درباره من
نویسنده و کارگردان تئاتر: همراه 09144430089
ادامه...
دئرام متنی : زینجیرلی پیریم آتا ...
دئرام : زینجیرلی پیریم آتا .
پئرسوناژلار : پیریم آتا ، کورآس ، ایستی آس ، آخانآس قیزلاری ،
آخانآس ، هورومآس و قارتال .
صه حنه ایشلی ینه باغلیدیر .
اود ایشیقی .
ایستی آس اود الینده بیر داش اوسته دوروبدور .
نئچه آدام آز ایشیقدا اویانا بویانا قاچیرلار ، بیربیره دییب و ییخیلیرلار ،
سویوقدور ، آداملارین ال آیاقی سویوقدا اوشویوبدور ، ییغیشیرلار بیریئره
بوزوشوب و اوتورورلار ، اللرین قاوزاییرلار گویه دوعا ائیله ییرلر .
آداملار : آنام آس ، آنام آس ، آنام آس ...
ایستی آس آداملاری گورور ایسته ییر گئدسین اونلارا ساری .
زیرآس قارتالی ایله تاپیلر و ایستی آسی چاغیریر .
ایستی آس گئدیر زیرآسا ساری و اونلا دانیشیر ، او آداملارا باخمیر .
پیریم آتا آداملارین اوشومکلرین و قارانلیقدا اولماقلارین گورور و گئدیر
اودو ایستی آسدان اوغورلویور و آپاریر وئریر آداملارا .
آداملار اودو آلیرلار و اونلا اویناییرلار .
ایستی آس ایله زیرآس آداملارین اودلا اویناماقلارین گورورلر .
زیرآس پیریم آتانی ایستی آسا گوستریر .
ایشیق .
ایستی آس ایله کورآس پیریم آتانی زینجیر قیچیندا بیر قایایا ساری
آپاریرلار .
ایستی آس : دایان داها کورآس .
کورآس : یورولدون ؟
ایستی آس : قافقاز داغلارینین باشینا یئتیشدیک .
کورآس : آسکالار یوردو بورادیر ؟
ایستی آس : آس ائللرین یوردو ، آسی یا .
کورآس : بورا اوجادیر ، چوخ اوجا ، آششاغیدا یاشایانلار بورادان چوخ خیردا گورسنیرلر ، آداملار ائیله بیل سیچاندیرلار ،،، هوم ، نه گوزل بیر داغ ،،،
اوجا ، اوجا ، اوجا ،،، ایندی داها آتام زیرآسین سوزون یئرینه یئتیرمک گرکدیر بیزه ، ایستی آس او قایا یاخچیدیر ؟
ایستی آس : تلسمه هله ... 1
کورآس : نئجه تلسمی ییم ؟
ایستی آس : ندن تلسیرسن ؟
کورآس : زیرآسین بیر قانونو وار ، قاباقیندا دایانان اولماسین گرک ، ، ، بو آلچاقی پیس ایشینین سزاسینا یئتیرمک اوچون بوتون یولو تلسمیشم ، اولمویا
سن بویله دئییلسن ؟
ایستی آس : سزاسین چکر بو ، تلسمه ...
کورآس : فیکیردسن ؟
ایستی آس : ...
کورآس : هان ، ایسته ییرسن بورایا باغلاماقدان قاباق ایشکانجا وئرمکیله حالا گتیره سن بونو ! یاخچی فیکیردیر ، ایندی ایشین گوررم .
کورآس باشلاییر پیریم آتانی وورماقا ، ایستی آس قاباقین آلیر .
ایستی آس : دایان گوروم ، دایان دئدیم .
کورآس : آزدیر وورماق ؟!
ایستی آس : کورآس بو اوزو تانریلارداندیر ، پیریم آس اویله کیچیک آد دئییل یاددان چیخا بویوک اولماقی .
کورآس : آنلامادیم ؟
ایستی آس : اوتور بویوک پیریم آسی ...
کورآس : پیریم آس بویوک آدلی اولسادا زیرآس تانریلار تانریسینین قاباقیندا هئچدیر !
ایستی آس : دایان ، هئچ اولسایدی اولومونه سوز وئرردی آتامیز !
کورآس : اولدورمک دئمسده منی گوندریب !!!
ایستی آس : زیرپیسان دوز ، زورلا ایش قاباقا گئدمک لازیم اولاندا سن گئدیرسن دوز آمما ایندی منده بورادایام ، اودا زیرآس آتامیزین سوزویله !
کورآس : باغلاماقینا سوز وئریب کی !
ایستی آس : دئدیم تلسمه هله ...
کورآس : من بونون باخیشلاریندان خوشوم گلمیر ...
ایستی آس : اوز ایچینده اولان کیفیرلیقی توکمه ائشی یه ،،، پیریم آس ایله سوزوم وار .
کورآس : سوزون ! ؟
ایستی آس : پیریم آس ، پیریم آس سنیله ییم ...
کورآس : بونلا دانیشماقا زیرآسدان بیر ...
ایستی آس : اوزاق دورماسان یاناجاقسان کورآس !!!
کورآس : ال چک گوروم ...
ایستی آس : دئدیم ...
کورآس : چکیل اویانا ،،،،،،،،،،،،،،، یاندیم ، اوزاق ائیله اودویون ایستی سینی ، یاندیم ............................................
ایستی آس : سوزه قولاق وئرسن بویله حالا قالمازسان .
کورآس : بو آلچاق سنده اولان ایستینی ، اودو اوغورلویوب وئریب کیچیک اینسانلارا ، آز ایشدیر بو ؟؟؟
ایستی آس : گورورسن پیریم آس گوردوغون ایش هارالارا چکیب سنی ؟
کورآس : او دانیشمیر ، اوتور سنده ...
ایستی آس : آی پیریم آس ، توم آسین درین بیلیجی اوغلو ، سن اودو مندن ، اودلار تانریسی ، ایستی آسدان ، اوغورلادین ،،، چوخ اینجیدیم ، آتام
زیرآس چوخ دانلادی منی ، اوزولدوم ، آمما سندن کینه آلمادیم اوره ییمه ، سن اودو اوزوین ایسته میردین ! اینسانلار اوچون اوغورلادین
اودو ،،، ایندی زیرآسین سوزویله گرک تاوان وئرسن ، زینجیرله گرک بو قایایا باغلاناسان ، قافقاز داغلارینین اوستونده ! اوزون بیلیرسن بو
ایش نئجه اوزوجودور ! گل اودوزمالی یولون یاریسیندان قایید ، سنی آپارارام زیرآسین یانینا ، اوندان ایسته رم باغیشلاسین گوناهی یین !
کورآس : اوزویون کیچیتمه بونا ... 2
ایستی آس : سن دوشرسن آتامین قیچینا ، بویله اولسا سنه رحم ائدر ، منیله یولا گل ! ایسته میرم سن بورادا قالاسان ! اودو اوزون اوچون ایسته سیدین سنی
اوزوم اولدورردیم ، سن اینسانلاری سئویرسن ، منده !
کورآس : ایکیمیز زیرآسین اوغولو اولماسایدیک بو سوزلره گوره اولدورردیم سنی ایستی آس !
ایستی آس : چکیل دالا ، سنین اورگین چوخ برکدیر ، نه آنلاییرسان اینسانلارا آشیق اولماق ندیر !
کورآس : اینسانلارا آشیق اولسایدین اوزون اودو وئرردین اونلارا !
ایستی آس : ایسته دیم ، زیرآس آتا قویمادی ..................................................
کورآس : سنین آشکین اینسانلارا یا بو پیس پیریم آسا هئچ نه یی چئویرمز ، زیرآس تانریلار تانریسی نه ایسته ر سه او اولمالیدیر ، بوندان آرتیق دایانما
داها ، باغلا بونو ، یوخسا آتامیز بو ایشدن سوراغ تاپار !
ایستی آس : نه هوسلیسن پیس اولماقا سن کورآس !
کورآس : منه بیر ایش تاپشیریبلار ، اودا گرک تئز باشا یئتیره ، سوزون وار بونا ؟
ایستی آس : کئشگه بیر آتادان اولمویایدیک !
کورآس : منده سنه گووه نمیرم !!!
ایستی آس : اوره گیم ایسته میر ، الیم ایشله ییر آمما ، نه اوزوجودور بویله اولماق ، زینجیرلری برکیدیرم ، بیر به بیر ، بیر کیمسه آچا بیلمز بونلاری .
ایستی آس زینجیری قایایا باغلاییر .
کورآس : او بیریسینده من باغلایارام .
کور آس زینجیری قایایا باغلاییر .
ایستی آس : یانیرام ، یانیرام ، یانیرام ...
کورآس : زیرآسین دوشمانینا یانما ، قورخ بو ایشدن یوخسا بوتون عالم سنه یانار .
ایستی آس : کورآس دیلینده اوره گین کیمی ، اوزون کیمی کیفیردیر .
کورآس : زیرآسین خوشو گلسه نه اولار بویله اولسا ، باخ بونا الی باغلی قیچی باغلی دوشوبدور بیزیم قیچیمیزین آلتینا ، بو شرف بیزه هاراداندیر ؟ آتامیز
زیرآسدان ! بو شرفی الدن وئرمه مک اوچون گرک اونون قوللوقوندا اولاق ، پیریم آس هئچ بوتون دونیادا دورسا قارشیما دالا چکیلمرم
زیرآسین سوزو دایانماق اولسا ...
ایستی آس : داها بسدیر ، گئدک ، زیرآسا آپارمالی سوزلرین ، موشدولوقلارین وار سنین !
کورآس : آهای پیریم آس چک ایندی گوستاخ اولماقین جزاسینی ! هان ، گوروم بیرده اولار بیری اودو اوغورلویا آپارا آداملارا ؟! اولماز ! سن بوتون
عالمه بیر نیشان اولدون ، هرکیمسه زیرآسین قارشیسیندا دورسا بویله اولمالیدیر ، پیریم آس ایندی آدین کیمی یان یاندیردیغین اودلارلا ، باخ
گور ایندی بودردی چکمگه دییردی زیرآسین قارشیسیندا دورماق ؟
ایستی آس : پیریم آس ، اینسانلارا اود وئردین ، اونلار سنی تانری بیلدیلر ، اونلارا اولدون پیریم آتا ، سن دردیله یاشاساندا اوره گین سئوینر اونلارین
سئوینمکلریله ، یاشاسین پیریم آتا ، بوندان بویانا سن اودلار تانریسیسان .
کورآس : ایستی آس بویله باخیرسان ایشلره ؟ یوخ ، گوزل دئییل باخیشین ، بو اودو وئردی آسلارا ، دوز ، آمما هانی آسلار ائلی ؟ هانی اود اینسانلاردا ؟
زیرآس آتا آسلارین هاممیسین اولدوردو ، بو گورن ایش باشا یئتیرمدی ، زیرآس آتا ایستمی ین ایش باشا یئتیرمز .
ایستی آس : آسلار اولدو زیرآسین ایستدیغیله ، دوز ، آمما بیر سیرا اله دوشن اود یئنیده دوشه بیلر اوبیریسی ائللرین الینه !
کورآس : من اولسه م بلکه م !!!
ایستی آس : اوزوندن چوخ امینسن !
کورآس : هله کی اوغورلو بیزیک بو ایشده ، اود اینسانلاردان آلینمیش ، پیریم آس زینجیره چکیلمیش ! بو سوزو زیرآس آتایا پای آپارمالی یام ،
آی تانریلار تانریسی گلیرم یاخچی سوزلرله ، یوللاری چاپیب گلجم ، داغلاری آشیب گلجم ، گویلری اوچوب گلجم ، سنه گتیرملی
سوزوم وار ، شوکتلی تانریلیک سنیندیر ، بیرجه سنین ، سنه قوللوقچو اولماق بویوک شرفدیر ،،، گئدک ، تلسمیرسن هله ؟
ایستی آس : پیریم آتا سوزون یوخ منیله ؟
کورآس : غرورلا باخیر ، خوشوم گلمیر باخیشیندان ، ووروب اولدورمه لیدیر ... 3
ایستی آس : گئدک ، بورادا دورماقدان داها هئچ نه چیخماز ...
کورآس ایله ایستی آس چیخیرلار ائشی یه .
پیریم آتا : آنام آس ، آنام آس ، آنام آس ،،،
آس ائللرین آسی ، آسیم ، سنیله ییم ! سندن سونرا هئچ کیمسه م یوخدور ،،، گویلرده اولان آسیم ،
اسن یئل آپار سوزومو تانریما ، تک تانری یا ! بو داغلاردان ، چایلاردان ، دنیزلردن ، آخانآسلاردان کئچ گئد آپار گویلره ، دولانان گونشلره ،
آپار تانریما ! آپار سسیمی بوتون ائشیدنلر بیلسینلر یالان تانریلارا ایلیشنلر نه چکیرلر !
بو زینجیرلری بیر یالان تانری باغلاتدیریبدیر قیچلاریما ! چیغیریرام دونیا بیلسین ، آی قارانلیق سئون پیس تانری قالماز گونشسیز گئجه لر !
اودو اوغورلادیم آپاردیم اینسانلارا ایشیقیندا گورسونلر کیمی اوزلرینه تانری بیلیبلر ! بیر پیس یالان تانری ، زیرآس یالاندیر یالان !!!
زیرآس آنلادین سن ایشیمین کوکونو ، بو ایشدن کدرلی اولوب منی بویله درده سالدین ! دردیم اولسادا باش ایمرم سنه ، بیل بیل بیل !
یالقیزام ، یالقیز ، یالقیز یالقیز ،،، آس ائللرین قافقاز داغلاریندا یالقیز گرک باغلانام قایالارا ! حاییف اولسون عومورومه ، حاییف اولسون بویله
آزاد سئون گویولومه ! حاییف اولسون ، حاییف !!
بیلیردیم اودو وئرسم اینسانلاراچتینلیک چکه جیم ، ایشکانجا اولاجایام ، بودور کی شیکایتیم یوخ ، آمما باغیرتیلاریم بو ایشکانجادان گویلره
یئتیرجکدیر ،،، آی اینسانلار اودلار سیزین اولسون ،،، گونشلر سیزین اولسون !
درد الیندن دئییل بو ،،، قوی ائشیدسینلر اینسانلار ، قوی بیلسینلریالانچی تانریلار نئجه دیرلر !
آی اینسانلار سیزی اولدورمک اولماز ، هاممی ییزی آرادان آپارماق اولماز ، اودو سیزدن آلسالاردا داها سیزدن گیزلتمک اولماز اونو ،
سالین ایندی ایشیقی بوتون قارانلیقلارا ، داغیدین ایشیقی پای کیمی ، قارانلیق اولمه لیدیر داها ، سویوقدا قالماسین اینسان گرک ،
ائشیدین سسیمی ، اودلار سیزیندیر ، سیزین ! ایشیقلار سیزیندیر سیزین ! سسیمی ائشیدن وارمی ؟
سس گلیر ! اییی گلیر بورنوما ! گول اییی سی ، ، ، کیم اولا بیلر بورالاردا ؟ بولود کیمی یاخینلاشیرلا بو گویده اوچانلار ،،، پیس اولسالار
نه دویوشمک اولاجاق ، نه قاچماق اولاجاق اللریندن ، نه گیزلنمک ،،، کیمسیز سیز ؟
آخانآس قیزلاری گیریرلر ایچری یه .
آخانآس قیزلاری : قورخما قورخما سن بیزدن ،
زیرآس آتا یاتمیشدی ،
گوزلرین یوموب هوشلانمیشدی ، لالا لالا لالا ،
گوردوک یاتیبدیر ، بیزیله ده ایشی یوخ ، دورسادا سوراغلاشماز بو تئزلیکده بیزی ،
بولود اولدوک قاناد آچدیک گلدیک ! اوچا اوچا ، قافقازا ،،، بیزیم ایشیمیز بودور کی تانریلاری تک اولاندا دووره لی یک ،
اوچا اوچا ، اوینویا اوینویا ، ال اله ، اوچ ال بیربیر ایچینده ، آیاق قابیسیز ، آراشقینسیز گلدیک سنده تک قالمی یاسان ! اویناماقیله !
اویناییرلار .
پیریم آتا : آه سیزلری تانی ییرام ، آخانآسین ، دنیزلرآتاسینین قیزلاری سیز ! آتاییز آخانآس بوتون یئری اوز گوجلو شپه لریله دولدورور ، قورولوکلاردان
سونرا یئر بوتون اونوندور ، آناییز توتآس سیزلری اوندان توتوبدور ، سو کیمی آیدینسیز ، بولود کیمی قانادلی ...
آخانآس قیزلاری : یاغاندا گویده اوچوب یئرده آخاریک بیز پیریم آس ،
آی قیز دئگینن پیریم آتا ،
هن ، یئنی بیر تانری !
پیریم آتا : نئجه تانری یام من کی بویله اسیرم بو اوجا داغلار اوستونده ؟
آخانآس قیزلاری : بورادا اوزاقسان اینسانلاردان ،
بیز اوچاندا گوردوک اونلاری ، ائشیتدیک سوزلرین ،
پیریم آس ایندی بیزیم آتادیر ، بیر بویوک تانری ، یاشاسین پیریم آتا !!! اینسانلار دئییردیلر بیربیره ،
یوردلارینین آدی اولدو اودلار یوردو ، ایندی داها آس ائللری اودا صاحیب اولوبلار ، بونودا سندن بیلیرلر !
پیریم آتا : یارالاریما مرحمدیر سوزلری ییز ، کئشگه یول تاپیب گئدردیم اونلارا قوناق ،،، اولان دئییل آمما ، قوللاریم باغلی ، قیچلاریم باغلی ، ، ، 4
کورآس ایستی آسا دئدی آخی زیرآس آس ائللرین داغیدیبدیر ؟ اولدوروبدور ؟
آخانآس قیزلاری : زیرآس تانریلار تانریسی اولاندان بری اوز سوزوندن سونرا سوزه قولاق وئرمیر ، یوخسا گئدیب آزادلیقی یین ایسته ردیک اوندان .
پیریم آتا : بیلیرم نئجه تانریلیکدادیر ، آمما بیلین سیزلر او بیرگون گرک آچا زینجیرلریمی ، بیلیرسیز نی یه ؟ بیرجه من بیلیرم هانسی یئل آپاراجاق اونون
تاختینی !
آخانآس قیزلاری : سن بویله حالدادا ایسته میرسن اونا باش ایه سن ؟ عیصیاندان ال چکمیرسن ؟ اوندان قورخمورسان ؟
پیریم آتا : باش اوجا داغلار هئچ بولودا باش ایمزلر !
آخانآس قیزلاری : قار توتار باشلارین ، کولاک چیرپینار اوزلرینه ، ایلدیریملارلا دویولرلر !
پیریم آتا : اوره کلری داش کیمی ، آیاقلاری یئر اوزونده ، کوکلری آلتا گئدمیش توکومدن دولودور باش اوجا داغلارین !
آخانآس قیزلاری : باش اوجا ، آزاد ، دوروشوقلو !!! دئییرسن بیزه نئجه اله گتیریبسن بویله اولماقی ؟ بیرده دئییرسن ندن سنیله دوشماندیر زیرآس آتا ؟
همده دئییرسن گلجکده اولانی ؟ سن بیلیجیسن آخی !
پیریم آتا : زورلاردان یورولموش باجی قارداشلاریملا بیر اولدوک ، ال اله ، پیس ایبلیس بیزلره حاکیم اولان زامان ، اونو تاختدان یئندیردیک ، منیله
قول ائللریم ، آزاد اولماق ایسته دیک ، ایستی آسین اودویلا اونون تاختین یاندیراندان سونرا هاممی گئتدی اوز ایشینه ، دئدیلر به لکم ایش
قورتولدو ، زیرآس ایشی سئچدی ، اوزونه بیر تاخت دوزلدیب اوتوردو اوستونده ، من دینمدیم ، بیر الدن سس چیخماز آخی ، او اولدو
یئنی تانری ،،، آنام آس بوتون ائللرین بیرجه تانریسی منی آزاد بویودوبدور ، منه دئییبدیر یاشام زورلولارین دئییل ، دوشوننلریندیر ! اود ایستی
وئرر ایشیقدا ، ایشیقدا اوزویله دوشونجه گتیرر ،،، بو اولدو من اودو وئردیم اینسانلارا ایشیق سالسینلار یوللارینا ایستی وئرسینلر ائولرینه ،
بیلیم وئرسینلر ایشلرینه ، چیخار وئرسینلر هونرلرینه ،،، ایشیق ساچاندا یاتمیش اینسانلار دوروب آیاقا دوشونمک آختارارلار ، بیرجه من بیلیرم
دوشوننلرین الیندن نه گلیر !!! من بیلیرم اونلار نئجه گوجلودورلر ! اونلار آلا بیلرلر هر ایشی اله ،،، دئمدیز آسلاردان منه بیر سوز ؟!
آخانآس قیزلاری : پیریم آتا بیرجه بو اولدو سنین گوناهین بویله باغلاندین قایالارا ؟
پیریم آتا : اینسانلاری سئومک گوناه اولسا هن ...
آخانآس قیزلاری : هر کیمسه سنین دردی ین یانماسا چوخ قانمازدیر ، هئچ بیلمزدیک اینسانلارا فیکیرلشنلرین ایشی بویله اولار ، ایندی بیز سنی بویله
گورمکدن کدرلی اولدوک .
پیریم آتا : اینسانلارا اومودو من اویره تدیم ، اومودوم وار اوزومونده گلجکه ، سیزده اومودویوز اولسون کدرلی قالماز اوره گی ییز !
آخانآس قیزلاری : الیمیزدن نه ایش گلر سنی قورتارماقا ؟
پیریم آتا : هئچ ، سیزدن ایسته ییرم من اوچون کدرلی قالماسین اوره کلری ییز ، بویله کدرلی قالماقلا من راحاتلاشمارام ، گئدین ایشلر دوزه لر .
آخانآس قیزلاری : گئدک زیرآسا یالواراک ؟
پیریم آتا : اوزویوزه بیر ایش ایسته سز سوزوم یوخ ، من راحاتام .
آخانآس قیزلاری : نی یه آخی بونو ایسته میرسن ؟
پیریم آتا : زیرآس بیر کیفیر تانریدیر ، آزاد یاشاماقدان هئچ کیمسه قاچماز آمما او بیر منی اوتورسه اوزگلری ازسه نئجه گرک بونا شاد اولام ؟ زیرآس
تاختان دوشمسه نه اینسانلارا یاخچی گون وار نه آزادلیق سئونلره ، اینسانلاردا دئیین منه ؟!
آخانآس قیزلاری : بویله اولماز کی ، بیز هئچ ایش گورمویک ؟ دایانمیر بونا اوره گیمیز ...
پیریم آتا : زامانی یئتیرمسه ایشلر باشا یئتیرمز ، زیرآس بیلسه سیز منه یاردیم ائدیبسیز یا اوره ک یاندیریبسیز سیزلریده منیم گونومه سالار ، ایستمیرم
یولداشلاریمی الدن وئرم ، گئدین و لازیم اولاندا گلین هاراییما .
آخانآس قیزلاری : سنین پیس باش یازی یان آغلاییریک ،، ایندی بوتون گویلر دومان اولور ،، ایلدیریملار چاخیر ، یاغیشلار یاغیر بیزیم گوزلرله
بیرلیکده ، ایندی بولودلار بیربیری ایته لی ییرلر ، های دوشور عالمه ، آس ائللریده بیزیله آغلاییر اوز آتاسینا ، تانریسینا ،، پیریم آتا ،،،
آخانآسلار ، دنیزلر ، چایلار ، دره لر ، داغلار ، یابانلار ، آداملار آغلاییر سنه ،، آی پیریم آتا سن ایشیق سالیبسان اوره کلره ، یوللارا ،
آغلاییریک سنه ،،، وای وای وای ، سن اوزون ندن آغلامیرسان ؟ ندن بویله دوروبسان ؟ ندن اوره گین تیتره میر ؟
پیریم آتا : بو سوسماق ، آغلاماقی قاوالاماق غروردان دئییل ، اوزومو بویله آوارا گورممیشدیم ، الی باغلی ، چاراسیز ! قویون اعتیراف ائدیم ، اینسانلارا
فیکیرلشمه گی من اویره تدیم ، دوشونمه گی ،،، کوهوللردن چیخاردیب ، اورمانلاردان چیخاردیب اونلاری زمیلره چکدیم ،، 5
آتا مینمه گی ، شوخوم وورماقی ، گول اکمه گی اونلارا اویره تدیم ، هونری اینسانلارا من اویره تدیم ، ایندی آمما اوزومه بیر یول تاپا
بیلمیرم ، وای وای وای حالیما .
آخانآس قیزلاری : دردین چاراسیز دئییل ...
پیریم آتا : دردلرین مرحمین تاپانین اوز دردی مرحمسیز قالیب !
آخانآس قیزلاری : فیکیرلش بونون یولونو تاپماقا ...
پیریم آتا : اولمور ...
آخانآس قیزلاری : بوتون دوشونجه لری یین ایشه سال ...
پیریم آتا : بویله اولماق گرک ایمیش ! بو گرک دوشونجدن گوجلودور .
آخانآس قیزلاری : بو گرکین هئچ چاراسی یوخ ؟
پیریم آتا : زیرآس اولاناجاق یوخ !!!
آخانآس قیزلاری : او سونلو تانری دئییل ...
پیریم آتا : سونو اولمویاندا او دئییل ، اونوندا سونو وار ...
آخانآس قیزلاری : کیم بیلیر نئجه گلجک اونون سونو ؟
پیریم آتا : بو سوزون دانیشماق زامانی قالیر ، بو زینجیرلر آچیلاندا دئییلر .
آخانآس قیزلاری : زینجیرلرین آچیلماقینا بیر یول گوستر ...
پیریم آتا : بونا فیکیرلشیرم ، چتیندیر آمما تاپارام یولونو ، یالوارماق دئییل آنجاق ،،، بلکه م زیرآسا بیر سوز یوللادیم ...
آخانآس قیزلاری : ایفتیخار اولسون یولویان ، اویره ندیک سندن زینجیردده باش اوجاقالماق اولار .
پیریم آتا : گلن وار ...
آخانآس قیزلاری : آتامیزدیر ، گیزلنملی ییک بیز ایندی ، گلین بورادان ...
آخانآس قیزلاری گیزلنیرلر .
آخانآس گیریر ایچری یه .
آخانآس : ندن باغلانیبسان قایایا ؟
پیریم آتا : سنی تانی ییرام .
آخانآس : آچیم اللری یین دانیشاریک .
پیریم آتا : کورآس باغلایان زینجیری آچماق اولسایدی پیریم آتا آچا بیلردی ...
آخانآس : پیریم آتا ؟!
پیریم آتا : آخانآس هارا یولا دوشوبسن ؟
آخانآس : کیمسن سن ؟ نه بیلیرسن کورآسدان ؟ پیریم آسدان ؟!
پیریم آتا : پیریم آس اودو وئریب اینسانلارا اونلار اونو پیریم آتا چاغیریرلار داها ...
آخانآس : بویله غرور سوزوندن گلیر یوخسا اوزوندن ؟ اولمویا سن ......................
پیریم آتا : اوزومم ، یالان تانریلاردان اود اوغورلویان پیریم آس ...
آخانآس : بوتون تانریلار بیلیب گوردوغون ایشی ، یئرین بوتاییندان اوتایینا .
پیریم آتا : بونو سن یاخچی بیلرسن ، بیرباشین اویاندا بیرباشین بویاندا ...
آخانآس : بونو بیلیرم آمما چوخلو سوزده وار بیلمیرم ...
پیریم آتا : بیلمه لی اولسان بیلرسن واقتیندا ...
آخانآس : قیزلاریم زیرآسدان گیزلین چیخیبلار دولانماقا ، یوللویوب اونلاری تاپام ، سوراغ یوخ آمما ...
پیریم آتا : زیرآس اونلاری نئیله ییر ؟
آخانآس : سوزون دوزو ، ایشی اولماسادا بو گونلر سنین یانیندا اولماق دوز دئیل ، هر کیمسه یه ... 6
پیریم آتا : آنلاییرام .
آخانآس : سئویندیم سنی تانیماقدان ، گئدیم داها .
پیریم آتا : سنین اوره گین صافدیر ، یالان دانیشمادین ، یاشا .
آخانآس : دوز اولماق چتیندیر ، بیلیرم بونو ،،، ائشیدمیشم سنده دوز دانیشانسان ، و چوخ دوشونجلی ، ، ، سوروشسام قیزلاریمی هایاندان تاپا بیلرم کومک
ائیلی یرسن ؟
پیریم آتا : یوخ ...
آخانآس : حاقلیسان ،،، اونلار دونیادا یالقیز تانریلاری تک اولماکدان چیخارتماقلا تانینیبلار ، اولا بیلر یوللاری بویانا دوشه ، ایسته ییرسن گلسلر اونلارلا
دانیشاسان تک اولماقین یادیندان چیخا ...
پیریم آتا : به لکه م ....
آخانآس : هئچ یول گوسترمیرسن نئجه تاپا بیلرم اونلاری ؟
پیریم آتا : یول اوزو تاپیلدی !!!
آخانآس : آنلامادیم !
پیریم آتا : هر یول چتین باشا گئدنده ، یولچو دایانیب یولون باشین تاپا بیلمی ینده هردن اولور یول اوزو گله ...
آخانآس : آنلامادیم هله !
پیریم آتا : گونش باتیر ، قارانلیق دوشور ، بو قارانلیقدا داها تاپا بیلمزسن اونلاری ...
آخانآس : زیرآس اولدورر منی ...
پیریم آتا : آخانآس گمیچیلری اوزدور سولاری یین اوستونده ، اودلار گمیلرده یانسین ، گمیچیلری آپار اوتایا بوتایا ، ایشیق سالسالار هر یئره سن تاپا
بیلرسن قیزلاری یین !
آخانآس : گمی ؟! اود ؟! منده اود یوخدور !؟
پیریم آتا : آس ائللرینده وار ، اللریندن آلینمامیش گئد آل اونلاردان ...
آخانآس : اینسانلاردان کومک آلیم ؟
پیریم آتا : تاپیلار ایشیقدا قیزلارین ......................................
آخانآس : آس ائللرین زیرآس آرادان آپاردی ....................................................
پیریم آتا : آس ائللرینین بیر قایداسی وار ، چتین گونده سون نفسه جک دایانارلار آمما ایشلر اللریندن چیخسا گیزلنمکدن چکیلمزلر ، آختار کوهوللری ،
اورمانلارین گیزلین یئرلرین ، دره لری ، اولا بیلر قالا اونلاردان نئچه سی ..........................
آخانآس : بو کومکین قاباقیندا نه ایش گوره بیلرم سنه ؟
پیریم آتا : زیرآسی گورنده اونا سویله بیر اوشاقی اولاجاق بیر درد چکمیش قیزدان ، او اوشاق اونون تانری اولماقین سونا یئتیره بیلر ، او قیزی بیر من
تانی ییرام ..............................
آخانآس : گئدیم ...
آخانآس چیخیر ائشی یه .
آخانآس قیزلاری گیریرلر ایچری یه .
آخانآس قیزلاری : آتامیز هارا گئتدی ؟
پیریم آتا : باخین ...................
آخانآس قیزلاری : هریاندا اود یانیر ، ایشیق آلیب هر یئری ، بوتون سولارین اوستونده !!!
پیریم آتا : اود داغیلدی بوتون اینسانلارین ایچینده ! بورادان گورورم آخانآس اوزونده گئدن گمیلری ، اودلاری ، اینسانلاری ...
آخانآس قیزلاری : بیزیم آتا نئجه قورخمادی زیرآسدان ؟
پیریم آتا : او زیرآس اوچون بو ایشی گوردو ، سیزی آختاریردی .
آخانآس قیزلاری : سنده دئدین کی ... 7
پیریم آتا : ایشیق آلتیندا آختارسین سیزی .
آخانآس قیزلاری : وای ، وای ، زیرآس اونو اولدورر ...
پیریم آتا : من اودو آس ائللرینه وئرمیشدیم ، زیرآس اونلاری آرادان آپارماقلا ایسته دی اود اینسانلارین الیندن چیخسین ، ایندی داها اود بوتون
اینسانلارین الینده ...
آخانآس قیزلاری : دئمدین زیرآس بونو بیلسه نه اولاجاق ؟
پیریم آتا : آتاییزی اولدورمز ، آتاییزا بیر سوز دئدیم اونا یئتیره ، او سوز آتاییزی قورتارار ،،، قورخمایین ،،، زیرآسین نه ایش گورمگین بیلمک اوچون
دوزوم لازیمدیر ،،، امینم منیم سوزوم ایندی داها یئتیریبدیر زیرآسا ،،،،،،،،،،، دئمه دیم !!! آیاق سسی گلیر ، گیزلنمیرسیز ؟
آخانآس قیزلاری : آخانآس هر یئری آختارمامیش بیر یئره ایکی سیرا گئدمز ، اوزگه تانریدا اولسا بیزی زورلا آپارا بیلمز ...
هورومآس گیریر ایچری یه .
هورومآس : خوش گوردوک آخانآس قیزلاری ، زیرآس تانری اوزاق داغ اوسته سیزی آختاریر .
آخانآس قیزلاری : سن نه یاخچی اوندان آیریلیبسان هورومآس ؟
هورومآس : پیریم آسیلا ایشیم وار ، چکیلین اویانا گوروم .
آخانآس قیزلاری : بویور گوردا ، بودا پیریم آتا ...
هورومآس : پیریم آتا !!! پیریم کورآسدان ائشیدمیشم هئچ کیمسه ایله دانیشمیرسان ؟ هورومآس گلیب سنی گوره ، منیله دانیشماسان داها اوزوین
باخمارام .
آخانآس قیزلاری : یاتیبدیر ، سس سالما ، باخ بیر ...
هورومآس : یاتسادا گرک دورسون ، قیچیم قولوم قانادلاریم قابار چالدی گلیب بورا یئتیشنجک ، یورولدوم ، اینصافدیر بونلا دانیشمامیش قاییدام ؟
آخانآس قیزلاری : یورولمویاسان ...
هورومآس : ساقولون ، پیریم ! پیریم آس ! پیریم جان ...
پیریم آتا : یالانلا جان دئمک چتین دئییل ، دوغوردان جان یاندیرماق چتیندیر !
هورومآس : سنین قادایین آلاردی هورومآس یولداشین ، سنه نه اولوب بوجور آجی اولوبسان ؟
پیریم آتا : زینجیریمدن بللی دئییل ؟
هورومآس : اوزوندن گیلئیلن یولداش ، آخی باشی یان دولانیم سنین آداملارلا نه ایشین وار اودو آپاریبسان وئریبسن اونلارا ؟ سن گوناه ائیله ییبسن ...
پیریم آتا : یئنی سوزون یوخویدو نه ایشه گلیبسن به ؟
هورومآس : منه اخم ائیلمه اورگیم سینار ها ، آی قاش قاباقلی تانری ، هوشلوسان ، بیلیرم بیلیرسن بیر ایشه گلمیشم ، بورادا اوزگه اولماسایدی ...........
آخانآس قیزلاری : پیریم آتا بیز گئدیریک ...
پیریم آتا : قالین سیز ،،،،،،،،،،،،،،،،،، سوزون اولسا دئگینن یوخدور خوش گلدین ، یول اوپور قیچلاری یین آلتین ...
هورومآس : چوخ خشنسن پیریم جان ! چوخ ...
آخانآس قیزلاری : آخی ...
هورومآس : باش آغری وئرمی ییم ، گلمیشم آخانآس دئدیغی سوزون نئجه اولماقین بیله م ...
پیریم آتا : بیلیرم .
هورومآس : هوشون منی اولدوروب باخ ، بیلیرم بیلیرسن ،،، بونودا بیل ، زیرآس ایستدیغی گرک تاپیلا ...
پیریم آتا : اویله دانیشیرسان بیلمی ین فیکیر ائیله یر زیرآس سون گونجک تانری اولاجاق !
هورومآس : سون گونه یئتیرمسه ده ایندی بیزیم بویوک تانریمیزدیر ...
پیریم آتا : سوزون آیدیندیر ، سیزین تانریدیر ..........................................
هورومآس : آنلاییرام ،،، سن چوخ برکسن ، خوشوم گلیر سندن ،،، آمما بویله اولمادان زیرآسین خوشو گلمیر .
پیریم آتا : من زیرآس اوچون یاشامیرام .
هورومآس : منه یاززیقین گلسین ! 8
پیریم آتا : زیرآسدان اوزاق اولسان سن اوچون بویوک شرف یازیلار .
هورومآس : اولان دئییل بو ، یئریم اوجادیر ، سن بیلمزسن بونو ، سنین یئرینله منین یئریم بیر دئییل ...
پیریم آتا : من اوز یئریمی سنیله بیر بیلمیرم ، دونیا ییغیشسادا سنین یئری یین وئره منه ایستمرم !
هورمآس : پیس اوغلان ، سیندی اورگیم سندن ، ، ، بویله داغلارا باغلانماقین نه یی خوش اولا بیلر ؟!
پیریم آتا : آزادلیق سئون اینسانلارا بویله باغلانماقین چتینلیغی چوخدور آمما شرفسیز قالماقدان یاخچیدیر .
هورومآس : فخر ائیله ییرسن !؟ باشا دوشمورم ،،، شرف ؟! باش اوجالیق ؟! اللر بویله باغلی اولاندا !!!؟
پیریم آتا : باشا دوشمزسن ، کئشگه شرفی آنلایاردیلار زیرآسین آداملاری ................................
هورومآس : سوزو اوزالدیرسان ، من گلمیشم او قیزدان بیلم و اونون اوشاقیندان .
پیریم آتا : بیلمزسن ، نه سن و نه آیریسی ، زیرآس ایسته رسه بونو بیله گرک منیم الیم آیاقیم آچیلا ، اودودا گرک داها آلمی یا اینسانلاردان ....
هورومآس : اوزون گئدیرسن یولداش ، اولان دئییل ، اولسادا منیم الیمده دئییل .
پیریم آتا : دئمه دیم سندن ایسته ییرم ، بونلاری زیرآسا دئگینن ، بونودا دئگینن وئرمسه ده قورخوم یوخ ، اونون تانریلیغی قورتولمالیدیر ، منده دوزوملو
بیر ...
هورومآس : دئییرسن بلکه م بیر بورایا باغلانماقیلا قورتولاجاقسان ؟
آخانآس قیزلاری : آزدیر بویله اولماق ؟
هورومآس : دالیسی وار بو ایشین ...
پیریم آتا : منیم هئچ ندن قورخوم یوخ ، بونلاری بیلیب یولومو سئچمیشم ...
هورومآس : اولدوروبدا منی ، نه گوزل دانیشیر ،،، سوزوم یوخ ، آمما بیلمه لیسن زیرآسین ایشکانجلری باشلاناجاق یولا گلمسن .
آخانآس قیزلاری : یوخ ...
هورومآس : قولاق آس دئییم نه لر اولاجاق ، ایلک سیرا بو قایا زیرآس تانرینین آذرخشیله داغیلاجاق ، دارامب ، پاتلاماق دئییرم ها ، اوزاق اولسون
جانیمدان ،،، سونرا سن قایانین داشلارینین آلتیندا قالاجاقسان ، بیر آز یول آچیلاجاق ، بیر قارتال گلسه او یولدان ایچری یه کیفایت ائیلر ،
او قارتال گونده گلجک و سنین جی یاری یین چیخاردیب و یی یجکدیر ، گونده ، هر گون سنین جی یارین یئرینه قاییداجاق و قارتال
اونو چیخاردیب یی یجک ، هر گون ، وای ، وای نه چتین ، من فیکیرلشنده اونا آز قالیر باغریم چاتلایا ، وای ...
آخانآس قیزلاری : پیریم آتا بونون سوزلرینده یالان یوخدور ، بویله اولا بیلر زیرآس ایسته سه ...
پیریم آتا : بیلیرم ...
آخانآس قیزلاری : ایسته میرسن گئدک زیرآسا سوز آپاراق ؟ سنین پئشمان اولماقیندان ؟
پیریم آتا : یوخ ...
آخانآس قیزلاری : اولمکدن قورخمورسان ؟
پیریم آتا : چتین اولاجاق ایشیم ، بیلیرم ، چوخدا چتین ، آمما ، منیم اولوموم زیرآسین الینده دئییل ، من بورادان قورتولاجایام .....................
هورومآس : یالان دئییرسن ، زیرآس بو سوزه یاللانماز ...
پیریم آتا : اونو یاللادماق ایسته سیدیم یولونو تاپا بیلردیم .
هورمآس : دلیدیر بو ، داها سوزوم یوخ بونلا ،،، ایندی چیخین قیراقا ، چکیلین دالا ، بورادا قالساز سیزده بونلا گئدرسیز قایالارین آلتینا ...
آخانآس قیزلاری : داها گئدمک اوچون قیچیمیز یوخدور ، قالمالی اولدوک بیزده ، بیزده اونلا شریک اولاجاییک بو دردی چکمک اوچون ، سن گئد
اوزاقدا دور و ایشی یین باشا آپار ، بیز بونلا قالاجاییق ، شرف بورادادیر ...
هورومآس : دلیلیک سیزیده توتدو ؟! گورورم بونو ،،، بویله اولسون ،،، من گئدیرم بو دلیلیک منی توتماسین ، گئتدیم ، پیریم جان ...
هورومآس چیخیر ائشی یه .
آخانآس قیزلاری : ایندی داها گرک چتینلیکلری آلاسان جانی یان ، ندن پئشمان اولمادین ؟
پیریم آتا : اینسانلارا اود وئردیم ، گوردولر منی ، اویره ندیلر اونلار مندن هر نه یی ، ، ، پئشمان اولمادیم ، اولسایدیم اونلاردا اویره نردیلر .
آخانآس قیزلاری : بیزده اویره ندیک سندن باش اوجا اولماقی ، خوش گوندده ، چتینلیکدده ،،، یاشاسین پیریم آتا ... 9
پیریم آتا : گورورم چتینلیکلر باشلانیر ، سیز گئدین ، منیله یانممایین بو ایشده ...
آخانآس قیزلاری : بیز سنی تک بوراخیب گئده بیلمریک ، سنیله قالاجاییک بورادا ...
پیریم آتا : بورادا قالساز اولرسیز ،،، اولمکدن هئچ نه چیخماز ،،، دیری قالساز ، آختارساز ، ایسته سز تاپا بیلرسیز هر یولو ...
آخانآس قیزلاری : قایا آلتیندا سنیله قالا بیلریک بیزده ...
پیریم آتا : قایا آلتیندا قالیب منیله درد چکمدن نه چیخار ؟ زیرآس او قیزین آدین بیلمک اوچون گلر منیم سوراغیما ، اوندا بیر ایش گوره بیلریک بیر
اولساق ،،، سیز گئدین یول تاپین دردیمزه ...
آخانآس قیزلاری : پیریم آتا سن بیزه یول گوستر ...
پیریم آتا : قالین ، بولود اولون ، یاغمور اولون یاقین ، داغلاردان آخین ، آخان اولون ، آخار سولار هر یئره یول تاپا بیلر ، اوزویوز اولون آخین ،،، آخساز
گلیب قایالار آلتیندا منی تاپارسیز ، گلین اورادا فیکیلریمیزی بیربیر اوسته قویاق گورک نه ایش گورملی ییک ...
آخانآس قیزلاری چیخیرلار ائشی یه .
آذرخش یانیر .
قایا اوچور پیریم آتانین باشینا .
بیر قارتال گیریر ایچری یه .
آخانآس قیزلاری بولود کیمی گیریرلر ایچری یه .
سون .
گونله ر ...
سایمامیشام گونله ریمی
نه فه سله ریمی
سایمارامدا !
بیری
اوچو
هانی ایکیسی ؟!
گونله ریم
ـ نئچه سی !
آشکسیز نئجه اولور اولسوندا !
نه فه رقی !!!