یئنی آی ...

قوناق  گه لیر  یاواش یاواش   تانریمدان  

بیزله ره !

آژدیک  دئمه  

گوزه ل  آیا ! 

آیاخلاری  گوزوم  اوسته 

سه حه ر  چاقیندان   آخشاماجاق 

بو  اذاندان  او  اذانا ...

نظامی ...

نظامی ما 

پسر آن رئیسه قورد 

نوعروس خوانده فارسی شما را 

و من از پس همه این تحریفها و دروغها 

که فارسی را صدر میگذارند و آغازینش میدانند 

شعر او را میخوانم و تحسینش میکنم 

نظامی میداند 

ـ مرگ را با جاودانگان پیوندی نیست !  

همچو 

تمامی شاعرانی که به دربار شاهان ترک خوردند و سرودند

او نیز میدانست این زبان تازه عروسی بود از هند 

و جهاد او  

یاد دادن تمامی آنچه ایلش داشت  

با آنهائی بود که بدین زبان نو  

سخن میگفتند !  

چرا که از محمود به این سو 

سرزمینهای جدید هند و فارس 

گشوده میگشت  

نو به نو

به شمشیر فرزندان تسلیم شده ترک ...

دئرام متنی : آشک دوز ـ اله سی ...

دئرام : آشک  دوز _ اله سی    ...

                            پئرسوناژلار :    شاهقیزی ، بالیقچی ، اوغلان ، قیز ، قوجاباغبان ، جارچی ،  

                                                                                                          دارغا  و ساچلی  .                                                

                                    صحنه ایشلی ینین  سلیقه سینه باغلیدیر  .

ایشیق   .

                            بالیقچی اوتوروبدور چایین قیراقیندا بالیق توتور .

بالیقچی : ( اوخویور )           گئدیرم چایدان توتام ،

                                             بالیقی سودان توتام ،

                                             آرآسدان گلیر روزوم ،

                                             گئدیرم اوردان توتام ،،،

               دئییرم تانریم سنی بیز گورموروک آمما سن بیزی گورورسن ، سنی تانیمیانا لعنت ، سن بیزی گورمسن روزوموزو نئجه گوندریرسن ؟ روزودان

                سوزوم بیر بالیق یا چورک دئییل ، یاخچیلیک ، دوزگونلوق ، بوتون دوشونجلری دویغولاری دئییرم ، هاممیسینی سن بیزه وئریبسن ، بو

                بالیقلاری نئجه سالیرسان منیم توروما اوجورده یاخچی یاخچی ایشلر چیخاردیرسان قاباقیما ، گوزه ل گوزه ل فیکیرلر وورورسان باشیما ،

                دئییرم آی منیم گوزه ل تانریم نه اولار بیردنه ده حالال سود اممیش گوزه ل گویچک اوزون ساچلی یار یوللویاسان بیله مه ؟ هن ؟ سن اوچون

                چتین بیر ایش دئییل بو ها ، بیلیرم بونو مندن یاخچی بیلیرسن  ، واللاه سویوق یئمیش یئمکدن ددم یاندی ، نه اولاردی بیر سوزه باخان آروادیم

                 اولاردی ، اون اون بئش دنه ده اوشاقیم ، دئدیم نئچه دنه ؟ ! آی جانیم بو آژدیک زاماناسیندا کیم قارینلارین دویوزدوراجاق آخی  ؟ !

                 اوتوردا ،،، هئی ، هئی ...

                            اوغلان و قیز گلیرلر و ایسته ییرلر چایدان کئچلر .

اوغلان : ماشالاه بو چایا ، نه چوخدور سویو .

قیز : آخارلی اولسون اینشالاه آرآسیمیز .

اوغلان : سویوندان ایچن ایناملی ایگیت اولسون توپراقین سئوسین .

قیز : آمین یا رب العالمین .

اوغلان : آمین .

قیز : بورادان کئچیم ؟

اوغلان : هن ، کئچ گئدک .

بالیقچی : اورادان کئچه بیلمزسیز ، اورا دریندیر ، گلین بویانا ، آهان اولدو ، بورا دیازدیر ، ایندی کئچین گلین بویانا .

اوغلان : تورون برکتلی اولسون یولداشیم  ...

قیز : یاخچی سیز وارییدیز .

اوغلان : هن ، اولماسایدین سو بیزی آپاراردی ، یاشاسین .

قیز : ساق اولون .

بالیقچی : اوتاندیرمایین منی ، بیر ایش گورممیشم .

قیز : بورا نه آدلانیر ؟

بالیقچی : قریبسیز ؟                                                              1

اوغلان : هن ، اولکلری دولانیریک .

بالیقچی : بیزیم یوردا خوش گلیبسیز ، بوراسی آس ائللرین تورک یوردودور .

قیز : بورانین حاکیمی کیمدیر ؟

بالیقچی : اونلا ایشی ییز وار ؟

اوغلان : گورمک ایسته ییریک بیله سین .

بالیقچی : اونو گورمک چتیندیر ، قصره هئچ کیمسه نی قویمورلار ، بیر قیزی وار من یاشدا آمما هله اولمویوبدور اوزونو گورک   .

قیز : نه چتیندیر او قیزین روزیگاری ، ایندی داها امینم اونو گورملییک .

اوغلان : هن قصره گئدملی ییک  .

بالیقچی : اولان ایش دئییل بو ، هله دئمدیز سیزین قصرده نه ایشی ییز وار ؟

اوغلان : بیز یاخچیلارلا پیسلری سئچیریک ائللرین ایچیندن  .

بالیقچی : نه اوچون ؟

قیز : بیز آشکی یاییریک ، اولمویان اولکه لرده آشک پایلاماق بیزیم ایشیمیزدیر .

بالیقچی : نه گوزه ل ، آمما نه ربطی وار قصره بو ایشین ؟

اوغلان : حاکیم عادیل اولسا بیزه کومک ائیلر ائلینده آشکی پایلییاق .

بالیقچی : بیزیم ائللرده آشک وار آمما ...

اوغلان : ندن سوسدون ؟

بالیقچی : هئچ ...

قیز : قورخما بیزدن اوره گین امین اولسون .

بالیقچی : آشک وار آمما آشکا ماجال یوخدور ، گئجه گوندوز ایشلمکله بیر بونا یئتیریریک قارنیمیزی دویوروزدوراق ، نه چیخاردیریک گئدیر شاهین

                قصرینه  .

اوغلان : اولا بیلر بیز بوگون او قصره آشک آپاراق  .

بالیقچی : چتیندیر ، شاهی و قصرین آداملارین من اوزوم گورممیشم آمما دارغا او قصرین آدامیدیر ، اونو گونده گورورم ، اونون پیس اولماسی بیزه

                بویله فیکیر وئریبدیر قصرین آداملاری بوتون پیسدیلر .

اوغلان : دارغا نه ایش گورور پیس تانینیبدیر ؟

بالیقچی : هر ایش ، آزی گونده گلیب بو یوخسوز خالقدان وار یوخلارین آلیر آپاریر شاها  ، اونلاردا آشک اولسایدی خالقا باخاردیلار .

قیز : به سیز نه اوچون دارغانین قاباقیندا دایانمیرسیز ؟

بالیقچی : آی جانیم بیز سحردن آخشاماجاق قاچیریک بیر تیکه چورک دالیسیجاق ، اودا تاپا بیلسک .

اوغلان : شاهی ییز پیسدیر ، دییشین اونو .

بالیقچی : بو اولکه نین اسکی زامانلاردان بری شاهلاری اوز ایچیندن اولاردی ، هردن خالق تانرینی یاددان چیخارداندا اوزگه یئرلردن بیر پیس شاه گلیب

               بیزه حاکیم اولور ، بو شاهدا آیری یئرلیدیر ، اودور بیزه باخمیر و خالقی اینجیدیر .

اوغلان : آزدان چوخدان باشا دوشدوم بو اولکه نئجه اولکه دیر ، آی یاخچی بالیقچی اوغلان بیز بو قصره گئدیریک ، اولا بیلر اورادا اولانلار سن

               دئدیغینجک پیس اولالار و ایستییه لر بیزیم الیمیزده اولان آشکی آلالار ، ایندی بو آشک داغیدان دوز _ اله نی  سنه تاپشیرمالی اولدوک  .

بالیقچی : آشک داغیدان دوز _ اله ؟

قیز : هن ، بو زورنانین سسی هاممینی یوخودان اویادیر ، اونلارین اورگین شاد ائیلییر ، شاد اولان خالق گوزو آشکا آچیلیر .

اوغلان : بو چالیناندا آشک دیریلیر اورکلرده و آداملار بیر یئنی باخیشلا یاشاییشلارین یاخچیلیکلارا ساری آپاریرلار .

بالیقچی :  نه یاخچی دوز _ اله دیر بو .

قیز : سن بیزه یاخچیلیک ائیلدین  ، ایندی داها  بیلیریک او قصریدن بیز قاییدماساق سن خالق اوچون بو زورنانی چالاجاقسان .

اوغلان : چالیب و اونلاری آشکلا یاخچیلیکلارا ساری آپاراجاقسان .                        2

بالیقچی : دئییرم ایندی چالیندا ، قویون هاممی آشکلا یوخودان دوروب دوشسونلر یاخچی گونلری باشا وئرمک دالیسیجاق ،  اولماز ؟

اوغلان : ایندی چالینسا سن دئدیغین اولار آمما بو قصردن گلیب و زورنانی زورلا آلارلار ، بیز گرک گئدک اورایا ، یاخچی اولسالار ایذن آلاریک

              زورنانی چالاریک ، پیس اولسالار زورنا گرک دوشمسین اونلارین الینه ، قاییداندا سندن آلیب چالیب بو خالقی آشکلا اویادیب و یولا

              دوشوب گئدریک اوبیریسی اولکه لره ، بو دوز _ اله  بوتون اینسانلار اوچوندور .

بالیقچی : باشا دوشدوم .

قیز : ایندی گل بونو ساخلا و قصرین یولون بیزه گوستر .

بالیقچی : دیلیم لال سیز گلمسز ؟ سیزی اولدورسلر ؟

اوغلان : بیز گورسک داها قالمالی دئییلیک بیر یول تاپاجاییک قویاق بو قصرین صاحابینین قاباقینا او یولو گئدنده دوشه قویویا آرادان گئده ، بو اونلارا

               یاراشیق بیر ایش  ، آمما سن ، بیز اولسک بو سنیندیر ، بیز گورن ایشده سنین بوینویان دوشور ، گرک ائلدن ائله دولانیب زورنانی چالیب

               خالقلاری یوخودان اویاداسان ، اویاداسان و اونلاری یاخچیلیکلارا آشیق ائیلییسن .

بالیقچی : من ؟!

قیز : هن سن .

بالیقچی : بو چتین ایشدیر ، منیم الیمدن گلمز .

اوغلان : دالا قاییدیرسان ؟

بالیقچی : اوزومو تانی ییرام ، بیلیرم الیمدن گلمز .

قیز : بیزده سنی تانیدیک بونو وئردیک سنه ، سن یاخچیسان ، یاخچیلارین الیندن گلر بو ایش .

بالیقچی : قورخورام باشا آپارا بیلمییم سیزین یانی ییزدا باش آششاغی اولام ، گئدین وئرین آیریسینا .

اوغلان : آیریسیدا سنه تای ، او ایستمسه نه ایش گورملی ییک ؟ بیری گرک اولا بونو وئرک اونا یا یوخ ؟

بالیقچی : من قورخورام .........................................................

اوغلان : سن سوبایسان یوخسا ائولی ؟

بالیقچی : منیم گوروم وار کفنیمده اولا !؟

قیز : بیر اوزون ساچلی گوزه ل گویچک یولداشیم وار ، اوجا بوی ، ایری گوز ، اینجه بئل ، گورسن ال چکه بیلمزسن اوندان ، بیلیرم سن اونا آشیق

        اولوب اونلا یاخچی گونلرین اولا بیلر ، آدی ساچلیدیر  ،  بیزدن سونرا گلجک بورایا .

اوغلان : بیلسه بیزی یالقیز بوراخیبسان اوره گی توتماز سنی ها ، دئییم بیله ین .

قیز : اوندان آرتیقین تاپا بیلمزسن .

اوغلان : اودا سنه یار اولاجاق بو یولدا .

قیز : بیز ایکیمیز کیمی .

بالیقچی : گوزه لدیر ؟

قیز : چوخ سئویلملیدیر  .

اوغلان : قولاق وئر اونو تعریف ائیله ییم .

                               اوغلان ساچلینی بیر ماهنیلا تعریف ائیله ییر .

بالیقچی : آی جانیم گلیردیز اونودا گتیرردیزدا .

قیز : داریخماسان گلر .

بالیقچی : ائیله دیغی ییز تعریفلرله اولار داریخمییام ؟

اوغلان : سن چیخاری یین گوسترمسن او سنه آشیق اولان دئییل .

بالیقچی : وئرین منه گوروم او دوز _ اله نی  ، جانیمدان عزیز توتارام  بونو ، گوزوم اوستونده اولاجاقدیر .

اوغلان : پیسلرین الینه دوشمسین ، دوشسه آشک اولر .

بالیقچی : دوشمز .                                                            3

قیز : قصرین یولو یاددان چیخدی ها .

اوغلان : بالیقچی قارداش چوخ فیکیره گئدیب زورنانی یاددان چیخاردما ها .

بالیقچی : بو یولو توتون گئدین قصره یئتیشرسیز ، زورناداندا قورخمایین ، اولسمده الدن وئرمرم بونو .

قیز : بیزدن خبر اولماسا سنیندیر ، بیرده بوتون یاخچی آداملارین .

اوغلان : گرک چالاسان ها .

بالیقچی : چالارام .

قیز : گئدک یاوروم ؟

اوغلان : گئدک  ...............................................

قارانلیق   . ایشیق   .       

                            شاهقیزی اوتوروبدور صحنه نین سونوندا تیاترا باخیر ، اونون قاباقیندا  قیز

                            و اوغلان تیاتر اویناییرلار .

                            اوغلان اوخویا اوخویا قیزی یولا گتیریر و اونلا اوینویا اوینویا بیر

                                                                                     سکودان اوسته چیخیر ، اولار گونش کیمی ایشیق ساچیرلار هر یئره .

                            شاهقیزی دورور آیاقا و اونلاری تشویق ائیله ییر .

                            قیز و اوغلان گلیرلر و دورورلار شاهقیزینین قاباقیندا اونا  احترام

                                                                                     ائیله ییرلر  .

شاهقیزی : سن نیه دوشدون بونون دالیسیجاق ؟

قیز : شاهقیزی ایسته ییر گوره بیز اوینادیغیمیزی آنلامیشیک ؟

شاهقیزی : سوزو بوندان سوروشدوم ، سندنده لازیم اولاندا سوز سوروشاجایام ، دئگوروم اوغلان .

اوغلان : شاهقیزی من بو قیزی گوردوم عاشیق اولدوم دوشدوم دالیسیجاق .

شاهقیزی : عاشیق اولدون ؟ آنلاد یانی نه بو !

اوغلان : بیر اوغلان بیر قیزی گورنده اوندان خوشو گلسه اونا وورولوب اونا عاشیق اولار ، آشکلا اوره گی دولاندا گئدر دالیسیجاق .

شاهقیزی : عجب ، سن نیه بو دالی یان دوشنده خوشون گلدی ؟

قیز : بیر قیز بیر اوغلاندان خوشو گلسه اونا عاشیق اولار و خوشو گلر اوغلان دالیسیجاق گئدسین .

شاهقیزی : آشک ! باشا دوشدوم  ، نه گوزه ل ، نه گوزه ل .

اوغلان : خوشویوز گلدی ؟

شاهقیزی : بیلمیرم .

قیز : خوشویوز گلمدی ؟

شاهقیزی : بیلمیرم .

اوغلان و قیز : خوشویوز گلدی یا گلمدی ؟

شاهقیزی : منیم اوستومه چیغیریرسیز ؟ جلاد ، جلاد ...

قیز : بیز پیسلیک اوچون چیغیرمادیک .

اوغلان : بیزی باغیشلایین شاهقیزی .

شاهقیزی : دانیشمایین داها .

اوغلان : بیز آنلامادیق واللاه .

قیز : رحم ائیله یین شاهقیزی .

شاهقیزی : داها قورتولدو ، سیز اولمه لیسیز ، جلاد .                             4

                               جلاد گیریر ایچری یه .

جلاد : جانیم شاهقیزی ، امر !

شاهقیزی : بونلارین باشینی ووراجاکسان .

اوغلان : اوندا کیم سیزه تیاتر اوینویاجاکدیر ؟

قیز : کیم سیزه آشکدان سوز آچاجاکدیر ؟

شاهقیزی : سیز منیم گوزومو آچدیز ، دوز ، آمما اولمویانلاریمیدا یادیما سالدیز ، بوندان بویانا منیم بیلدیکلریم منی اینجیدجکدیر ، نیه گرک منی بیربئله

                ایلدن سونرا هله هئچ اوغلان ایستمی یه ؟  ایسته ییب دالیما دوشمویه ؟

اوغلان : شاهلار قیزینین دالیسینا دوشمک اولماز کی آخی .

قیز : سیز هئچ ائشی یه چیخیرسیز آخی بیری دوشسون دالی ییزا ؟

شاهقیزی : شاهلار قیزینین دالیسینا اولا بیلر شاهلار ، وزیرلر یادا سردارلار اوغلو دوشسون ، منیم دالیما هئچ اوغلان دوشمویوبدور منی آپارسین  اوزو

                اوچون یار ائیله سین .

اوغلان : سیز چیخین قصردن ، گئدین چوله ، امین اولون سیزینده دالی ییزجاق گلن اولاجاقدیر .

قیز : سیزیده سئون اولار واللاه .

شاهقیزی : اولسادا اولماسادا سیز منیم اوستومه چیغیریبسیز ، جلاد آپار باشلارین کس .

اوغلان : رحمین اولسون شاهقیزی .

قیز : الیم اته گی ین ، بیز ایگیدیک ، آرزوموز وار ، خوش گونلری آلمایین بیزدن .

شاهقیزی : جلاد آپاردا بونلاری .

جلاد : یازیغیم گلیر ایگیتدیلر آخی .

شاهقیزی : چاغیریم اوز باشی یین وورسونلار ؟

جلاد : یوخ جانیم ، آپاریرام ، دوشون قاباقا گوروم .

اوغلان : شاهقیزی بیزده بیر دوز _ اله  وار اونو سسلندیرسک بوتون آداملار عاشیق اولارلار ، اوندا سیزیده سئون اولاجاقدیر .

شاهقیزی : هانی او دوز _ اله  ؟

قیز : امین بیر یئرده ، بیزی بوراخین گئدک گتیرک چالاق اونو .

اوغلان : بیزدن سونرا هئچ کیمسه اونا ال تاپا بیلمز .

شاهقیزی : یئرین دئیین منه .

قیز : اولان دئییل بو ایش .

شاهقیزی : هارادا اولماقین دئمیرسیز منه ؟ بو اولدو سیزین ایکیمجی جورمویوز ، ایندی داها سیز اولمه لیسیز ، آمما بیلین سیز زورنانین یئرینده دئمه سز من

                  اونو تاپاجایام ، بونا امینم ، منده اولماسا سیزدده اولماسین ، او زورنا سیزین الی ییزده اولسا چالارسیز بو درده دییلمز آداملاردا عاشیق اولارلار

                  ، من اونو بیرجه اوزومه ایسته ییرم ، یا گرک منیم اولا یا قالدیغی یئرده ایته باتا ، ایندی اونو منه وئرمیرسیز ، نه اولار ، سیز اولسز اونا هئچ

                 کیمسه نین الی چاتماز ، جلادباشلارین ووردون گئد شنلیک وزیرینه دئگینن شاهقیزی ائشی یه چیخماق ایسته ییر .

اوغلان : شاهقیزی ایندی کی ایسته ییرسن بیزیم باشیمیزی ووراسان دئگینن بیزیم اللریمیز بیربیرین الینده اولاندا وورسونلار .

شاهقیزی : نه اوچون ؟

قیز : سن آشکدان هئچ نه بیلمیرسن ، بو آشکدیر بیزی بیربیره باغلاییر .

شاهقیزی : اللری ییز بیربیرده اولسا اوله نده نه اولار ؟

اوغلان : او دونیادادا بیربیرین یانیندا اولاریک .

شاهقیزی : آشکدا آیریلیق یوخدور ؟

قیز : آیریلیق آشکدا وار ، اوره کلرده یوخدور ، سن پیسسن ، اوره گین پیسدیر ، ائشی یه چیخساندا بیر آدام تاپیلمی یاجاقدیر سنی سئوه ، سن سئوملی

         دئییلسن ، سئویلمی ین آداملارا یاشاییش حارامدیر ، اونلارین اولمه کلری یاخچی .                                5

شاهقیزی : آپار بونلاری .

اوغلان : سئویلمسن گئد اوزویون آت آرآس چاییندا بوغول .

شاهقیزی : آپار جلاد ، آپار بونلاری  دئدیم .

جلاد : گوزوم اوسته .

                               جلاد ، اوغلان و قیز چیخیرلار ائشی یه .

شاهقیزی : منی نییه سئون اولمویوبدور ؟ قوجا باغبان گل بری .

                               قوجاباغبان گلیر ایچری یه  .

قوجاباغبان : جانیم شاهقیزی ، گول دریم سیزه ؟

شاهقیزی : بیر سوز سوروشاجایام دوزونو دئمسن وئرجیم جلاد بوینویون وورا .

قوجاباغبان : نییه دوزون دئمیرم کی ، سوروشماقدا لازیم دئییل ، اوزوم ائیله ایندی دوزونو دییرم ، هن منله دارغا ال بیر اولدوک گوللرین چوخونو بازاردا

                   ساتدیک ، پارالارین یاریسی اونون اولدو یاریسی منیم .

شاهقیزی : حالیم خوش اولسایدی وئرردیم بو ایشه گوره باغدا آساردیلار بیله یین ، آیری سوز سوروشاجایام ، سن کی گونلر کئچیرتمیش بیر قوجا

                  باغبانسان سن بیلیرسن نییه بوگونه کیمین هئچ کیمسه منه عاشیق اولمویوبدور ؟

قوجاباغبان : لیاقتلی اوغلان اولمویوبدور سیزی سئوه .

شاهقیزی : بیرده سوروشورام ، دوزدن سونرا آیری سوز دئسن گئد جلادین اوتاقینا ، نییه منی سئون اولمویوبدور ؟

قوجاباغبان : دوزون دئسمده اولمه لیم آخی .

شاهقیزی : یوخ اوندا اولدورمکده ن کئچرم .

قوجاباغبان : سوز وئریرسیز  ؟

شاهقیزی : سوز وئریرم .

قوجاباغبان : آخی سیزین کیمین چیرکین بیرقیزا کیم عاشیق اولاجاکدیر ؟ باخین من اوزوم قوجالیغیملا حاضیرم اوله م سیزه عاشیق اولمویام .

شاهقیزی : عاشیق اولماقا گوزه للیک لازیمدیر ؟

قوجاباغبان : هم گوزه للیک ، هم هونر ، هم چیخار ، هم خوش دانیشیب خوش باخماق ، نازلی اولماق ،  بونلارین هئچ بیری سیزده یوخدور .

شاهقیزی : قوجاباغبان بیری بوجور اولاندا اونا نه دئییرلر ؟

قوجاباغبان : بیری دئییر مارال ، بیری ترلان ، بیری جئیران ، ایندیده دئییرلر جی یار .

شاهقیزی : جی یار ؟

قوجاباغبان : جی یار !

شاهقیزی : منیم کیمین پیسلره ؟

قوجاباغبان : اپریمیش قارتال .

شاهقیزی : ایندی من نه ایش گورمه لی یم ؟

قوجاباغبان : بیلمیرم ، عشقی بیر شیکسته راست گلیبسیز سیز ، عاشیقسیز عشقی بیر شیکسته .

شاهقیزی : شیکسته عاشیقلر نه ایش گوررلر ؟

قوجاباغبان : تحمموللاری قالماسا اوزله رین اولدوررلر .

شاهقیزی : اودا بو سوزو دئدی .

قوجاباغبان : کیم ؟

شاهقیزی : سنه نه قوجا اپریمیش قارتال .

قوجاباغبان :  آی جانیم سیز نئیله ییرسیز آخی عشقی ، دونیا سیزیندیر ، خوشلوقویوزدا اولوندا .

شاهقیزی : سوز وئرمیشم حاییف یوخسا ائیله اولدورمه لیسن ، گئد ،،، گئد دئدیم .

قوجاباغبان : گئدیمدا .                                                          6

                            قوجاباغبان چیخیر ائشی یه .

شاهقیزی : ایندیه جک بیلمیردیم ، ایندی بیلیرم نییه هئچ کیمسه منی چوخ ایسته میر ، من چیرکین بیر قیزام ، دئییردیم بلکه بابام شاهی اولدورسم یئرینده

                اوتورسام دونیا منیم اولار ، اولدو آمما آشکسیز نه یه لازیم  ، ایندی گوزوم آچیلدی ، گرک گئدم ائشی یه ، بیری عاشیق اولسا اولوب ،

                اولماسا ..............................................

قارانلیق   . ایشیق   .  

                               جارچی کئچیر .

جارچی : اوزاق اولون ، کور اولون ، شاهین قیزی کئچیر ، اوزاق اولون ، کور اولون ...

                               شاهقیزی گیریر ایچری یه .

شاهقیزی : نه دئییرسن جارچی سن ؟

جارچی : کور اولون دئییرم .

شاهقیزی : نییه ؟

جارچی : رسمیدیر شاهلار قیزی کئچنده هاممی گوزونو یومالار  .

شاهقیزی : چوخ پیس رسمیدیر ، بوگوندن بویانا چونور رسملر ، هاممی گرک ییغیشا شاهلار قیزینا باخا .

جارچی : سوز سیزیندیر شاهقیزی ،،، گوزویوزو آچین ، باخین شاهقیزی کئچیر ، نئچه گوزده بورج آلین باخین اونا ،،، گوزویوزو آچین ، ییغیشین

                کوچه لره ، باخین اونا ، شاهقیزی کئچیر  ، گوزویوزو آچین ...

شاهقیزی : به نییه اوزاقدان باخیب قاچیرلار ؟

جارچی : سیزین اوزویوزون ایشیقلی هاله سی وورور اونلارین گوزونه ، تاب گتیرمیرلر .

شاهقیزی : جارچی گئد جلادین اوتاقینا .

جارچی : دوز دانیشسامدا گرک گئدم آخی .

شاهقیزی : یوخ سوز وئریرم .

جارچی : واللاه دوزو بودور سیزین چیرکین اوزویوز هاممینی قاچیردیر .

شاهقیزی : من چوخ چیرکینم ؟

جارچی : دوز دئییم یوخسا یالان ؟

شاهقیزی : یالان دئسن جلادی گورمه لیسن .

جارچی : عومورومده سیزدن چیرکینین گورمه میشم .

شاهقیزی : ایندی گرک اینانام چیرکینلیغیمه ، وای عشقسیز جانیما ، وای سئویلمی ین جانیما ، وای ، وای ، وای .................................

قارانلیق   . ایشیق   .  

                                                                                         بالیقچی تورون ییغماقدادیر .

بالیقچی : ( اوخویور )           گئدیرم چایدان توتام ،

                                             بالیقی سودان توتام ،

                                             آرآسدان گلیر روزوم ،

                                             گئدیرم اوردان توتام ،،،

                 آی جان سسیمه ، آشیقلار گرک گللر مندن سوز اوخوماق اویره نلر ، جان سسیمه .

                 شوکورلر اولسون تانریما ، بیر ساق سلامت جان ، بیر زورلو قووه لی بئل بوخون ، بیر جوتده چورکلی ال وئریب منه ، قاداسین آلاردیم بئله

                 روزی وئرن تانرینین ، او منه بالیق وئریر منده ساتیرام بو آللاهین گوزه ل گویچک خالقینا ، بودا توروم ، باخیم گوروم بوگون نه گلیر باشیما ،

                 نه توشور توروما ، دئییرم هئچ خبر سوراغ اولمادی قصره گئدن یولداشلاردان ، کئشگه پیس قدردن اوزاق اولسونلار ، بودور گلدی باخ ،    7

                 ایت اوغلو ایتلرین سوزونده دانیشماق اولمور کی  .

                                                                                                   دارغا گیریر ایچری یه .

دارغا : به به بالیقچی اوغلان ، آی اوغلان خوش گوردوک .

بالیقچی : باخ دارغا  ، هله نه بالیقدان خبر وار نه ده هفته باشیدیر پارا وئرم سنه ...

دارغا : اوغلان کیم بالیقدان دانیشدی آخی ؟ کیم پارادان دانیشیر آخی  ...

بالیقچی : لازیم دئییل دانیشاسان ، سن تاپیلاندا بللیدیر نه یه تاپیلیبسان ، پارادان سونرا نه ایستی یه جکسن بیزدن ؟

دارغا : یوخ جانیم ، بورادان کئچیردیم ، قوی تورویون ییغماقینا کومک ائله ییم سنه ، نییه به بوجور باخیرسان ، بلکه من کومک ائیلدیم بالیق چوخ

              توتدون ، اوندا دارغانیندا پایی چوخ اولار ، بوگونویونده منیم الیمله باشلا  ( تورون ییغیشماقیندا بالیقچییا کومک ائیلییر )  .

بالیقچی : آللاه اوزو کومک اولسون منه ، واللاه بوگون سو آپارماسا منی یاخچیدیر .

دارغا : آپارسیندا ، منیده آپارسین ، سنیده آپارسین ، هاممینی آپارسین ، قوی دنیزلر آپارسین بیزی .

             ( اوخویور )           ساحیلی تاپشیرین عاقیللیلارا ،

                                          من گئتدیم دنیزدن دنیزه باتام  ...

بالیقچی : آی کیشی بو سوز سنین آغزی یین سوزو دئییل ، اوز شالواری یین تاپ گئیگینن باخ  ، دئییرم گون هانسی طرفدن چیخیبدیر سنین کئفین بوجور

                 سازدیر هن ؟

دارغا : منیم کئفیم هرزامان سازدیر ، بوگونده لاب چوخ ، آی اوغلان بیر سوز دئییرم آمما سن ائشیدمی ییبسن ، شاهقیزی تیاترا باخیبدیر .

بالیقچی : بونون هاراسی سئوینملیدیر ؟

دارغا : اوتوز یاشی دولدوروب ، بوگون ایلک سیرادیر قصردن چیخیر ، تیاترا باخیب اویره نیبدیر ،، اونون ائشی یه چیخماسی پارامیزی چوخالداجاکدیر .

بالیقچی : من باشا دوشمدیم واللاه !

دارغا : سن نه بیلیرسن هئیوا کالدیر یا یئتیشمیش !  بونلاری بیر من بیلیرم ، سن بالیق توتماقیندا اول .

بالیقچی : به دا ایشین دوزوده  بودور .

دارغا : دئمیرم توتدوقویان شریک اولورام آمما پاییمی گوزلویورم  ، گئدیرم ایندی آمما گلنده بالیق ایستی یه جیم ها .

                               دارغا گئدیر .

                            بالیقچی تور آتیر .

بالیقچی : ایلیشمیشیکدا بو دارغایا ، دئییرم بونا دیین یوخدور آی جانیم سئرچه ندیر  اونون باش آیاقی نه اولا  !  منیم توتدوغوم گونده نئچه دنه بالیقدیر

                آپارام ساتام آجیمدان اولمویم اوندا بو آقازاده گلیر دئییر بیزیم بویوک شاهین حکومتینده چایدا شاهیندیر سودا باغدا بوستاندا توتدوغون

                بالیقدا ، ائیله  بیرسیرا دئگینن منین بو ... استغفراله ،

                ( اوخویور )          گئدیرم چایدان توتام ،

                                             بالیقی سودان توتام ،

                                             آرآسدان گلیر روزوم ،

                                             گئدیرم اوردان توتام ،،،

آهان ، تور ترپندی ، اده واللاه توتموشام ، آهان آهان ، ایش بوندادیر ها ،،، وای ددم نه ده آغیردیر ، دئییرم اولمویا ناققا توتموشام ؟ چیخیب

یئمییه منی ؟ خاییر ها چیخمییاجاقدیر ، سنی تانیمیانا لعنت گوزه ل تانریم ، گور نئجه یئتیردی بیزیم روزونو ، آی قاداسین آلاردیم سنین هئی ،

چیخدا ،،،

                                ساچلی گیریر ایچری یه .

                             ساچلی بالیقچینی گورور اونا وورولور ، ایسته ییر گئدسین بالیقچی یا

                                                                                    کومک ایله سین .

بالیقچی : دارغا ، دارغا گل کومک ائیله زوروم چاتمیر بونو چکم ائشیه ، گل گوروم ها .                                                                       8

                             دارغا گیریر ایچری یه .

                           ساچلی دارغانی گورور گیزلنیر .

دارغا : هن نه اولوبدور بالیقچی ؟

بالیقچی : کومک ائیله ، یاخچی بالیق توتموشام ها ، هان چک گوروم ، آهان ،،، وای ددم ، بو سو پریسیدیر توتموشام من ؟ نه ده چیرکیندیر !

                               بالیقچیلا دارغا شاهقیزینی سودان توتوبلار .

دارغا : وای بیزه ...

بالیقچی : نییه ؟!

دارغا : گوتور بونو آپاراق خسته خانایا ، گوتور تئز اول ، هله اولمویوبدور ، تئز اول گوروم .

بالیقچی : آی هوو ، گوتور گئددا ، من بالیق توتورام آخی ، سنه ده وئرجیم ها .

دارغا : آی اوغلان ترپنمسن دریمیزه سامان تپرلر ، گوتور گئدک گوروم ، تئز اول .

                             بالیقچی دارغایلا شاهقیزینی آپاریرلار ائشی یه .

                             ساچلی اونلارین دالیسیجاق گئدیر ائشی یه .

قارانلیق   . ایشیق   .

                               شاهقیزی گوزه للشیبدیر ، اوتوروبدور تاخت اوسته .

                            دارغا دوروبدور بیر قیراقدا .

شاهقیزی : دارغا ، سنیله بالیقچی اوغلان منی سودان توتدوز آپاردیز خسته خانادا سینمیش بورنومو کسدیزگوزه للیغیم بوتون عالمه بیللندی ، ایندی سن

                 شاهین قصرینده وزیر اولورسان ...

دارغا : منیم هئچ مکتبدن کاغاذیم یوخدور آخی !

شاهقیزی : لازیم دئییل ، بیرجه من سنی وزیرلیغه قبول ائیله ییرم بسدیر ، او اوغلانی تاپ گتیر ایشیم وار اونلا ، ایستیرم اونو سولار بیگی ائیله یم ،،، آمما

                  اصلی سوزوم ، ایندی هاممی منیم گوزه للیغیمی گوروب منه عاشیق اولوبلار ، ائلچی الیندن قصرین قاباقیندا یئر یوخدور ، گئد و اونلارین

                  بیرین سئچ گتیر بورایا ...

دارغا : شاهقیزی ساق اولسون قارپیز دئییل کی آخی ، سیز اوزویوز گرک اونلاردان بیرین سئچه سیز .

شاهقیزی : اونلارین هاممیسی منه عاشیقدیلر ، بو گورر ، یاخچی چیخار اولار منه یار ، پیس چیخار اولدوررم آیریسین سئچریک ، سوزوم اوسته سوز

                 اولماسین ، گئد .

دارغا : سوزوم یوخ گئدرم آمما ...

شاهقیزی : آمما نه ؟ دانیش گوروم ...

دارغا :  ائلچیلری گرک نئچه شرطیله سینایاسیز ، سوزلرینین دوز یالانی بیلله نه ، آشک ائیله بیر ایش دئییل اوندان ساده کئچمک اولا ، اونلار دئییرلر

             سیزی  سئویب گلیبلر ائلچی آمما اولا  بیله ر  یالاندان گللر ، سیز شاهقیزیسیز ...

شاهقیزی : انتربالاسی من قاباقداندا شاهقیزییدیمدا ، آدیمی چکن واریدی ؟  بونلار منی سئویرلر ، بونو دوشون .

دارغا : بوندا سوزوم یوخ ، سیناساز نه اولار آخی ؟ امین اولماق پیس دئییل کی .

شاهقیزی : من بیلیرم گوزه للیغیم اونلاری چکیب گتیریبدیر بورایا ، من اوزوم بونا اینانیرام ، آخی آینادا باخاندا اوزومه عاقلیم اوچور باشیمدان ، دونیادا

                 بیر گوزه ل اولسا اودا منم ، کئشگه اولایدی هاممی ائلچیلرین آشکین قبول ائلی یم ، حاییف اولان دئییل ، حاییف ،،، آمما اونلار الدنده

                  گرک چیخماسینلار ، بیری الدن چیخسا واللاه قولاقلاری یین کسیب وئره جیم الی ین ها ، دئمیش اولوم ،،، هله شرطیمیز نه اولسون ؟

دارغا : ایکی آج قافلانین آراسیندان  تاج گوتورمک .

شاهقیزی : دارغاوزیر اوزویون سریییبسن ؟ سن ایستمیرسن منیم یاریم اولا ؟ اده وئررم جلاد بوینویون وورار ها ، بو نه شرطیدیر آخی ؟

دارغا : یاخچی راحات بیر شرط ، قوردلا گوله شمک ...

شاهقیزی : گئد او جلادی چاغیر گلسین ایشیم وار ...                                 9

دارغا : شاهقیزی ساق اولسون شرط گرک ائیله شرط اولا هاممی اونو باشا یئتیره  بیلمی یه .

شاهقیزی : لازیم دئییل ، بوجور اولسا بیر ائلچی قالماز ، من تزه ائلچیلردن خوشوم گلیب ،،، دئدین هئچ کیمسه او ایشی گوره بیلمییه ؟ تاپمیشام ، تاپمیشام

           ،،، وای جان ، اوزودور ،،، وزیردارغا گئد شرط ائیله هرکیمسه آشک زورناسین تاپیب چالسا من اونون یاری اولاجایام .

دارغا : آشک زورناسین ؟

شاهقیزی : منیم حکومتیم اونا باغلیدیر ، گئد او زورنانی چالانی تاپ گتیر بورایا .

دارغا : تاپیلماسا ؟

شاهقیزی : سنین جانی یین آلارام اوندا ، اونو تاپ گتیر ، بو سنین دیری قالماقی یین شرطیدیر ...

دارغا : شرط ، منه شرط قویورسوز ؟ من سیزین ان یاخچی ، سوزه قولاق آسان نوکری ییزم آخی ! رحم ائیله یین شاهقیزی .

شاهقیزی : ایکی گوندن سونرا الی بوش گلسن گلمه بورایا ، گئد جلادین اوتاقینا .

قارانلیق   . ایشیق   .

                               جارچی کئچیر .

جارچی : ییغیشین ، باخین ، شاهقیزی کئچیر ، ییغیشین ، گوز آچین ، باخین ...

                                شاهقیزی کئچیر .

شاهقیزی : جارچی ، نه چوخ آدام ییغیشیبدیر .

جارچی : شاهقیزی ساق اولسون ییغیشیبلار سیزه باخالار ، رسمیدیر .

شاهقیزی : من قورخورام بونلاردان ، چوخدولار ، رسملری چوندرین ، کور اولسونلار من گئدیم قصره یئتیشیم .

جارچی : اوزاق اولون ، کور اولون ، شاهقیزی کئچیر ، اوزاق اولون ، کور اولون ...

                               شاهقیزی و جارچی چیخیرلار ائشی یه .

                            بالیقچیلا دارغا گیریرلر ایچری یه .

بالیقچی : گوزه للیک ، وار ، قصر ، تاخت ، هاممیسینی تانری وئریب بونا ، خوش بونو آلانین حالینا ، بودا یاشاییر بیزده .

دارغا : چتین دئییل کی اونو آلماق ...

بالیقچی : دئییرم سنده چوخ شوخلوقچوسان ها ، اده نئجه چتین دئییل آخی ؟ سریییبسن بیزی ؟

دارغا : شرط ائیله ییبدیر هرکیمسه آشک زورناسین تاپیب اونا وئرسه اونون یاری اولاجاقدیر ...

بالیقچی : یوخدا ؟!!!

دارغا : منه ده ایکی گون وقت وئریبدیر زوناچینی تاپام یوخسا اولمه لی یم .

بالیقچی : یازیق یولداش ، تاپسان نه وئرجک سنه ؟

دارغا : تاپسام وزیر اولاجام ، بوگون اولا بیلر سون گونوم اولا .

بالیقچی : اولا بیلرده وزیرلیغی یین ایلک گونو اولا .

دارغا : هن او زورنانی تاپا بیلسم اولار ، تاپیلان دئییل آمما .

بالیقچی : سن بیرگون منه کومک ائیله دین تورومو سودان چیخارتدیم ، دوزدور اوگون توروما ایلیشن جانیوار اوقدر چیرکینییدی چایداندا زهلم گئتدی

                بالیقلارداندا آمما سنین یاخچیلیغین یادیمدا قالیر ، بوگون منده سنه ایستیرم کومک ائیلی یم ، دوزو اوزومه گوره ، بلکه شاهقیزیلا  یار اولام بو

                دارلیقدان قورتولام گئدم قصرده یاخچی گونلری گورم ...

دارغا : سنده شوخلوقچوسان ها اوغلان ...

بالیقچی : یوخ ، بو سوزلر اوره ک سوزومدور .

دارغا : باخ گوروم بیر یئردن خبرین وار ؟

بالیقچی : دئسه م دوز _ اله نین  یئرین بیلیرم اینانارسان ؟

دارغا : شوخلوق ائیله سن باشین گئدملیدیر ها !                                  10

بالیقچی : شاهقیزینین یاری اولاندان سونرا منله بوجور دانیشسان سنین باشین گئدملیدیر ......................

دارغا : اوغلان سنین قاداییندا آلارام باشییاندا دولانارام ...

بالیقچی : اوتوردا منی ، اه ، نده پیسسن ، بئچارا سنی قوجاقلییان .

دارغا : نییه دوروبسان به منیم پاشام ، منیم آقام ، منیم شاهیم ، کئچ گئدک ، تئز اول ، گل مین بئلیمده آپاریم سنی هان ؟

بالیقچی : اونادا یئتیره ریک ، گئدک قصره ؟

دارغا : یوخ ، گئدک دوز _ اله نی  گوتورک گئدک قصره  .

                               دارغا و بالیقچی ایسته ییرلر چیخالار ائشی یه ، ساچلی گیریر ایچری یه ،

                                            ایکیسیده اونا حئیران باخیرلار .

بالیقچی : آشکا نه لازیم زورنا چالینا ، اوزو گلدی ...

دارغا : یاللانما بونون گوزه للیغینه ، شاهقیزی قصرده سنی گوزله ییر .

بالیقچی : بونون گوزه للیغی گوزه ل اولماسایدی سن نییه به بوجور حئیرانی اولوبسان ؟

دارغا : شاهقیزی منیم زورنامی گوزله میر کی ، یانی زورنا منده دئییل کی ، سن اونا گوره اوتور بونو .

بالیقچی : اوتوروم سن قاپاسان ؟

دارغا : کئچ گئدک ، منده ایسته مدیم ، نئیله ییرم بونو ، جانیمی قورتارماق واجیبدیر منه ، اولمه سم قالسام گلیب بونو تاپارام ، تاپا بیلمه سمده نه چوخ

             بویله گوزه ل قیزلاردان  ، گئدک .

بالیقچی : قیچیم گلمیر آخی .

دارغا : قیچین پوخ یئییر !!! دئییرم یانی شاهقیزی ، قصر ، یئملی یئملی یئمیشلر ، گورملی گورملی گوروشلر ، مینملی مینملی مینیشلر ، اوغلان بو ندیر

            آخی ، کئچ گئدکدا  .

بالیقچی : واللاه داها قراریم اوز الیمده دئییل ، ایسته سمده گئده بیلمیرم .

دارغا : داها سن اوزوندن اولدون ها ، دوش یولا گوروم .

بالیقچی : سن گئد منده سونرادان گلرم .

دارغا : دوش یولا اوغلان .

بالیقچی : گلمیرم .

دارغا : زورلا آپارارام سنی .

بالیقچی : گلمرم .

دارغا : ایندی کی بویله اولدو  وورا وورا آپارارام هوشون گلر باشی یان .

بالیقچی : نییه به قیلینج چکیرسن نامرد اوغلو نامرد .

دارغا : دوش یولا گوروم .

بالیقچی : گوزه ل قیز سن نییه چیخدین منیم قاباقیما آخی ؟ ایندی قانیم توکولر ، آمما اولسون قوی توکولسون ، سنه قوربان اولماسا بو جان نه یه

                 لازیمدیر .

دارغا : دوش یولا بابا ، منه اولوبدور کرم آسلی یا شعر اوخویور .

بالیقچی : بیر سوز دئگینن ، گئتمی ییم ، بیلسه م منی سئویرسن ، بیلسه م منیم آشکیم اولارسان واللاه اولسه مده گئدمرم ، دانیش ، آی قیز ، دانیشماسان

                گئدیرم ها .

دارغا : گل گئدک ، گئدک زورنانی گوتور گئدک قصره ، شاهقیزی ، قصر ، دارلیقدان قورتولماق  .

                              بالیقچیلا دارغا یولا دوشورلر گئده لر .

ساچلی : او دوز _ اله آشک دوز _ اله سیدیر  ، قویما اللره دوشسون ، اونو سنه بیر اوغلانلا قیز وئریبلر دوز ؟ ایه ایسته ییرسن سندن راضی اولالار بوندان

               سوروش اونلارلا نئیلییبلر قصریده  ، بو پیس جانیوارلار اونلاری اولدوروبلر یقین ، بونا امینم من ، من اونلارین یولداشییام ، چوخ گوزلدیم

               گلمه کلرین ، دئمیشدیلر سیزین شهرین یولونا گلیرلر ، گلمدیلر من اوزوم دوشدوم یولا گلدیم ، اوگون سنی گوردوم سودان بالیق             11

                   توتورسان ، خوشوم گلدی سندن ،  ایسته دیم گلم کومک ائیلی یم سنه ، بونو گوردوم گلمدیم ، سیز سودان چیخاردیغی ییز هامان

                    شاهقیزیدی ، او گوزه ل دئییل ، هامان چیرکین پیس جانیواردی ، بونلار نه آشک بیلیرلر ندیر و نه عاشیقلری سئویرلر ، سن بونلا گئدمه ،

                    قال ، ایه آشک زورناسی سنده دیر بیرلیکده گئدک اونو گوتورک چالاق ، خالقلار اوچون ، اینسانلار اوچون ، بوتون آدام بالالاری

                    اوچون .

دارغا : اوغلان سوزونه قولاق وئرسن باشین گئدجکدیر .

ساچلی : بو سنی اولدورسه اوزوده اوله جکدیر ، دوز _ اله نی  گرک تاپا آپارا .

دارغا : یاللانما بو سوزلره ، سن زورنانی وئرمسن منه سنی اولدوررم ، شاهقیزی بیلسه زورنانین یئرین بیلن اولوبدور منی داها اولدورمز .

ساچلی : بوندان سوروش او اوغلانلا قیزین باشینا نه ایش گلیب ؟ سوروش ، بونلار اونلاری اولدوروبلر ، زورنانی سندن آلاندان سونرا سنیده اولدوررلر ،

              بونلاردا هئچ رحم یوخدور ،،، آشک اوچون ، خالق اوچون بونلا گئدمه .

دارغا : اوغلان دوشمورسن یولا ووروم باشی یین هان ؟

بالیقچی : قوی بو قیزی  بوغوم ، قورخورام دوشم یولا سنیله گلم گله یولدا دوز _ اله نی  گوتورنده گیره جیلدیمه ، قوی بونو بوغوم خیالیم آوسودا

                اولسون .

دارغا : نئجه اوز فیکریمه یئتیشمیردی بو ایش ، ساق اول  ، ایندی بونو اولدوررم الیندن قورتولاریک .

بالیقچی : سن یوخ ، قوی بونو من اولدوروم ، اوزوم اولدورسه م سونراسی نیفرت قالماز اوره گیمده .

دارغا : بو دوز ایشدیر باخ ، گئد گوروم نه ایش گورورسن .

                              بالیقچی گئدیر تورون گوتورور ، ساچلی یا باخیر ، دارغایا باخیر ،

                           ساچلیلا بیرلیکده هوجوم گتیریر دارغایا ساری و اونو تورا سالیر باغلاییر .

قارانلیق   . ایشیق   .

                              بالیقچیلا ساچلی بیر سکو اوسته دوز _ اله نی چالیرلار .

                               شاهقیزی چیغیرا چیغیرا اویان بویانا قاچیر .

                                                                سون  .