دئرام متنی: مخبز ...
مخبز
"شکسپیرین مکبثیندن اقتباس"
آداملار: مخبز، قادین مخبز، بورآک، دانگون، باشچی، اودآنا،اورآس و اودآسا
1.
اودآنا: اوغورلادیقیم آد منه یاردیم اولسون.
اودآسا: سن ده منه اودآنا.
اورآس: منیم ده اوغورلادیقیم آد منه.
اودآسا: ائله گنه سن ده اورآس منه.
اودآنا: یانی نه آخی؟
اودآسا: قوربانین اولوم نه اولدو؟
اودآنا: جهننم اول گئد اونا ساری باخ.
اودآسا: آهان. یوخ ائله بیل بیز یاری آدام یاری تانریلاردا سیز بوتون تانریلاری اوز ایشلریمیزله یئرییزدن اوینادا بیلیریخ.
اودآنا: هئچ وئیجیمه ده دئییل. آمما اوقدر تئز ساتیرسان تانری یین قالیرام سنین ایشلرینده.
اورآس: بو اودآسا ایله باش باشا ووردوقویون یئرینه آشی پیشیر باخ. ایندی مخبز گلر یولدان.
اودآنا: هله اونلا بورآک ساواشدادیلار. ساواشی قورتار سونرا آشی پیشیرخ ساواشلار تانریسی، اورآس خان.
اورآس: اودآنا خانم ای اودلار تانری سی سنسیز ساواش باشلانماز آمما سن سونسن ساواشلار بیتر. ایندی سن سون من بو یالان اودآسانی گوندریم
ساواشی بیتیرسین.
اودآنا: هن منده یورولدوم بو ساواش دان. یئتر بو قدر. منده گئدیم آشیمیز اوچون قورباغا ایلان ییغیم گتیریم.
اودآسا: قیرجالا ایله پیسپیسادا یاددان چیخماسین.
اودآنا: سن گور اورآس نه دئییر اونو گور. چکیل اوتایا اوستوندن کئچممیش پیسلر باشی.
اودآسا: بویور. به نیه وورورسان به؟! ووی. من قوللوقوندایام اورآس خان.
2.
باشچی: دورد بیر یان ییخیلیب. اوردولار داغیلیب. نه قاباقا گئده بیلیریخ نه ده دالا چکیله بیلیریخ. نئیلملییخ؟
دانگون: کولوم باشیوا بوجور باشچی. اولان سن قوشونون باشی سان مندن سوروشورسان نه ایش گورملییخ؟
باشچی: منیم تاجیم، روحوم، آقام، گوزوم، جانیم، شاهیم ...
دانگون: سوزویون دئگینن بابا.
باشچی: منیم گیله م، باغیشلا، دئییرم کی، سن منه نه سویله سن منه سون سوز ائله اودور. من کیمم سنین قاباقیندا آخی.
دانگون: یاخچی یاخچی. آز منه دستمال چک. ائله بیر ایش گور بو ساواش الدن گئدمسین. بیز بو توپراقلارین آداملارین نئچه ایلدی بو ساواشلا
اوز دالیمیزجاق چکمیشیخ. ایندی ساواش بیزه ساری اولماسا آداملاری الدن وئرریخ. توپراقلاریندا.
باشچی: بو گلن اودآسادیر. گورخ تانریلاردان نه سوز گتیریب.
دانگون: اودآسا خوش گوردوخ.
اودآسا: ساواش الدن گئدیر. باشچی گئد هاممی یا دئگینن ساواشدا اوغور بیزیم اولوب، بونا گوره دالا چکیلیریخ.
باشچی: کور دئییل لر کی آخی. بو یئکه لیخده یالانی اینانمازلار.
دانگون: سن چوخ بیلیرسن یوخسا تانریلار پیکی اودآسا؟ گئد دئدیقی سوزو یئرینه یئتیر.
اودآسا: بو آداملاری ائله دب وئرمه میشیخ سوزوموز اوسته سوز دانیشالار. گئد. تانریلاردا یئره گویه توز سپه جخلر سوزلریین اینانا هاممی.
باشچی: بوتون چتین ایشلری وئرین منه ها. اوووووف.
دانگون: گئد دا یئکه باش.
3.
اودآنا: مخبز لا بورآک گلیرلر. ایشلر یئرینده؟
اورآس: اودویون یاندیر قلیانی دا ایشه سال یئتیشدی آش ایشمخ زامانی.
اودآنا: اودوم یانیر، قلیانیمدا توستولودور. آشیمیز نه حال دا؟
اورآس: پیشیب.
اودآنا: بو آش دان یئسه مخبز له بورآک، ایکی آغیز بیر تات داداجاقلار، آمما ایکی باش یازی ایله.
اورآس: هانسی باش یازی دیرلی؟
اودآنا: اونلار اوچون هئچ بیری. بیری شاه، بیری شاهلیق نوباسیندا اوتورسادا.
اورآس: اوندا نه افسونلی بیر آشدیر آشیمیز. شاه اولاجاق بیری؟
اودآنا: شاه اولاجاق. نوبادا اولان یوخ آمما. بودا اودآسا. آی اودآسا مخبز لا بورآک بیگی چاغیر بورایا.
اودآسا: یوللارین دوندرمیشم بوتایا.
اودآنا ایله اورآس گیزلنیرلر.
مخبز ایله بورآک گلیرلر.
بورآک: نه چتین ساواشییدی.
مخبز: سونو نه اولدو؟
بورآک: سریمه گورخ. بیز قازاندیخ دا.
مخبز: من اولوم؟ فتحسیز قازانان اولدوخ بیز؟ بیزدن اولن آز اولمادی آخی ...
بورآک: تانریلارا قوناق گئدیبلر.
اودآسا: سیز بو ساواشدا تانریلارا آداملارییزین روحلارین گوندریبسیز، بوگون تانریلاردا سیزه سلام گوندریب.
بورآک: اودآسا خوش گوردوخ.
اودآسا: مخبز قاغام نجوردو؟ یاشاسین بیزیم بورآک کیشی.
مخبز: تانریلاردان نه گتیریبسن بیزلره.
اودآسا: سنه دئدیلر دئییم شاه مخبز. سنه ده شاه لار آتاسی بورآک.
بورآک: هارانین شاهی؟
مخبز: آغیزیندان چیخانی بیرده سویله گوروم نه دئدین؟
اودآسا: ساواش بیتدی. مخبز سن ایندی اولدون امیرتومان، سنده بورآک. گلن سیرا، مخبز سن شاه اولمالیسان. گوزله بونو. تئزلیکده اولمالیدی بو.
بورآک: به هارا گئدیرسن؟ منه سویله گوروم منیم اوشاقلاریم نجور شاه اولاجاق ؟
اودآسا گلدیقی کیمین یوخ اولور.
مخبز: یاری تانری یاری آدام دان نه انتظار وار آخی. گئتدی.
بورآک: جانیمیزی سوسوز بوراخدی گئتدی.
مخبز: قودوخ بالاسی قودوخ.
بورآک: قودوخلار بالا دوغار میه؟
مخبز: بو هایدا هایدا من قودوخلارین دوغماقینا فکرلشیم یوخسا اودآسانین سوزلرینه؟
بورآک: سنه شاه دئدی؟
مخبز: سنه ده شاه بابا!!!
بورآک: مخبز شاه؟! اودا دانگون شاه دیری اولا اولا؟
مخبز: شاه بابا بورآک؟ اودا دانگون شاهین بالاسی اولا اولا؟
اودآنا ایله اورآس مخبزین گوزونه گورسنیرلر.
اورآس: سلام شاه مخبز.
اودآنا: سلام شاه مخبز.
مخبز: سلام. سیز کیمسیز؟
بورآک: کیم کیمدیر؟
مخبز: بونلار دا.
بورآک: هانسی لار؟
اورآس: اوزویون یورما او بیزی گورمور.
اودآنا: فقط سنین لیاقتین وار بیزی گوره سن.
مخبز: یوخ دا؟
بورآک: سفیه لییبسن سن؟
مخبز: اوزومده بیلمیرم.
اورآس: سیزدن یوخاری و بیزدن آششاقی اولان اودآسا سنه بیزیم ایستکی دئدی.
اودآنا: بیزدن یوخاری اولان تانریلاردا بیزه دئمیشدیلر.
مخبز: کیم یوخاری؟ کیم آششاقی؟ من هارادایام؟ سیز هاراداسیز؟
بورآک: سنین باشی یان هاوا گلدی؟ اولمویا اودآسا دئدیکلری سنی هاوایی ائدیب؟
اورآس: ایندی گئد و شاه اولماق اوچون تدارک گور.
اودآنا: مخبز قادین لا گوزل گونلرییز اولسون.
مخبز: اونودا تانییرسیز میه؟
بورآک: کیمی؟
اودآنا: داها بونا اوز وئرمه.
اورآس: به دا. سن شاه اولاجاقسان دا.
مخبز: من شاه اولاجاقام. من شاه ...
اودآنا ایله اورآس گئدیب لر.
بورآک: بو نه حالدی نه احوال دی سنده؟
مخبز: قان آغلامالیسان داها سن. من ایندی سنه فرمان وئریرم منی شاه بیله سن.
بورآک: هله دوز گورخ. خمیر چوخ سو آپارار ها.
مخبز: نه سو نه خمیر نه دنیز نه دوز نه یئر نه گوی. داها من شاهلیقا فکرلشیرم. سنده آیری فکر ائدسن اوزوین اولوم منه باش آغری آختاریرسان
دئمک.
بورآک: آختارمارام. سن شاهلیقا فکرلش. منده شاه بابالیقا. نه ایشیم وار اوزگه خیال لارلا.
4.
قادین مخبز: قولاقیم ائله گلیر ائله گلیر ائله گلیر ها، ائله بیل مخبزدن خبر گلجخ.
اودآسا: سیز قادینلار اوزویوزه گوره تانریسیز ها ...
قادین مخبز: ووی قورخوتدون منی آی اودآسا. بیر اهن اوهن آخی.
اودآسا: ایسته ییردیم سسلی گلم. خبر گتیرمیشدیم. گوردوم اوز اوزوین دئییرسن قولاقیم گلیر دئدیم تئز دئمسم دادی قاچار خبرین.
قادین مخبز: خوش گلدین هله. چوخدان بیزی سوروشمورسان ها.
اودآسا: آی جانیم مخبز ساواشا گئدندن بوتایا بیر گون یوخ بیر گون سنه قوناقام دا ...
قادین مخبز: یاخچی دا سنده. گور بونلاری دئییب منیم ائویمی ییخا بیلرسن. دئگوروم خبرین ندیر هله؟
اودآسا: تانریلار مخبزه شاهلیق گوروبلر یوخولاریندا ...
قادین مخبز: مخبزه؟ بیزیم مخبزه؟؟؟
اودآسا: نیه گولورسن به؟ هیه. سن اونا هئچ اینانمادین ها. بابا چوخ دا پیس دئییل کی آخی ...
قادین مخبز: من بیلیرم مخبز ندی نه دئییل، سن نه بیلیرسن اوندان؟ یاخچی هله دئگوروم دانگون اولا اولا نه شاهلیق یوخوسو؟
اودآسا: ائله بودا.
قادین مخبز: هانسی؟
اودآسا: دینمسن دییرم دا.
قادین مخبز: دئدیم به نمنه مه نی دئییرسن. یاخچی دئگینن.
اودآسا: ائله فکرین نمنمه نه یانیندا اولسون ها. باخ، اودآنا تانری اورآس تانری یا دئدی ساواشدان یورولموشا، اودا دئدی تامام اوندا.
قادین مخبز: اونا گوره ساواش بیتدی؟ او پیس اودآنایا گوره؟
اودآسا: چوخ دا گوزل دی ...
قادین مخبز: آدامین شانسی اولا گرک. واه واه واه. گوزل گورمویوبسن ...
اودآسا: بیری بو او آدام دئییل شانسی اولا یوخسا اولمویا. ایکی سی بو گوزل ده لاپ چوخ گورموشم. اوچومجوسو بو اولار دانیشمی یاسان من
سوزومو دییم؟
قادین مخبز: میه من نه دئدیم آخی؟ هئچ من دانیشمیشام؟ ووی ...
اودآسا: بیر کلمه ده دانیشسان قویوب گئدجه یم ها. سوزوموده دئمی یجیم. سوس دا. ساواش بیتدی. دانگون ساواش شاهییدی. ایندی داها درده
دیمز. بونا گوره تانریلار ایسته ییرلر مخبز شاه اولا، منتهی ...
قادین مخبز: منتهی نمنه؟
اودآسا: منتهی ایشین بیر اوجو اونلارین الینده. بیر اوجو سنه باغلی دیر.
قادین مخبز: اولوب من سنه یوخ دییم؟ سوزو بوتون دئدا منیم داغلار آسلانیم.
اودآسا: سندن ماجال اولسا منده دانیشیب سوزومو بوتون دییرم. سوز بودور اورآس سنیله گوروشمک ایسته ییر.
قادین مخبز: ...
اودآسا: سوس دون؟ سن؟ نه یاخچی؟!
قادین مخبز: دانیشا بیلرم؟ یوخسا هله سوسوم.
اودآسا: ایندی نوبا سنیندی دا. دانیش.
قادین مخبز: باخ گوروم اورآس اوزو دئدی بو سوزو؟
اودآسا: هیه.
قادین مخبز: اودآنانین یانیندا؟
اودآسا: وای دده. سیز قادین لار هارالارین گورورسوز! پس ایسته ییردین اونون یانیندا دییه؟
قادین مخبز: فرقی یوخ منه. تانری اولسادا منیم یوزدن بیریم دئییل. دئدیم اونون یانیندا دئسیدی اودا بیلردی ائله بیر جامالی یوخ.
اودآسا: اوتور بو قادین پاخیللیقلارین. دئمه دین اورآس لا گوروشمک اوچون سوزون ندیر؟
قادین مخبز: من سنین یوخ ها، حتی او مخبز کی سنین یوزدن بیرین دئییل منه، حتی اونون بیر توکون وئرمرم مین دنه اورآس کیمین تانری یا.
اودآسا: بیلیردیم. بیلیردیم. بیلیردیم من له اونو دییشمزسن. منی اونا ساتمازسان.
قادین مخبز: اوزو گرک بیلردی بونو. ایه بیلمییب اوزوم اونلا اوز به اوز اولوب بونلاری اونا قاندیرمالی یام.
اودآسا: ...
قادین مخبز: اونا دئگینن گلسه گلسین، گلمسه من اوزوم گئدرم اونلا دانیشارام. اونو اوتوردارام یئرینده. به هارا یولا دوشدون؟
اودآسا: من بیلدیقیمی بیلدیم. آمان سیز قادین لارین الیندن.
قادین مخبز: دایان گوروم. سنیله ایشیم وار هله. ووی. گئتدی ها. گئد دا. گئد. دئییردی بلکه بیر بو بیلیر نئجه بیر دیرلی قادینام. بیلدی ایندی منله
دانیشماقا گوروشمغه اورآس کیمین تانریلار سیرا چکیب لر. نئجه دولویام تمنادان. نئجه جوشور داشیر ایچیمده هیجان لار. ایندی
داها یاخینلاشیرام اورگیمده اولانلارا. ایندی سیرا منیمدیر. شاه خانیمی داها من اولمالی یام. گل منیم مخبز اریم. گل. سنه نئجه سوزلر
دئملی یم. منده اولان شور، منده اولان شر، منده اولان جوشوب داشان ایستک گرک سنین ده جانیدا اولا. تانری لار سنه شاهلیق منه
شاهلیق خانیمی یازیب آمما بیلیرم من سنی یولا سالماسام سن یولا دوشن دئییلسن. قادینلیقیم ایندی لاپ یئرینده. بو هاوا منیم هاوام.
دوشلریمدن سود یئرینه قان داشیب آخاجاق دیر. وولکان جانیمین اوجا ذیروه لریندن اود گویلره سپلنیب یئرلره اخگرلر یاغاجاق.
بو گلن مخبزدیر. گل منیم شاهیم. تاجیم. منیم اللریمین موم کیمین خمیری. گل ایندی سنین جانی یین خمیریندن بیر پیشمیش یئمک
چیخارداجاق منیم هالوولاریم. گل منیم مخبزیم. گل.
مخبز: گوزلرینده بیر دئهشتلی باخیش سوموکلریمی دلیر کئچیر جانیما. قورخودور بو باخیشلار منی.
قادین مخبز: یاخچی یاخچی. سنده. سن گئدیب ساواش دا آدام اولدوروبسن من اولدوم قورخمالی دئهشتلی؟
مخبز: من سیز قادینلاردا قالمیشام ...
قادین مخبز: بیز قادین لاردا؟ نئچه دنه بیز قادینلاردان گوروبسن کی ایندی دئییرسن سیز قادینلاردا؟
مخبز: یاخچی سوزباز. سوزه باخ. دئییرم یانی سنده قالمیشام. ایلک باخیشین دولو اودلو ایکیمجی باخیشین دولو آشک، بو دا اوچومجو باخیشین
شک له قاتیشمیش بیر دنیز کیمین مواج.
قادین مخبز: دئییرم باخیشلاریمدا نه اولورسا اولسون آمما یاخچی سنی شاعر ائدیب بوجور شعر دئییرسن ها.
مخبز: دانیشماق اولمور کی. اوتور بونلاری. گئجه قوناقیمیز وار.
قادین مخبز: بو هایدا هایدا نه قوناقی آخی.
مخبز: هانسی هایدا هایدا؟
قادین مخبز: هان؟ هئچ اوتور. هله کیمدی قوناق؟
مخبز: دانگون شاه.
قادین مخبز: تئز دئدا.
مخبز: چوخ خوش گلدی یوخ؟
قادین مخبز: سوزباز منم یوخسا سن؟ هله نه زامان گئدجخ؟
مخبز: صاباح ... . اوزو بوجور ایسته ییب.
قادین مخبز: صاباح گونش ساچماز. بونو منه تاپشیر. اوزون گولسون کونولون بیر خیال اولسون افق لاری گزسین، صاباحلارین گوزل افق لارین.
گولوش دوداقلاریندا بیر گول کیمین آچیلسین آمما یاپراقلاریین آلتیندا بیر ایلان گیزلنسین.
مخبز: بوجور اولاندا منی لاپ قورخودورسان ها.
قادین مخبز: دوعا ائد دانگون دئییلسن. اودا بو گئجه.
مخبز: هان دوز دئییرسن. دانیشاریخ. من یورقونام.
قادین مخبز: ایندی ندیمه لری چاغیرارام سنه یئتیشسینلر.
مخبز: به سن اوزون؟
قادین: گئجه ایشیم چوخ دور. گرک یاخچی تدارک گورم. شاها یئتیشملی یم. هم تزه شاها هم کهنه شاها.
مخبز: تزه شاه؟ نه ائشیدیبسن؟
5.
دانگون: بو قالا گوزل یئرده بسلنیب یوخسا هاوا گوزل دی بوگون؟
اودآسا: هئچ بیری. سیز بورا قوناق اولدوز. هاوالاردا گوزللشیب بو گلمک له.
دانگون: یئتیم ده دیللره باخ. بس دی بابا. بس دی. اورا باخ اورا، گور کیم گلیر. بیزی قوناق ائدن گوزل. آشک لا یوللاری گلدیخ یورقونلوق
بیلمدیخ، او گولوشلر عالمین یورقونلوقلارین چیخاردیر ایندی جانیمدان. مخبز هارادا؟ دئدیم اونون آشکی مندن ایتیدی ایندی یئتیشیب!
قادین مخبز: خوش گلیبسیز اوز قالانیز، اوز ائوینیزه منیم سروریم. آشک دا آز گتیریر بویله خوش آنلاردا.
دانگون: گوزل باخیش، گوزل، دانیشیخ، گوزل هئیکل. تامام گوزللیکلر بورادادی ایندی. الی یین وئر منی آپار ایچری یه. بوگئجه بورایا قوناقام.
قادین مخبز: بوندان گوزل سوز ائشیدمک اولمازییدی. ایندی بیزلره وئردیقین باش اوجالیق بیزی سئویندیریر. قالسین خاطره اولسون جانیمیزدا.
6.
مخبز: دئییرم نجور اولاجاق بو ایش؟ قورخو دوشوب جانیما.
قادین مخبز: اوندا نجور اینانیم من چتینلیقلرده سنه بئل باغلی یا بیلرم تزه شاهیم؟
مخبز: یانی سنین الین تیتیره میر منیم شاه قادینیم؟
قادین مخبز: بو نه سوزدور آکیشی! یئکه کیشی سن ها. اوتان. باخ، ایه او منیم اوز سود امه ر اوشاقیم اولسایدی ممه لریمی آغزیندان چیخاردیب
بوغا بیلردیم. بو دوروم شوخلوق گوتورمز. بو گئجه بیزیم گلجک بللی اولور اوندا سن دوروبسان آخ اوخ سالیبسان؟
مخبز: بتر اورگین وار. یاخچی نجور قورتاراخ ایشی؟
قادین مخبز: راحات. دییرم منیم اتاقیما گلنده کئشیکلری ده گتیرر دورالار قاپی قاباقیندا. اوندا سن گلرسن اونلاری های هاوارلا اولدوررسن، منده
دانگونو تختیمده اولدوررم. اوبیریسی قوناقلار ییقیشاندا سن چیغیرباغیرلا دئگینن دانگونو اولدورموشدولر کی اونلا شریک اولالار بو
اتاقین قوناقی اولماقدا و دانگون اونلاری قاوالایاندا شهوت گوزلرین کور ائدیب و اونو اولدوروب لر.
مخبز: آخی اوندا سنله دانگون بیر اتاق دا، اودا سنین اتاقیندا، آخی ...
قادین مخبز: من سنه خائن تانینام یاخچی دیر یوخسا سن دانگونه؟ سن خائن تانینسان نقشه میز هئچ اولار. من سنه خائن تانینسام هئچ نه اولماز.
مخبز: نئجه اولماز؟ به من کیشی دئییلم؟ اوبیریسی کیشیلر منه نه دییر؟
قادین مخبز: ایندی کیشی وار قادینی اونا خائن اولمویا؟
مخبز: ...
قادین مخبز: بس دئییل من شاهلا اوتوروب دورورام. اوبیریسی لر قاپی چی، کئشیک چی، ایلیخچی، بزاز، بنا، یولدان کئچن له حتی او سوز.
مخبز: یوخدا؟! نه خوشبختم من اوندا. شاهلا.
قادین مخبز: به.
مخبز: قوناق اولدورممیشدیخ کی اودا قیسمت اولدو بیزه.
قادین مخبز: میتدانما دا. گئد ایشی گور.
7.
بورآک: نه قارانلیق بیر گئجه دی.
اودآسا: گئجه نین آدی اوستونده دیر دا.
بورآک: یوخ بو گئجه چوخ قارانلیق دیر. هله خوش گوردوخ. تانریلاردان نه خبر.
اودآسا: ساغلیق. سلام یئتیریردیلر شاها و شاهین وزیری نه.
بورآک: گئد یئتیر دا.
اودآسا: وزیرینه ایندی یئتیشدی. شاه دا گلنده یئتیررم.
بورآک: ...
اودآسا: ائله دوز قانیبسان. سنی دئییرم. مخبز له سنی. او شاه اولاندا سنی وزیر ائدجخ. ایشلر دوشجخ سنین الی ین. او شاهلیقیلا خوش اولاجاق
سن آمما ایشلر باشی اولاجاقسان.
بورآک: منیم آرزیلاریمداندی بویله اولسون دا.
اودآسا: بودا شاه. خوش گوردوخ مخبز. هله یاتمییبسان؟
مخبز: یوخوم قاچیب بو گئجه. سیز گئدین یاتین. من اوزوم اویاقام.
اودآسا: یاخچی فکردی. بورآک گئدخ.
مخبز: گئتدیلر. اودآسانین باخیشیندان بللی دیر بیلیر من نه ایش گورموشم. اللریم تیتره ییر. بودا بیزیم قادین دی گلن؟ گوزلریم تار گورور نیه؟!
قادین مخبز: ندی؟ نیه به بوجور باخیرسان؟
مخبز: هله گوزلریمین قاباقیندادیر. قانلاری توکولدو یئره. بیری ترپندی ترپندی جان وئریب اولدو. داها ترپنمدی.
قادین مخبز: دا اولوب ترپنمییب دا. انتظارین وارییدی دورا اوینویا؟ اولو ترپنمز کی.
مخبز: سن گرک جلاد اولاردین.
قادین مخبز: هله یاخچی اوچون اولدوروبسن بابا. به سن ساواش مئدانین دا نجور آدام اولدورورسن؟
مخبز: بیردی بونلار؟
قادین مخبز: یوخ اونلار اولنده قانلاری توکولمور. ووی. نه فرقی وار. بوجور هاوایی قالما یوخسا دلی اولارسان شاهلیق باتار.
مخبز: سن شاهلیقین فکرینده سن؟
قادین مخبز: نقشه چکممیشیخ کی سن بوجور قالاسان. منده. دانیشمیشیخ دا. بابا سن نجور آدامسان؟ اولوبلر اولوبلر دا. اوتور گورخ.
مخبز: من گرک دییم سن نجور آدامسان. سن یوخ.
قادین مخبز: میه نجورم؟ نییم دیر؟
مخبز: هئچ. ایندی گئد اوتاقیندا های هاوار سال. منده گلیم او اولدوردوقوم کئشیک لری یالاندان بیرده اولدوروم.
قادین مخبز: باخ بیر. جاماهاتین یانیندا منه ال آچما ها.
مخبز: نه اوچون گرک ال آچام؟
قادین مخبز: یالان غیرت اوچون دا.
مخبز: خیالین راحات گئد دا.
8.
اودآسا: آهای جاماهات، من اودآسا، یاری تانری یاری آدام، بوگون جارچی پالتاریندا سیزلره سوز گتیرمیشم. ییغیشین، ائشیدین. ائشیدنلرده بورادا
اولمویانلارا دئسین. آهای جاماهات. آهای میللت. بیلین بونو، یایین بونو، شاه دانگون اولدو. اوشاق لاری قاچیب گیزلنیب. ایندی بیزیم
شاه، شاه مخبز اولوب. شاهلیق شوراسی، شاه ائدیب اونو. بوگون بیزیم شاه اولوب مخبز. مخبز شاه.
9.
مخبز: دئییرسن یانی اونو هر ایشین اوستونه قویوم؟
اودآسا: نیه کی یوخ.
مخبز: هئچ کیمسه دن اونجاق قورخوم یوخ.
اودآسا: تانریلار دئییب او شاه اولمویاجاق دوزدور؟
مخبز: دئدی لر او شاهلارین آتاسی اولاجاق.
اودآسا: اوشاق لاری نا فکرلشریخ. سنه مهم بودور کی اوزو شاه اولمویاجاق. قولاق آس گور نه دئییرم. هر ایشی تاپشیر اونا، سنده شاهلیق ائیله.
مخبز: یانی نه ایش گوروم؟
اودآسا: اویرنجخسن. شاهلیق دی دا. ندی آخی. نییاران اولما. چتین دئییل. مملکت اوز یولون گئدیر. دانگون دانیشماق دان سونرا نه بیلدی
شاهلیقدان؟ سن ده اونا تای. منتهی ایه حال ائیلمسن، خوش اولماسان اویونو، شاهلیق اویونون اودوزوبسان باخ. بودا قادین مخبز گلیر.
مخبز: من گئدیم بورآکی ایشلرین اوسته قویوم. هللیک.
اودآسا: هللیک. خوش گوردوخ قادین مخبز.
قادین مخبز: ملکه مخبز.
اودآسا: یوخ دا؟ یاخچی دا.
قادین مخبز: به شاه مخبز هارا گئتدی؟
اودآسا: گئتدی بورآکی اوز وزیری ائیلیه ایشلری تاپشیرا اونا.
قادین مخبز: اوتور اونو. باخ گوروم اورآس قرار دئییلدی منله گوروشه؟
اودآسا: یانی سن اونلا گورشن دا؟
قادین مخبز: سوز باز نه فرقی وار آخی.
اودآسا: دوز دئییرسن دا هئچ فرقی یوخ دور.
قادین مخبز: دئمه دین نه خبر اوندان؟
اودآسا: هله قالیر اونلا گوروشمک. ایلک بیر ایش گورجخسن. تانریلارین سوزو بودور. بوندان بوتایا مخبز شاهلیق آدیلا خوشلوقلارا مشغول
اولاجاقدیر. بورآک ایشلری گورجخ. سنده اونا یاخینلاشیب اونلا بیرلیکده ایشلری قاباقا آپاراجاقسان.
قادین مخبز: نه قدر یاخینلاشاجاقام؟
اودآسا: اوزون بیلیرسن دا.
قادین مخبز: سن دئگینن تانریلارین پیکی.
اودآسا: منه نه آخی. اوزون بیلیرسن. چوخ.
قادین مخبز: دئدیخ ملکه دربار اولاریخ خانم اوللوخ ...
اودآسا: هر نمنه نین چتینلیخلری وار دا.
قادین مخبز: سنده هئچ غیرت میرت اولماسین ها.
اودآسا: تانریلارا قارشی دوروم؟
قادین مخبز: بئچارا. بابا من او بورآک دان خوشوم گلمیر.
اودآسا: آغلاما دا. منیم اورگیم قان اولور. وووی.
10.
مخبز: باخ بو سون سیرادیر دئییرم. سن نیه به اوزویون ووروبسان گیجلیقه. ائله بوراکین اوشاقلاری یئتیشدی لر قالانین یانینا باخچادان اوخ لا وور.
باشچی: دئییرم اوشاقی نیه؟ ائله بورآکین اوزون اولدوروم دا.
مخبز: باخ گوروم باشچی، ایندی سن اولوبسان اونون بونون اوشاقینین له له سی؟
باشچی: یوخ. یانی ...
مخبز: یانی مانی یوخدور. گئد ایشی یئرینه یئتیر. ایه ایسته ییرسن وزیر اولاسان گئد بو ایشی قورتار.
باشچی: ایسته ییرم وزیر اولام منتهی ...
مخبز: آقا جان من کیمم؟
باشچی: شاه ...
مخبز: داها تامام دا. من شاهام، شاه دا دئییر بو ایشی گور.
باشچی: منیم سوزوم یوخ سوزون اوسته. بیر سوز دئییم گئدیم.
مخبز: دئگینن. آمان آمان سنین الیندن.
باشچی: بیز اونون اوشاقلارین اولدورسخ صاباح اوبیریسی گون ایستسخ اونا فشار گتیرخ نجور بو ایشی گورخ؟
مخبز: نجور یانی؟
باشچی: او اوشاقلاریندان کئچمز.
مخبز: آهان. ساغ اول. ساغ اول. سن گئد اونون اوشاقلارین توت سال دوستاقا. منده گئدیم بلکه اودآسا یئر به یئر ائیلدی اودآنا ایله اورآس
تانری نی گوردوم. ایشیم وار اونلارلا. گوروم آخی گلجک ده نه لر اولاجاق.
11.
اورآس: گلیر.
اودآنا: گورورم.
اودآسا: اوزاقلاری گورن گوزلره قربان کسرم دا.
اورآس: گلنده دئگینن تانری لار دئدی سن بو تئزلیکده اولمویجخسن.
اودآنا: دئگینن تانری لار دئدی هرکیمسه قاباقیندا دورسا اولدور.
اورآس: دئگینن رحم ائدمه.
اودآنا: دئگینن گوز یاشینا باخما.
اورآس: دئگینن سنه زوال یوخ.
اودآنا: دئگینن سنین اوسته اوستون اولان یوخ.
اورآس: سن سون شاهسان.
اودآنا: سن سون داغ سان.
اورآس: قدرت لر سنین دیر.
اودآنا: شوکت لرده.
اورآس: دئگینن اولدوزلار یئره سپلنسه ده سن یئرینده قالمالیسان.
اودآنا: گونش سونسه ده.
اورآس: دنیزلار قوروسادا.
اودآنا: اورمانلار یابان اولسادا.
اورآس: داغلار سوکولسه ده.
اودآنا: وولکان لار پوسکورسه ده.
اورآس: دیپرم لر شهرلری چول له سه ده.
اودآنا: ایلدیریم لار یئری گویو یاندیرسادا.
اورآس: دئگینن آداملارین بیر به بیر اوز چئویریب سندن اوزاقلاشسادا سنه یئرینده سن.
اودآنا: دئگینن قادین مخبز دلی اولوب اوزونو اولدورسه ده سن یئرینده سن.
اورآس: هاممی اینسانلار ساواش پالتاری گئییب بیر بیره مئیدان اوخوسادا.
اودآنا: بیر بیری قیریب توکسه ده.
اورآس: قوشون باشچی لاری سنین اوردولاریندان اوز دوندریب سنه قارشی دورسالاردا.
اودآنا: اوردولارین داغیلیب پارام پارچا اولسالاردا.
اورآس: اینسانلار یئمک اوچون هئچ نه تاپماسا بیر بیرین یئسه ده.
اودآنا: اینسانلار جانیوارلار کیمین بیر بیرین دیدیب سوکسه لرده.
اورآس: سن قالمالیسان دئگینن اونا.
اودآنا: قالمالیسان.
اودآسا: دئسه نه زامان ییخیلاجاقام؟ اوله جقم؟
اورآس: سوس اوندا.
اودآنا: سوس.
اودآسا: سریمه یین گورخ. او ایندی اوزون قدر قدرت شاه بیلیر. بو سوزلری ده دئسم اوزون سیز تانریلاردان بیری بیلجخ. نجور سوسوم اونا؟
اورآس: باجاریسیز.
اودآنا: چیخارسیز.
اودآسا: بوشلو دوشدوم؟
اورآس: داها یاری آدام یاری تانری دان بو انتظار یوخ دور.
اودآنا: بیر سوز تاپ دئگینن. گرک بیز دییخ حتمن؟
اودآسا: دئییرم یانی سیز دیین اولسون.
اورآس: بیز دیین اولاجاق. سن نییاران اولما.
اودآنا: گرک دئییل سنده اولاجاق لاردان خبرلی اولاسان.
اودآسا: آهان. بوجور پس.
اورآس: بیر بونو دئگینن بورآک ایندی هر ایشی باشا آپاریر، دئگینن او اولسه سنده اوندان آز سونرا اوله جخسن.
اودآنا: سون یاییلمیش ناخوشلوق یئری گوتورنده اوله جخسن.
اودآس: ایندی گورورم مخبز گلیر.
12.
اودآنا ایله اورآس شطرنج اویناییرلار.
مخبز دانیشیر.
مخبز دانیشاندا یئر گوی تیتره ییر، دنیزلر قورویور، داغلار سوکولور، شهرلر یانیر،
ساواشلار اوز وئریر، آداملار اولور، آج اینسانلار بیر بیرین یئییر، یئر گوی اود
ایچینده یانیر.
مخبز دانیشر.
قادین مخبز دلی اولوب گوله گوله بیر خنجر الینده اوتای بوتایا قاچیر.
مخبز دانیشیر.
بورآکی نئچه نفر اولدورور.
اینسان لار ناخوش اولوب بیر به بیر اولورلر.
مخبز دانیشیر.
اودآسا مخبزی بو اتفاق لاردان خبردار ائیلییر منتهی مخبز همچنان دانیشیر.
مخبز: بورادا منم. سیزله بیرلیکده. سعادت قوشو قونوب باشیمیزا. من سیزه فخر ائدیرم، سیزلره، منین قیراغیمدا دوروب منه یاردیم ائدنلره. سیزلرده
منه فخر ائدین. بیر دیرلی شاه. بوتون دنیا بیزه قارشی دورسادا بیز آیاقلاریمیز اوسته دوروب اونلارلا قارشی دوراجاییق. بیز ساواش
مئیدان لاریندان نه قاچانیخ نه دالی چکیلن. یاشام بیزیم دیر. تانریلار بیزه اهدا ائدیب یاشامی. بیز اوبیریسی اینسانلارا وئرسخ یاشاماق
اونلارادا وار وئرمسخ اونلارین یاشام اوچون حاققی یوخ. من بوگون سیزلره دئملی یم جهانین ان بویوک و گوجلو اینسانلاری بیزیخ. بیزلر
گویه یئره صاحابیخ. من بوگون سیزلره دئملی یم بو شاه دونیانین شاهیدی دانیشیر، سیزین شاه. فضیلت بیزیخ بوگون، رذیلت فضیلت
اولا بیلمز. بو فضیلت تانریلاردان بیزه چاتیب. بوگون بو فضیلت اوچون هاممی میز اولسخ دا، آرادان گئدسخ ده، یارالی دوشسخ ده هئچ غم
و اندوه گلمز اورکلریمزه. بیز قربان اولمالیخ بو فضیلت اوچون. فضیلت بوگون منم. سیزین شاه. قان آغلا بیزیم توپراق. قان دوغ بوگون.
چای لاریندا قان آخسین سو یئرینه. دنیزلرین قانلا دولسون. بیز بو فضیلتی دونیایا یایماق اوچون قانلا یاشامالییخ. نییاران قالمایین
توپراقیمیزین اولادلاری، داریخمایین، آغلامایین، درد اوچون چتینلیک اوچون آجلیق اوچون سورگونلوق اوچون یالنیزلیک اوچون قیریلماق
اوچون ازیلمک اوچون هابویله پیس پیس ایشلر اوچون. گوزلری ییزی اوز عظمت و اوستونلوقویوزه یوممایین. من شاه، سیز منیم رعیتیم.
هانسی شرف بوندان آرتیخ؟ منله یول بیر اولون. منله یولا گلین. من سیزلری تانریلارین دوز یوللارینا آپاراجاقام. یئر گوی بوندان آرتیخ
پیسلیکلر الینده قالا بیلمز. اهریمنلره قارشی دورون. من بورادا، سیز قارشیلاریندا. من آرخاییزدایام. یالانلارا یاللانمایین. آزا قانع اولون. من هر
نمنه سیزین دی ساخلارام سیز اوچون. دادگرلیخ، دوزلوخ، اعتدال، یاخچلیخ، پرهیزگارلیخ، اینسانیت، هابویله دوزگونلوخلر منده. منده سیزه
وئرجقم بیر گون. منیله اولساز.
قادین مخبز: اللرییزی یویون. قانلی دیر. منیم اللریم کیمین.
اودآسا: قاچما بیر بئله. دایان.
قادین مخبز: اللر قان. گوزلر قان. یئر قان. گوی قان.
اودآسا: مخبز بس دی. داها سونون گلدی.
مخبز: من دانیشیرام. قورخوم یوخ سون دئسن ده. سس اولماسین. منیم سونوم بورآک اولندن سونرادیر. بوتون آداملار ناخوش اولاندان سونرا.
اودآسا: مخبز داها بس دیر. اولان یئر گوی داغیلدی سن دانیشناقدان دویمادین؟ وووی. دور گور نه اولوب دونیا. بورآک اولدو. ناخوشلوق توتوب
هاممی.
مخبز: جنایت یاغیر منیم دور و بریم ده. یالان یاغیر. سیزلر یالانسیز. یالان. سیزلر جنایت ائدیبسیز. من شاهام. فضیلت لی شاه. پایان 1400.11.10 آس اولدوز. آس اوربایجان. اورآنا.
