افق ...

بن بست و خارهای مغیلان 

پشت سر حتمن 

زخم و عطش رسیدن و تاول 

عجب ! 

افقی داریم به این غروب بیکسیها ! 

هی 

هی هی ...

دئرام متنی : زیلزیله ...

                                                                                  کوچه : آخشام باشی .

                                آیدین سربازلیق پالتاری اینینده کوچه نین باشیندان گلیر .

                                                                                  شیخ مختار اوبیریسی طرفدن گلیر .

شیخ مختار : اوغلان باشیین سالیب آششاغیا هارا گئدیرسن ؟ ؟ ؟ به هانی سالامین ...

آیدین : سالام شیخ مختار عمی .

شیخ مختار : هه ، ایندی اولدو باخ ،،، سالام آیدین بالا ، اوغلان خوش گلدین ، نه زامان یئتیشدین ؟ مرخصیه گلیبسن ؟

آیدین : مرخصیه ؟

شیخ مختار : اده به دیلین نیه توتولور ؟ مارال ائشیدسه سئوینجک ، هله گئد بیر ائوده آنایین آتایین گور گتیررم گوررسن بیله سین ...

آیدین : آتامدا ائوده دیر ؟

شیخ مختار : قونشو قونشونون هر نیین بیلر آمما بونو بیلمیرم باخ ، اولماسادا گلردا .

آیدین : یانی گئدیم ائوه ؟ یا ...

شیخ مختار : اوغلان آنایین گورمک واجیبدیر ، گئد ،،، آللاه اکبر .

                                 آیدین گئدیر .

                                                                                  شیخ مختار ایستییر گئدسین حیدرعمی ایله اوز به اوز گلیر .

حیدرعمی : خوش گوردوک شیخ مختار .

شیخ مختار : خوش گونون اولسون حیدر عمی ، هارا بو توولا ؟ اولمویا خبری ائشیدیبسن ؟

حیدرعمی : ائشیدیب حالیم خاراب اولوب ...

شیخ مختار : آی کیشی جاماهات بوجور سوز ائشیدنده سئوینیر سنین حالین خاراب اولوب ؟

حیدرعمی : شوخلوقا هئچ حالیم یوخ کیشی ، قوی گئدیم ایشیمین دالیسیجاق ...

شیخ مختار : نه شوخلوقو جانیم ؟

حیدرعمی : شیخ مختار دوغرودان سن خبری ائشیدیبسن بوجور گوله گوله دانیشیرسان ؟

شیخ مختار : من خبرین اوزون گورموشم کیشی ائشیدیبسن ندیر ...

حیدر عمی : یوز سیرا بو آروادا دئدیم تیلویزیونو آچیخ قوی بیزده مملکتین خبرلرین بیلک ، قولاق وئرمدی کی وئرمدی ...

شیخ مختار : آی کیشی لاب ساریدین ها ، اولمویا تلویزیون گوستره جیدی ؟

حیدرعمی : تلویزیونون ایشی بودوردا ، گرک گوسترسین .

شیخ مختار : گور ایندی سن شوخلوقا توتوبسان یا من ، واللاه سنین کئفین سازدیر ، جانیم بویله اولسا تلویزیونون وقتی اولماز آیری بیر خبر وئره ،

                اوندا گرک بیر به بیر ...

حیدرعمی : شیخ مختار کیچیک خبر دئییلدی کی تلویزیون گوسترمیه آخی ، هئچ بیلیرسن نلر اولوبدور ؟

شیخ مختار : آی کیشی بیر سربازین مرخصیه گلمغین تلویزیون گوسترمز .

حیدرعمی : باشا دوشمورم سن ندن دانیشیرسان ، اولمویا آیدیندن بیر خبر اولوب ؟ من اولوم بیر سوز ائشیدیبسن ؟

شیخ مختار : ائله اصلی خبر اونون خبریدیردا ...

حیدرعمی : یا ابوالفضل ، یا ابوالفضل اوزون کومک اول ...

شیخ مختار : آی کیشی سنه نه اولدو ؟ بیری گلسین کومکه ،،، جئیران باجی ، مارال ...

                               جئیران باجی گلیر .

جئیران باجی : یا اون ایکی ایمام ، نه اولوب بونا ؟ یا ابوالفضل ...

شیخ مختار : گئد بیر قاب سو گتیر گوروم ...

                               جئیران باجی گئدیر بیر قاب سو ایله قاییدیر .

جئیران باجی : حیدر ، حیدر سنه نه اولدو ؟ حیدر !!!                       1

شیخ مختار : قورخما بابا هئچ زاد اولمویوب ، حتمن فیشاری یئنیب .

حیدرعمی : آیدیندن نه خبر وار آی کیشی دئگوروم آخی ...

جئیران باجی : یا حضرت عابباس ، یا اون ایکی ایمام ، آیدین بالاما نه اولوب ؟ یا ابوالفضل ...

شیخ مختار : آی هوو ، به سیز نیه بوجور ائلییرسیز ، نه اولاجاق آخی اونا ؟

حیدرعمی : زیلزیله ..............................

شیخ مختار : سوسما گورومدا  اه ، نه زیلزیله سی ؟

حیدرعمی : سن کی دئدین خبری بیلیرسن ، زیلزیله گلیب ...................

جئیران باجی : کول اولدو باشیما ، یا ایمام رضا ، کیشی هارا زیلزیله گلیب ؟

شیخ مختار : کیشی دانیشدا نیه به سن لال اولوبسان ...

جئیران باجی : اولمویا اهره ، دیلیم لال ، اورا ...

حیدرعمی : قورخما ، هئچ زاد اولمویوب ، آز ...

جئیران باجی : وای اوغلوم وای ، بیرده نه م وای ...

شیخ مختار : آی آرواد دور آیاقا گوروم سنده ، سیز لاب اوزویوزو ساریدیز ها ، آیدین گلدی گئدی ائوه بایاخلاریما ...

جئیران باجی : سن ابوالفضل دوز دئییرسن ؟

شیخ مختار : اوزوم یوللادیم ، اولمویا گلمییب ائوه ؟

جئیران باجی : گلسیدی من گورمزدیم ؟

شیخ مختار : اده واللاه او سفیه اوغلو سفیه گئدیب بیزه مارالین یانینا ...

حیدرعمی : سفیه اوزونسن آی کیشی آغزینلا دانیش ...

شیخ مختار : هن نه اولدو دیریلدین دیلین آچیلدی ؟

حیدرعمی : اوزونه یامان دئگینن به منیم گوناهیم ندیر دئییرسن سفیه اوغلو ...

شیخ مختار : اولماسایدی مرخصیه گلمک همین قاچمازدی بیزه کی ، گئدردی آناسین گورردی .

جئیران باجی : سن آللاه گلیب آخی ؟

شیخ مختار : من گئدسم خوش اولماز ، سن گئد او آنلامازی چاغیر گلسین ائشیه ...

                                 جئیران باجی گئدیر .

حیدرعمی : نه وقت گوردون اونو ؟

شیخ مختار : سندن قاباق ، آی کیشی یوز سیرا دئمیشم بو اوغلویان دئگینن بیزه گلمسین .

حیدرعمی : گلیر گلیردا ، سنله ایشی یوخ ...

شیخ مختار : آخی کیشی اونلار هله ...

حیدرعمی : هله نه ؟ هان ؟ اونلار آداخلی اولماسایدی گلسیدی سیزه اوزوم باشین کسردیم .

شیخ مختار : آداخلیدیر دوز ، دئمیشدیم اوز ائوی ییزه آپاراناجاق حاققی یوخ گله بیزه ، دئممیشدیم ؟

حیدرعمی : آی کیشی سرباز نه قانیر هئیوا کالدی یا یئتیشمیش ، سوزه قولاق وئرمیردا .

شیخ مختار : او سنین سوزوین قولاق وئرمیر منیم گوناهیم ندیر ؟

حیدرعمی : یاخچی کیشی چیغیریب جاماهاتی کوچه ده ییغما باشیمیزا .

شیخ مختار : قوی ییغیشسینلار ، قوی بیلسینلر ، آی جاماهت سیز دئیین منیم گوناهیم ندیر ؟ نیه گرک منیم آبیریملا اوینانا ...

حیدرعمی : آی کیشی شرعی قیچلارینین آلتینا قویمویوبلار کی ، آداخلیسین گئدیب گوره ، بونون نیی پیسدیر ؟

شیخ مختار : واللاه یاخچی سوزدور ، به بونلار هارادا قالدیلار ؟

حیدر عمی : اوداها گلیرلر ...

                                                                      جئیران باجی آیدین ایله گلیر .            2

                               حیدرعمی آیدین ایله قوجاقلاشیر .

شیخ مختار : اوغلون گوردو هر نه یاددان چیخدی ...

حیدرعمی : یوخ چیخماییب ، اوغول اورالاردان بیر خبر ......................................

شیخ مختار : بودا سوسدو ، بویون سیزه نه اولوب ؟

جئیران باجی : اوغول قورخوبسان هن ؟ سنی گرک بیر داغلیام ...

حیدرعمی : آرواد بو اوشاق دئییل کی قورخا ، مملکتین سربازیدیر ، هن اوغول اهردن نه خبر ؟ اینشالاه ائیله بیر شئی اولمویوب اورالاردا سنی

                 اوتوربلر گلسندا هن ؟

آیدین : میه تلویزیون گوسترمی ییبدیر ؟

شیخ مختار : حتمن بویوک دئییلمیش ...

حیدرعمی : من گاراژدا ائشیتدیم .

جئیران باجی : تلویزیون بیر سوز دئمدی ...

آیدین : هر یئر ییخیلدی ، داغیلدی ، هر یئر ، من گوردوم ، اوزوم گوردوم ، یا آللاه ، یا آللاه ...

حیدرعمی : یا ابوالفضل ...

شیخ مختار : به تلویزیون گوسترمی ییب آخی ؟

جئیران باجی : اوغول سن قورخوبسان واللاه ...

حیدرعمی : دانیش گورک .

آیدین : هن ؟ نه دئییم آخی ؟

حیدرعمی : گوردوکلریندن ...

آیدین : ائولر ییخیلدی ، باشاباش ، پاسگاه ترپندی ، ایکی سیرا ، ییخیلمادی ، بئتونداندیر ، هئچ نه اولمادی پاسگاها ، آمما ، آمما ائولر ، ائولر ، یا

          ابوالفضل ، یا ...

جئیران باجی : اوغول اوتور یئره ، گل سو ایچ ، گل ...

شیخ مختار : آللاه اوزو کومک اولسون ...

حیدرعمی : آللاه اینسانلاری یارادیب بو گونلره ، اوغول به نیه گلدین سن ؟ اورالاردا کومک لازیم دئییلدی ؟

جئیران باجی : یاخچی گلیب ، واللاه اولردیم بونو گورمسیدیم ...

حیدرعمی : اوغول دئمدین اورالاردا کومک لازیم دئییلدی گلدین ؟

شیخ مختار : حتمن لازیم دئییلمیش بونلاری اوتوروبلر گللر ائولرینه ...

آیدین : داملار ییخیلمیشدی ، هاممیسی ، یولدا گلنده گوردوم ، ورزقان ، اهر ، هریس بوتون خارابا قالیبدیر ، اولن چوخ ، یارالی اولان لابدا چوخ ،

           آنالار اوشاقلارین آختاریردی ، آتالاردا ، اوشاقلار آنالارین توپراقلاردان چیخاردیب اوپوردولر ، توپراقلارلا آداملار قاریشیب بیر

           اولموشدورلار ، اولن چوخ ، یارالی اولاندا لاب چوخ ، قیرقین گلمیشدی ائلیمیزه ...

حیدرعمی : یا آللاه ...

جئیران باجی : اوغول اوتور یئره سو ایچ ...

آیدین : اوشاقلار آغلار ، سو یوخ اورالاردا آنا ، سو یوخویدو ، ، ، گوزلر یاشلی ، یئمک یوخ ، چادیر یوخ ، پتو یوخ ، ، ، هاممی کدرلی ، قاشدیم ،

          قاشدیم ، قاشدیم ...

حیدرعمی : قاشدین ؟

جئیران باجی : سو ایچ اوغول ، سو ایچ ...

آیدین : قورخمالی اولوب اورالار ، قورخوب قاشدیم ، بیلیردیم گرک قالام ، قورخو قاچیرتدی بیلمی ، قاشدیم ...

حیدرعمی : کیم اینانیر بونا ؟

شیخ مختار : قورخوبدا ، بونا نه سوز وار ...                                3

حیدرعمی : منیم اوغلوم ؟

جئیران باجی : اوغول سو ایچ ...

آیدین : یئر بئشیک اولوب بیر یئرده دورمور ، یاریم ساهاتدان بیر ترپنیر .

حیدرعمی : اوندا گرک سن میللتی او حالدا اوتوروب جانیان گوره قاچیب گلسن آنایین قوجاقینا ؟ اینانیم بونا ؟

آیدین : آتا ...

حیدرعمی : منیم اوغلوم ؟!!!

آیدین : آتا ...

حیدرعمی : آتا درد ، آتا اولوم ، نه آتاسی داها هن ؟ منیم اوغلوم اولاسان قاچاسان یئرین ترپنمغیندن ؟ وای وای وای سنه ...

آیدین : آتا ...

حیدرعمی : بونو مندن اویرنیبسن ؟ یا آناندان ؟ هان ؟

آیدین : آتا ...

حیدرعمی : بو الکه نین بویله قایداسی وار سن بویله اویرنیبسن ؟

آیدین : هرکیمسه اورالاری گورسه قورخار منیم کیمی ...

حیدرعمی : قورخودان اوله جیدین ؟ قورخموشدون قورخموشدوندا ، نیه به قاچیبسان هله ؟

آیدین : چوخلاری قاچدی ...

حیدرعمی : سن منیم اوغلومسان اونلار کی یوخ ...

آیدین : آتا ...

حیدرعمی : گئد ، داها منه آیدین اولدو ، گئد ...

آیدین : آنا سن بیر سوز دئگینن ...

حیدرعمی : نه دئسین ؟ دئسین سودوم حالالین اولسون اوغول میللتی ، یازیق میللتی اوتوردون گلدین ؟ نه دئسین هان ؟ دئسین باریکالا اوغلوما ؟

شیخ مختار : آی کیشی آز قینا بونو ، قالاردی اولردی ...

حیدرعمی : نه اولاردی بودا قالا ؟ کومک ائیلی یه ؟ نه اولاردی ؟ منی باش آششاغی ائیلمکدن خوشو گلیردی ؟ داها من نئجه بو خالقین ایچینده

                باش اوجا یاشامالیام ؟ نئجه هان ؟ وای سنه اوغول ، وای سنه ...

جئیران باجی : کیشی اوزمه اوزویون ...

حیدرعمی : باخ جاماهاتا نئجه باخیرلار بونا ، بو منیم جییاریم ، اوغولومدور ، بو گرک اوزونوده منیده باش اوجا ائیلییردی نه کی بوجور باش

               آششاغا ، نئجه اوزولمویوم ؟ هان ؟ سن بونا اویردیبسن بونلاری ؟ خالقی پیس گونده بوراخیب قاچماقی من اویردمیشم بونا ؟

آیدین : آتا قورخدوم ، واللاه قورخدوم ...

حیدرعمی : آنلامادین قورخدون ،،،،،،،،،،، سن سربازسان ، سن منیم اوغلومسان ، تورک اولادی قورخاق اولار ؟ ندن قورخدون ؟ جانیندان ؟ آخی

                خالقین یولوندا وئریلمسه جان اونون ارزیشی ندیر ؟ هان ؟ نیه لازیم اولاجاق ؟ اولمویا قوردلا قیامته قالاجاقسان ؟ ندن قورخدون ؟

                ندن ؟

شیخ مختار : آی کیشی بوراخ بونو ...

جئیران باجی : اوغول گل بویانا ...

حیدرعمی : قولاق وئر گور نه دئییرم ، یا ایندی منیم وانتیمی گوتوروب دولدوراجاقسان اورادا لازیم اولان وساییل ایله دوشجکسن اوزومله گئدک

                 اهره ساری یادا داها گئدیب دالیان باخمیاجاقسان ؟ منیم قورخاق اوغلوم اولمویا یاخچیدیر ...

شیخ مختار : آی کیشی بو نه سوزدور ؟ ائشیدمدین دئییر یئر تئز تئز تیتره ییر ؟ بو گئدسین اولسون اوزوده بدبخت اولسون منیم قیزیم مارالدا ؟

حیدرعمی : مارالداندا سوروشسان منی حاقلی بیلر ، اونوندا خوشو گلمز اوشاقلاری بیر قورخاقین اوشاقی اولسون ...

شیخ مختار : سون سوزوندور ؟

حیدرعمی : سون سوزومدور ...                                               4

شیخ مختار : جئیران باجی سن بیر سوز دئگینن بونا ؟

جئیران باجی : بو منیم اوغولومدور ، جانیمدیر ، بونو من بویودموشم الیمین آغاجی اولا ، پیس گونده دایاقیم اولا ، بو منیم روحومدور ...

شیخ مختار : بونلاری منده بیلیرم آیدینده بیلیر ، بو کیشی یه دئگینن ائشیدیب شئیطانین ائششگینن دوشسون ...

جئیران باجی : بیلیرم بیلیرسیز ، دئدیم یادا سالام ، بو کیشی آجیدا دانیشسا دوز دانیشیر ، منیم اوغلوم منه گوزومدن ایستملی اولسادا آتاسی

                  دئدیکلری منیمده سوزومدور ، بو اولکه نین خالقی مینلر ایلدی بویله یاشاییب ، اولادلارین بویله اویردیب ، ایندی نئجه من بو

                  خالقین دبلرین قویوم قیچیمین آلتینا ؟ کیم دئییر منیم اوغلوم اوبیریسیلردن گوزو قارادیر ؟ هله کیم دئییر بو اورادا قالسایدی

                  اوله جیدی ؟ اجلین اورا بوراسی وار ؟

شیخ مختار : بو سوزون سوزو یوخدور داها ...

جئیران باجی : اوغلوم آتان دوز دئییر ، سن قاییدماسان داها بو خالق ایچینده باش اوجا یاشاماق اولماز ، اوزون باش آششاغا اولارسان ، بونو

                   ایسته ییرسن ؟ آتانلا قایید گئد اورایا ، جان شیریندیر آمما اولوم هر یئرده وار ، اونلار بیزیم کومکلریمیزی گوزله ییرلر ، ائیله بیل

                   اوز آنان آتان ، اوز آداخلین ، یولداشین ، قونشوندورلار ، ائیله بیل اوز عائیلن اوچون چاللاشاجاقسان ، قایید گئد اوغلوم ، گل بودا

                   منیم قولباقلاریم ، آل آپار اورایا ، بیلیرم اورادا هر نه لازیمدیر ، ائوده پتودا وار گیلیمده ، آتانلا دوش یولا ، بونلار کی ییغیشیبلر

                   بورایا بونلاردا کومک ائیله یرلر ، باخ هاممی سنه بیر پهلوان کیمی باخیر ، قایید اوغلوم ، بونلارداندا نه وئرسلر آل آپار گئد ،

                   یاشامالیدیر خالقیمیز ، پیس گونده گرک بیربیرین دایاقی اولاق  .

                                                                                                       سون  .

                               ۱۳۹۱.۰۵.۲۶

آذربایجان ...

بوگون  سولدوز  باشی اوجایدی 

ییغدیلار  آزدان چوخدان  ییخیلان  یئرلر اوچون  خالقیمین  یاردیملارین 

یاشاسین  تورک  اولادی ! 

باخدیم  اولمویوب  مورووت  هه له کی 

اوره گلرده  قالیر  اینسان اوچون  موحه ببه ت 

ال له ر  آچیخ 

دیلله ر   سوزلو 

شئیطانین  قوردوقو  پوزولو  

اوزو  اوزولموش  سانجیدان ! 

آند اولسون  اوجا  باش  ساوالانا 

بیردانا   سه هه ندیمه 

توپراقیما 

آند اولسون  اولکه مین  گوزه ل  آداملارینا 

آذربایجان  مین  سیرادا  قیچ  آلتیندا  ازیلسه   اوله ن   دئییل  

تاریخ  شاهیددیر  بونا ! 

خالقیمی  گوردوم  بوتون  آذربایجاندا 

یاردیم  ائتدیله ر  هاممیسی 

کیچیک 

بویوک 

وارلیسیدا 

وارسیزیدا ! 

بوگون  بیلدیم  بو  توپراق  قالاجاقدیر 

یاشام  بویو ! 

بوگون  ایچیم  دئدی 

یاشامالی یام 

آخی 

مه ن  آذربایجانام ...

یاشاسین  آذربایجانیم !