پیئس : حسنلو تپه سی ...

صحنه : بیر پوزولموش اسکی تپه .

                                                                   بیر آغ پرده صحنه نین دیبینده گویدن آسلانیبدیر ، شکیللر

                                                                   اونون اوستونده گوستریلجکدیر .

                                                                   بیر قبیر صحنه نین ساقیندا و اوچ سکو صحنه نین سولوندا

                                                                   واردیر .

                              آسلان ، آسلی ، آیدین ، آیگون و قاراپالتارلیلار صحنه ده اوتوروبلار .

سولماز خاتینین سسی : باشلانسین ؟

هاممی بیرلیکده : باشلانسین .

سولماز خاتینین سسی : یاخچی ، یاخچی ،،، بویوک تانرینین آدیلا باشلاییریخ ،،، ایشیقی سوندور ،،، شکیل ، او یوخ ،،، آی هوو ، یئنیدن ،،، آهان .

آیگون : آیدین قورتار گورخ ، لپ تابلا اویناما .

آیدین : یاخچی .

سولماز خاتینین سسی : نه اولوب اورادا ؟

آیدین : هئچ ، باشلایین ،،، دینمه دا .

سولماز خاتینین سسی : بیر ، ایکی ، اوچ .

                              حسنلو تپه سینین شکیللری .

سولماز خاتینین سسی : بوراسی حسنلو تپه سی . حسنلو تپه سی اورمو گولونون گونئی باتیسیندا یاشیللیق سولدوز یوردوندا یئرلشیبدیر . باتی

                              آس اربایجان و اونلا بیرلیکده سولدوزدا چوخلو تانینمامیش و دیرلی تاریخی اثرلر واردیر . اونلاردان بیری اولان حسنلو

                              تپه سی یئتدی مین ایل مسیح دوغوشوندان اونجه یه قاییدان تاریخی واردیر .

                              آسلان و آسلی نین سوموکلری نین شکیلی سون پرده یه دوشور : ایکی

                                                                              اولونون سوموکلری بیر بیرین یانیندا اوزانماق حالیندا .   

                              آیدین و آیگون یاواش یاواش گیریرلر ایچری یه .

آیدین : سس گلیر ؟

آیگون : یوخ ، هانی ؟

آیدین : دانیشما گوروم .

آیگون : سن دانیشدیریرساندا ...

آیدین : سوس .

آیگون : قورخودما .

آیدین : قورخاجاغیدین نیه گلیردین ؟

آیگون : دئییرسن قاییدیم گئدیم .

آیدین : گئده بیلرسن ؟

آیگون : من گئده بیلمسم سنده قالا بیلمزسن ، گئتدیم ...

آیدین : دایان گوروم ...

آیگون : گئدمی ییم ؟                                                          1

آیدین : باخ گوروم منیم سنسیز بورالاردا نه اولوم یاتیب ؟ آی جانیم سن اوچون بورادایام ...

آیگون : دوز دئییرسن من اوچون بوراداسان ؟

آیدین : یالان دی یجم ؟

آیگون : وای کی من سنی چوخ ...

آیدین : سوس ، سوس ...

آیگون : آیدین سن قورخاندا منده قورخورام .

آیدین : من قورخمامیشام .

آیگون : آهان ، بو تاپپیلتی دگیرمان سسیدیر ، سنین قلبی یین یوخ .

آیدین : آی جانیم دینمدا ..

آیگون : سس گلمیر ، هانی سس ؟

آیدین : وای سنین الیندن .

                            آیگون ایشیق آچیر .

آیگون : ایشیق ...

آیدین : سوندور اونو .

آیگون : هئچ یئری گورمورم آخی .

آیدین : ایندی آی چیخار .

آیگون : آی چیخاناجاق بو ایشیق سالسیندا ...

آیدین : بونون ایشقی بیزی گوسترر ، سوندور .

آیگون : ویی ...

آیدین : ندیر ؟

آیگون : سونمور !

آیدین : وئر گوروم منه ..............................

آیگون : گوردون .

آیدین : کورلادیندا .

آیگون : منه نه آخی ، اوزون گئدیب خاراب چیراغ آلیبسان .

آیدین : آلاندا باخدیم ، ساق ساقیدی .

آیگون : چینی جینس بودوردا .

آیدین : واللاه گنج اوسته اوتورمامیشدیم آمریکائیسین آلام ، واریم اولسایدی نه اوچون سنیده سالیردیم دالیما گلم بورایا ؟

آیگون : اوندا بونون خارابلیغین منیم بوینوما آتما .

آیدین : یاخچی سنده ، گل قوی کیفی یین ایچینه ایشیقی گورسنمسین .

آیگون : سن کی دئییردین بورایا گلن اولماز گئجه لر !

آیدین : گوزلمکدن زیان گلمز .

                              آسلان و آسلی قبیرلرینین ایچینده یاتیبلار ، اونلارین پالتارلاری سوموک

                                                                              شکیلینده دیر .

آسلی : آسلان ، آسلان ، آسلان .

آسلان : هان ؟

آسلی : آسلان ، آسلان ...                                                        2

آسلان : ندیر آخی ، قوی یاتاخدا .

آسلی : نه چوخ یاتیرسان ، دور سس گلیر .

آسلان : نه سسی ؟ یاتدا .

آسلی : بورالاردا آدام وار .

آسلان : هر گئجه بونو دئییرسندا .

آسلی : بو سیرا دوغروداندا سس گلیر .

آسلان : آسلی ، یات قوی منده یاتیم .

آسلی : قورخورسان یوخ ؟

آسلان : کیم من ؟

آسلی : من یاتدیم آمما قورخاقلار ساق باش گورا آپارا بیلمزلر ...

آسلان : دور گوروم هارادان سس گلیر باخ .

آسلی : کیشی اول دور گئد باخدا ...

آسلان : بیلیرسن سنسیز گئده بیلمرم بو سوزو دئییرسن ؟

آسلی : بیرده دئگینن منسیز گئده بیلمزسن ............

آسلان : سنسیز منیم نه گونوم ، نه یاشاماقیم آخی آسلی جان ...

آسلی : یاشام ؟! ( ایکیسیده گولورلر )

آسلان : هارادان سس گلیردی ؟

آسلی : اوتایدان .

آسلان : گئدخ اویانا باخاق .

                            آسلی ایشیق آچیر .

آسلی : ایشیق ...

آسلان : سوندور اونو .

آسلی : گورمورم آخی .

آسلان : بونون ایشقی بیزی گوسترر اونلاری یوخ ، سوندور .

آسلی : ویی ...

آسلان : ندیر ؟

آسلی : سونمور !

آسلان : وئر گوروم منه .

آسلی : گوردون .

آسلان : کورلادیندا .

آسلی : منه نه آخی ، اوزون گئدیب خاراب آچیرآغ آلیبسان .

آسلان : آلاندا باخدیم ، ساق ساقیدی .

آسلی : قیراق بازارین جینسی بودوردا .

آسلان : واللاه گنج اوسته اوتورمامیشدیم آتایین بازاریندا دوزلدنلردن آلام ، واریم اولسایدی آتان راحاتچیلیکلا وئرردی سنی منه ، قاچیرتمازیدیم

          بیله یین .

آسلی : اوندا بونون خارابلیغین منیم بوینوما آتما .

آسلان : یاخچی سنده ، سوندوردوم .

آسلی : به دئییردین بورایا گلن اولماز گئجه لر !                              3

آسلان : گوزلمکدن زیان گلمز .

                                                                  آسلی ایله آسلان بوتایدان و آیگون ایله آیدین اوتایدان گلیرلر .

                                                                              بیر بیرین یانیندان کئچیب گئدیرلر .

سولماز خاتینین سسی : یاواش گوروم ، دورون ...

آیدین : نه اولدو ؟

سولماز خاتینین سسی : هارا به ؟

آسلان : گئدیریخدا ...

سولماز خاتینین سسی : خئیر اولا !

آیگون : اینشالاه خئیردیر ...

آسلی : اینشالاه ...

سولماز خاتینین سسی : یوخ واللاه دئییل .

آسلان : نیه آخی ؟

سولماز خاتینین سسی : لاب سری ییبسیز ها !!! آی جانیم یئتیشدیز بیر بیره دوز گئتمه یین کی ...

آیدین : به نه ایش گورخ ...

سولماز خاتینین سسی : قورخاجاییز ، متنه بیر باخسایدیز ...

آسلی : سولماز جان باخمیشیخ ، کیم قورخاجاق ؟

آیدین : بیز یوخسا اونلار ؟

آسلی : سیز ...

آسلان : آسلانلار قورخاق اولماز .

آیدین : اولمویا اوزویون آسلان بیلیرسن ؟ نقشین آسلان نقشی دیر ، اوزون یوخ جانیم ...

آسلان : هله یانیرسان بو نقشی منه وئریب سنه یوخ ...

آیدین : یالوارسایدیدا من گئدمزیدیم او ...

آیگون : اوتوردا آیدین .

آیدین : بو باشلادی دا .

آسلی : بو سولمازلا دانیشیردی سن نیه اوزویون آتدین آرایا .

سولماز خاتینین سسی : یاخچیدا ...

آسلان : بیز روح اولساق بونلار گرک قورخادا آی سولماز .

سولماز خاتینین سسی : بیری بو سولماز خاتین ، ایکیمجیسی بو هاممی هاممیدان قورخاجاق ، قورخاندان سونرا قاچاجاییز ...

هاممی بیر یئرده : چوخ تیکراری بیر صحنه ، چوخ .

سولماز خاتینین سسی : سوس ، کارگردان بویله ایسته ییب .

آسلان : بویون یوخدور چئویردا .

سولماز خاتینین سسی : وای سیزین الی ییزدن ، باشلایین گوروم .

                                                                  آسلی ایله آسلان بوتایدان و آیگون ایله آیدین اوتایدان گلیرلر ، بیر بیرینه

                                                                              یئتیرنده چیغیریب قاچیرلار .

آسلان : دایان گوروم کیمسن بورالاردا ؟

آیدین : وای دده ...

آسلان : کیمسیز دئدیم ...................

آیگون : جاواب وئردا .                                                         4

آیدین : نه دئییم آخی ؟

آسلی : آسلان بو بئچارالارین نه سوجو وار آخی ، بو هئیبتده دوروبسان من قورخورام سندن ...

آسلان : قورخسالار تئز سوزه گلرلر ،،، دئمدیز کیمسیز ؟ بورادا نه ایشی ییز وار ؟ دانیشین گوروم .

آیگون : سیز اوزویوز کیمسیز ؟

آسلی : من شامان قیزی ، بودا خان چوبان اوغلو ...

آیدین : آدی ییز یوخدور ؟

آسلان : او آسلی ، من آسلان ، سیز ؟

آیگون : من آیگون ، بو آیدین .

آسلان : تانیمادیم ، آتاییز کیم ؟

آسلی : آناییز ؟

آیگون : مامور اولمویالار ؟

آیدین : سوس ،،، تانیمازسیز ، اوزاقدان گلمیشیخ .

آسلان : دئییرم آخی بورالاردا گورممیشدیم سیزی ، نه یاخچی ؟

آیدین : آخی اول سیز بو پالتارلاردان ، بورادا اولماقی ییزدان دئیین ، سونرا بیزده ...

آیگون : مامورسوز ؟

آیدین : دینمه دا ...

آسلان : مامور ندیر ؟

آیدین : آغزینا گلدی ، هئچ ،،، آخی بیز هله بوتون بیلممیشیخ سیز کیمسیز !

آسلی : بورا بیزیم تپه دیر ، ائویمیز بورادادیر .

آیدین : آی جانیم بو تپه نئچه مین ایلدیر خارابادیر ، سیزین ائوی ییز هانی بورادا ؟

آسلی : بو نه دئییر ؟!

آسلان : سن نه دئییرسن !؟ تپه خارابادیر ؟

آیگون : آیدین لپ تاپدا گوستر بونلارا حسنلونین شکیللرین .

آسلی : حسنلو ؟! لپ تاپ ندیر ؟

                              حسنلو تپه سینین شکیللری .

سولماز خاتینین سسی : حسنلو تپه سی یئتدی کیلومتر سولدوز شهریندن آراسی واردیر . حسنلو آدینی بو آددا اولان کندین یاپیشیغیندا اولماسیندان

                               آلیبدیر . سولدوز اوزو اولا بیلر سولو دوز یا آس اولدوز اولا بیله . بو تپه نین قازینتیلاری 1313 شمسیدن باشلاندی .

                               1336 _ دا بیلیمسل و تخصصی آختاریشلار بیر ایرانلی _ آمریکالی هئیاتین آختاریشی ایله باشلاندی . دئدیکلره گوره

                               بو تپه نین تاپیلان قالاسی ماننا ائلینه عاییددیر . بو تپه دایسون دئدیغینه گوره اون قاتدیر . هر قات بیر ائله و تمددونا عایید

                               اولا بیلر .

آسلی : باخ بورا ، بو سنیله من اولاجاییخ ها .

آیگون : دوغروداندا بونلاردیر !!!

آیدین : وای بیزه ، گور کیملرله اوزبه اوز اولموشوخ .

آسلان : نه ییمیزدیر ؟؟؟؟؟؟؟؟؟؟؟

آیگون : بیزه بیر شرفدیر سیزیله تانیش اولماق ..........................

آیدین : باخیندا ...                                                          5

آیگون : دوز دئییر ، لپ تابدا یاخچی شکیللر وار .

آسلان : شامان آتایین جامینا آد قویوبلار .

آیگون : لپ تاب ؟؟؟ !!!

آیدین : جام جمدیر منظورون ؟

آسلان : جم کیمدیر ؟

آیگون : یم ، اود آتاسی ...

آسلی : اود آتاسی پیریم آتایدی .

آیدین و آیگون : پیریم آتا ؟! یوخ جم ، هامان یم .

آسلان : پیریم یم ! پیریم یم ! باخ بیر بونلارا ، پیریمین پیرین گوتوروبلر یمی قالیب ، پیریم آتا ...

آیگون : آهان پرومته .

آیدین : او یونانلی لارین اود آتاسیدیر ...

آسلان : خان اوغلان اودون بیر آتاسی واریدی اودا پیریم آتایدی ...

آیدین : آدیم آیدیندیر ...

آیگون : بیزه اوجور اویره تمی ییبلر ...

آسلان : پیریم یانان آغاجا دئییرلر ، قولاق وئرریرسن دئییم اویره ن .

آیدین : بیزیم دانشگاهدا اوخودوغوموز درس باستان شناسلیقدیر ، آرکولوقوخ بیز ، خوشوموز گلیر دئسز ، اویره نریخ .

                                                                          آسلان اوتوروب یئره و اللرین آچیب گویه ساری .

آسلان : آنام آس ، آنام آس ، آنام آس ...

آسلی : آنام آس ، آنام آس ، آنام آس ...

آسلان : آنام آس ، آنام آس ، آنام آس ...

آیدین : نه دئییرلر ؟

آیگون : تانری یا یالواریرلار ،،، آنام آس !؟ آنامآز !؟ ناماز !؟

                              گویدن اود بیر قابدا گلیر آششاغایا ، اودون قابی بیردن بیره دوشور یئره .

آیدین : قاچین اوتایا .

آسلان : آی جانیم دوشموشدور باشیمیزا آخی ، اه .

آیگون : اولماز بو گویدن گلمی یه ؟

آسلی : نیه اولمور آخی ! یاخچی هله یالان اودویدو .

سولماز خاتینین سسی : نه اولدو ؟ به او نیه دوز گلمدی ؟

آسلان : بونو آیری میزانسئن ایله یوللا ، اولماز ؟

سولماز خاتینین سسی : کارگردانین نظری بویله دیر .

آیدین : آی جانیم بو میزانسئنی کارگردان محترمیمیز یئدی سکگیز ایشده ایشلدیب ...

آیگون : نئچه ایشدده دئراماتورژویموش ، اونلارادا دئییب بونو ایشلدیبلر ...

آسلان : رئال ، سوررئال ، مدرن ، پست مدرن ، اکسپرسیونیستی ایشده فرقی یوخ بیله سینه ، بیر باشدان بو میزانسئنی وئریب گئدیب باشا ...

سولماز خاتینین سسی : بیر گون بورادا دئییل ها ! هاممی قورد اولوب ، اوزو اولاندا قوزو کیمی سوزه باخیرلار ،،، یاخچی ، آسلی سن اودو سکولار

                              اوستوندن گتیر وئر آسلانا ،،، یئنیدن باشلا گوروم .                                   6

                                                                          آسلان اوتورور یئره و اللرین آچیر گویه ساری .

آسلان : آنام آس ، آنام آس ، آنام آس ...

آسلی : آنام آس ، آنام آس ، آنام آس ...

آسلان : آنام آس ، آنام آس ، آنام آس ...

                                                                          آسلی اودو سکولارین اوستوندن گوتورور ، یاواش یاواش گلیر  و  وئریر

                                                                            آسلانا .

آسلی : آس آنام گوندریبدیر اودو .

آسلان : ساقلیکلار اولسون آس آناما ، بونو منده وئرجاغام تانریم یاراتدیغی آداملارا .

آسلی : پیریم آس ، آدین اولدو اودلار آتاسی ؛ پیریم آتا .

                               آسلان اودلا اویناییر .

آسلان : آس ائللرین بیر آتاسی واریدی پیریم آس آدیندا ، اودو آس آنامیز تانریدان آلدی گتیردی وئردی اونا ، اونوندا آدی دوندو اولدو پیریم آتا .

آیگون : آس آنا کیمیدی ؟

آسلی : آبان اولاردان بیری ...

آیگون : آبان او ؟! بانو !

آیدین : بانو ،،، الهه ...

آیگون : نه گوزل تاریخی آچیرلار .

آیدین : به ندن بونلاری بویله اویره تمی ییبلر بیزه !!!

آیگون : ائیله بیل بونلارین یئرینه چوخلو یالانلار اویره نمیشیخ !!!

آسلان و آسلی : یالان ؟

آیدین : هن ، یالان ...

آسلان : او ندیر ؟

آیگون : سیز بیلمیرسیز یالان ندیر ؟! دوز اولمویان سوز .

آسلی : میه سوزده دوز اولماز ؟

آیدین : سیزده یالان یوخ ؟

آسلان : نه اوچون گرکدیر ؟

آیدین : بوتون ایشلری باشا آپارماق اوچوندور ...

آیگون : بیزیم زاماندا یالانسیز ، ایشلر قاباقا گئدمز .

آسلی : نه پیس بیر زامان ....................................................................................

آیدین : سیز بو شکیلده یاتیبسیز ؟

آسلان : نئجه ؟

آسلی : آسلان سوروشوردا ، نه دئییب آخی بویله دامارین شیشدی ؟

آیگون : ایستمسز دئمه یین .........................

آسلی : آسلان دئگینن ، دئگینن .

آسلان : بیز بورادا تزه توی توتموشدوخ .

آیگون : وای توی ...

آسلی : اودا نه گوزل بیر توی .

آسلان : من بی ، آسلی بایان ،،، یادیندا هارادا گوردوم سنی ایلک سیرا ؟            7

                              آسلان آت سورور ، آسلی کوزه چیینینده گئدیر ، بیر بیری گوروب ، باخیب

                                                                             و  گولورلر .

                              آسلان سوز اوخویور ، آسلی اویناییر .

                              آسلان بیر جامدا شکیللره باخیر .

آسلان : اونون آتاسی یوخ گلسین قاباقا ؟

آسلی : او بیر کیشی کیمین اوزو گلیب قاباقا ، آتاسی اولوب .

آسلان : من قیزیم آسلینی چولدن تاپمامیشام هر کیمسه یه وئرم .

آسلی : او خان چوبان اوغلودور ، بیرده بیزیم قیزیمیز آسلی اونو سئویر بویوک شامان .

آسلان : یادیندان چیخار .

آسلی : یادیندان چیخسایدی باخدیغین جامی اویله آتمازیدین اوتایا .

آسلان : دئدیم اولماز .

آسلی : آسلان آسلان هاراداسان بو اوزون گئجه لرده ؟ ( آسلانی آختاریر و تاپیر )

آسلان : ساچین اوزون ، چولده سارالان سونبوللر کیمی ، گوزون گوزل ، آی کیمی ایشیقلی ، الین ایستی بیر گونش کیمی ،،، ( اوخویور ) ،،،،

           آی سنده بیرینه وورولوبسان گئجه لر یاتا بیلمیرسن ؟ گویده یانیرسان آیریلیقیندان ؟ ( اوخویور )

آسلی : منی آپار بورالاردان ، آپار ،،، قاچارام سنیله ، آسلان آپار منی .

آسلان : قاچدی منیله آسلی گلدی بو تپه نین اوستونده اولان قالامیزا .

آسلی : گلدیم ، قیرخ گئجه گوندوز توی اولدو .

                               تویدور .

آسلی : آنام دئدی یادیندان چیخماز ، دوز دئدی ، چیخمادی .

آسلان : چیخا بیلردی ؟!

آسلی : چیخمازیدی ...

آسلان : بیز یاشامی باشلادیخ .

آیگون : سونرا ؟

آسلی : گئددیخ گئجه نی اورادا یاتاق .

آیدین : سونرا ؟

                              حسنلو تپه سینین شکیللری .

سولماز خاتینین سسی : ایرانلی _ آمریکالی آرکولوقلارین آختارماسی گوستریر بو قالا یانیبدیر . ایندی یازیلان یازیلار تاریخ ساحه سینده گوستریر

                              آسیادا چوخلو قالالار یهود الیله یانیبلار . بو قالالار بیر شکیلده و بیر زاماندا اود وورولوبلار . یهودون بو یاندیرما و

                              پوزقونلوق سالمالاردان نه ایسته دیگیندن هله ده بیر سوز دئییلمیر ، بو سوزلر بولود دالیسیندا قالیبلار .

آیگون : دئدیز بو خان چوبان اوغلودور ، سارایین خان چوبانی !؟                  8

آسلان : خاییر ، آلپ آراس خان چوبان .

آیدین : او کیمدیر ؟

آسلی : تانیمیرسیز ؟!!

آسلان : به سیز کیمی تانی ییرسیز ؟!

آسلی : تانیتدیر آسلان آتایین .

                              قاراپالتارلیلار هوجوم گتیریبلر ، آسلان دویوش ائیله ییر ، توتولور .

سولماز خاتینین سسی : ایگیت چوخ قولدورسان ، خوشوما گلدی دویوشون ،،، بوگون چین اولکه سینین قوشونو ایری آنا آدلانان یوردون قوشونونا

                              اوغورلو اولدو ، ایندی دویوشو اودوزانلاردان بیری گرک بیر اوخ آتسین ، سیز یاخچی کامان چکیرسیز آس اوغوللاری ،

                              بو سیزلرین کانیندادیر ، بویله اولسون ،،، ایندی بو زورلو اوغلان کامانین آلاجاقدیر الینه چیخاجاقدیر او داغین اوستونه و

                              اوخونو آتاجاقدیر ، اوخ هارا دوشسه اورا اولاجاق ایری آنا ایله چین آراسیندا جیزیق .

آسلان : بو اولان دئییل ...

سولماز خاتینین سسی : اولماز ؟! اوز قوشونومدان بیرینه دئییم گئدسین اوخو آتسین ؟

                              آسلان بیر کامان الینده چیخیر سکو اوستونه .

                              آسلان اوخ آتیر .

آسلان : کامانی اولدو الی آتامین ، اوخو جانی .

آسلی : اوخ گئتدی ، چوخ گئتدی ، اوچا اوچا ، قاناد آچدی اوخ ، آراسین جانی ایچینده گئدیردی ، اوخ گئتدی یئتیشدی ایری آنانین سون یابانینا ،

          اورادا دوشدو یئره اوخ ، اوخ ایری آنا توپراقیندان بیر اوووج وئرمدی چین خاقانینا .

آسلان : داغ اوسته قالدی آتام ، داغلار آدلاندی آلپ آراس .

آسلی : قارامان آراس ، آلپ آراس .

آیدین : وای دده ، البرز !!! الپروس ، آلپروس ، آلپ آروس ، آلپ آرآس !!!

آیگون : آرش !!!

آسلان : اولمویا بونلاریدا دئییشیبلر ؟!!!!

آسلی : وای بیزه ، وای سیزه ..............................................

آیدین : بویله اولسا چوخ آدلار دئییشیلیبدیر ...

                              آیدین لپ تابا باخیر .

                              شکیللر دوشورلر پرده اوستونه .

آیگون : اوستا ؟

آسلی : ائو اوسته !

آسلان : بوتون ائولرین اوستونده اولان یازیلار .

آیدین : آسو زرتشت ؟

آسلان : آس بوتا زاراتوشتو ! آناسی دوغدو آدلانیردی ، آتاسی دده .

آیگون : ارداویراز یا ارداویراف ؟

آسلی : آرآتاوئرآس ! زاراتوشدو آسین یولونون دالین توتدو ، آناسینا یازان سوزلر قالیر ؟ آدین قویدو آرآتاوئرآسدان آناما ...

آیگون : اروادیراز نامه ، آناما ،،، وای .

آیدین : بستور ؟

آسلی : بسدور !                                                              9

آسلان : تکینه دوردو دوشمانلارین قاباقیندا دئدی بیر جان سیز اوچون بسدور ...

آیگون : ساسان ؟

آسلی : آس سان ! آس ائلینه باغلیسان !

آیگون : هاممیسیندا آس وار !!!

آسلی : آدلاردا آس ائلیندن آد آپارماق اوجا یئرلره باغلی اولماقی گوستریردی .

آسلان : آس ائلی بوتون ائللرین باشینا بیر تاجیدی ، آسیا اولکه سی اونلاردان آد آلیبدیر ، چیندن قاف آساجاق اونلارین یوردو تانینیردی ...

آیدین : قاف آس ؟!

آیگون : قافقاز !!!

آیدین : داریوش ؟

آسلان : تاری آس !

آیگون : آتوسا ؟

آسلی : آت آسا !

آیدین : اردشیر ؟

آسلان : آرآتاشئر !

آیگون : بالاش ؟

آسلی : بال آس !

آیدین : اردوان ؟

آسلان : اردوغان !

آیگون : اشکانی ؟

آسلی : آس کانلی !

آیدین : کوروش ؟

آسلان : کورآس ! گوزلرین قان آلمیشدی او آسین ، گورموردو آداملیق ندیر ، دئییلدی کورآس .

آسلی : تومروآس آنا اوغلونون قانی توکولندن سونرا کورآسی دویوشده توتدو ، باشین کسدی قویدو بیر جاناقا دئدی اوز قانیندان ایچ ای قاندان

          دویمویان کورآس .

آیدین : نئجه باش آششاغا اولدوخ بونلارین یانیندا .

آیگون : باخ گور بو اوزون تاریخدن دوزده تاپا بیلرسن !!!؟

آیدین : تاپا بیلمدیم ......................................................................

آیگون : نه ایش گورملی ییخ ؟

آسلی : نه اوچون ؟

آیگون : بونلارین دوزون یایماق اوچون .

آسلان : بو سیزه باغلیدیر .

آیدین : بیزه ؟

آسلی : دئمه دیز اوخویورسوز بونلاری ؟!

آیگون : دوزدور .

آیدین : اوندا به سیز ؟

آسلی : یاشام بیزدن ال چکیب ، نئچه مین ایلدیر .

آسلان : یوخودان دوراندا باشیمدا بیر سوز دئدی نه اوچون دوروبسان ؟ بیلمه دیم بو سوزه نه دئییم ، سیزی گورنده اوزومه دئدیم یوخودان

           دورماقیم اولا بیلر بونلار اوچون اولسون ، آسلی ایله اوزومون سوموکلرین یانمیش گورنده بیلدیم نلر گلیب باشیمیزا ، اولا بیلر بیزیله   10

             سیزین گوروشو بیر سیرا یالانلارین دوزون آچماق اوچون اولا ، اولا بیلر ،،، ایندی ایشلر سیزه باخیر ، بیز داها الدن گئدمیشیخ ،

             کئچمیشلر یازیلارینا یاپیشیب آدیمیز ، بیزیم الیمیزدن هئچ ایش گلمز ،،، وای بیزه .

آسلی : ندن بویله اولدو حالین ؟

آسلان : کئشگه زامانا بیزیم اولاردی ، یوخ آسلی ؟

آسلی : هن .

آسلان : نه پیس ، حاییف بویله دئییل ، حاییف .

آسلی : اوزمه اوزویون آسلانیم .

آسلان : سون یوخوموزدا خوش قالمیشدیخ ، نئجه ایندی باشیمی قویوم یئره بیرده راحاتچیلیکلا یاتیم ؟

آسلی : هارا گئدیرسن ؟

آسلان : بویله یالانلار اوزجکدیر یوخوموزو .

آسلی : دایان هله ...

آسلان : نئجه دایانیم ؟ نئجه قالیم بویله یالان دونیادا ؟ نئجه کوتولره باخیم دینمه ییم ؟ سوسوم آتا بابالاریمین کورلانماقینا ؟ نئجه آنامین

           اویره تدیغی دوزلوقو تالانمیش گوروم دینمه ییم ؟ بویله یاشاما نئجه اولار سوسماق ؟!؟ یوخ منیم یئریم بورالار دئییل آسلی ، آس ائللرین

           یوردو بویله اولا بیلمزیدی ، اولوب آمما ، من قالسام آتام آلپ آراسا ، بابام پیریم آتایا ، آبام دوغدویا یاشامیمدان نه دئییم ؟ یوخ داها آنام

           تومروآسین اوزونه باخا بیلمرم ،،، گئدیرم اوز یوخومدا یاخچی یوخولارین قوناق گلمسین گوزلویم ، بویله یاشام منه یازیلمی ییبدیر ،،،

           گوزل آی گویده اوتوروب گورورسن بیزی ؟ یادیندا ساخلایاجاقسان بونلاری ؟ وای بیزه ، وای ...

آسلی : دور منده گلیم .

آسلان : توپراقیم ، باخ ، جانیم پای اولوب سنه وئرمک اوچون ، ایسته ییرسن ؟ الیمدن هئچ نه گلمیر آخی ، نه ایش گوروم سنه ؟ گل بو جانیم ،

           گل وئریم سنه ، توپراقیم قوی سنه قوربان اولسون جانیم ،،، آسلیم گل باش قویاخ دونه دونه قانلا بویانمیش قارا توپراق اوسته ، یاتماق

           بیزه بویله یاشامدان آرتیق یاراشیر ، گل آسلیم ، گل .

                              آسلان و آسلی قاییدیب گئدیرلر اوز قبریلرینده اوزانیرلار .

آیگون : دانیشمیرسان ؟

آیدین : دانیشماقا سوز قالیب ؟!

آیگون : بیز بورادا نه ایش گوروروخ ؟

آیدین : هئچ نه بیلمیرم ایندی داها ، هئچ نه .

آیگون : بیلیرسن .

آیدین : یوخ بیلمیرم .

آیگون : بیلیرسن ، بیز گلمیشدیخ بورالاردان یئرآلتی تاپاق آپاراق ساتاخ ...

آیدین : بئکار اولماق چوخ زور گلیردی .

آیگون : دئدیم کئشگه بیر ائویمیز اولاردی .

آیدین : دئدیم باستان شناسی درسی اوخوموشوخ آیگون ، آیری ایش الیمیزدن گلمیر ، دئدین بئکار یاشام باشا گئدمز ...

آیگون : دئدیم بیز بیلیریخ هارالاردا یئرآلتی وار ، دئدین آلانیدا چوخ ...

آیدین : دئدیم قاچاقچیلار الیمیزدن اوپور ...

آیگون : دئدیم گئدخ .................................................

آیدین : اوتانیرام اوزومدن .

آیگون : منده .............................................

آیگون : بورانین اوچ قاتین گوتوروبلر ...

آیدین : دایسون دئییر اون قاتدی ...                                         11

آیگون : یئتدی قات ، یئتدی تمددون ، یئتدی خالق کئچمیشی قالیر بو یئرین آلتیندا ...

آیدین : بیزیم آتا بابالارین کئچمیشی ...

آیگون : گرک بیری اولا بو توپراقلاری چکه اوتای بوتایا .

آیدین : قازا بیلمه رم .

آیگون : دئمه داها الیم گئدمز قازماقا ...

آیدین : آخی ، آخی داها بورایا بیر اوغورو گوزویله باخا بیلمیرم ...

آیگون : اوز ائوی ین نئجه اولار اوغورو گوزویله باخاسان ؟!

آیدین : نه کوتو فیکیرلریمیز واریمیش ....

آیگون : آیدین یئنیدن باشلاماق اولار ؟

آیدین : نه یی ؟

آیگون : هر نه یی ...

آیدین : بیلمیرم نه دئییرسن !

آیگون : هر نه گلسه قاباقا ...................................

آیدین : واللاه بیلمدیم !

آیگون : بیلیرسن .....................................................................

آیدین : چتیندیر .

آیگون : الیم الینده اولسادا ؟!

آیدین : چتین اولسادا گرک یولون تاپاق .

                              حسنلو تپه سینین شکیللری .

سولماز خاتینین سسی : حسنلو تپه سینین ان اونملی تاپینتیسی و دونیادا و اسکی تانیمدا اوزل و اونملی یئر آلان شئی قیزیلدان اولان حسنلو

                              قابی دیر . بو قاب حسنلو قیزیل جامی آدیلا تانینیر . بو قابین اوستونده چوخ اینجه لیک ایشلر آپاریلیبدیر . بو اویولموش

                              ناخیشلار بیر حیماسی ناغیلی دئمک ایسته ییرلر . گورن بو حیماسی ناغیل نه اولا بیلر ؟!

                                                                             هاممی گلیر صحنه اوستونه .

هاممی بیرلیکده : یورولمویاسیز .

سولماز خاتینین سسی : چوخ گوزل ، ایشیمیزین نئچه دن نئچه سی دوز اولماسیلا ایشیم یوخ ، آنجاق الیمیزدن گلن ایشی گوردوخ بیز ، ایندی داها

                              اوبیریسیلرین نوبتیدیر گللر و ایشلرین گوستریب سوزلرین دی یلر ، یورولمویاسیز  .

                    سون .

                                          91.08.10  

                      12

اوزوجو ...

اوزاقی  یوخ  ! 

یاخیندیر !

گورمه ک  آمما  گوزله رین 

ایسته کدیر  

اوزوجو 

چه تین ...

حضور ...

تا باشی 

دعات می کنم !

لبالب از حضورت ...