نرمان                  بونو دئییرسن ؟ بو کمالونددیر ، آبادانلیدیر .

قفر                     لردور .

نرمان                  دده سیده کیشیدی !

آسلان کیشی          لر آبادانلی اولماز کی !

قفر                     نودده بیللندی لردور ، آبادانا ربطی یوخدور ، بویون دوشنبه دیر ؟ گورسدجک گورن بونو ؟

نرمان                  دده سیده کیشیدیر کمالوندین ، قفر نه قدر قالیر قورتولا ؟

قفر                     ایضافه توتدو ، اوش دیقه .

نرمان                  داور دیققت کن دئسیدیلر توتمازیدی ، کئشگه اورادا اولاردیم ، اودسا لیگده اوول اولاجاق ؟

قفر                     یوخ هله ، بو مین سیرا ...

نرمان                  دده نده کیشیدیر .

تیراختور اودور .                                                       8

قفر و نرمان دورورلار آیاقا چاهارپایالاری آلیرلار ال له رینه اویناییرلار .

سولطان عمی گه لیر چاهارپایالاری آلیر ال له رینده ن و اونلاری اوتورور ائشی یه .

آسلان کیشینین موبایلی زنگ وورور .

آسلان کیشی         الوو ، الوو ، سس گلمیر ، الوو .

سولطان عمی        بیلمیرم نیه بورادا خط وئرمیر ، چیخ ائشی یه .

دالیسی . خییاوان .

میلله ت  توکولوب ائشی یه و شادلیق ائیله ییر .

آسلان کیشی قهوه خانادان چیخیر ائشیه و گوله گوله اونلارا باخیر .  

موبایلی زنگ وورور .

آسلان کیشی        الوو ، هن ؟ آیدین سنسن ؟ هیه ، نه ؟ الوو ، الوو .

ماشینلار چیراغلارین یاندیریب و اویانا بویانا گئدیرلر .

آسلان کیشی موبایلی قویور جئبینه یولا دوشور گئدیر .

نئچه جاوان اوغلان کوچه لرین بیرینده اویناییرلار .

دالیسی . آسلان کیشینین ائوینین قاباقی .

ترلان خالا نئچه آروادیله قاپیدا دوروب کوچه نین باشینا باخیر .

آسلان کیشی کوچه یه گیریر .

گئجه . ایچری . آسلان کیشینین ائوی .

آسلان کیشی یوخودان دیسکینیر و دورور آیاقا .

ترلان خالا یوخودا سوقابین گوتورور توتور آسلان کیشی اولان طرفه .

آسلان کیشی یوخولو یوخولو سوقابین آلیر چکیر باشینا .

تیلفون زنگ چالیر .

ترلان خالا دورور گئدیر گوشینی گوتورو .

     ترلان خالا        الوو ، سلام آیدین بالام ، یا ابوالفضل پاسگاهدان .

آسلان کیشی یئرینده دیک دورور اوتورور .

گوندوز . ائشیک . اورمو تئرمینالی .

اوتوبوسلار گئد گلده دیرلر .

اورمو _ تبریز  اوتوبوسو بیرقیراقدا ساخلاییبدیر .

آسلان کیشی و ترلان خالا گئدیرلر اوتوبوسا ساری .

آسلان کیشی          توککول آللاها ، بیلیط قالمامیشدی .

ترلان خالا             به هارا گئدیریخ ؟

آسلان کیشی          بلکه شایید بیر یئر وئردیدا .

یئتیشیرلر اوتوبوسون یانینا .

موسافیرلر اوتوبوسا مینیرلر .                                             9

آسلان کیشی گئدیر شاگیرد _ اون سکگیز _ ایله دانیشیر .

ترلان خالا بیر اوتوبوسون کولگسینده دورور و دایانیر اونا .

آسلان کیشی دوشوبدور شاگیردین دالیسینا .

  شایید                  آی کیشی یئریم یوخدوردا .

  آسلان کیشی         اوغول واجیب اولماسایدی یالوارمازیدیم کی .

  شایید                  دائی یولدا هم گرک جریمه وئرخ همده ...

  آسلان کیشی         جریمه نی اوزوم وئررم .

  شایید                  راننده نین دفترچه سین آلارلار ، اولماز واللاه .

  آسلان کیشی         یاخچی بیزیم ایشیمیز بوجور واجیب اولا اولا قالاق باخاباخا ؟

  شایید                  دئییرسن سن مین شوفرین یئرینه آروادیندا اوتورسون منیم یئریمده ، هان ؟

  آسلان کیشی         قادایین آلیم منیم ظارافاتا حالیم یوخدور ، اوغلومو تبریزده توتوبلار گئدیرم گورم باشیما نه داش سالمالییام ...

  شایید                  بس دئگینن سابیقه دار دده سی یم !؟

  آسلان کیشی         اوغلان آغزیندان دانیش ، نه سابیقه داری ؟ تیراختورون اوسته توتوبلار بیله سین ؟

  شایید                  تیراختورلا آدام باسدیریب ؟

  آسلان کیشی         تیراختور او تیراختور یوخ کی ، فوتبال تیراختورو .

  شایید                  یوخ دا ؟ نیه ؟

  آسلان کیشی         نه بیلیم واللاه .

  شایید                 نه فرقی وار آخی ، آنجاق تیراختور اوچون توتولوبدور ، کیشی اوولدن دئدا تیراختورچودور اوغلون ، مینین

                          پلیس راهاجاق آپاریم ...

   آسلان کیشی       به اورادان اوتایا ؟

   شایید                اورادا ماشین چوخ اولار آپارسین تبریزه سیزی ، قالان اولماسین ، تبریز حرکت .

آسلان کیشی گئدیر ترلان خالایا ساری .

دالیسی . ایچری . اوتوبوسون ایچی .

اوتوبوس یولدا گئدیر .

راننده تیراختورا اوخونموش بیر ماهنی آچیبدیر .

نئچه ایگیت اتوبوسون اورتاسیندا اویناییرلار .

آسلان کیشی و ترلان خالا لاب دالدا موعذذب حالدا اوتوروبلار بوفه ده اونلارا بوزارا بوزارا باخیرلار .

دالیسی . پلیس راهین قاباقی .

اورمو اوتوبوسو گلیر و ساخلاییر پلیس راهین قاباقیندا .

راننده دوشور گئدیر پاسگاها ساری .

آسلان کیشی و ترلان خالا اوتوبوسدان دوشورلر .

شاگیرد دوشور و اونلاری چکیر آپاریر بیر طرفده آغاج آلتینا .

ترلان خالا بیر داش اوستونده اوتورور .

شاگیرد قاییدیر گئدیر اوتوبوسا ساری .

آسلان کیشی دورور یولون قیراغیندا تبریزین مسیرینده اولان ماشینلارا باخیر و ال قووزاییر .

بیر تریلی ساخلاییر اوستونده یازیلیبدیر : منیم آشکیم قوشچو ، اونون دالیسیندا بیر آیری تریلی ساخلاییر اوستونده            10

یازیلیبدیر : سولدوزلو .

آسلان کیشی یولا باخیر .

علی قره _ قیرخ سکگیز یاشیندا _ عینک گوزونده پلیس راها طرف گئدنده آسلان کیشینی گورور .

            علی قره                سایمازساندا .

               آسلان کیشی          جان ؟

               علی قره               کیشی تانیمادین ؟

               آسلان کیشی          گوزونده کین گوتور گوروم ، سسین چوخ تانیشدی قولاغیما .

علی قره عینکین گوتورور و گلیر آسلان کیشی یه طرف .

            علی قره                قوجا هله تانیمادین ؟ ( اوخویور ) قره قیزین بارماقیندا یمنی ، گل دولاناق داغی داشی چمنی ...

               آسلان کیشی          ( اوخویور )  ترلانیمسان جئیرانیمسان قارا قیز ، گئدیرم قوربته من گلینجک دوز ، سولدوزلو علی قره ، اده کئفین

                             نئجه دیر ؟

   علی قره               خوش گوردوخ آسلان کیشی .

آسلان کیشیله علی قره قوجاقلاشیب اوپوشورلر .

دالیسی . جادده .

علی قره نین تریلیسی جادده ده یول گئدیر .

آسلان کیشی و ترلان خالا اوتوروبلار ماشیندا .

     آسلان کیشی            ترلان بیر بو سولدوزلو علی قره یدی بیر منییدیم بیرده پادگانیدی ، یادش بخئیر سربازچیلیخ  .

                 علی قره                  یادش بخئیر .

                 ترلان خالا               علی آقا اللرین آغریماسین قارداش ، سن اولماسایدین قالاجایدیخ یوللاردا ها ، آللاه اولوب گئدنلری ین

                                             رحمت ائیلسین ،،، دئییره م  اوشاقلاریدا هردن آپاریرسیز اویان بویانا ؟

                 علی قره                  من داها قوجالمیشام ، اوغلان سورور ، بو سیرا  ایشی وارییدی قالدی سولدوزدا من اورمودان آلما وورموشام

                                             تربیزه .

                آسلان کیشی             آللاه ساخلاسین اوغلویون ، سنین کی ده اوغولدور منیم کی ده ...

                ترلان خالا                آی کیشی ناشوکور اولما ، اینشالاه بویوک اولماز خاطاسی .

                علی قره                   آسلان نیگارانچیلیق یوخدور کی ؟

                آسلان کیشی             باش آغری اولمویا دانیشسام ؟

                علی قره                  بو نه سوزدور کیشی ؟ دئگوروم نه اولوبدور .

تریلی یولدا گئدیر .

دنیز قورویوبدور .

آسلان کیشی دنیزه باخاباخا دانیشیر .

دالیسی . ایچری . بازداشتگاه .

آیدین زیندانداکیلارلا جوراب جوراب اوینویور و پوللارین دالبادال اودوزور .

نادیر باشینی توولاییر و گئدیر بیرگوشه ده اوزانیر .

آخشام باشی . ائشیک . کوچه .                                     11

علی قره کاغیذ الینده قاباقدا گئدیر و آسلان کیشیله ترلان خالادا دالیسیجاق .

علی قره بیر قاپینین قاباقیندا دورور و کاغیذا باخیر و سونرا زنگین اوستونو اوخویور .

      علی قره              بودا بویوک آغانین ائوی .

       آسلان کیشی         چالدا قاپینی .

      علی قره               منی نه تانی ییرلار ، گل قاباغا قاپینی اوزون چال ، منده قاییدیب گئدیرم .

       آسلان کیشی          میه من قویارام گئدسن ؟

       ترلان خالا            کیشی میه اوز ائویمیزدیر تعاروفه دوشوبسن آخی ؟

       آسلان کیشی          بویوک آقایلا منیم بوجور سوزلریم یوخدور کی .

      علی قره               آی کیشی دوز دئییردا ، سیز قاپینی چالین گئدین ایچری ، منده گئتدیم ، آسلان شوماره نی کی وئردیم ، بیله مه

                                          زنگ وور ها .

آسلان کیشی باشی ایله جاواب وئریر .

علی قره آسلان کیشیله اوپوشور و یولا دوشور گئدیر .

ترلان خالا قاپینی چالیر .

دالیسی . بویوک آقانین حیاطی .

بویوک آقا _ قیرخ سکگیز یاشیندا _ حیاطدا گلیر قاپی یا ساری .

      بویوک آقا           کیمدیر ؟

      آسلان کیشی        بویوک آقا نین ائویدیر ؟

                بویوک آقا            سیز کیم اولاسیز ؟

                آسلان کیشی         آچ قاپینی گوردا .

                بویوک آقا            جانیم بلکه بویوک آقانین ائوی دئییل آخی دئگورخ کیمسن ؟

                آسلان کیشی         من آسلان کیشی یم ، اورمولو آسلان .

بویوک آقا قاپینی آچیر .

گوندوز . ایچری . انتیظامی پاسگاهی .

افسر نیگهبان _ اوتوز بئش _ اوتاقیندا اوتوروبدور میزین دالیسیندا پرونده یه باخیر .

بویوک آقا ایله آسلان کیشی افسره باخیرلار .

          افسر              تیراختورون بایراقین ساتیرمیش .

        بویوک آقا      جورم دئییل کی بو !

        افسر              ایرانیسی خاییر ، لاتین حروفلا یازیلانین ساتیبدیر ، ترکیه دیلینده .

        بویوک آقا        آی جانیم ترکیه دیلینده خ یوخدور آخی ، تیراحتور دئییرلر اونلار ، بو ایران تیمی تیراختورون بایراقین ساتیبدا .

        افسر              ترکیه نین خی یی وار یا یوخ ایندی گرک گئدسین دادگاها .

        بویوک آقا      جیناب سروان سن اونون بویوک قارداشی راضی اولما توشسون دادگاها بیله سینه سابیقه اولسون ، جاواندیر

                           بیلمی ییبدیر ، آنلامی ییبدیر ، بیر قلط ائیله ییب ایندی ، باخ اونون دده سینه ، بو آدام ایللر بویو سنین کیمی

                               اوغلانلارا حیماسی سوز اوخویوبدور مرزلری ساخلایاسیز ، ایندی ...

           آسلان کیشی     بویوک دایان گوروم ، سوزو بورالارا نی یه چکدین به ؟ قوی گوروم جورمو دادگاها گئدملی اولسا گئدسین

                                       اولماسا کاغاذ وئرریخ آنلامی ییبدیر ، جیناب سروان بو اولاندیر ؟

                  افسر               سوزون یاپیشدی بیله مه دایی جان ، اوتورون گوروم نه ایش گورملی یم .                                       12

قیسسا ندیر ( ییرمی یاشیندا سرباز ) الینده بیر برگه قاپینین دالیندان باخیر آسلان کیشینی گورور ، ایستمیر او گوره بیلسین ، چکیلیر قاپینین دالیسینا و قولاق وئریر .

بویوک آقا قیسسا ندیری گورور و اونون حرکاتینا مشکوک اولور .

قیسسا ندیر بویوک آقانین باخیشیندان اوزون قیراقا چکیر .

دالیسی . ائشیک . پاسگاهین قاباقی .

بویوک آقا ایله آسلان کیشی دوروبلار پاسگاهین قاباقیندا .

آیدین پاسگاهین قاپیسیندان چیخیر ائشیه و آسلان کیشینی گورور گئدیر اونا ساری .

آسلان کیشی اوزون دوندریر و بویوک آقادان اوزاقلاشیر .

آیدین باشین سالیر آششاقایا دورور یئرینده .

بویوک آقا گئدیر آیدینه ساری و اونو قوجاقلاییر و اوپور .

بویوک آقا آیدینی آپاریر آسلان کیشی یه ساری .

بیر کوینه کی قانلی اوغلان اللری باغلی بیر اوجابوی سربازلا گئدیر پاسگاهین ایچه ریسینه ساری .

بویوک آقا ایله آیدین یئتیشنده آسلان کیشی یه اونلارا بوزارا بوزارا باخیر کئچیر گئدیر .

دالیسی . ایچری . پاسگاهین ایچی .

قیسسا ندیر تلفن ایله دانیشیر .

دالیسی . ایچری . تاکسینین ایچی .

آسلان کیشی  اوتوروبدور تاکسینین قاباقیندا .

              آسلان کیشی         من سنی یوللامیشام درس اوخویاسان یا تیراختورا شال ساتاسان ؟ پول ایسته ییبسن وئرممیشم ؟ آخی به سن

                                         نه زامان آدام اولاجاقسان باخ ؟

بویوک آقا ایله آیدین اوتوروبلار تاکسینین دالیسیندا .

       بویوک آقا              اوغلان ساتیردین بو موجوویزلیلردن ساتاردیندا ، نه ایشین واریدی خی یی بئله یازیلیب یا بئله !

                آیدین                   من بیلمیردیم اونلاری ساتماق قاداغاندیر عمی .

                آسلان کیشی           بیلمیردین پو ... اسغفراله ها ، بیلمیردین آنلامیردین ساتیردین به ، آدامدا بیر بئله آنلاقسیز .

         بویوک آقا              آی کیشی اوشاق نه بیلسین آخی ؟! تیراختور تیراختوردوردا ، نئجه یازیلیر یازیلسیندا .

                راننده                   ایندی کی تیراختورچوسوز ، بو قوجا دایی سئوینمک اوچون دئملی یم کیرایه نی سیزدن یاری آلاجاقام تیراختور

                                           عشقینه .

                بویوک آقا              داها نه ایسته ییرسن ! بودا بوندان ، گول گورخدا .

         آسلان کیشی           هاممینی دلی ائیلییبدا بو تیراختور .

                راننده                   آی کیشی بیزیم کی دیلخوشلوقوموز یوخدور ، سحردن آخشاما قاچیریخ بیر تیکه چورک دالیسیجاق تیراختوردا

                             اولماسا هئچ دا .

                 آسلان کیشی          بیلسیدیم هاممی فوتبال دلیسی اولاجاق منده اورموموزدا ایکیمجی تیراختور تیمین دوزلدردیم .

                 راننده                  اورمولو اولماقی ییزا گوره ده اوبیریی یاریسینیندا یاریسین آلاجام ، منیمده خانیمیم اورمولودور .

                 بویوک آقا             بودا بوندان ، ایش بوجور دوز گلر ها .

                 راننده                  ایگیت اوغلان سوسما ، بیر سوزده سن دئگینن بلکه داییمیزین اوزو گولدو .                                    13

                 آیدین                  آتام باشیمین تاجیدیر ، آمما تیراختورون قدرین بیلمیر ، آزی بودور باخ ، آدین دیینده بوتون آذربایجانلیلار

                                          اورکدن سئوینیرلر ، پوللارینداندا کئچیرلر ایشلریندنده .

                 راننده                  یاشاسین تیراختورچولار ، دایی داها سنده گولدا .

                 بویوک آقا             گولسنده گولمسنده دئدیغیین فیکیرلش ، دئییرم اورمودا تیراختور کیمین فوتبال تیمی دوزلسه نه اولار .                                                                              

                 آسلان کیشی          بویوک سن لاب دلیسن ها ، بیر بویوموز قالمیشدی باخ .

                 بویوک آقا             اونودا قویماریخ قالا ، داداش قاباقدا چونگونن فرعیه گوروم بیزیم ماشینی اوستا دوزلدیب یا یوخ .

گئجه . ائشیک . ائل گولو .

بویوک آقا ، آسلان کیشی ، ترلان خالا و آیدین اوتوروبلار سوفرا باشیندا شام یئریرلر .

اوشاقلار تیراختورون بایراقی اللرینده اوتایا بوتایا قاچیرلار .

آسلان کیشی اوشاقلارا باخاباخا باشینی توولاییر .

بویوک آقا باخیر آسلان کیشی یه گولور .

گوندوز . ائشیک . اورمو دنیزین قیراقی .

بویوک آقا پیکانین ساخلاییبدیر اورمو دنیزینین کورپوسونون قیراقیندا .

بویوک آقا ، آسلان کیشی ، ترلان خالا و آیدین حسرتله اورمو دنیزینین قورولماسینا باخیرلار .

       بویوک آقا             دئدیم روماتئسمیمه گوره اوزومو وورارام بیر سویا ، باخ بیر سن آللاه ، لاب قورویوبدور ها .

                آیدین                  داها گمی لازیم دئییل  ، چیرمالان کئچ گئد آدالارا .

                آسلان کیشی         قورودو ها آرواد ...

                ترلان خالا            قوروماز اینشالاه .

                آسلان کیشی         نه یی قالیب کی .

                 بویوک آقا            فیکرینده اولسایدیلار قورومازیدی .

                 آیدین                 دئییر آراسدان سو گتیرجکلر یادا خزردن ...

                 بویوک آقا            گوزوم سو ایچمیر .

                 ترلان خالا            قار یاغسا دوزلر .

                 آسلان کیشی         یاغماسا نئجه ؟!

دنیزین قورویوب آغاران یئرلری گئدیر اوزاقلاردا یئتیشیر بیر بالاجا سویا کی اودا ساراییب ( سراب ) شکلینده گورسنیر .

دالیسی . یول .

پیکان اورمو گولونو آراسیندان کئچن یولدا اورمویا ساری گئدیر .

ماشیندا اوتورانلارین هاممیسی فیکرده دیرلر .

گوندوز . ائشیک . آسلان کیشینین قاپیسینین قاباقی .

ائلمیرا _ ییرمی یئتدی یاشیندا _  ایله اری آتیلا _ ییرمی دوققوز یاشیندا _ قاپینی چالیرلار .

قاپینی آچان یوخدور .

ائلمیرا و آتیلا یاواش یاواش کوچه نین باشینا ساری گئدیرلر .

نرمان ایله قفر موتورلا گلیرلر .                                        14

ائلمیرا نرمانین موتورونا باخیر .

نرمان موتورو ساخلاییر .

قفر موتوردان دوشور الینده کی پارچانی آچیر .

نرمان موتوردان دوشور قفر ایله بیرلیکده ایسته ییر پارچانی باغلاسینلار قاپینین اوستونه .

ائلمیرا ایشاره ایله آتیلادان ایسته ییر سوروشسون بورادا نه ایسته ییرلر .

آتیلا ایستر _ ایستمز گئدیر نرمانا ساری .

       آتیلا             آقا سیز نه ایش گورورسوز ؟

                نرمان           جان ؟

                قفر              دئییر بورادا نه ایشیمیز وار .

                نرمان            قوی اوزو دئسیندا .

                قفر                 دئدیدا .

              نرمان            بیرده دئسه نه اولار ؟

                آتیلا           بو پارچا نه پارچاسیدیر وورورسوز بیزیم قاپی یا ؟

          نرمان           آسلان کیشی تزه آرواد آلیب ؟

          قفر                بو تزه ایشین ایشی اولا بیلمز ، ییرمی نئچه ایلدن چوخون ایشیدیر ...

          آتیلا               اوغولو دئییلم ، کورکنی یم .

          نرمان              آسلان کیشی هله اولمویوبدور کی سن ائوه صاحابلاندین کورکن ...

          آتیلا               سیزین کئفی ییز سازدیر یوخ ، باخیرام ، وئر گوروم پارچانی منه .

          قفر                اوغلان الی یین چک اویانا باخ ، سنه نه وار نه دیر ، بیز بیلریخ آسلان کیشی بیلر .

          نرمان          دووا ائیله آسلان کیشینین قوهوموسان یوخسا ...

          ائلمیرا         یوخسا نه ؟

                 نرمان          بیی ، اوغلان بو ائلمیرا ، ائلمیرا خانیمدیر .

                 قفر            یوخدا ؟! ویی ، اوزودور ها .

                 نرمان          خئییر اولا ، بئش ایله یاخین اولار گورممیشیخ بیز سیزی .

                 ائلمیرا         باغیشلاییندا گورسنممیشم گوزویوزه .

                 قفر            یوخ بابا آللاه باغیشلاسین بو نه سوزدور ، اریندی بو ...

ائلمیرا گئدیر قاباقا پارچانی آلیر اللریندن و اوخویور .

               ائلمیرا             آتیلا باخ بورا ، آیدین تیراختورا سئچیلیبدیر .

                  آتیلا               نه تیراختورونا ؟

                  ائلمیرا             تیمینه دا ...

                  آتیلا                آیدین ؟ جانیم او توپا شوت وورا بیلیر آخی هله گئده ...

                  ائلمیرا             آتیلا قوی قیراقا بو قارداشیما پاخیللیق ائیلمغی یین ...

                  نرمان              کور اولاسان اوسنین قینیندیر ها ...

        قفر                بشر بو قدر پاخیل ...

                  آتیلا               بویون ایلیشدیخ سیزه ؟

                  قفر                اخوی بیزیم هم محلله سئچیلیبدیر تیراختورون تیمینه ، بیز سن دئییلیک اوره ییمیز دار اولا جانیمیز چیخا ،

                                      سئوینیریخ باخ .

                  نرمان             ایندیده چکیل اویانا بو پارچانی ووراخ دووارا .                        15

نرمانلا قفر پارچانی ائلمیرادان آلیب و یاپیشدیریرلار قاپینین اوستونه .

دالیسی . هامان یئر .

بوتون محلله نین آدامی ییغیشیبلار آسلان کیشینین قاپیسینا .

کامران قصصاب _ ییرمی یئتدی یاشیندا _ بیر داواری ووروبدور یئره پیچاق الینده اوتوروبدور باشی اوستونده .

قفر ایله نرمان شربت داغیدیرلار .

سکینه ننه _ هشتاد یاشیندا _ اوزه رلیک سالیر اودا .

اوشاقلار توپ اللرینده سیرایا چکیلیبلر .

آتیلا ایله ائلمیرا اوتوروبلار ماشینلارینین ایچینده .

کوچه نین باشیندان بویوک آقانین ماشینی گیریر ایچری یه .

بیر ایکی نفر آیدینی ماشیندا گوروبلر جاماهاتا ال ائیله ییرلر .

آرخان بالابانچی _ قیرخ بئش یاشیندا _ و باباخان تویچو _ اللی یاشیندا _ گلیرلر اورتایا باشلاییرلار چالماقی .

محلله نین ایگیتلری ال اله وئریب یاللی ( جالمان ) گئدمغی باشلاییرلار .

هاممی ماشینا ال قووزاییرلار .

بویوک آقا ماشینی قاپینین قاباقیندا ساخلاییر .

آسلان کیشی ، ترلان خالا ، آیدین و بویوک آقا حئیران _ حئیران اویانا بویانا باخاباخا ماشیندان دوشورلر یئره .

سس کسیلیر و هاممی بیردن بیره صلوات چئویریر .

ایگیتلر ییغیشیرلار آیدینین دوره سینه و اونو بوینولارینا آلیرلار .

              ایگیتلر        ( شوعار وئریرلر ) توپچو قهرامان آیدین     

                                                        اوز ائویوه خوش گلدین  .

آسلان کیشی حئیرتلی حئیرتلی جاماهاتا باخاباخا قاپی یا ساری گئدیر .

ائلمیرا گلیر و ترلان خالانی قوجاقلاییر .

آتیلا آیدینی زورلا ایگیتلرین الیندن آلیر قوجاقلاییر .

کامرن قصصاب داوارین باشین کسیر وئریر اسکندرخانین _ اللی یئتدی یاشیندا _  الینه .

اسکندرخان گلیر آسلان کیشی یه ساری .

             اسکندرخان         گورورسن آسلان ، نئچه ایلدن سونرا کارخانادار اولماغیمی قویدوم قیراقا آیدینین تیراختور اویونچوسو اولماق

                                       اوچون داوارین باشینی قصصاب اولان زامان کیمی آلدیم الیمه قانین توکم اونون قیچنین آلتینا ، آی کیشی بیز

                                       قریبه ایدیخ ایندییه جخ دئمیردین آیدین گئدیبدیر تیراختورا ؟

                آسلان کیشی        آیدین گئدیب تیراختورا ؟!

             اسکندرخان          آی شوخ کیشی ایندی داها عالم و آدم بیلیر بونو .

                آسلان کیشی        سیزه کیم دئییبدیر بو سوزو ؟

       نئچه نفر             ( بیرلیکده ) نرمان ایله قفر .

              قفر                      ( اوزاقدان ) گلدیم باخ .

قفر شربت الینده گلیر .

بویوک آقا بیر آلتدان اوسته قفره باخیر ایشی سئچیر ، یاپیشیر قفرین الینده اولان سینیدن اونو اوزویله آپاریر .

        قفر                  آی جانیم هاممیسی اولماز کی ...

              بویوک آقا          اوغلان بو شربتلر بیدمئشک شربتیدیر ؟

           قفر                 تبریزدیسن قردش ؟ هن ، ایچ اورمو بیدمئشکین هئچ یئرده تاپا بیلمزسن .                                              16

                 بویوک آقا          گل بویانا ، ایسته ییرم هاممیسین ایچه م ، باخ گوروم سن هاممی یا دئییبسن آیدین تیراختورا گئدیب ؟                                 

                  قفر                 اخوی نئجه به ؟ هن ، منله نرمان دئمیشیخ .

                 بویوک آقا          کیمدن ائشیدیبسیز بو سوزو ؟

                  قفر                 تبریزدی قوناق بیری قوناقسان بیریده یاشین چوخدور دینمدیم ، یوخسا من سنه گوزاریش وئرن دئییلم کی سن

                                       مندن ...

بویوک آقا یاپیشیر قفرین الیندن چکیر قیراقا .

قفر زور وئریر آمما بویوک آقانین زورو چوخ اولدوغونا گوره الیندن قاچا بیلمیر .

              بویوک آقا           قولاق وئر گور نه دئییرم ، جیزیقیندان چیخسان قولویون اوزوب وئررم اوبیریسی الی ین ، بیر ایش گورمه

                                        جاماهات شک ائیلی یه ، ایندی آدام بالاسی کیمین دئگینن بو شاییعه نی کیم بوراخیبدیر ؟ سن ؟

                  قفر                  شاییعه ؟

                 بویوک آقا           سسی یین گتیر آششاغایا ، هن شاییعه ، ایندی دانیش گوروم .

         قفر                 واللاه دوزون سوزو ...

           بویوک آقا          سوزون دوزو ...

                   قفر                 سوزون دوزو نرمانین یولداشی ...

           بویوک آقا          نریمان کیم ؟

                   قفر                 منیم یولداشیم ...

           بویوک آقا          سوزویون دئگینن .

                  قفر                  نرمانین یولداشی قیسسا قدیر ، تبریزده پاسگاهدان زنگ وورموشدو دئمیشدی بو سوزو .

                   بویوک آقا         آیدینی تانی ییردی ؟

                   قفر                 بیر سیرا آسلان کیشی محلله ده ووردو بیله سین ، دوشموشدو ائلمیرا ، آسلان کیشینین قیزینین دالیسینا .                                                                                       

بویوک آقانین ذئهنیندن پاسگاهین قاباقی کئچیر .

قفر ها زور وئریر الین بویوک آقانین الیندن چیخاردا ، اولمور .

بویوک آقا اوزونه گلیر .

                بویوک آقا      قولاق آس گور نه دئییرم ، گئدرسن و یولداشینلا هاممینین ایچینده دئگینه ن  آیدین چون چوخ یاخچی

                   اوینچویدو و توپدا فیکیری هاممیدان چوخویدو مورببی اولوب و گلیب اورمودا تیراختورون ایکیمجی تیمین

                                         دوزلده ، بیلدین نه دئدیم ؟

                    قفر            یوخدا ؟

                   بویوک آقا           سن اول ...

        قفر                  اینانیم آخی ؟

                   بویوک آقا           قیسسا ندیرین سوزونه ...

                    قفر                  قیسسا قدیر ...

                   بویوک آقا           اونون سوزونه اینانیرسان منیم سوزومه یوخ ؟ من هارالی یام ؟

                    قفر            دیلین دئییر تبریزلی ...

                   بویوک آقا           من تیراختورون نیماینده سی اورمودایام ، بونو آمما هئچ کیمسه یه دئمه ، بیر اوزون بیل ، باخ بیر ، سنیله یم ،

                                          قولاق وئر سوزه ، سونرالاردا بلکه سنده اولدون تیمین لیدئیری .

                  قفر                  قیره دئری ؟ نه دئدین ؟!

                   بویوک آقا          زورناچیسی ...

                    قفر                 آقا تامامدیر ، نرمان دئملی دده نده کیشیدیر باخ .                                                          17

دالیسی . ایچری . آسلان کیشینین ائوی .

هاممی اوتوروب شربت ایچیرلر .

آسلان کیشیله آیدین مات مبهوت جاماهاتا باخیرلار .

بویوک آقا گلیر اوتورور آیدینین یانیندا قولاقینا سوز دئییر .

آیدین اوزونو ایتیریبدیر و اویان بویانا باخیر .

نرمان گلیر و دورور آیدینین قاباقیندا .

             نرمان               آیدین ، اوزون یاخچی بیلیرسن سن تیراختورا گئده بیلسن منده ...

قفر گلیر نرمانین یانینا .

                قفر             بیزده ...

               نرمان               آنجاق سوزوم بودور ، بیزه ده بیر یئر ائیله اورالاردا ، سن بیزدن یاخچی توپ اوینویانسان ؟

                آیدین               اینشالاه .

بویوک آقا ایشاره ایله آسلان کیشینی اوزونه ساری چاغیریر .

آسلان کیشی گئدیر بویوک آقایا ساری و اونون ایشاره سیله یانیندا ایلشیر .

          بویوک آقا           قونشولار ، یولداشلار ، محلله نین گوزه ل آداملاری سیز بیزه خوش گلیبسیز ، دئییرم ایندی اوزویوزدن سوروشورسوز

                                   بو کیمدی داها ؟ حاقلیسیز ، منی تانیمیرسیز و منده گرک اوزومو تانیتدیرام ، البتده آسلان خانین بوینونایدی بو ایشی

                                   گورسون آمما سیز اونا حاق وئرین ، بیر آز یورقوندور بیر آزدا بو ساحه ده تجروبه سی یوخدور ، ایندی اورکلرییزده

                                   دئییرسیز هانسی ساحه ده ؟ من دئملییم سیزه بونو، باخین ، سوزو اوزالدمیرام ، آیدین تیراختورون تیمینین طرفیندن

                                   سئچیلیب گلیب اوز شهرینده ، اورمودا ، تیراختورون ایکیمجی تیمین دوزلده ، هن بی آز نه جور بیرجور گلیر سیزه

                                   بو سوز آمما سوزون لاب دوزو بودور ، ایندی سیز اورمولولار بو کیشینین ، هن ، آسلان کیشی آدلانان آدامین

                                   کولگه سینده بیر تیراختور کیمین تیمه صاحابلانیبسیز ، البتده دئملییم هله ایشیمیز چوخدور ، من تیراختورون

                                   نیماینده سی سیزه سوز وئریرم تئزلیکله آسلان کیشی مودیرعامیل ، آیدین مورببی و منده اورمو تیراختورونون

                                  سرپرستی عونوانیله قوللوقویوزدا اولاجاییق ، ایندی سیز آقالیق ائیله یین بیزیم الیمیزدن توتون و گئدین ائوی ییزه ،

                                  اینشالاه صاباحدان گلین گورخ بو ایشی نئجه قاباقا آپاراجاییخ ، ایندی هاممی بیرلیکده دئیین یاشاسین تیراختور ...                                 

                 جاماهات      ( بیرلیکده ) یاشاسین تیراختور ...

دالیسی . اوبیریسی اوتاق .

ترلان خالا و ائلمیرا قاپینین دالیسیندا اوتوروبلار و بویوک آقانین سوزلرینه قولاق آسیرلار .

دالیسی . ائشیک .  ائوین قاباقی .

جاماهات یاشاسین تیراختور دییه دییه چیخیر ائشی یه .

بویوک آقا و آیدین جاماهاتی یولا سالیرلار .

دالیسی . ایچری . ائوین ایچی .

آسلان کیشی قاپینین اورتاسیندا دوروبدور بویوک آقانین قاییدماقینین یولون گوزله ییر .

بویوک آق آیدین ایله بیرلیکده گیریر ایچه رییه .

          آسلان کیشی            ایشی یین گوردوندا ، ائویمی ییخدیندا ، آی کیشی سنه من پیسلیک ائیله میشدیم ؟                                      18

            بویوک آقا               نئجه آسلان ؟

            آسلان کیشی            اوزویون وورما او یولا آی کیشی ، بو سوزلر نه ایدی سن دئدین ؟ 

            بویوک آقا               ساق اول ، دوغروداندا ساق اول ، آی جانیم بودا منیم سنه یاخچیلیغیمین جاوابیدیر ؟ کئشگه سینایدی بو ال ،

                 کسیلردی بو دیل سن اوچون اوزومو یالانچی ائیله مییردیم ...

             آسلان کیشی     سن منی بدبخت ائیله دین بونون آدین قویورسان یاخچیلیق ؟

             آیدین                   آتا بو نه سوزدور بویوک عمی بیزه گوره ...

 آسلان کیشی             داها سن آغزی یین یوم باخ ، دانیشما باخ ...

آسلان کیشی یومولور آیدینین اوستونه .

بویوک آقا آتیلا ایله ایسته ییر آسلان کیشینین قاباقین آلسین ، ییخیلیر قالیر یئرده .

              بویوک آقا              وای دده بئلیم وای ...

گوندوز . ایچری . اورژانس .

بویوک آقانی اوزالدیبلار تخت اوسته .

آیدین اوتوروبدور صندلی اوسته اونا باخیر .

آسلان کیشی اویانا بویانا گئدیر .

دوقتور بویوک آقانی موعایینه ائیله ییر .

گئجه . ایچری . آسلان کیشینین ائوی .

آسلان کیشی و آیدین بویوک آقانی ایچریه گتیریرلر .

ترلان خالا آسلان کیشی یه بوزارا بوزارا  چیخیر قاباقلارینا .

آسلان کیشی باشین سالیبدیر آششاغی یا .

بویوک آقا آسلان کیشینین قولوندان توتور و اونو باغرینا باسیر  .

ترلان خالا قاییدیر ایچریه .

گوندوز . ائشیک . ورزیشی توکانین قاباقی .

قفر بیر اوزون زورنا الینده توکاندان چیخیر ائشی یه .

نرمان اوتوروبدور توکانین قاباقیندا موتورونون اوسته .

          نرمان           بو ندیر قفر ؟

            قفر               زورنا .

     نرمان           دئدیم بلکه ننه ین آلیبسان قیف عوضینه نفت بوشالدا بونلا ، گورورمدا زورنادیر ، نی یه آلدین باخ ؟

             قفر              دئییرم یئری سنده بیرین آل .

      نرمان           منیم ننه مین قیفی وار نفت ...

       قفر            اوزون بیلرسن ، آمما صاباح بوروسوگون من اولدوم لئیدی ...

      نرمان           نه اولدون ؟

       قفر            سن بونلاری بیلمزسن ، تیملرین زورناچیلارینا لئیدی دییرلر ...

       نرمان          قفر منه دئدین اوزگه یه دئمه ، گولرلر بیله ین ، لیدر اوغلان لئیدی ندیر ؟!

  قفر            لیدر توتاق ، من اولاندا لیدر دئمه نیه دئمدین ...

  نرمان          مندن گیزلین بیر ایش اولوبدور خبریم یوخ منیم ؟      19

  قفر             سن زورناسین آل خبر اوزو چیخار اوندان .

  نرمان           ایندی کی بیر خبرلر وار اولردین ایکی دنه آلاسان ؟

   قفر            سن اول پولوم یوخویدو .

   نرمان          اوزون اول منیم ایشیم وار ، وئر باخیم اونا بیر .

               قفر              باخدا  ( زورنانی وئریر نرمانا ) .

   نرمان         منیم ائیله بو رنگیندن خوشوم گلیر ، یئری اوزوین بیر آیری رنگین آل گل ، آی چالاجاغام ها .

قفر نرمانا بوزارا بوزارا گیریر توکانین ایچینه .

گوندوز . ایچری . آسلان کیشینین ائوی .

آسلان کیشی چیغیریر آیدینین اوستونه .

             آسلان کیشی      بو ایش اولان دئییل .

کوچه نین " تیراختور ، تیراختور " سسی آسلان کیشینین مات قالمیش اوزونده یوخاری حالدا ائشیدیلیر .

دالیسی . ائشیک . آسلان کیشینین قاپیسینین قاباقی .

نرمانلا قفر زورنا چالاچالا اوشاقلاری سالیبلار داللارینا کوچه ده ییغیشیبلار آسلان کیشینین قاپیسینا .

           هاممی           ( بیرلیکده ) تیراختور ، تیراختور .

آیدین چیخیر ائشی یه ، دالیسیجاق بویوک آقا و سونرا آسلان کیشی .

آسلان کیشی اوتورور دووارین قیراقیندا داش اوسته .

بویوک آقا اللرین قووزاییر و " تیراختور ، تیراختور "  دییه دییه جاماهاتا قاریشیر .

آیدین ایکی اورکلی قالیبدیر .

گئجه . ایچری . آسلان کیشینین ائوی .

آتابی ، بویوک آقا و آسلان کیشی چای ایچیرلر .

         آسلان کیشی        قارداش منیم دده مین تیمی واریدی بابامین تیمی واریدی ، گوروم هانسی اولوب گئده نیمین تیمی واریدی آخی هان ؟  

                                  جانیم من تیم ساخلاماقدان نه باشیم چیخیر آخی ...

     بویوک آقا          نی یه به دوور گوتوروبسن سن ؟ آی کیشی بیر دووروبریینده باخدا ، بیر بئله بئکار آدام وار گل بیر یاخچیلیق ائیله

                                  اونلارا ، تیم دوزلسه بیلیرسن نئچه نفره ایش تاپیلاجاقدیر ...

          آسلان کیشی       من ایداره کارام جاماهاتا ایش تاپام بویوک ؟

     بویوک آقا           کیشی بیر اوزوندن سوروشوبسان سنین اوغلون درسی قورتاراندان سونرا نه ایش گورجکدیر ؟

            آسلان کیشی       اوخودماقی منیم بوینومادیر ایشی یوخ کی ، منه نه وار نه ایش گورجخ ، دوولت وار بیلر نئجه ایشلده ...

            بویوک آقا           اوزویون آلداتما گورخ ...

     آتابی                سوزون دوز بویوک آقا آمما تیم ساخلاماق بو راحاتچیلیخلاردادا اولا بیلمز ها .

    آسلان کیشی       آخی منیم عزیزیم هئچ سن یا من بیلیریخ تیم ساخلاماق ، تیم دوزلتمخ نئجه دیر ؟

     بویوک آقا           میه اوبیریلر اودونیادان گتیریبلر ؟ اویره نریخ ، بیرده واللاه من بو تیم صاحابلاریندان یاخچی تیم ساخلارام باخ ، آی

                                  جانیم تیم ساخلاماق اونلار ساخلی یان کیمی اولسا من اونون بیر یئرده ساخلارام ، کیشی بارسلون دوزه لتمک

                    ایستمیریخ کی ، بیردنه فوتبال تیمی اورمودا ...

            آسلان کیشی       بیر ایش دئییل کی هن ؟                      20

     بویوک آقا                 نه ایشی اولاجاقدیر آخی ؟ کیشی اوزویون قورخوتما ، گویده آللاه یئرده ایکیمیز بیر تیم دوزلدخ تایی اولماسین ، گور

                               ایکی ایلدن سونرا اروپایا اویونچو یوللاماساق !

            آسلان کیشی       سن بیزی سریدین واللاه .

            بویوک آقا          اوجور باخما گوروم ، ایشدی اولوبدا .

            آتابی                دوز دئییر ، ایشدی اولوبدا ،  ایندی دور او قرآنی گتیر ایستیخاره ائیله گور نه دئییر ، دور گوروم .

            آسلان کیشی       خئییرها ، بودا قاریشدی اونا .

            بویوک آقا          دوردا ، ( اوزو دورور ) قیچیمدا وار ، الیمده ...

بویوک آقا گئدیر قرآنی تاقچادان گوتورور و وئریر آتابی کیشی یه  .

آتابی قرآنی آچیر ، خوش گلیبدی ، گولور .

بویوک آقا گولور .

آسلان کیشی باخیر اونلارا  و سونرا اودا گولور .

آیدین قاپینین دالیسیندان اونلارا باخیر و گولور .

           آسلان کیشی       توککول آللاها ، ایندی ایلک ایشیمیز نه اولاجاقدیر ؟

           آیدین               تیمه پول تاپماق .

             آتابی                نئچه ؟

      بویوک آقا          صاباح گئدریخ تربیت بدنیه گورخ نئیله ملییخ .

گوندوز . ائشیک . آسلان کیشینین قاپیسینین قاباقی .

قفرله نرمان موتور اوسته اوتوروبلار سیگار چکیرلر .

آسلان کیشی و بویوک آقا قاپیدان چیخیرلار ائشی یه .

قفر قاچیر اونلارین قاباقلارینا .

            قفر                 سالام علیکیم .

       بویوک آقا         اوغلان یئری بیر ماشین گتیر .

               قفر                 ماشین هارادان تاپاق قادایین آلیم ؟ سیزین ماشین واردا .

        بویوک آقا         خاراب اولوبدور ، یئری گور بیر تاکسی توتا بیلرسن .

               نرمان               موتور واردا .

        بویوک آقا         ( قفره ) یاخچی ، یئری بیرینده سن تاپ گتیر گوروم .

            آسلان کیشی       من اولسمده موتورا مینمرم ، اودا نرمانلا قفرین دالیسینا .

        نرمان                  سوز وئریرم یاواش سورم .

        قفر                      منده .

        آسلان کیشی      منده اینانیرامدا .

        بویوک آقا         آدام اولماسالار ایشدن خبر اولمویاجاق بیللرینه .

   آسلان کیشی      نه ایشی ؟

   بویوک آقا         دییرم .

دالیسی . ائشیک . خیاوانلار .

آسلان کیشی گوزونو یوموب اوتوروب قفرین موتورونون دالیسیندا .

قفر سورعتله گئدیر .                                                  21

بویوک آقا اوتوروب نرمانین موتورونون دالیسیندا اونلا بیرلیکده آسلان کیشی یه باخیب گولورلر .

دالیسی . ایچری . تربیت بدنی .

بویوک آقا و آسلان کیشی باشلارین اوجا توتوب تربیت بدنیه گیریرلر .

قفرله نرمان اونلارین گئدمغینه باخیرلار .

دالیسی . هامان یئر .

بویوک آقا و آسلان کیشی ساللانا ساللانا تربیت بدنیدن چیخیرلار ائشی یه ، قفر و نرماندان سوراغ یوخدور ،  یوللارین توتوب یاواش یاواش گئدیرلر .

دالیسی . ایچری . کوشتو اوتاقی .

قفر و نرمان هر بیری بیر کوشتو توتانلا گولشیرلر .

گوندوز . ایچری . آتابیکین توکانی .

بویوک آقا بیر ورزیشی روزنامه اوخویور .

آسلان کیشی بوزارا بوزارا  اونا باخیر .

آتابی بویوک آقانین باشماقلارینا واکس وورور ، هردنده آسلان کیشی یه باخیر .

          آتابی               گولدولر بیله ییزه ؟

            آسلان کیشی      آز یوخ .

            آتابی              آخی نی یه ؟

     آسلان کیشی      دئییر آقا سیزین نئچه ییز وار تیم دوزلدمغه ؟ جاواب وئریر اولار نئچه یوز مین ، اودا گولدو دئدی منیم دده م بو پولا

                                  بیر جوت فوتبال باشماقی وئرمزلر .

            آتابی             دئمه دی نئچه ایسته ییر ؟

     آسلان کیشی     ( بویوک آقایا ) جاواب وئردا به !

     بویوک آقا         یازیبدیر دونیانین بویوک تیملری ایلده نئچه میلیارد خرج ائیلی ییرلر ، بیزیم مملکتدده بو نئچه ایلی خرج آغیرلاشیبدیر ،

                                 بیر تیمین نئچه میلیارد خرجی اولور ، اونلار دولار بیز تومن ،  البتده کیچیک تیملر نئچه یوز میلیونلا ایلی باشا آپاریرلار  

                                 بیزیم ...

            آسلان کیشی      نئچه ن وار ، اونو دئگینن .

     بویوک آقا         تئز اوتورورسان یئره باخ آسلان .

     آسلان کیشی      اوغلان دانیشگاها گئدندن بوتایا بیر قیران ییغمامیشام هئچ یارانه نی آلماسام جئبیمده پول تاپیلماز ، بو آقا میلیون سوزو

                                   سوزو دانیشیر .

      بویوک آقا         محلله نین جاماهاتی نین یارانه لری نئچه اولار ؟

             آتابی               یانی دئییرسن یارانه لری بیر یئره ییغساق دوزلر ؟

             بویوک آقا        دئییرم اورمولولارین یارانه لرین ییغساق شاید .

     آسلان کیشی       محلله دن اویانانی حئسسابا قویما .

             بویوک آقا        محللنین آداملاری ییغسا یارانه لرین اولار ، محللده اولار یوز ائو ، هر ائو بئش نفر ، بئش یوز ، نفره وئریرلر قیرخ ایکی      

                                  مین تومن ، اولار ، اولار نئچه ؟ ایکی یوز میلیون هان ؟               22

             آتابی                اوجور اولاردا .

             آسلان کیشی      دئدی بیر اویونچویا هئچ اولماسا اوش یوز اللی میلیون تومن وئریرلر .

             بویوک آقا          اوجوزدوسودا وار ، سقف قراردادی ریعایت ائیلمسلر جریمه اولارلار .

             آسلان کیشی      توتاق بو بیری ، به اوبیریسیلر ؟

             آتابی                هله قالیر اونو ، آیهوو .

             بویوک آقا         قارداش بوتون پولو بو یولدان اله گتیرجییخ ؟ آیری یوللاردا وار .

             آسلان کیشی      آخی هله گور جاماهات پولون وئریر ؟

             آتابی          آخشام سولطان عمینین قهوه خاناسینا ییغیشاق گورخ نه اولور .

           آسلان کیشی      نئجه ایش آشدین منه سن ...

             بویوک آقا         الین قاباقا دوشنده ده بونو دییجن ؟

             آتابی               آسلان اوتوردا ، دوزلر اینشالاه .

             بویوک آقا         کیشی بو یولوموزون اوولیدی ، نه اولوب هله سن اوزویون ایتیریبسن ، ائیله دوزلسین کئفین کیمین ، منه موفته آد

                                  قویمویوب کی آتا آنام .

             آسلان کیشی     هئیکلی ین گوره قویوبلار آغلی یان گوره یوخ کی ...

             بویوک آقا         اودا بیللنر .

آسلان کیشی بوزارا بوزارا  اونا باخیر .

گوندوز . ائشیک . سولطان عمینین قهوه خاناسینین قاباقی .

نرمانلا قفر اوتوروبلار قهوه خانانین قاباقیندا .

نئچه نفر اونلاری  دوره لی ییبلر .

            نرمان        یاز قفر ، قولونو یاز تداقیرات ...

        قفر              تداروکات ...

              نرمان       منوشو یاز نیگهبان ، علینی یاز نامه چی ، قاسیمده اولسون منشی .

              قاسم نرمان ، اولماز منشی یازمی یاسان ؟

       نرمان                   باشینداندا آرتیقدی ، اورمو تیراختورونون منشیسی اولماق فرقی وار اوبیریسی منشیلرله ، اوغلان دور سیرادا ، یازدین

                                قفر ؟

               قاسم    آقا منیده نگهبان یازدا ...

               قفر اوغول بالا دوعا ائیله یازیرام هله بیله یین ، گئد اوبیریسی گلسین ، نرمان ییغیشدیر گلدیلر .

               نرمان         به هوشون هارادا ؟ آقا گئدین قهوه خانانین ایچینه ، قالانی قالیر سونرا یازاق ، یئری یین گوروم ، پول یاددان چیخماسین .                                                                          

جاماهات قفره پول وئریب و گیریرلر قهوه خانانین ایچه ریسینه .

آسلان کیشیله بویوک آقا گلیرلر و گئدیرلر قهوه خانانین ایچینه .

قفر و نرماندا گئدیرلر قهوه خانانین ایچینه  .

بویوک آقا اونلارلا دانیشیر .

قفر و نرمان چیخیرلار ائشی یه و مینیرلر موتورا گئدیرلر .

دالیسی . هامان یئر .

قهوه خانانین قاباقی و ایچه ریسی دولودور آداملا .

بویوک آقا دانیشیر .                                                   23

بویوک آقانین سوزلری قورتولاندا جاماهات بیربیرینه باخیب و بیربیریله دانیشیرلار .

دالیسی . قهوه خانانین ایچی .

اسکندرخان یئریندن دورور و گئدیر قاباقدا دورور دانیشیر .

           اسکندرخان       دییرلر میه حاقوئردی کئچی اولدوروب ؟! آی جانیم پول صوحبتیدیر ، شوخلوق دئییل کی ، اوراجاق کی بیز بیلیریخ

                                   اورمودا والیبالین طرفداری چوخدور ، فوتبالین آمما یوخ ، تیراختور تبریزده تیراختوردور ، گلسه اورمویا تیراختور

                                   اولماز ، ایندی کی بویله اولدو من اوزوم بیر والیبال تیمی دوزلدرم میللی سطحینده ...                                                                       

              قفر                 اسکندرخان آدی نه اولاجاق تیمین ؟

             اسکندرخان        آدا نه وار ، تاپیلار ، قویاریخ تیراختورون والیبال تیمی .

             نرمان          واللاه پیس سوزده دئییل .

      اسکندرخان        آدام پولونو ائیله یئرده خرج ائیلر ثمری اولا ...

              قفر                اوتوز ایلدن اوتوز ایله ده شالوار دئییشمدین نه فایدا ...

             اسکندرخان       سن کی هفته نین بو باشی او باشی شالوار آلیرسان هارانی توتوبسان ؟ اسکندرخان اولوبسان ؟

      نرمان               بو قصصاب اولماز ...

             قفر       جانیم کامراندا قصصابدیر ، اوندا سوز یوخ ، قیرنیسلیق سوزودور .

             اسکندرخان       اصلن منیم سوزوم یوخ ، گئدین پولویوزو وئرین بونلارا آپارسینلار هدر ائیلسینلر ، منه نه وار ، من گئدیرم والیبال

                                  تیمینین دالیسین توتام ، هر کیمسه ایسته ییر باشا گئدن ایش باشلایا گلسین دالیمجاق .

اسکندرخان چیخیر ائشی یه .

نئچه نفر قهوه خانادان چیخیر ائشی یه و یوللارین توتوب گئدیرلر .

           آسلان کیشی       بیزیم زوروموز یوخ هئچ کیمسه ایله ، باخین مصلحتی ییزه .

آسلان کیشی دورور گئدسین .

 بویوک آقا         دایان گوروم هارا به ؟ اوتور یئرینده ، آی جاماهات ، سیز ترپشین منده تیراختورون طرفیندن سوز وئریرم لاب

                        یاخچی اویونچولاری گتیرم اورمویا ...

  قفر                 علی دایی نیدا گتیرجییخ ...

  قاسم               علی دایی داها اوینامیر ...

  نرمان              او بویوک آقانین سوزوندن چیخماز ، اودا گلجخ ، سوز وئریب بیزه بویوک آقا ، قاسم اوتور یئرینده گوروم .

           بویوک آقا         اسکندرخانی راضی سالماق مندن ، سیز آتابی کیشینین سوزلرینه قولاق وئرین ، اونو من قایتارارام .

بویوک آقا چیخیر ائشی یه .

آتابی ایستر ایستمز دورور آیاقا دانیشسین .

دالیسی . قهوه خانانین قاباقی .

بویوک آقا اسکندرخانین دالیسیجاق دوشوبدور توولو توولو گئدیر .

اسکندرخان گئدیر مینیر ماشینینا .

بویوک آقا اوزون یئتیریبدیر ماشینا .

دالیسی . قهوه خانانین ایچی .

آتابی جاماهاتا دانیشیر .                                               24

دالیسی . قهوه خانانین قاباقی .

بویوک آقا اسکندرخان ایله دانیشیر .

دالیسی . قهوه خانانین ایچی .

آتابی جاماهاتا دانیشیر .

دالیسی . قهوه خانانین قاباقی .

بویوک آقا اسکندرخان ایله دانیشیر .

اسکندرخان و بویوک آقا  گیریرلر قهوه خانانین ایچینه .

دالیسی . قهوه خانانین ایچی .

  بویوک آقا         صالاوات چئویر گوروم آخی ، محمد جامالینا صالاوات ، اوز ساقلیقی ییزادا بیرین چئویرین .

جاماهات صالاوات چئویریر .

  اسکندرخان        آی جاماهات قرار اولدو ایشلری آسلان قارداش دوزلده بیزده قوللوقوندا اولاق گورخ نه ایش گورملی ییخ .

  بویوک آقا          موجوویز آلیناندان سونرا اوتوروب دانیشاجاییخ ، ایندی بیر بئش نفر سئچیلجخ بیزله بیرلیکده دوشه ایشلرین 

                        دالیسین توتا .

گوندوز . ائشیک . تربیت بدنی نین قاباقی .

بویوک آقا ، اسکندرخان ، قفر ، نرمان ، آتابی و آسلان کیشی گیریرلر تربیت بدنی ایداره سینین ایچینه .

دالیسی . ائشیک . دانشگاه .

آیدینلا سولماز صندلی اوسته اوتوروب دانیشیرلار .

 آیدین         گئدیبلر ایشی قورتارالار ، ایه توتسا ایش اولاجاق ها .

 سولماز        دئییرم بیر یئکه ائو ...

 آیدین          باشلادی ...

 سولماز         نئچه اوتاقی اولا گرک ، مطباخ ، منیم اوپئندن خوشوم گلمیر ، قوناق گلنده ...

 آیدین           بو قوناقلیقیندا ائیله دی ...

 سولماز          آدام راحات قاب قاشیق یویا بیلمیر باخ ...

 آیدین            راحات یوما ناراحات یو ...

 سولماز          سن یویاجاخسان ، من یوخ کی ...

 آیدین            نه ؟!

 سولماز          اوپن بونا خوش دئییلدا ، اوپن اولسا سنی گوروب و سوز چیخارداجاخلار ، اوپئن اولماسا گورمزلر اوندا داها سوزده

                    چیخاردا بیلمزلر ...

 آیدین           داها ؟

سولماز           قالانیندا دی یجم ، هله تئزدی ...

 آیدین           سنین کیلاسین یوخدور ؟                              25

 سولماز          ایشدن دانیشاندا قاچ ها ...

 آیدین           سنده قال اوزوین یوخو گور .

گوندوز . ایچری . آتابیکین توکانی .

بویوک آقا تلفونلا دانیشیر .

اسکندرخان ، آتابی و آسلان کیشی بویوک آقایا قولاق آسیرلار .

گوندوز . ائشیک . تربیت بدنی نین قاباقی .

بویوک آقا ، اسکندرخان ، قفر ، نرمان ، آتابی و آسلان کیشی گیریرلر تربیت بدنی ایداره سینین ایچینه .

دالیسی . ائشیک . دانشگاه .

آیدینلا سولماز صندلی اوسته اوتوروب دانیشیرلار .

گوندوز . ائشیک . سولطان عمینین قهوه خاناسینین قاباقی .

نرمانلا قفر اوتوروبلار قهوه خانانین قاباقیندا جاماهاتدان پول آلیب دفترلرینده یازیرلار .

دالیسی . ایچری . آتابیکین توکانی .

بویوک آقا تلفونلا دانیشیر .

اسکندرخان ، آتابی و آسلان کیشی بویوک آقایا قولاق آسیرلار .

 بویوک آقا           هله لیک قارداش .

 آسلان کیشی        هن نه اولدو ؟

 بویوک آقا            بیز یا گرک آششاغیدان باشلایاخ یا اوستن .

 اسکندرخان          او ندیر بو نه ؟

 بویوک آقا            آششاغیدان باشلاساخ پول آز ایسته ییر ...

 آسلان کیشی         لاب یاخچی ...

 بویوک آقا            عومورون اونا یئتیرمز قوجاکیشی ، آزی ییرمی ایل چکر سن بیر تیمی دوزلدیب آپاراسان لیگه .

 اسکندرخان          ماشین سازی اللی آتمیش ایلین تیمیدیر گئده بیلمیر لیگه .

 آتابی                  اوسدن باشلاساخ نئجه اولار ؟

 بویوک آقا            ائیله بیر بو یولوموز وار ، بیر تیمین ایمتییازین آلاق .

 آسلان کیشی         آلاقدا .

 بویوک آقا            موشکول بودور کی پول چوخ ایسته ییر .

 اسکندرخان          نئچه ؟

 بویوک آقا            اسکندرخان سنین اوستانداریده آدامین وار ؟

 اسکندرخان          وار نئجه ؟

 بویوک آقا            اوراداندا گرک کومک آلاق ، خرجی چوخدور ، صاباح گئدریخ اورایا .

گوندوز . ائشیک . اوستانداری نین قاباقی .                       26

بویوک آقا ، اسکندرخان ، آتابی و آسلان کیشی گیریرلر اوستانداری ایداره سینین ایچینه .

گوندوز . ائشیک . سولطان عمینین قهوه خاناسینین قاباقی .

نرمانلا قفر اوتوروبلار قهوه خانانین قاباقیندا جاماهاتدان پول آلیب دفترلرینده یازیرلار .

گوندوز . ایچری . آتابیکین توکانی .

بویوک آقا تلفونلا دانیشیر .

اسکندرخان ، آتابی و آسلان کیشی بویوک آقایا قولاق آسیرلار .

 بویوک آقا        اولدو آقا ، یاشا .

 آسلان کیشی     هن ؟

 بویوک آقا        ایمتییاز ساتان وار ، باهادیر آمما .

 اسکندرخان      منیم بیر کوهنه توکانیمدا وار ساتارام اونو .

 آسلان کیشی     آرواد راضی اولسا اونوندا کتده نئچه طنف یئری وار ، ساتاریخدا .

گئجه . ایچری . آسلان کیشینین ائوی .

آسلان کیشی ترلان خالا ایله اوتوروب دانیشیرلار .

 ترلان خالا        داها بو اولان ایش دئییل باخ .

 آسلان کیشی      منه گوره یوخ ، اوغلویان گوره .

 ترلان خالا         ساخلامیشام اونادا ...

 آسلان کیشی       ایندی وقتیدیر ساتاسان اونا وئرسن .

 ترلان خالا          ساخلامیشام او درسین قورتارا گله وئرم اونا ایش تاپماسا الینده اولا بیر ایش باشلایا .

 آسلان کیشی       بو ایش توتسا او اولاجاق اورمونون بویوک آداملاریندان بیریسی آروارد بونو قان .

 ترلان خالا          ایش توتماسا ؟

 آسلان کیشی        بیر زاد قالمی ییب داها ، سونودور .

 ترلان خالا           نئچه آیدی بو سوزو دئییرسندا .

 آسلان کیشی        بو سیرا فرقی وار ، موعامیله اولوب قورتولوب ، قالیب پولو وئرخ تیمی یوللویاخ لیگه .

 ترلان خالا          ائیله بوجور راحات راحات ؟!

 آسلان کیشی       نه راحاتی ؟! سن گورمورسن نئچه وقتیدیر دده میز یانیب ؟

 ترلان خالا          آی کیشی عومور بویو باش اوجا یاشی ییبسان ، او یئر پیس گونوزوموزوندور ، قوی قالا ، واللاه بیللاه او ...

 آسلان کیشی       سوز وئریرم اوچ آیدان سونرا آلامدا بیرده اورانی ، اوراداندا یاخچیسین آلارام ، آرواد بو ایشده پول وار آمما اول

                       گرک پول قویاسان سونرا گوتورسن ، سن منیم سوزومه قولاق وئر ، ایندیجخ اولوب ضررلی ایش گورم ؟

                       اولمویوب کی آخی ...

 ترلان خالا         واللاه من بو ایشین سونوندان قورخورام .

 آسلان کیشی       قورخما ، اینشالاه خئییردیر ، آللاه کریمدیر ...

 ترلان خالا         آللاه بنده یه عاقیل وئریب ، گوره گوره قویویا ساری گئدمز بنده ...

 آسلان کیشی       داها پیس یئره گئدمسین فیکیرین ، بو نه سسیدیر ؟

 ترلان خالا         قوی باخیم ائشی یه گوروم .

                                                                  27

دالیسی . آسلان کیشینین ائوینین قاباقی .

تیراختورون بایراقی اللرده .

جاماهات های هاوار سالاسالا اویان بویانا گئدیرلر .

دالیسی . ایچری . آسلان کیشینین ائوی .

آسلان کیشی و ترلان خالا پنجردن ائشی یه باخیرلار .

 آسلان کیشی          گورورسن ، بیزیم تیمده بوجور اولاجاق ها ، اوداندا اورمو بویله اولاجاق ها ، آی جانیم هئی .

 ترلان خالا             آللاه اوزو خئیر ائیلسین .

 آسلان کیشی          بو قرآنی آچیب سنه بیر آیه اوخویوم اینان خئیر اولاجاق .

 ترلان خالا             آی کیشی ال چک بو ایشلردن ، آللاهین آیاغین آچما توپا .

 آسلان کیشی          یازیب الی ییزه گلن پولو خالقا خرج ائیلیین .

 ترلان خالا             خالقا یازیبدا توپا یوخ کی .

 آسلان کیشی          توپودا خالق اوچون اویناییرلاردا .

 ترلان خالا             به آلدیخلاری میلیون میلیون پول هارا گئدیر .

 آسلان کیشی          خالقی سئویندیریرلر ، نوش جانلاری اولسون .

 ترلان خالا             سنین بئینیین بیر ایش ووراندا واللاه سن ساغیین سولویون گورمورسن ، داها سوزوم یوخ منیم .

گوندوز . ایچری . آتابیکین توکانی .

هاممی وار ، پوللاری ساییرلار ، قورتولاندان سونرا یازیرلار و سونرا دوروب اوپوشورلر .

 اسکندرخان            داها دوزلدی ، ایندی گرک تئزلیکله ایشین دالیسین توتاق ، ناهاردان سونرا ییغیشاریخ گورخ صاباح نه ایش

                           گورملییخ ، ایندی داها ناهارا گئدغین ، بانک آچیق اولماز داها ایندی ، بئواقتدیر ، آتابی قارداش پوللار سنین

                           توکانیندا قالسا هر یئردن امنیدیر .

آتابی پوللاری قویور صاندیقا و باغلی ییر قاپیسینی .

 آسلان کیشی            بیر صالاوات چئویرین .

جاماهات صالاوات چئویریر و چیخیر ائشی یه .

نرمان ایله قفر هاممینی گوز آلتینا آلیبلار .

آتابی ایله آسلان کیشی هاممیدان سونرا چیخیرلار ائشی یه .

آتابی توکانین باغلاییر و آسلان کیشی ایله یولا دوشور گئدیر .

نرمان ایله قفر توکانا ساری گئدیرلر .

گوندوز . ایچری . آسلان کیشینین ائوی .

آسلان کیشی و ترلان خالا یاتیبلار .

زیلزیله اولور .

آسلان کیشی و ترلان خالا یوخودان دوروب قاچیرلار ائشی یه .

دالیسی . آسلان کیشینین ائوینین قاباقی .

جاماهات قاپیلارینین قاباقیندا بیربیرله دانیشیرلار .                       28

دالیسی . آسلان کیشینین ائوی .

آسلان کیشی و ترلان خالا ناماز قیلیرلار .

تلفون زنگ وورور .

ترلان خالا نامازدان قورتولوبدور ، گئدیر گوشینی گوتورور .

                ترلان خالا            الو ، سالام اوغول ، نئجسن بالا ؟ هن بورادادا گلدی ، ویی تبریزده ! یوخ ائیله بیر شئی اولمویوب ، هارادا ؟ اهر

                                         طرفینده ؟ ورزیقاندا ، بیرده هریسده ، یا ابوالفضل ، آللاه اوزو کومک اولسون ، اینشالاه ائیله بیر شئی اولماز ،

                                         هن آتاندا بورادادیر ، ناماز قیلیر ، عئیبی یوخ اوغول ، لازیم اولسا گئد .

آسلان کیشی نامازدان قورتولوب .

                آسلان کیشی         کیمیدی ؟

                ترلان خالا            آیدین ، دئییردی اهر طرفینه زیلزیله بتر گلیب .

                آسلان کیشی         اینشالاه هئچ نه اولماز ، تیلویزیونو آچ باخاق گورخ نه دئییر .

ترلان خالا تیلویزیونو آچیر .

قاپینین زنگینین سسی گلیر .

آسلان کیشی چیخیر ائشی یه گئده قاپینی آچا .

تیلویزیوندا گول گوستریر و ترانه پخش اولور .

                آتابیگین سسی        یا آللاه .                        

آسلان کیشی و آتابی گیریرلر ایچری .

                آسلان کیشی         خوش گلدین ، اوتور گورخ ...

                آتابی                   اوتورمالی دئییلم ، یاززیق اولدوخ .

                آسلان کیشی         بو نه سوزدور آی کیشی نیه نه اولوب ؟ اولمویا زیلزیله ....

       آتابی                  یوخ جانیم ، ناهاردان سونرا بیر آز یاتدیم ، دوراندان سونرا گئتدیم توکانی آچدیم ، زیلزیله دن قاباق ........

                آسلان کیشی         آهان ؟! کیشی نیه به سوسوبسان ؟

       آتابی                  پوللاری آپاریبلار ............

                آسلان کیشی         وای دده .          

دالیسی . ایچری . آتابیکین توکانی .

بویوک آقا ، آتابی و آسلان کیشی کئفسیز اوتوروبلار .

هئچ کیمسه دینیب دانیشمیر .

اسکندرخان گیریر ایچری .

             اسکندرخان            سالام علیکیم ، جانیم دئییرلر چوخلو ائو ییخیلیب ورزیقاندا ...

             آسلان کیشی          ائویمیز ییخیلدی ...

             اسکندرخان            آی کیشی اولممیشیخ کی یئنیدن دوزلدریخ ییخیلان ائوی ...

             آسلان کیشی          یاززیق اولدوخ ...

             اسکندرخان           اینشالاه یاززیق اولماریخ ، اولن اولماسا ییخیلان ائو قارخا بیلر ...

             آسلان کیشی          بئلیمیز سیندی ...

             اسکندرخان           آسلان سیزین اورالاردا قوهومویوز وار اولمویا ؟

             آسلان کیشی          هان ؟! قوهوم ؟                          29

 اسکندرخان           بو نیه بوجور اولوب به ؟

             بویوک آقا              آسلان منه گوره بوجور اولوب ...

             اسکندرخان            سنین آداملارییان بیر زاد اولوب ؟

     آتابی                   هاممیمیز یاززیق اولموشوخ ...

 اسکندرخان            بوندا سوز یوخ ، زیلزیله دونیانین او باشیندادا گلسه ، بیرینین بورنوندان قان آچیلسا آدام گرک ناراحات اولا ...

 بویوک آقا              بو زیلزیله ائولر ییخان زیلزیله ایمیش ...

 اسکندرخان            ائشیدمیشم ، آللاه اوزو کومک اولسون ، دئمدیز سیزین آداملاردان ...

 آسلان کیشی          وای یاززیق جانیم وای .

آسلان کیشی باشلاییر آغلاماقا .

بویوک آقا ایله آتابی ده قاریشیرلار اونلا آغلاشیرلار .

اسکندرخاندا باشلاییر آغلاییر .

آسلان کیشیله آتابی و بویوک آقا ایله اسکندرخان قوجاقلاشیب آغلاییرلار .

تیلویزین زیلزیله گلن شهرلری گوستریر .

بویوک آقا اسکندرخانی چکیر بیر گوشه ده اونلا دانیشیر .

دالیسی . ائشیک . آتابیکین توکانی نین قاباقی .

اسکندرخان توکاندان حیرسلی چیخیر ائشی یه .

             اسکندرخان           من اوشاقام ؟ منیم باشیما بورک قویورسوز ؟ منی ساده اله سالیبسیز ، واللاه دده ییزی یاندیرارام ، هوم نه فیکیر

                                       ائیلییبسیز هان ؟ واللاه بیله ییزی پول ائیلرم ، منه دییرلر اسکندرخان .

گوندوز . ایچری . انتیظامی پاسگاهی .

بویوک آقا ، آتابی ، آسلان کیشی و اسکندرخان اوتوروبلار .

افسر نیگهبان گیریر ایچری و گئدیر اوتورو یئرینده .

             افسر نیگهبان          شیکایتی اولان سنسن ؟          

             اسکندرخان           بعلی جناب سروان ، بونلار ال بیر اولوب منیم پولومو یئییبلر .

دالیسی . ایچری . بازداشتگاه .

بویوک آقا ، آتابی و آسلان کیشی اوزانیبلار بیربیرین قیراقیندا .

بویوک آقا یاتیبدیر .

آسلان کیشی           گل ایندی بو خورراپوفلا یات .

آتابی                     نده درین یاتیب .

آسلان کیشی           هئچ ائیله بیل زینداندا دئییل .

آتابی                     دئییرسن کیمین ایشیدیر ؟

آسلان کیشی            ویجدانسیز بیر آدامین .

آتابی                     بیر سیرا دئگینن لازیمی اولان آدام راحات اولاقدا ، دئییرسن جیبیمیزینده پولون آپاراق وئرخ اونا ؟

آسلان کیشی            بیزیم جیبلره راضی اولان اولسایدی نئچه وقتی ووروب آپاراردی بی انصاف .

آتابی                     آللاه اوزو کومک اولسون بیلمیزه .

آسلان کیشی            یاخچی اولار اینشالاه ، یات هله .             30

گئجه . ایچری . آسلان کیشینین ائوی .

ترلان خالا آغلاییر ، گوشی نی گوتورور و شماره توتور و دانیشیر .

تلویزیون زیلزیله نی گوستریر .

ترلان خالا اوتوروب بیر گوشه ده آغلاییر .

دالیسی . ایچری . بازداشتگاه .

بویوک آقا ، آتابی و آسلان کیشی شیرین یاتیبلار .

دالیسی . ایچری . خوابگاه .

آیدین اوتاقدا اوتایا بوتایا گئدیر .

گوندوز . ائشیک . ترمینال .

آیدین بیلیط الینده ترمینالین ساختمانیندان چیخیر ائشیه .

گوزو ساتاشیر نئچه دانشجو همکلاسینا و گئدیر اونلارا ساری .

آیدینین  دانشجو یولداشلاری آیدینی گورورلر و اونا ال ائیله ییرلر .

آیدین یولداشلارینا یئتیشیب و اونلارلا ال وئریر و دانیشیر .

دالیسی . ایچری . اوتوبوسون ایچه ریسی .

اوتوبوس یول گئدیر .

آیدین و یولداشلاری اوتوروبلار .

دالیسی . ائشیک . زیلزیله داغیلدان یئرلردن بیریسی .

آیدینین یولداشلاری زیلزیله داغیلدان یئرده میللته کومک ائیلییرلر .

آیدین موبایلا دانیشیر .

                آیدین           آنا بورانی گورسن بو سوزلری دئمزسن ، واللاه هاممی قان آغلاییر ، آتامین گورمغی واجیبیدیر دوز ، آمما بورا واللاه

                                  گرک گلیدیم ، بیلمیرسن کی نه دئییرم ، تیلویزیون میندن بیرین گورسدمیر ، آللاه اوزو کومک اولسون .

آیدین دانیشا بیلمیر ، آغلاییر .

زیزیله داغیلدان یئرلر چوخ پیس حالدا گورسنیر .

قفر ایله نریمان آیدینلا اوز اوزه چیخیرلار ، اونو گوروب ایسته ییرلر گوزونه گورسنمسینلر آمما داها بئوقت اولوب .

آیدین ایله قفر و نریمان قوجاقلاشیب آغلاییرلار .

                آیدین          داها کیم گلیب کومکه ؟

       قفر             کیم گلیب کومکه ؟

       نریمان          هن ، بابا هئچ کیمسه ، بیر من بیرده قفر ، اوغول قفر دایانما گئدک کومکه دا به ...

       قفر              به دا به ، بیز ائیله بونلار اوچون گلمیشیخدا ، وای دده .

       آیدین           هیه واللاه گئدغین .

اوچوده دانشجولارلا بیر اولوب و کومکه باشلاییرلار .                       31

زیلزیله داغیلدان یئرلرین شرایطی اوقدر پیسدیر کی کومک ائیله ینلر هاممیسی توتولوبلار ، بیر سیرادا آغلاییرلار .

قفر و نریمان اوولده یاواش یاواش ایش گورورلر ، ائیله بیل مجبوردورلار ، سونرا داها هاممیدان آرتیق کورکدن ایشه گیریرلر .

دالیسی . ائشیک . هامان یئر .           

آخشام اولوبدور ، قارانلیق دوشور ، دانشجولارلا آیدین بیر خارابادا اوزلرینه یئر دوزلدیب یاتیرلار .

قفر ایله نریمان گلیر و آیدینین یانیندا اوتورورلار .

                آیدین          دایاندیز ها ، یورولمویاسیز .

       نریمان         آیدین یورولدوخ واللاه .

       قفر             سیز نه وقت بیلدیز ؟

       نریمان         نه فرقی وار ، آنجاق ایندی بورادادیر .

       قفر             گورورمدا ...

                آیدین          آی جانیم هر کیمسه ائیلیه بیلسه گرک گله .

      نریمان          هیه واللاه .

                قفر             بیزیم کیمین ...

      آیدین          دوزدوردا ، منیم اوزومون یوز ایشیم اولا اولا ائیله اوشاقلار دیینده اهرده نه اولوب هر نه یی اوتوردوم گلدیم بورایا ،

                                 یاززیق آتاما بیر موشکول گلیب قاباقا ، من ایندی گرک اورمودا اولاردیم آمما بورادایام ، بیلیرم سیزینده یوز ایشییز

                                 اولا اولا گلیبسیز بو یاززیق ورزیقانلیلارا ، هریسلیلره یاردیم ائیلیه سیز ، بیلیرم واللاه ...

      نریمان          دئدین آتایان نه اولوب ؟

                 آیدین            نه دئییم آخی ، اه ...

      قفر              اوغلان فیکیره سالدین بیزی سن .

      نریمان          هیه واللاه ، دئگینن گورخ نه اولوب آتایان ؟

      آیدین           هله کی بازداشتگاهدا ، پوللار تاپیلماسا یاززیق قوجا وقتینده گرک گئده زیندانلارا ...

      قفر              نه پولو ؟

      نریمان          سوسما گورخ کیشی ، اولمویا تیمین پولون دئییرسن ؟

      قفر              منظورون او دئییل کی ؟ هان ؟

      آیدین           منه اوجور دئدیلر .

      نریمان           قفر بو نه دئییر ؟

      قفر               پوللار بادا گئتدی ؟ آیدین بونو ایسته ییرسن دییسن ؟

      نریمان           بیزیم پوللار ؟

      آیدین            واللاه نه بیلیم آخی ! آقا نریمان سیز کی اوزویوز پول وئرممیشدیز !

      قفر               بو سوزلر سنه گلمییب ، دئگوروم پوللاری هارادا گیزلدیبسیز ؟

      آیدین            اوولن منیم هله کامیل خبریم یوخدور نه اولوب ، ایکیمجیده سیز نه کاره سیز بو آرادا ؟ بیر تومن پولویوز واریدی

                                   میه او پوللارین ایچینده ؟

                نریمان           یئکه دانیشما گوروم ، بورا اورمو اولماسادا بیز نریمان ایله قفریخ هله ، تئز دئگوروم پوللار هارادا ؟

      قفر               ساقول نریمان ، اولا بیلمز بونون خبری اولمویا .

قفر ایله نریمان آیدینی توتورلار و ایسته ییرلر وورالار .

نئچه نفر اونلاری گوروب و گلیب بیله لرین آرالی ییرلار .

      بیر قوجا         اوتانین واللاه .                                32

      آیدین           نیه به منه بوجور باخیرسیز ؟ سیز کی منی تانی ییرسیز ، من داوا آدامی یام ؟ دئییرم آتام زیندانا دوشوب بیله می دیله

                                  توتماق یئرینه یاخامدان یاپیشیرلار ، من او بدبختی او حالدا قویوب گلمیشم بورادا خالقیما کومک ائیلی یم اوندا بو

                                  ایکی آدام حالیمی توتورلار .

      نریمان          گئدخ قفر ، دوشدو آغلاماقا .

      قفر              گئدخ .

گوندوز . ائشیک . هامان یئرلر .           

قفر ایش گورمکدن هم یورولوبدور همده آجیخیب و اوتوروب بیر قیراقدا .

نریمان ناهارا ساندویچ گتیریر .

قفر ساندویچی آلیر یئسین بیر اوشاقی گورور اونا حسرتله باخیر ، ساندویچی وئریر اوشاقا .

نریمان اوز ساندویچین بولور یاریسین وئریر قفره .

       نریمان           نه پیس اولور آدام هر نه یین الدن وئره .

       قفر               یاززیقلار .

       نریمان           عومور بویو گل دده سیز ننه سیز قال .

       قفر               کیم بیلیر نئجه چتیندیر ؟

       نریمان           عومور بویو باخ اونون بونون الینه ، اون دورد یاشیندان قارنی یین دولدورماقا ال آت ایری ایشلره ، دیلنمخ ،

                                   اوغورلوق ، قومار ، قاچاقچیلیق ، بویون تاپدین یئدین صاباح نه اولاجاق ؟ بیلمه ، اونون بونون عاددی ایشلری سنه

                                   بویوک حسرت اولا گرک ، اوشاقلیقدا چرخه حسرت قال کوچه لرده تکر اویناد بویوکلوقده ماشینا ، ائو بیلمه نه یه

                                   دئییرلر ! خوشلوق نه یه !

       قفر               نئجه گونلر چکدیخ .

       نریمان           بیری بیریندن پیس .

       قفر               او پیس گونلری یادیما سالماقلا ساندویچیده حارام ائیله دین .

       نریمان           منده داها یی یه بیلمیرم ، آی قفر دئییرسن بیزیم پول نئچه ائو دوزلده بیلر ؟

       قفر               من معمارام یا بنا ؟!

       نریمان           بنا اولماق لازیم دئییل ، پولون چوخو آدامین گوزون آچیق ائیلر ، دئییرم نئجه دیر بیز پولوموزو بونلارا ...

       قفر               یاخچی آدین نه قویاخ ؟

       نریمان           نئجه ؟

       قفر               اوغورلوق مالیلا مسجد دوزلدیرسن ؟

       نریمان           او اوغلان ، آیدین دئدی آتاسین توتوبلار ؟

       قفر               گورورم لاب مسلمان اولوبسان ؟ فیکیره دوشوبسن خئیر ایشلر گورسن !

       نریمان           خوشدور یوخسا پیس ؟

                قفر               یاخچیدیر ، آمما منده شریکم پولا یوخ ؟

       نریمان           امینم منده اولان فیکیرلر سنده ده وار ...

       قفر               هله نه دییجییخ ؟

       نریمان           کیمه ؟

                قفر               میللته .

       نریمان           سن نه دئییرسن ؟

                قفر                                                        دئییرم کئشگه آیدینله سوزلشمی یردیخ ...                                33

         نریمان           اونو یولا گتیرمخ منله ، نقشه ن ندیر ؟

دالیسی . ائشیک . هامان یئر . 

نریمان ایله قفر آختارا آختارا گئدیرلر آیدینه ساری .

آیدین اوزاقلاشیر .  

قفر گئدیر آیدینین اوزوندن اوپور قایتاریر .        

      نریمان           بیلیرسن آیدین نه اولوب ، باخ ، البتده اوجور کی فیکر ائیلی یسن دئییل ها ، پیس فیکیر ائیلمه بیزیم موریدیمیزده ...

                قفر              دوز دئییر آیدین ، بیلیرسن بیزیم نیت خئییریدی .

      نریمان           به ، خئییر اولماسایدی بو ایشی گورمزیدیخ اصلن .

      آیدین            آی کیشی ال چکین ، سیز منی یولداشلاریم یانیندا خاراب ائیله دیز ، نئجه نییتی ییز خئیر اولا بیلردی ؟

      قفر               بورانی دئمیریخ ، نریمان اصلی سوزو سویله بیله سیندا ...

      نریمان           آیدین داداش ، سن گل بیزله گئدخ اورمویا ، یولدا بیر سوزلر گرک دی یم سنه ، آخی ...

      آیدین            گئدمغین فایداسی اولسایدی من ایندی اورادایدیم ، پول الدن گئدیب ، تاپیلان اولسایدی اونلار تاپاردیلار ، بیز بورادا

                                   اورادان چوخ درده دیه بیلریخ .

      قفر         اورایا گئدمخدن منظور بورایا فایدا یئتیرمخدیر ، سن بیزله گل ایشین اولماسین .

      آیدین            سوزو اوستو اورتولو دئییرسیز باشا دوشمورم ، آچین ، بلکه دا سیز حاقلیسیز .

                نریمان           باخ آیدین ، بیز بیر خئیر فیکیریمیز وارییدی ، ایستدیخ اونا یئتیشخ ، ایکیمیز اوتوردوخ و تصمیم توتدوخ آسلان عمی

                                   ییغان پوللارا بیر خالقا منفعت یئتیرن ایش تاپاخ ، بو اولدو پولو ، دئییم ها آیری فیکیرلر وورسا باشی یان اولمویاجاق ،

                                   بیز پوللاری گوتوردوخ گئدخ یاخچی ایشلر باشا سالاق ، ایشیم یوخ نئجه اولدو بورالاردان باش چیخارتدیق ،

                                   آمما ، سوز آمماسیندادیر ، باخ یولداش ، باخیشیندا چوخ سوز وار ، منده بیلیرم سنده ، بوراجاقدا دینمی ییبسن

                                   آقالیقیین گوستریر ، آقا باخ اصلن سوزون دوزو بودور باخ ، قفر دئدی منه گل پوللاری ...

       قفر         نریمان داداش ایندی کی دوزون دئییرسن هاممیسین دوز دئدا ...

          نریمان          آقا ایکیمیز پوللاری گوتوردوخ قاچاق گئدخ ، ایشیم یوخ ، اوول گلدیخ هریسده بیزیم قوهومون ائوینده گیزلنخ ،    

                                   سونرا ایشین دالیسین توتاخ ، بورادا زیلزیله اولدو ، اوله بیلردیخ ، اولمدیخ ، بورالاری گورنده دونیادان بئزدیخ ، ایندی

                                   ایشیمیزدن پئشیمانیخ ، بو داها دوزدور ، ایشیم یوخ آللاه بیزیم بو پئشیمان اولماقیمیزی قبول ائیلیه بیلر یا ...

       قفر             اینشالاه ائیلیر ...

       نریمان         اینشالاه ، دئییردیم ، سوزون ساقی ایندی بو نتیجه یه یئتیرمیشم ، یانی منله قفر بو نتیجه یه یئتیرمیشیخ ، پوللاری بورادا

                                   و بو یئرلرده خرج ائیلی یخ ، پول صاحابلاری اوزلری بیلر قبول ائیلیه یا یوخ ، آنجاق بو ایش اولمالیدیر ، هن ندیر ؟

                                   نیه به بوجور باخیرسان ؟

        قفر             آیدین سو وئریم ایچسن ؟

        نریمان         اولر قانی دوشر بوینوموزا ها قفر ...

قفر سیلله ایله آیدینی اوزونه گتیریر .

        آیدین          وای دده م ، سیز نه ایش گوروبسوز ؟

        قفر             یوخ بابا هله دیریدی .

        نریمان         اوغلان بیز پوللاری گوتوروب قاچمیشیخ سن نیه بوجور رنگین دونوبدور ؟

        قفر             دینمیرسن آیدین ...

        آیدین          سیز جاماهاتین پولویلا ایستییرسیز نه ایش گوره سیز ؟ وای سیزه ...

        نریمان         دئدیخ گئدخ اورمویا سن پوللارین صاحابلاریلا دانیش دئگینن نه اولوب ، به بیز نه دئییریخ بیر ساهاتدی ؟     34

        آیدین          وای سیزه وای ، سیز نه ایش گوروبسوز ، یاززیق آتام ، یاززیق ...

        نریمان         آیدین سن بیر دانشجو باباسان ، ایندی بو ایشلرین ، بو سوزلرین یئریدیر ؟ اوغلان دور گئدخ بو آداملار پولا

                                   احتیاجلاری وار .

                   آیدین        پوللارین صاحابلاری قبول ائیله مسه لر ؟

                   قفر           بیزده سنیله گلیریخ ، کیمین جوراتی وار قبول ائیله میه ؟

         آیدین        واللاه خوشدور ، هر نه زورلا گرک اولا هان ؟ نه دئییم سیزه من ؟

         نریمان       هله گئدخ اورایا ، گورخ نه اولور .

         آیدین        گئدمخده سوز یوخ ، دونندن بویانا بورایا چوخلاری کومکه گلیب ، قالمیشام گورم جاماهاتا گرک نه دئییله ، گئدغین

                                   گوره غین یولدا نه گلیر فیکیریمیزه .

دالیسی . ائشیک . یول .

اورمو اتوبوسو یولدا گئدیر .

دالیسی . ایچری . اوتوبوسون ایچی .

آیدین ، قفر و نریمان اورمو دنیزینه باخیرلار .

دنیز قورویوب .

دالیسی . ایچری . پاسگاه .

آیدین ، قفر و نریمان اوتوروبلار صندلی اوسته .

افسر نگهبان تئلویزیونا باخیر .

تئلویزیون زیلزیله دن خبر وئریر .

آسلان کیشی بیر سربازلا گیریر ایچری یه .

آیدین آتاسیلا قوجاقلاشیر .

اسکندرخان گیریر ایچری یه .

تئلویزیون زیلزیله نی گوستریر ، بو تصویرلرین اوسته اوتاقداکیلارین داواسینین سسی گویه قارخیب .

هاممی اوتاقدان بیر بیر چیخیر ائشی یه .

قفر ایله نریمانی سربازلار آپاریرلار اوبیریسی اوتاقا .

گئجه . ایچری . بازداشتگاه .

قفر ایله نریمان اوتوروبلار بیر گوشه ده فیکیره گئدیبلر .

نئچه نفر اوتایدا اوزانیب یاتیبلار .

گوندوز . ایچری . پاسگاه .

آیدین موبایلینین گوشیسیله قفر و نریماندان زیلزیله منطقه سینده گوتوردوقو تصویرلری اوتاق دولوسو محلله آداملارینا گوستریر .

گوشی الدن اله دولانیر و افسر نگهبانا یئتیریر .

هاممی تعجب ائیله ییبلر .

                                                                        35

دالیسی . ایچری . محلله نین مسجدی .

محلله نین بوتون آداملاری ییغیشیبلار مسجده .

آیدین میکروفون الینده دوروب منبرین قیراقیندا جاماهاتا دانیشیر .

       آیدین          سوزوم یوخ بو آداملار دوز ایش گورمویوبلر ، تاوان چکملیدیرلرده دوز ، آمما سوزوم ایندی سیزه بودور بونلارین

                               یاخچی ترپنمخلرین من گوزومدن گوردوم سیزده من گوتوردوغوم فیلیمله ، بو یاخچیلیق گرک یاددان چیخماسین ،

                               اونلاری باغیشلاماق چتین آمما اولمویان ایش دئییل .

   آتابی          آیدین باغیشلاماقدان سوز آچدی ، بوندان قاباق منیله دانیشیردی ، آیدینین سوزلری بونو گوستریر بیزیم باجی

                   قارداشلاریمیز اهرده ، هریسده ، ورزیقاندا بیزیم کومکه چوخلو نیازلاری وار ، من اوز پولومو اونلارا باغیشلاییرام ،

                   سیزدنده بویله اینتیظاریم وار ، بیزیم توپچولارین زورو و غئیرتی اولسا اوزلری توپ اویناییب و لیگ برتره ده گئدرلر ،

                   ایندی بو پول ورزیقاندا ییخیلان ائولره لازیمدیر ، آنجاق باغیشلاماق اولسا بونودا گوره بیلریخ .

محلله نین آداملاری بیربیریله دانیشیرلار .

گوندوز . ائشیک . زیلزیله داغیلدان یئرلردن بیریسی .

محلله نین آداملاریندان نئچه سی زیلزیله داغیلدانلارا کومک ائیله ییرلر .

اسکندرخان ، آتابی ، بویوک آقا و آسلان کیشی آیدین ایله بیرلیکده دولانیرلار و ییخیلان ائولری گتیردیخلری بننا فحله لره گوستریرلر .

دالیسی . ائشیک . هامان یئرلر .

زیلزیله ییخان یئرلر دوزلمکده دیر .

هاممی ایشله ییرلر .

گئجه . ائشیک . هامان یئرلر .

هاممی اودون باشینا ییغیشیب اوتوروبلار .

آسلان کیشی ساز چالیر .

گوندوز . ائشیک . سهند ایستادیومو .

ایستادیوم دولودور .

آسلان کیشی ساز چالا چالا گلیر دورور میکروفون دالیسیندا و چالیر .

ایستادیومداکیلار آسلان کیشیله ماهنی اوخویورلار .

بویوک آقا زیلزیله پارچاسین آلیب الینه و آیدین ایله پول ییغیر جاماهاتدان .

تیراختور تیمینین اویونچولاری گلیر و پول وئریرلر .

آسلان کیشی ساز چالیر .

                                          سون .

                  92.07.15

بولود ...

بولودلار  قوناق 

سوروشدوم   یاغموردان 

قاردان 

گولدو 

آنلامادیم  پیسین   یاخچیسین 

دولدو 

گوزله ریم  یاغماق  ایسته دی ...