متن نمایشنامه: ریحان ...
پئرسوناژلار: ریحان، تارخان، ایلانیالیان، داشناک، روسکویچ و آشیق
1. آشیق ساز چالیر.
آشیق: داغلار قیزی ریحان. اوزون زامنلاردان بیر ماهنی. ائللریمیزین ناغیللاریندان بیر ناغیل. آذربایجان پارچالنمیشدی. ایران روس دویشلریندن
سونرا آذربایجان ایکی بولنموشدو. روسیه نین اولموش یوخاری آذربایجان، روسلارا قاتیشمیش آیری اولکه لرله بیرلیکده یاشامی داوام
ائدیردی. ایستر ایستمز. بیزیم ناغیل بویون ریحان آدلی گوزل آذربایجانلی قیزین ناغیلیدی.
ریحان: الینده تور اولا اولا آرازدان بالیغ سیز قاییدیبسان آی گول یاناقلی گوی پاپاقلی اوغلان؟
تارخان: آی قیز سن اورادا نه ایش گورورسن گئجه نین بو چاغی؟
ریحان: اولدوز دریرم باشیما تاج دوزلدم.
تارخان: شیرین دیللی قیز تاج نئیلییر سنین باشین، گوزل ساچلاری وئرسن یئل الینه اییی سی یوز اوغلانی یولدان چیخاردار گئدیب سنه اولدوز
دررلر.
ریحان: یوز اوغلان منه لازیم دئییل، بیر گوزل اوره گیمده یئر تاپسا گورر منی.
تارخان: اونون دا آدی نه اولا؟
ریحان: تارخان مفته مفته دانیشیب اوزویون یورما. شرط قویاجاقام سن شرطی می اودسان منیم قلبیم ده یئرین اولا بیلر ، یوخسا گئد گئد گرک دییم
سنه.
تارخان: به نه زامان بو شرطی ایستیه جکسن آی باشی تاجلی مارال؟
ریحان: تلسمه تلسمه تلسمه. تاجیمین اولدوزو کامل اولاندا شرطیمی دییرم هاممی بیلسین.
تارخان: باخ گوروم هله سن دئمیرسن دوواردان دوشوب اولرسن؟
ریحان: قارا اوره گ قارا ایش پئشه دوشمانیم اولسون، حاییف دئییل من اوله م؟
تارخان: هیه واللاه. او دوشمان اولملی دیر. نامرد قودورغانلار اولماسایدی ایندی بالیغ سیز قاییدمامیشدیخ سنده دولاشاسان بیزه.
ریحان: نئجه میه؟
تارخان: نئجه سی یوخ کی آی ریحان. موندار داشناک لار سلاح اللرینده دوشدولر دالیمیزا...
ریحان: سیزده قاچدیز گلدیز؟
تارخان: یوخ دوراجاقییدیخ گول له سوکه جانیمیزی؟
ریحان: نه اولار کی. لازیم اولسا گول له سوکسون دا جانی.
تارخان: لازیم اولسا هیه. بالیغ اوسته یوخ کی...
ریحان: من اولسایدیم داشناکلاری روم دا اولان کلیسالاراجاق قاوالاردیم هوشلاری گله باشلارینا.
تارخان: دئییرم بونو شرط ائلمه ها...
ریحان: گول آمما بونو بیل صاباح گون اورتا مسجیددن چیخاندا ائشیدرسن ریحان شرط ائلییب بالیغ گتیرن اولا بیلسه آرازدان من اونا گئدجه یم.
تارخان: یوخ ها.
ریحان: گور دا. منجه آشک دان دانیشان آشکی اثبات ائدملیدیر.
آشیق آشک ماهنی سی چالیر.
2. ایلانیالیان ایله روسکویچ شکاردادیلار.
روسکویچ: بازام اوو وورام، داغ کئچی سی، جئیران. کهلیکدن نه چیخار آخی؟
ایلانیالیان: بو داغلاردا هر نمنه ایستسن وار. من شکارین اوزوندن خوشوم گلیر. نه اولسا قاباقیمدا فرقی یوخ.
روسکویچ: اولمالیدی. فرقی.
ایلانیالیان: نئجه؟
روسکویچ: من گوزلره عاشقم. مارال گوزو، جئیران گوزو. اوو گوزو. شکار اولان جانیوارین اتی کابابی بیر طرف گوزل گوزلری بیر طرف. 1
ایلانیالیان: عاشق اولدوقون جانیواری نئجه اولدورورسن؟ شکار ائدیرسن.
روسکویچ: آشک منه بویله دی. آداملار ایچینده ده بویله یم. آشکیمی گوروب گوزلرین سئویب اوزون شکار ائدیب اوزومله آپاریرام خلوتیمه.
ایلانیالیان: خلوتینده ده ...
روسکویچ: اوراسی اوزوم ایله شکار اولانین دی. سنه یئتیرمز.
ایلانیالیان: او هئچ. بو جانیوارلاری آمما کسیب یئییرسن. بونلارین گوزلرینین آشکی نجور آشک اولا بیلیر ؟ خلوتسیز آشک؟
روسکویچ: ایلانلیالیان، هر نمنه اوز یئرینده گوزل دی. آشک لاردا بویله دی. سیاست عالمیندن مثال وورسام سنه بویله دئملی یم. باخ، من بیر روس
نظامی سی اولدوقوما گوره روس اولکه سینین سیاستلرینه باغلییام. اونلاری گرک قاباقا آپارام. بو ایش اوچون بیر ماهر شکارچی کیمین
اوزگه اولکه لری آلماقدا گرک اولا ایشلریمین ایچینده. بو ایش آشکسیز نئجه اولا بیلر؟ من اوز اولکه مدن چیخیب چوخلو یول گئده م
گرک. گئجه گوندوزوم اولمویا گرک. بو داغدا، او باتلاقدا، دره ده، دوزده، ها بویله چای دا دنیزده یول آچیب گئدم گرک. بو ایش لر
ایچریدن گلمی ین آشکسیز اولارمی؟ اولماز ایلانیالیان اولماز. بودور کی من اوزومه تعریفیم وار، آشکسیز ایشی باشلاما. هر اولکه ده
بیر گوزللیک اولا بیلر اونا عاشق اولاسان. من بویله آشک سوروب اولکه لری روس اولکه سینه ملحق ائیلییرم.
ایلانیالیان: بو دئدیقین آشک فقط اولکه لره باغلیدیر؟
روسکویچ: هم اولکه لره، هم آداملارینا، هم گویلرینه هم یئرلرینه. داشلارینادا حتی. نه فرقی وار. گوزللیک هر نمنه ده اولا بیلر.
ایلانیالیان: اوندا عاشق اولدوقون آداملاری نئجه قیرمالیسان اگر ایستسلر سنین قاباقیندا دایانالار؟
روسکویچ: جانیوارلار اوز جانلارین قورتارماق اوچون بیز شکارچی لاردان اوزاق گزیب، بیزی گورنده قاچیرلار. بیز آمما، من، اوزوم، اونلارین
گوزل گوزلرینه باخا باخا اونلاری اوولاییرام. بو منیم قانونومدو. آشک اوز یئرینده، شکار اوز یئرینده.
ایلانیالیان: چتین بیر ایشدی بویله اولماق. من بیر اولکه لری آلسام ایچیمده کی خشونت له آلمالییام. شکاردا دا جان آلماق اوچون اوخ آتیرام. اوزوم
ایله و شکاریم ایله تعارف یوخومدو.
روسکویچ: من دئدیقیمی اویرن. یاشامیندان لذت آپار. سن دئدیقین حال دا بیر قاتل وظیفه لرین گورور، من دئدیقیم حالدا بیر اینسان آشکلاری لا
یاشاییر. یاشامی راحات الدن وئرمه منیم ائرمنی دوستوم. اولدورسنده آشک لا اولدور.
3. ریحان بیر کلیسادا تارخانین عکسین چکیر.
ریحان: اوچ سله دولو. اوچ سله دولو.
دئدی گوردون سنه گوره آرازدا قویمادیم بالیغ قالا. ائرمنی لر گئجه شرابلارین ایچیب یاتمیشدیلار. سنه گوره تور ساللادیم ریحان. آراز
گوردو. اوچ سله. باخ کیمین سله سی دولوب؟ من اوچون گتیرمیشم. ایندی نئجه؟ منیم سن یوخسا هله شرطین وار؟
تارخان تارخان، اوچ سله دولو بالیغ وئردی سنه آراز؟
دئدی من آرازدان توتدوم. به اوبیریسی لره نه اوچون وئرمییب؟
آی دیللی باشلی اوغلان آراز گیزلدسییدی بالیغ لاری ایندی سنده الی بوش قاییداردین.
تارخان تارخان، آیری شرطی ده بوجور باشا آپارا بیلسن گلرم سنه ایندی یوخ هله.
گولدو تارخان. تارخانیم گولدو. دئدی اون شرط یوخ یوز شرطین اولسادا قاچان دئییلم. بالغ لاردا سنین. نوش اولسون.
اوچ سله دولو. اوچ سله دولو. بالغ لارین آللاهی توتمادی منی؟ نئچه ایلدی جاوابیم یوخ بونا. نئچه ایلدی.
4. آشیق.
آشیق: ایگیدلر کندین مئیدانین قوروق ائدیبلر. بوگون دوره کندلردن گلن آز اولمویوب. آتلار مئیداندا کیشنه ییر، ایگیدلر مئیدان اوخویور. ریحان
آت قووما شرطی قویموش. منجه کوراوغلو آتی گره کدیر بویله مئیدانا.
هایقیریب آچسام مئیدانی/ سو ته ک آخیدارام قانی/ ده سته له ییب به یگی خانی/ قیرآت دوشونه قاتارام!
کوراوغلو قیرآتینا اوخوموش سوزو ایگیدلر آتلارینین قولاقلارینا اوخویور بوگون.
ده لیله ریم بوگون داعوا گونودو/ آتلانین! یارادان بیزه یار اولسون/ مرد ایگیدلر یاراسیندان بللیدی/ نامردلری قوی تر باسسین خار اولسون! 2
تارخان: آی سئوملی قیز دوروبسان تپه اوسته باخیرسان مئیدانا. باخ. باخ. هاممی ایگیدلر بورادادیر. آتی اولان ایگیت آتین مینیب، اولمویان بورج
آلیب گلیب. قوی گویلرده بیلسین ایگیدلرده، یئرده بیلسین آتلاردا؛ بو مئیدان تارخانا باخیر، تارخان آمما مئیدانین سونونا. بو یول، بو آت
چاپدیرما منیمدیر. قوی بوتون عالم بیلسین ریحان خانم منیمدیر. اوچ آتیم، اوچ قیرآتیم. اوچ منیم آتیم.
ریحان: خه یالیمده هله ده آغ آتی چاپدیریرسان منیم گوزل آداخلیم. منیم سئوگیلیم. هله ده سسین گلیر هئی ووروبسان آغ آتا. کئچ هاممی نی. اوچ.
اوچ دئنن آغ آتا. اوچ. کئچ هاممی نی. یولون سونو سنی گوزله ییر. منیم گوزله ریم سنی گوزله ییر.
آشیق: بوگون خینا واقتیدی/ اللره خینا یاخدی دی.
بی گلینلر، آی قیزلار اوغلانلار، گئنجلر ایگیتلر، بوگون سیزین گون دی. خینادی خینا. قان کیمی بویا. بو گون خینا یاخدی دی.
اوینا گوزل ایگید. اوینا بو گوزل دویون ده. بو گئجه خینا گئجه سی دی. تارخانین ریحانین خیناسی دی.
5. ریحان بیر کلیسادا تارخانین عکسین چکیر.
ریحان: قان رنگی آلمیش دونیامی. دونیانی. قان یاغیر گویدن. جوشور یئردن. قرمزی بویا آلمیش هر یئری. آی گویده اوچان بولودلار، ندن سیز آغ
کوینکلری چیخاردیب آل گئیینیبسیز؟ سیزده خینا یاخیبسیز اولمویا؟ بوگون من له تارخانین خیناسی دی آخی. گئنه خه یال گلدی قوناق.
تارخان: گئجه می گوندوزه دوندرن گوزلر.
ریحان: قانادسیز اولورام سنسیز، اوچماق ایسته سم سنسیز اولماز. بیلیرم.
تارخان: سن منیم آشکیم. روحوم. نازلی دلبریم.
ریحان: سن منیم سئوگیلی یاریم.
6. ریحان ائولرینین قاباقیندا عائله سینین جسدلری له دانیشیر.
ریحان: آتالی نه بیلیر آتاسیزدیک ندیر؟ کیمسه آتا دئییب گوزو دولسا اوندان سوروش آتا کیمدیر. شانیم آتا. جانیم آتا. شوکتیم، واریم یوخوم آتا.
باشیمین تاجی سنسن. گوزومون ببکلری. روحوم سنسن. قلبیمین دیلکلری. وای آتا. وای آتا نئجه قییدین آتا؟ نئجه؟
تاریم دا سیمیم آنا. حزین حزین سوزوم آنا. سسیم آنا. ایزیم آنا. هر باخیشیمدا مین دیله ییم آنا. روحومو آپاردین، جانیمی آپاردین، نئجه
به بو جانسیز جسدی قویوب گئدیرسن؟ آنام. سنسیز هانسی گولوش اوتوراجاق اوزومده؟ هانسی اللره اوپوش ووراجاق اوچوخلامیش
دوداقلاریم؟ آنام. جانیم آنام. آشکیم آنام. لای لای آنام لای لای. نه یاتیبسان سن آخی؟ لای لالاری سن اوخومالییدین یوخسا من؟ نئجه
قالدیم یالقیز. وای بو گونومه. وای. یات آنام یات. نه اولار کی، اویادمارام سنی. یات آنام. لای لای دئییم یاتاسان آنا، قیزیل گوله باتاسان
آنا. دردلریمی بیله سن آنا. وای آنا. جان آنا. دردیمی بیر سن بیلرسن آنا. بیر سن.
باخیرام ایندی اوتایا بوتایا. نه باخماق. نه گورمک. نه بیلیم. روحسوز. جانسیز. بیر اولو گئدیر یئر له گوی آراسیندا. بیر اوزوندن کوچموش.
لال. کار. باخیرام هر یئره. نه گورورم؟ بوتای قان. اوتای قان.
اولوم حاقدی. تانری بیلیر. بیلن انسان دا. بویله آمما؟ هانسی مصحف بونو یازمیش؟ هانسی تانری. به دئییبسن عدالتی وار دونیامین؟ به
هانی؟ به هانی؟ گورورسن اولولری؟ لئشلری بیر بیر اوسته گورمور گوزلرین؟ به هانی دئدیقین عدالت؟ باخ. دیقتله باخ، عادل گوزلری یین
آچ، گور. بودور دئدیقین عدالت؟ باخ، بو باجیمدی او قارداشیم، بو عمیم دی او یولداشیم. بو گوزل ساچلی منیم جان سیرداشیم. بو
جانسیز، کفنسیز آنامدیر؟ او یوخولار دونیاسینا قوناق گئده ن آتامدیر.
قانلا دولوب اوووجوم. قانا دونوب ایچیم، اوره گیم. قانا دونوب جانیم، جانسیز جسدیم. هانی منیم گوزه لیم؟ گوزل لریم؟
7. آشیق. 3
آشیق: ایستدیم ریحان خانیما صبردن دانیشام. دیلیم توتولدو. بویله حالدا سوسماق گرکدیر. سن منیم یئریمه دانیش سازیم.
8. ریحان بیر قایا اوسته دوروب اوزاقلارا باخیر.
ریحان: یالقیز نئجه قالماق اولار؟ اولماز آللاه. اولماز. چاره م یوخ آمما. ایندی منیم یولوم بللی. ایشیم بللی. یالقیز قالسامدا بو ایش منه باخیر. داغلار
منه باخیر. آتیم توفنگیم منه باخیر. قان یئرده قالماز.
ها داغلار قوجا داغلار. باش اوجا بیزیم اوجا داغلار. ریحان سیزه اوز گتیریب، پاره پاره اورگله. یالقیز. یارالی. پناه وئرسز منه نه اولار؟
ظالم لردن سیزه پناه گتیرمیشم داغلار. اوجا داغ باشیمی قویوب اتگینده یاتاجاقام، آنام یئرینه. قایالارییان دایانیب اوتوراجاقام، آتام یئرینه.
داشلارین لا، آغاجلارینلا یولداش اولاجاقام، باجیلاریمین قارداشلاریمین یولداشلاریمین یئرینه. اوجا داغ قارتللارلا اوچوپ گویلردن
آختاراجاقام موندار ظالم لری. قیرقی لارین کیمی گویدن یئنیب دوشمانلاری، یاغی لاری، کافتارلاری توتوب سوکوب داغیلداجاقام. بو
گون منیم مسکنیم سن اولدون اوجا داغلاریم.
9. ریحان بیر کلیسادا تارخانین عکسین چکیر.
ریحان: گوزلریم یوللارا باخیر، اوره گیم بیله بیله گلن یوخ. اینتیظار نه چتین، یالانا منتظر قالماق اوندان دا چتین. سنین آدین آمما شیرین. اولدوزلار
چکیب شکیلی یین سنین گویلرده. الیم قیسسا. اولدوزلار اوزاق. جانیم یورقون. گئجه دن گئجه یه یئنه من یئنه اولدوز یئنه سنین خه یالین.
10. آشیق.
آشیق: بیر گوزل تویدا ساز چالیب اوخومادایدیم.
داشناکلار گلیب تویو پوزورلار.
داشناک: گلین نئجه؟ اونودا اولدورک؟
ایلانیالیان: گلینلری نه زامان اولدورموشوخ؟ انصافین اولسون کیشی.
داشناک: بو داها اولدورملی دئییل.
ایلانیالیان: دئمیشدیم چوخ حشری حئیوان سان؟
داشناک: بونلارا گرک دا اولام.
ایلانیالیان: یاخچی گئد داها. گئد دالی قالدین. گه ایندی بونلارا اویرد آشک لا شکار ائدین. هاهاهاهاها، هاراداسان روسکویچ یولداش. هاراداسان.
داشناکلار هاممی نی اولدورورلر.
ریحان دیری قالیب. قاچماق ایسته ییر.
داشناکلار ریحانی توتورلار.
ایلانیالیان: امر بودور؛ اللری اوپمک. قیچلاری یالاماق. چالیب اویناماق. یاشام قیمتلی دیر. قیمتین وئرملیدیر نفس ایسته ین.
داشناک: بو چوخ چاللاشدی قاچا. قاچا بیلمدی.
ایلانیالیان: بونا امر اولوندو. داها آخشامدی. باشلا گوروم هنرین ندیر!
داشناک: باخیشلاریندان اود یاغیر.
ایلانیالیان: من ده بازام بوجور باخیشلارا. امری ائشیدمییبسن؟
ریحان: ...
ایلانیالیان: گوزلرین باخیر، گورورده؟
ریحان: من گوردوقوم موندارلیک دیر.
ایلانیالیان: تفنگچی لر ایله من گوزوین دیمیریخ؟
ریحان: سن باشسان. ایبلیسدن آلچاق، جانیوارلاریندان اوجا.
ایلانیالیان: پس اوجالاری گوره بیلیر گوزلرین. هله اومود وار سنه. 4
ریحان: موندار آغیزدان اومود کلمه سی چیخاندا اومود دا دوشور گوزدن.
ایلانیالیان: بو گوزللیک سنده، امین اول سن دوشمزسن گوزدن.
ریحان: ...
ایلانیالیان: بونلا یاخچی گونلریمیز اولاجاق.
ریحان توپورور ایلانیالیانین اوزونه.
ایلانیالیان: جسارت لر منی اوزومدن چیخاردا بیلمز داغلار جئیرانی. من بو بوینوزلاری کسرم. بونو آپارین. تووله ده باغلایین آخیرا.
داشناک: آیری ایشیمیز ...
ایلانیالیان: من ایذن وئرمسم چپ باخساز گوزونوزو چیخاردارام.
داشناک: ائله بیل گوزونوزو بتر توتوب منیم آقام.
ایلانیالیان: بونلا ایشیم وار هله. اولا بیلر بیر گون وئرم سیزلره، آمما هله یوخ. باغلایین تووله ده بونو.
ریحان: اللریم اسیر. گوزلریم بیر توفان الینده چیرپینان دنیز کیمی آلت اوست اولور، بیر داشقین بولاغ کیمی سو ایله دولور. اوره گیم داها یاتیب بیر
قوجاقدا یاتمیش جوجوک کیمی. بویله اولسادا اولسون. یاشامین داوامین گورورم. نه چتین. نه پیس. اوزومو بویله یاشامدان آلام گرک.
نفسی جانیمدان، هوشو باشیمدان آلام گرک. یاشام داها منه لازیم دئییل. اولوم چتین اولسادا ایندی گرکدیر منه. آداملاریم اولوب من نه
اوچون قالیم ایندی؟
ریحان اوزونو آسماق ایسته ییر.
11. ریحان بیر کلیسادا تارخانین عکسین چکیر.
ریحان: اولو تانریم بیر گئنیشلی پنجره آچدی منه. بیر گوی بویدا گئنیش باخیش وئردی. اللریم آچیلدی تانریما ساری. دئدیم تانریم دونه نه کیمین
آزاد قوشویدوم سنین ماوی گویلرینده، ندن قانادلاریمی یولدون وئردین یئللره؟ بونو دئدیم ایسته دیم تووله ده اوزومو آسام، پنجره دن
باخدیم گویه، دئدیم سون دفعه م اولسون. بیر قیرقی گویده اوچا اوچا گلدی بیر سئرچه نی توتوب آپاردی. گوردوم منده سئرچه اولموشام
بو حالیمدا. اوزومدن آجیقیم گلدی. من قیرقی اولمالی یام دئدیم. ندن سئرچه اولوم؟
12. داشناک گلیر تووله ده ریحان لا دانیشا.
ریحان ایپی گیزلدیر.
داشناک ایسته ییر ریحانی توتوب اوپه، ریحان ایپی سالیر بوینونا.
ریحان: کوراوغلونون نیگاری منم کوراوغلوسوز آمما. نبی سیز هجر منم. بیلسین عالملر، آداملار بونو. بونودا بیلسن سیغمارام بو دونیادا. بیلسین دار
آغاجی لار بوتون یاشامدا من باش دارا وئرن دئییلم. بوگون بو من بو هاممی ظالیم لر. دئیین گلمیشم جان آلام. گوتورون قاچین منیم الیمدن
جانلاری ییزی. گلیر جان آلان.
یارالی ریحان اوزاقلاشیر اوبادان.
ریحان: بو دونیا من ایستدیقیم اولمادی. ساغ قال وطن. روحوم گویلردن سنه باخاجاق. بوگون سن یارالی، من یارالی وطنیم. سیزیللاییر یارالاریم.
الیم بوش اوره گیم دولو. واریم یوخوم قالدی سنده امانت. توپراقلارین اوستونه قوندو. ایندی گئدیر جانیم جانسیز. سن ساغ قال وطن. بیر
گون گلجم. قاییداجاقام. امینم. ایندی بو یارالی جانی اولوم قوشو بلکه میندیره گویلره آپارا. بیلسم قالسام، بیلسم یانسام کولوم قوناجاق
قوناق کیمی مزار داشلارینا، قالارام اینان. اینان قالارا. اینانمیرسان؟ سوسوبسان توپراقیم. سنده سوس. داها عادتیم اولدو سوسمالارا یاشلی
گوزله قولاق وئرمه ک. سنده سوس توپراقیم. گئدیرم من. گئدیرم من. ساغ قال وطن.
تارخان: سن گئد. قالما بورالاردا. گئد داغلارا قوناق اول. قالما. یاشامدا قال آمما. گرکدیر بو.
ریحان: یاریم سنسیز سیزیللاییر جانیم. سنسیز دونیادا نه اوچون قالیم؟ 5
تارخان: سن قال. اوزون اوچون قالماسان دا بو خالق اوچون قال. ظالیملری ازمک اوچون قال. بیز بو اوسته ن سنه باخیریک. بو اوسدن سنی
گوروروک.
ریحان:اللریمه باخ. سیزین قاندان بویا آلمیش قرمیزی اللریمه باخ.
تارخان: بونو ساخلا. هر زامان یورولدون باخ اللرینه. بیزی سال یادا. ظالیملره دار آغاجی اولسون اللرین. ایندی دور آیاقا. ایپی برک ساخلا. نگهبان
یورقون دور. قورخما. سو ایسته. گتیرنده ایپی سال بوینونا. بوغ اولدور اونو. اوبیریسی نگهبان لار یاتیبلار. چیخ چوله. داغلار سنی
گوزله ییر.
ریحان: تک باشیما بو ایشی باشا سالا بیلمم ...
تارخان: تک دئییلسن. بوتون شهیدلریمیز سنیله دیلر. دور آیاقا. من سنیله یم.
13. آشیق.
آشیق: چوخ ایگید اوغلانلارا ناغیل قوشوب ائللریمیزه اوخوموشام. بو ناغیل آمما اوغلانلار ناغیلی دئییل. ریحان خانیمین ناغیلیدی. ریحان قاشدی
گئتدی کوراوغلو کیمین داغلاردا اوزونه مسکن توتدو. ایگیدلری ییغدی باشینا. چنلی بئل کیمین یووا قوردو. داشناکلاری اولدوردو، توتدو.
گون او گون اولدو ایلانیالیان دا دوشدو ریحانین کمینینه، شکار اولدو اونا.
ریحان: نه ایسته ییرسن ایندی؟
ایلانیالیان: قالیب کرمی ین.
ریحان: باخیرسان، آمما گوزلرینده گورور؟
ایلانیالیان: ...
ریحان: او داغی گورورسن؟
ایلانیالیان: گورورم.
ریحان: سن منه دئدین قاچا بیلسن قاچ. دئدین هر طرف اوخ لاریمیز آلتیندا. آزادلیق اولومدن بیزی چوخ چکیر دالیسیجاق. ایندی گوروم سن
هانسین سئویرسن؟ اولوم یوخسا آزادلیق. بورادان او داغاجاق قاچاجاقسان. من بورادایام. اوخوم آمما دالینجاق گلیر. داها اوزوین قالیب.
ایلانیالیان: بوراخسان منی نه اولار؟ اینتقام سنین گوزلری یین کور ائدیب.
ریحان: اوزوم اوچون اولسایدی بورخماک زور اولمازییدی. بیلیرسن سن نه ائدیبسن منیم روحوملا؟ قاچ بلکه قورتولدون هله.
ایلانیالیان: بیلیرسن اوخدان قاچماق اولماز.
ریحان: من قاچدیم اوخدان.
ایلانیالیان: سن اینتقام اوچون دیری قالدین جان وئرمدین اوخلارا من آمما ...
ریحان: سنده شرفین اوچون قاچ. واریندی؟
ایلانیالیان: ...
ریحان: واریندی اثبات ائده بیلرسن.
ایلانیالیان: نیه بورادا جانیمی آلمیرسان؟
ریحان: قاچا قاچا هر آتدیمیندا یادییان سال. منیم ائلیمدن عائیلمدن اولدوردوکلری یین یادییان سال. بورادان داغا کیمین عذاب آزدی آمما آزا قانع
اولمالییام. قاچ ایندی ایلانیالیان آدلی اولان کیشی لره بنزر.
ریحان: ییخیلا ییخیلا قاچیرسان ایلانیالیان. ییخیلیرسان دورورسان. بیرده قاچیرسان. ایندی سیرا منیمدیر. اوخ منم. کامان منم ایندی. ظولوم چکمیش
خالق منم. شهید اولموش جان منم. تاریخ بویو قیچ آلتیندا ازیلمیش انسان منم. اوخوم قاناد آلیر ایندی سیزلرین الینده اولنلردن. اوخ گلیر.
بودا مظلوملارین اوخو.
ریحان اوخ آتیر. 6
ایلانیالیان ییخیلیر.
ریحان اوخ آتیر.
ایلانیالیان ییخیلیر.
ریحان اوخ آتیر.
ایلانیالیان ییخیلیر.
ریحان: ساحیل لرده تور الیمده گزیرم. تور سالیب سنی یادا سالیرام. تارخانیم باخ ایندی اوخ لارلا تور توخویور سنین ریحانین. باخ ایندی. هر یئری
اوخوم ایله دولدوردوم. باخ. او موندار ایلانیالیانین قانی توپراقلارا آخیر. قاچیر آمما اوخ لاریملا وورولور. باخ. هارا قاچاجاق آخی. هر بیر
اوخ تور اولوب اونو یاخالاییر. بودا سون اوخ. منیم اوخوم سانجاق اول او کوتونو یاپیشدیر آغاجا. بو اولکه موندارلار یئری دئییل. بیلسین
بونو عالم.
اولکه مده یالقیز قالمیشام، آمما، حوریت، قیمت، شان شوهرت هاممی سی توپراقدان منه گلیب. موتلولوق بو اولکه لره قوللوق ائدمده دیر.
14. ریحان بیر کلیسادا تارخانین عکسین چکیر.
15. آشیق.
آشیق: بوتون کوتولری قیردی توکدو. ریحان. داغلار قیزی ریحان. یالقیز قالمیش ریحان ایگیتلری ییقدی باشینا کوراغلو کیمین داغلاردا مسکن
توتدو. گون او گون گلدی روسکویچ اوزو گلدی ریحانی توتا. چوخ ساواشلار اولدو اونلارین آراسیندا. روسکویچ پیس تولکویدو. تله
قوردو. آزاده ریحانی تورا سالدی. ریحان روسکویچین قوشونونون الینه دوشن زامان آدلی بیر قهرمان اولموشدو. روسکویچ اونو توتدو آمما
اولدوره بیلمدی. بیر قهرمانی اولدورسیدی باکی هئچ بوتون آذربایجان قیام ائدردی. ریحانی سورگون سالدی. ریحان مجبور اولدو گئده
بیر اوزاق اولکه ده بیر کلیسادا یاشامینا داوام ائده. گئتدی. یاشادی. ایللر بویو تارخانین، عائله سینین، هابویله اولکه سی آذربایجانین
خه یاللاری ایله یاشادی.
16. ریحان بیر کلیسادا عائله سینین عکسین چکیر.
ریحان: خرمن اوستونده آتلاری اویناداجاق بیرده؟ منیم تارخانیم. آنام گولور منه. آتام اللرین آچیب اوزاقلاردان یئنه اوزومه. باجیم قاچیر منه ساری،
قارداشیم باخیر آناما دئییر داها بو قیزی اره وئرخ گرک. آتام گولور. آنامدا. تارخان اوتانیب باشین سالیر آششاغایا. سنسیز اولسا یاشامیم،
دادی هانی؟ سئوگلی یار گئتمیش منده نه قرار قالار؟ بورادا اوخ اولوب هر باخیش باتیر اوره گیمه. قیش گلیب منه قوناق، یازسیزام یازسیز.
آخشاملار باخیرام افق لارا. گئجه لر اولدوزلارا. هانی منیم ائویم؟ هانی آتام؟ آنام؟ هانی تارخانیم؟ هانی باجیم؟ قارداشیم؟ هانی جانیم
یولداشیم؟ بویله یاشام اولار تانریم؟
منیم تارخانیم گول رنگینده سن. گور منی نئجه حیرانام. نفس سن. هاواسان. جانسان. دونیا لار قالسین سئونلرینه. سن بسیم سن.
آشیق: داغلار قیزی ریحان ریحان ریحان/ عالم سنه حیران حیران حیران/ نه قشنگ سن آی قیز، گول چیچک سن آی قیز/ بیر دانا سان آی قیز، دوردانا سان ای قیز/ گوزللر گوزلی ریحان ریحان، سئودانین ازلی ریحان ریحان/ عالم سنه حیران حیران حیران/ نه قشنگ سن آی قیز، گول چیچک سن آی قیز، بیر دانا سان آی قیز، دوردانا سان آی قیز/ زیل قارا دیر گوزون ریحان ریحان، بالدان شیرین سوزون ریحان ریحان/ عالم سنه حیران حیران حیران/ نه قشنگ سن آی قیز، گول چیچک سن آی قیز، بیر دانا سان آی قیز، دوردانا سان آی قیز.
سون
1400.04.15
علی قبچاق
آس اولدوز. آس اوربایجان. اورآنا. 7