دئرام متنی : آناگون آس ...

 بیر باخیشلا سوفوکلون " آنتیگونه  " دئرامینا . 

صحنه کندین خان
ائوینین حیاطیدیر . اوتاقلارین پنجره لرینین

                           نئچه شوشه سی سینیبدیر .

                           صحنه نین سونوندا اوست اوتاقلارین قاباقینداکی بورقوندا بیر

                                                                  تخت قویولوبدور . تختین اوستونده بیر ایپک فرش ، بیر قلیان ،

                           بیر کوهنه رادیو و نچه دونه موتککا وار .

                              1 . زورناچیلار چالیر و نئچه نفر اویناییرلار .

آناگون آس : دئییرم گور تویون اوزونده نئیلیجک بیزیم قارداش ، هله بو پارچادیر .

آسلی : آناگون آس دئییرم آبآس قارداشیمیز دئییر بلکه بیز اوغلان آدامی ییک بویله اویناییر ها ، اوتانماز ...

آناگون آس : سن آللاه اوجور دئمه ، آبآس منی چوخ ایستمسیدی بویله اوینامازیدی .

آسلی : هیه واللاه ، آللاه شانس وئرسین ، منیم تویومدا ائیله توتولموشدو دانیشدیرماق اولموردو بیلسین .

آناگون آس : آی هوو آی قیز نلر دوشوب یادی یان سنین ، اوتوردا ، قویمازسان قارداشیمیز شنلیک ائیلیه .

آسلی : ویی ، بو نه سوزدور ، سوزویدو گلدی آغیزیمادا ، اصلن گئدیرم اوزومده اوینویام ، باخ بیر .

آناگون آس : دئییرم ارین کیانیدا چاغیر تک اویناما .

آسلی : یاشارا یئر آچما قیز ، اوزو آچیلار کوره کنین ...

آناگون آس : یوخ واللاه سیزه گوره دئدیم .

آسلی : کیان هله ایچمکدن واقتی یوخ ، من گئتدیم اوینویام .

                              2 . خان تخت اوسته تک ایشیق آلتیندا اوتوروبدور رادیویا قولاق آسیر .   

                                                                                  خان دیری آدام اولاندان آرتیق محو اولونموش کولگه یه اوخشاییر .

خان : بیزیم ائویده ائشیدمیشم خئیروشر ائوی ائیلییبلر ، قدیمدن دئییبلر بو ایکیسی ، خئیر ایله شر باجی قارداشدیرلار ، قوی گوروم  بی بی سی

         بیزیم کوهنه اولکه دن بیر سوز دئییر ، بلکه م خئیر ایشلر باشا گلیر ، بلکه مده شر ، آمما هر نه اولسا منیم فیکیریم هله ده اورالاردا ، نئجه

         قویمادیلار عوموروموزون قالانیندا اورالاردا کئچیندیرک ، شادلیقلا ، خوش اولماقلا ، هئی یئتیم قالمیش اولکه م ، منسیز قالمیش یوردوم ،

         بو لامصصبده اورالاردان سوز آچماز کی ، البت بو دئمسه ده من بیلیرمدا ، اورالاردا ایندی یا تویدور اویناییرلار یادا یاسدیر آغلاماقدادیرلار .

                              3 . کیان ایله کژال دانیشیرلار .

کیان : من سنین یاخچیلیقیین ایسته ییرم ، تئز چیخ گئد بورالاردان .

کژال : آخی نی یه ؟

کیان : تئز چیخ گئد دئییرم ، خبر گلیب دموکراتلار آبآسی اورمودان قاییداندا اولدوروبلر .

کژال : کیملر ؟

کیان : دموکراتلار ، کوردلرین دموکراتلاری ...

کژال : دئدین کیمی اولدوروبلر ؟

کیان : آسلان اوغلو آبآسی ، خالااوغلوسو سولئیمانلا بیرلیکده .

کژال : وای جانیم ، آبآس  اولوب ؟ سولئیماندا ، وای یاززیقلار ، نیه آخی ؟

کیان : ساهات اوچدن اوتایا ایسته ییرمیشلر گللر سولدوز ماحالینا ، آناگون آسین تویونون اورمودا اولان قوهوملارا توی خبرین وئرندن سونرا سولدوزا

         قاییداندا یولو کسن دموکراتلار اولدوروبلر بیللرین .

کژال : وای یاززیق آناگون آس ، یاززیق آسلی ، آللاه رحمت ائیلسین ، هئچ اینانا بیلمیرم واللاه .

کیان : اونلارا آغلاما ، اوز حالیان آغلا ...

کژال : نئجه اولار یاخچی آبآسا آغلامیام ؟ گوزل سولئیمانا ؟

کیان : سنین حالین اونلاردان چوخ آغلامالیدیر ...

کژال : منه نه دخلی وار آخی سنده کیان بی .                                    1

کیان : کورد دئییلسن میه ؟ ایسته ییرسن اونلارین عوضینه اولسن ؟

کژال : کوردم کی کوردم ، اریم اوشاقیم عجم دئییل ؟ بیرده دموکرات اولدوروب منه نه ؟

کیان : منله آغیز آغیزا وئرمه ، من بیلنی سن بیلسن بیر ساهاتدا دایانمازسان ، ائو اوشاقی اوتوروب قاچارسان .

کژال : نیه کندین عجمی بوجور ایمانسیز اولوب بیر بئگوناه قوناقی اولدوره ؟ من بو کندین قوناقی یام ...

کیان : آبآس گیلده  بئگوناه اولوبدور ، ایندی بو سوزلرین یئری دئییل ، خبر اوبیریسیلره یئتیرممیش دور گئد بورالاردان اوزاقلاش .

کژال : منیم اریم ائویم اوشاقیم بورادا ، نه گئدنم نه قاچان ...

کیان : سن آنلامازسان گئدمزسن ، ایسته ییرسن قانین توکوله .

کژال : قان منیمدیر سن نیه اوزویون جیریرسان ...

کیان : سنین قانی یان فیکیرلشن کیمدیر ! سنی اولدوررلر طایفان گلر قانیان قان ایستر ، اوندا کیچیک بیر ایش یئکلر دورد دوره ده قان دوشر .

کژال : کیچیک ایش ؟! آی جانیم ایکی آدام اولوب ، بو ایشین هاراسی کیچیکدیر ؟

کیان : منده بیلیرم یئکه ایشدیر ، بوندان یئکه سیندن قورخورام من .

کژال : دئییرسن یانی بورالاردا نلر ...

کیان : بورادا اولانلارین سنه ربطی یوخ ، سن یولویون توت قاباقیان گئد ، من اوزوم بورالاری دوزلدرم .

کژال : سنده مندن آرخایین اول ، هئچ نه منه اولماز اینشالاه .

کیان : قالسان بلکه م ، آمما ایندی گئدملیسن .

کژال : سن ائیله بیل ائشیدمدین من اوشاقیمی اریمی اوتوروب گئدن دئییلم .

کیان : آناگون آسین الی یئتیرسه الی ین واللاه پارچالار بیلیین ...

کژال : آناگون آس بو ایشی گورن دئییل ، نه او نه سنین آروادین آسلی .

کیان : منیم آروادیم منیم سوزومدن چیخماز آمما آناگون آس هئچ کیمسه دن سوز ائشیدن دئییل ، چیخ گئد .

کژال : آناگون آس گوناهسیز ایله گوناهلینی بیر توتماز ، توتسادا گئدن دئییلم واللاه ، هارام وار گئدم آخی ، منیم اریم منی طایفامدان آلیب ، بیل

         بونو .

کیان : طایفاندان آلسادا اولونون صاحابی چوخ اولار ، گئدمسن مجبورام یاپیشام باشی یین توکلریندن سوروتدویه سوروتدویه آپارام اوتورم کندین

         ائشی یینه .

کژال : موسلمانچیلیق قالمی ییب میه ؟

کیان : یئکه دانیشما گوروم ، دوش یولا .

                              4 . آناگون آس ایله آسلی گیریرلر ایچری یه .

آناگون آس : کیان آنلامییب کژالی ووروبدور ، او نئیلسین ، او بو توپراقین قوناقیدی ، بیزیم قارداشیمیزی ، خالااوغلوموز سولئیمانی دموکراتلار

                  اولدوروبلر ، پیس دموکراتلار ، یانان جانیمین اودو دوشردی یاشاملارینا ، وای گوزل آبآس ، دده مین ننه مین یادگاری آبآس ،

                  قارداش گئتدین تویوما قوناق چاغیران یوخسا یاسا باتیران منی ؟ هان ؟ آخی گل باخ باجین آسلینین گوز یاشلارینا بیر ؟ آخی نیه

                  گئتدین ؟ کئشگه من اولردیم ، آغ گلینلیک پالتاریم اینیمده کفن اولاردی قارداش سن قالاردین آمما ، ایندی نئجه گئدیم آداخلین

                  سولمازین گوزلرینه باخیم قارداش ، نئجه باخیم آخی ؟ آسلی قارداشسیز قالدیق باجیم ، قارداشسیز قالدیک باجی ...

آسلی : آتام یئرینده اوتوران قارداشیم گئتدی باجی ، آنامین اییسین وئرن قارداشیم ، قارداش تزه ائوین موبارک ، یئتیر آناما آتاما سالامیمیزی .

آناگون آس : لایلا شیرین دیل قارداشیم لایلا .

آسلی : لایلا گوزل قارداشیم لایلا .

آناگون آس : لایلا اوجا بوی قارداشیم لایلا .

آسلی : لایلا آهو گوز قارداشیم لایلا .

آناگون آس : وای قارا گوز قارداشیم وای ...

آسلی : وای کامان قاش قارداشیم وای ...

آناگون آس : وای باشیمین تاجی وای ...

آسلی : وای گوزومون نورو وای ...

آناگون آس : آخی به سن نیه ؟ من اولموشدوم سن اولسن قارداش ؟

آسلی : یارالی قارداشیم وای ...                                               2

آناگون آس : آخی نئجه راضی اولوم گوزل اوزویون گورممیش توپراقلاردا یاتاسان سن ؟

آسلی : واللاه گورسیدیک آیریلا بیلمزدیک باجی ...

آناگون آس : یوخ آسلی ، کیان پیس ایش گوروب بیز قارداشیمیزین اوزونو گورممیش اونو باستیریب ، بیز هئچ خالام یوخاری کتدن گلنده نه

                 دئملی ییک اونا ؟ دئمز هانی سولئیمانیم ؟

آسلی : اولو یئرده قالا بیلمزدی منیم باجیم .

آناگون آس : آناسی گورممیش ؟ آتاسی گورممیش ؟ جانی یانان باجیلاری گورممیش ؟

آسلی : وای باجی باجی باجی ، یاخچی کی گورممیشیک قارداشیمیزین کسیلن باشین ...................................

آناگون آس : دئییردیلر به گول له دییب اونلارا ؟

آسلی : هان !

آناگون آس : سن دئدین کسیلن باشی ؟!

آسلی : من دئدیم ؟!!!

آناگون آس : آسلی کیان نه دئییب ؟ منیم قارداشیمین باشینا نه گلیب ؟

آسلی : اولوب اولوب اولوب .....................

آناگون آس : بیلیرم یاززیق اولموشوق ، بیلیرم چامیرا باتمیشیک ، اونون باشینا نه گلیبی سویله آسلی ، سویله ، سوسما باجی ......................

آسلی : نه بیلیم آخی ، نه بیلیم آللاهسیزلار نه ائیله ییب آخی اونا ، نه بیلیم ...

آناگون آس : من گرک گئدم قبرین آچام اونون .

آسلی : نمنه ؟

آناگون آس : گرک گورم قارداشیمین باشینا نه گلیب .

آسلی : بو اولان ایش دئییل .

آناگون آس : نیه ؟

آسلی : آنا باجیم بو گوناهدیر ...

آناگون آس : نه گوناهی ؟ باخاندان سونرا قویلویاجاغامدا ، نه گوناهی ؟!

آسلی : سن ایسته ییرسن عرفلا شرعله قانونلا کارشی دوراسان ؟

آناگون آس : من بیر بونو ایسته ییرم بیلم قارداشیمین باشینا نه گلیب ، گلیرسن گل گلمیرسن من گئتدیم ...

آسلی : آناگون آس باجیم مصلحت اولسایدی کیان اونو قویلامازیدی .

آناگون آس : یانیق اورک نه بیلیر مصلحت ندیر باجیم ؟

آسلی : منیمده اورگیم یانیب .

آناگون آس : ایندی داها گرک بیلم نه اولوب ، یا یوخ سن بویله فیکیرلشمیرسن ؟ کیان دئییر ایشین دالیسین توتمایین ، گرک بیلم نه اوچون بو

                سوزلری دئییر ...

آسلی : کیان ایندی بو کندین بویوک آدامی تانینیر ، دوز سیندی آزدیر آمما پایتخده درس اوخودوقونا گوره ، اورادا شاه حکومتیله ووروشدوقونا

          گوره هاممی قبول ائیله ییب قاچان خانین یئرینه اونون سوزونه قولاق آسا ، اونلا اوزویون طرف سالما باجی ...

آناگون آس : نه دئییرسن سن ؟ بو ائوه باخ ، دوننجک خان ائوی ایدی ، اوچ دونه اوشاق داش آتدی خان قاچدی گئتدی ، شوشه لره باخ یادی یان  

                دوشسون ، کیم دئییردی بلکه خان گئدر ائوی بوش قالار اولار خالقین خئیروشر ائوی ؟ دونیا کیمه قالیب کیانا یوخسا بیزلره قالا ؟

                هان ؟ بیرده منیم کیانلا ایشیم یوخ منیم باجیم ، گئدیرم گورم قارداشیمین باشینا نلر گلیب ...

آسلی : سنین کیانلا ایشین اولماسادا او دئییب آبآس ایله سولئیمانی قویلویوبلار ، ایذن وئرمز چیخارداسان قبیردن ...

آناگون آس : آخی نیه ؟

آسلی : دئییر کندین مصلحتینه دئییل ..............................................................

آناگون آس : ایستمیردیم آغیزیمی آچام دانیشام ، کیان مصلحت آنلاسایدی نیه یولداشلارینی شاهین قوشونونون قاباقیندا بوراخیب گلیردی کتده

                 گیزلنیردی ؟

آسلی : باجی بیلیرم اورگین یانیقلیدیر ، منیمده اورگیم سندن قالان دئییل ، بیلیرم سوزلرین دوزدور ، من کیانی سندن چوخ تانی ییرام ، آمما کیان

          منیم اریمدیر ، آتیم بیلسینی ؟ بیرده بیز آروادیک ، نه گلیر الیمیزدن ؟ قدرت ایندی کیاندا بونودا هاممی قبول ائیله ییبدیر ، دیلی وار ،

          دانیشیقی وار ، ساوادی وار ، بو کندینده ائیله بیر نفوذلو آق ساققالی یوخ جاماهات دوشه اونون دالیسینا ، دوشوبلر کیانین دالیجاق گئدیرلر ،

          دوز اولسادا اولماسادا ، کیان هاممی یا دئییب ایری چابالاساق دموکرات گلر هاممینی قتل عام ائیلر ، دئییبدیر اونلار ایسماعیل               3

         سیمیتقونون اوولادیدیر ، گرک بیر داش آلتدان قویاق بیرین اوستدن قورتولا گئده ، یوخسا هاممیمیزی اولدوروب پیچرلر ، ایندی داها

          کیانین قدرتی وار ، بیزیم اونون قاباقیندا دایانماقا عصیانا گوجوموز یوخ ، ایشلری کورلاما .

آناگون آس : کیان سنین اریندیر بیر ، سنین اورگینده اوندان سیمیتقودان قورخو وار ایکی ، اونون سوزلرین قبول ائیله ییبسن اوچ ، دوردو بئشی

                 یوزو مینی دیلیمه گلممیش گئد قوی ایشیمی گوروم ، آس ائللرینین اولادینا باش آششاغیلیقدیر عاصی اولماقدان قورخا ، قاراپاپاق

                 ائلینین قیزینا بویله سوزلر یاراشماز باجیم ، من سئچدیغیم یولوما گئدجاغام ، دوز گلر هئچ ، گلمز اولومه یئتیرسده یولوم قورخوم

                 یوخ ، یئرین آلتیندا شرفله یاتماق اوستونده کوتو گونلره باش ایمکدن یاخچیدیر .

آسلی : ایندی بو سوزلرین نه یئری وار نه ...

آناگون آس : آخی نیه بویله فیکیرلشیرسن ؟

آسلی : بیز ایندی یاسیمیزا گرک فیکیرلشک .

آناگون آس : یاسیندا یئری وار ، اوول گرک بیلم نلر اولور بو اولکه ده .

آسلی : آخی نلر اولور ؟

آناگون آس : کیان اوزوندن چیخیب ائیله بیل ، گرک بیری اولا اوزونه قایتارا بیلسینی .

آسلی : سن جینلی اولوبسان واللاه ...

آناگون آس : هر قیمته یاشاماق عاقیللی اولماق تانینسا بویله حالدا جنون یاخچیدیر ، آتامین توفنگین سونموش تندیردن چیخارتماق گرک .

آسلی : باجی یالواریرام سنه ال چک ، قوی گونلریمیز بوندان آرتیق پیسه گئدمسین .

آناگون آس : قارداش اولن گوندن قارا گون هانی بیزه ؟

آسلی : کیان دئییر بونداندا قاراسی اولا بیلر ...

آناگون آس : گئد باجیم ، گئد ، مندن اوزاق گزسن گونلرین پیسه دونمز ، گئد یاشا ، منیم چوخلو ایشیم وار گورمک اوچون .

                              5 . قوچو تختین قیراقیندا ییخیلیبدیر یئره .

                                  آناگون آس توفنگ الینده دوروبدور باشی اوسته .

قوچو : نه ایش گورورسن آنا گون آس ؟

آناگون آس : بیر ساتقین آدامی اولدورورم .

قوچو : ساتقین ؟ کیم ؟ من ؟!

آناگون آس : اشهدین یاددان چیخماسین ...

قوچو : آخی کیمی ساتمیشام ؟

آناگون آس : او دونیادا بیلرسن ...

قوچو : اولدورمه یاززیقام .

آناگون آس : بیر یولو وار ، دانیشسان اولمکدن یوخ خبر .

قوچو : دانیشسامدا اولجاغام آخی .

آناگون آس : عکسلری گورموشم ، دانیش ...

قوچو : کیان دئدی عکیسلری اونلارلا قویلاییب توپراقین آلتینا آخی ؟!

آناگون آس : قارداشیم آبآسیدا قبیردن چیخاردیب گورموشم ...

قوچو : اولان دئییل بو .

آناگون آس : دانیش .

قوچو : نئجه توپراقی ...

آناگون آس : توپراقین یئرینه توکومداشداندا اولسایدی قازاجایدیم ، دانیش .

قوچو : نه بیلدین من اونلاری گتیرمیشم ؟

آناگون آس : آختاران تاپار ، دئدیم دانیش .

قوچو : ندن ؟

آناگون آس : او گوندن .

قوچو : آناگون آس اوتور سن آللاه ، واللاه خطردن سونرا هئچ نه یوخ بو ایشده ...

آناگون آس : منیم هئچ کیمسدن قورخوم یوخ ...                                   4

قوچو : اونلارا زورون چاتماز ، بیلیرسن هارادان هارایا چکیلیبدیر قوشونلاری ؟

آناگون آس : دموکراتلاردان قورخما دئمیاجاغام سن دئییبسن منه ...

قوچو : مندن سونرا هاممینی اولدوردولر ، اونلاردان قورخوم یوخ ، بوراخدیلار منی عکسلری گتیرم هاممی عجملر گورلر ..............................

آناگون آس : به نه اوچون سوسدون ؟

قوچو : کیان مندن ایسته ییبدیر دانیشمی یام .

آناگون آس : دئمی ییب نیه ؟

قوچو : دئدی مصلحت دئییل ، من دانیشا بیلمرم ...

آناگون آس : سنی تاپان سوزون نئجه اولماسیندا آختاریب تاپار ، ایستمه او گون سن او دونیادا اولاسان ( گلن گئدن چکیر ) .

قوچو : رحم ائیله ...

آناگون آس : دئدیم کی بیر یولون وار ، اودا دانیشماقدیر ، سوز وئریرم دانیشسان دیری قالاسان ، کیانیندا ایشی اولمویا سنیله ...

قوچو : کیان سنین سوزوین قولاق آسماز ، اولدورر دانیشسام منی ...

آناگون آس : کیان منیم باجیم اریدیر ، قوهومچولوقدا سوزومدن کئچمز .

قوچو : آخی نه دئییم ؟ نئجه دئییم ؟ نئجه او پیس لحظه لری یادیما سالیم ؟ سوروجو اولدوقوما گوره دائمن یوللاردایام ، اورا بورا ، هر طرفه ایش

          دوشسه گئدم گرک ، بو گونلرده بیلیرسن کی اینقیلاب گونلریدیر ، کومالالار دموکراتلار یوللاردا کمین قوروب گئدیب گلنلری اولدورورلر ،

           ساهات اوچدن دورددن اوتایا یولا چیخماق اولمور ، منده بو ساهاتلارا یتیرنده آذربایجاندا هانسی کتده شهرده اولسام وانئتیمی ساخلاییب

           قالارام اورادا ، جانیمدان ماشینیمدان قورخورامدا ، اوگون نامردلر اوچ اولمامیش کمین وورموشدورلار ، اورمو یولوندا ، بیر دفعه گوردوم

           نئچه بوغو بورما دوروب یولون اورتاسیندا ، توفنگ اللرینده ، اشهدیمی اوخودوم ، وئردیم قیراقا ، باخدیم نئچه ماشینی ایتلی ییبلر کورپونون

           آلتینا ، آداملارین ال قوللارین باغلاییبلار ، دئدیم منده یاززیق اولدوم ، بیری گلدی منه ساری ، دئدی ، کوردو دیلده ، دئدی سور گل

           گوروم ، دئدیم گوزوم اوسته ، من پولا ایشلییرم ، ائیله باخدی آز قالدی جانیم اوچا گویه ، دئدیم نوکرینم نه پولو ، هارایا دئسن گئدرم واللاه

           ، نه پولو آخی ، دئدی گل ، چکدیم ماشینی او دئدیغی یئره ، باخدیم نئچه دونه ییغدیکلاری تایلاردان آتدی وانئتین دالینا ، بیر توفنگی

           الینده اولاندا گوزو باغلی آداملاری میندیردی ماشینین دالینا ، منیله دانیشان گلدی اوتوردو شایید طرفده ، دئدی سور ، ایستدیم سوروشام

           هارایا ؟ توفنگین قونداقیلا ووردو اوزومدن دئدی دانیشما سور ، هوشوم باشیما قاییداندا سوردوم ، یولدان چیخدیک ، چوخلو یول گئتدیک ،

           یئتیردیک بیر کنده ، ایشیم یوخ هارایا ، دئدی سور خانین ائوینین قاباقینا ، سوردوم ، ائیله بیل توی توتموشدورلار ، بویله آنلادیم

           دموکراتلارین بیرینین تویودور ، ماشینی ساخلادیم دوشدوک یئره ، گلین ایله بی گلدیلر بیزه ساری ، سئویندیم ، دئدیم تویدا شنلیک اولار

           ، شادلیق اولار ، ایندی بیزی بو گوزل توی اوچون اوخودوب اوینادیب اوتوررلر ، بوتون کورد عجم تویلاریندا بویله اولور ، اونلار بیزیم تویلاردا

           ، بیز اونلارین تویلاریندا اوخویوب اویناییب یاللی گئدریک ، بیلیرسن کی نه دئییرم ، آنجاق بی ایله گلین بیزه ساری گلدیلر .......................

آناگون آس : یئنه ندن سوسدون دانیش ؟

قوچو : عذابی قالسین منه ، اوتور سن آللاه .

آناگون آس : دانیش ، بیری گرک آچا نه اولوب .

قوچو : آمما بونو یوخ .

آناگون آس : اولاندان دانیشیرسان ، اوزون باشا آپارمیرسان کی ...

قوچو : سنده گورسیدین دیلین آچیلمازیدی .................................................

آناگون آس : دئگینن ، بلکه م داها اوز وئرمیه بویله ایشلر .

قوچو : قوزولارین باشین اوزنده باخا بیلمرم داها ، نئجه ال قیچ چالا آدام پیچاق آلتیندا ، گوزومون قاباقیندا گوزو باغلیلاری توتوب ییخدیلار اونلارین

         قیچینین قاباقینا ، دئدیم قورخودورلار ، پیچاقلار اللرینده نئچه نفر گلدی اوتایدان ، زورنالارین سسی قولاقی کار ائیله ییردی ، هر بیری بیر

         گوزو باغلینی توتدو گوزونو آچدی ، یا ابوالفضل بو بیزیم آبآس دئییل ؟ اودا سولئیماندیر واللاه ، آبآس منی گوردو ، اوتاندیم ، دئدیم منیده

          بونلاردان بیلدی ؟ آخی الیم گوزوم آچیق دورموشدوم اونلارا باخیردیم ، دینمیردی ، پیچاق آلتیندا نه دئمک اولار ؟ نئچه سی آغلاییب

          اوزلریندن گئددیلر ، دئدیم قورخودورلار ، زورنالارین سسی چوخالدی ، پیچاقلار اوینادی ، باشلار ، باشلار ، یا ابوالفضل ..............

                              6 . آناگون آس تکدیر .

                                  بیر پارچانی باسیر آغیزینا و چیغیریر .

                                  قان بویاسی هر یئره سپیلیبدیر .           5

                                  آناگون آس هوشدان گئدیب و ییخیلیبدیر یئره .

                              7 . کیان حیاطدا اوتوروب بورقونداکی تخته اوخشار تخت اوسته قلیان

                                                                                  چکیر .

                                  قوچو گیریر ایچری یه .

قوچو : بیری قبری آچیب ، عکسلری گوتوروبدور ، ایندی کندده الدن اله دولانیر عکسلر .

کیان : هانسی آخماق بو ایشی گوروبدور ؟

قوچو : دئییرلر آناگون آس ، آروادی یین باجیسی .

کیان : بیلیردیم بیر ایش گورجک او پیس آناگون آس ، بیلیردیم ، قارداشینا یاس توتوب عزا ساخلاماقدان دوشوب بویله ایشلرین دالیسینا ...

قوچو : جاماهات بیلسه پیسدیر بو ؟

کیان : آی جانیم بو خالقین عاقلی گوزونده ، او عکسلری گوروب قانلاری جوشاجاق ، دوشجکلر یولا گئدجکلر یا اوزلرین وئرلر اولومه یا دموکراتلارین

          قیچلارین بورایا آچیب هاممینین وئرلر اونلارین گول له سینه قوربان ، گرک بو ایش اولمویاردی .

قوچو : آی پیس قادین ...

کیان : قویمازلار یاخچی گونلری گورک ، ایندی کی خان قاچیب ائوی باغی یوردو یوواسی دوشوب الیمیزه قویمازلار قیچلاریمیزی اوزالداق کئفه

         باخاق ، او آخماق ایسته ییر بو یوردون بو گوزل یاشیل یارادان توپراقین قانیلا قیزاردا ، باخ سن آللاه گور بو مملکتده هارادا بویله گوزل یئر

         وار ؟

قوچو : واللاه منده چوخ یئرلری دولانمیشام بویله گوزل اولکه گورممیشم .

کیان : منده بونو دئییرمدا ، باغیمیز وار ، باغچامیز ، گولوموز ، بولبولوموز ، بوستانلار دولو ، مئشه لر آباد ، داغلار اوجا باشلی ، باشی دولو قارلی ،

          سولاریمیز آخار ، گوللریمیز سولو ، یایلاقلار گوزل ، آخی ندن دئییم من ؟ واللاه بو اولکه بئهشتدیر ، بئهشت ، بورادا گرک یئییب ایچیب

          شنلیکه باخاسان ، واللاه خانلار بیلیرمیش نئجه گرک کئچینسینلر ، اینسان اولملیدیر ، اولومون قاباقیندا ذلیلدیر ، آمما اولمکدن قاباق گرک

          کئفین ائیلسین ، دوورانین سورسون ، قویسالار بیزده گوزل یاشامیمیزی کئفیله باشا آپاراریق ، قویمازلار .

قوچو : قاباقین آلماق اولماز ؟

کیان : موفته گئدیب پایتختده درس اوخومامیشام کی ، ایندی بو کندین ایش بیلنی منم ، بوجور راحات اوتورا بیلمرم ، قولاق وئر گور نه دئییرم ،

         گئد او کورد قیزی ، کژالی ائوینده اولدور ، سونرا جار سالاریک آناگون آس اولدوروب بیلسینی ، اوندا داها آناگون آس گوزدن دوشر ارزیشی

          قالماز جاماهاتین آراسیندا ...

قوچو : یادیمدان چیخدی دییم آناگون آس کژالین ائوینه گئدیب هاممی یا دئییب بونلا ایشی ییز اولماسین ، دئییب تورک اولادینا گلمز گوناهسیز

         قوناقی اذیت ائیله سین ...

کیان : آخماق آدام بونو اوولده دئدا ............

قوچو : اللرین آغریماسین داها نه ؟

کیان : داها درد ، داها درد ، داها درد ، نه ایسته ییرسن داها ؟ داها داها داها ! مثلن  من سنه دئمیشدیم تئز یئتیر خبرلری ، بو خبر گتیردیغیندیردا

         ، ایش ایشدن کئچندن سونرا ، پول آلیرسان مندن اوپوش یوخ کی ، وای سنین تکین آداملارین الیندن ، واللاه بو مملکت سیزلر اولاناجاق

         هئچ یئره یئتیرمز ، دییسن اوزوم گیرمسم مئیدانا اولمویاجاق ، آناگون آس دولان دولانیم . 

                              8 . آناگون آس ایله کیان دانیشیرلار .

آناگون آس : قارادان اوسته یوخ بویا ، سوروجو قوچودان سوروشدوم دموکراتلار دئمدیلر نه اوچون عکسلری وئردیلر سنه گتیرسن بیزه ؟

کیان : نه داش اورگین وار سنین ، او سنین قارداشی یین باش کسمه سیندن دانیشیرمیش سن اوندان بویله سوزلر سوروشورموشسان ...

آناگون آس : جاواب وئردی ....

کیان : منه دئییب ، دموکراتلار ایسته ییبلر بویله خبرلر داغیلا بو اولکه ده ، اونلار ایسته ییرلر بورالاری آلیب بویوک کوردوستانلارین دوزلدلر ، تک

         بورالاردا یوخ ، قزوینه جاق گئدیر اونلارین کوردوستانی ، ایندی بیلدین نه اوچون ایسته میردیم بونلاری بیلسن ؟ بیزیم آذری ائللر گوزل

         یاشاملارین بویله ایشلرله خاراب ائیلسه هدره گئدر گونلری ...

آناگون آس : قوچو جاواب وئردی اونلار بیزیم توپراقلارا گوز تیکیبلر ...

کیان : نیه گرک باهانه وئریله اللرینه ، اونلار گورسه بیزیم ایشیمیز یوخ بیللریله ال چکرلر بورالاردان .

آناگون آس : قوچویا دئدیم تورک آتا بابالاریمیزدان بیزلره سوز وئریلیب ، توپراقدان پای اولماز .                  6

کیان : بورالار پاسگاهدان اوزاقدیر ، ژاندارمری گلیب بیزه یاردیم ائدنجک هاممیمیزی اولدوروب آرادان آپارارلار .

آناگون آس : دئدیم ایندی کی اونلار بویله ایشلری قاباقا آپارماق ایسته ییر بیزیمده ایشلریمیز باشلانیر ، ایندی داها بیزلر گرک کوهنه توفنگلری

                 آلاق الیمیزه ...

کیان : ایندی گرک گوزوموزو یوماق ، اوستون وورماساق ایشلر دوزلر ، یوخسا الدن گئدر آقالیقیمیز .

آناگون آس : دئدیم ایندی اینتیقام زامانیدیر .

کیان : بیر قولاق وئریرسن سوزلریمه ؟ ایسته ییرسن هاممیمیزین قبرین قازاسان ؟ سن نه اوچون قبری قازدین ؟ قارداشین آزیدی ایسته دین

         بیزیده اونلا قویلویاسان ؟

آناگون آس : دئییرسن بلکه م سسیندن قورخاجاقام باغیریرسان ؟ من سن گیزلتدیغین حقیقتی عیان ائیلمیشم ، پیسدیر بو ؟

کیان : بو حقیقتین قیمتین بیلیرسن ؟

آناگون آس : اولوم اولسادا اولسون ، قارداشیمدان آرتیقام ؟ قانیم سولئیمانین قانیندان قیرمیزیدیر ؟

کیان : تک اوزون اولسان گئد اول ، بیرجه سن دئییلسن کی ، بو خالقی عذابا سالسان قارداشیندا توپراقین آلتیندا عذابا دوشر .

آناگون آس : او ایندی یاخچی حالدادیر ، توپراقی گولور ، بیلیر آخی قانی یئرده قالماز ...

کیان : سنین سوزلریندن قان اییسی گلیر .

آناگون آس : دوز آنلاییبسان .

کیان : بو خالقین گوناهی ندیر ؟

آناگون آس : مندن نیه به سوروشورسان بونو ؟

کیان : به کیمدن گرک سوروشام ؟

آناگون آس : منیم قارداشیمی و اوبیریسی گوناهسیزلاری اولدورن کوتولر هئچ کیمسه یه رحم ائیلمزلر ، اونلاردان سوروشمالیسان کیان ...

کیان : الیمه دوشسلر سوروشارام آمما ...

آناگون آس : اونلار بیزی دویوشه چاغیریبلار .

کیان : بو سنین معیوب مغزیندن چیخیر .

آناگون آس : یوخ ، اونلارین توفنگلریندن چیخیب .

کیان : اوزوین فیکیرلشمیرسن قارداشیم یاشارا فیکیرلش ، اونون گوناهی ندیر سنیله آداخلیدیر ؟

آناگون آس : اودا منیله بیرجور فیکیرلشیر ، یانی سندن سونرا هاممی منیله بیر فیکیرلشیر ، قان توکولوبدور ، اوزوموزو بیلممزدیقه وورماقلا هئچ

                ایش دوزلمز .

کیان : یوخ ایشتیباهداسان ، من تک دئییلم ، چوخلاری ایسته میر موفته اوله قانی هدره گئده ، بیز بیر اولوب قویماریک سنین کیمین آداملار

          یاشامیمیزی خطره سالاسیز .

آناگون آس : من حاضیرلانمیشام قارداشیمین ، خالااوغلومون قانین توکن دموکراتلارلا کومالالارلا دویوشم ، سنده اوزون بیلرسن آداملارینلا .

کیان : بیلیردیم ایش بورایا یئتیرجکدیر ، آمما بونو بیل من بورادا اولاناجاق بو ایش اولا بیلمز ، آهان بودا سنین باجین آسلی ، یاخچی گلدی بلکه م

          او سنی یولا گتیره ، گتیره بیلمسه باجی یین ائودن اوتورجاغام ائشی یه ، نه اولسا آبآس اونوندا قارداشیدی ، هاممی ییز بیر آتانین بیر آنانین

           اوولادیسیز ، دئمیرم بلکه م بو سیزلره اوخشامی یا .

                                  آسلی گیریر ایچریه .

آسلی : کئشگه منده آناگون آسین یولونا گئده بیلم .

کیان : یاخچی یاخچی بیر قالمیشدین سن ، بونو یولا گتیرمکدن اوزون یولدان اول ، یاخچیدیر واللاه .

آناگون آس : آسلی سن اوزویون منه قاتما باجی ...

آسلی : آخی نئجه سن بو سوزو دئییرسن منه ؟ من ...

کیان : منیم بیر آز ایشیم وار ، قاییداناجاق بونو یولا گتیردین گددین گتیرمدین سنیده بونلا بیرلیکده یولا سالاجام گئدسن آتایین ائوینه .

                                  کیان چیخیر ائشی یه .

آناگون آس : باخ منیم باجیم ، کیان بورادایدی سوزومون هاممیسین دییه بیلمدیم ، من بیلیرم کیان منی اوتورمز ایشلریمی باشا آپارام ، سن منیم

                 سوزومه قولاق وئر گور نه دئییرم ، قولاق آسدا ، منده بیلیرم اورگین منیله دیر ، دئمک ایستمز ، بونو بیلمسیدیم اورگیمین سوزون

                  دئمزدیم سنه ، ایندی کیان گلر سوزوم قالار ، سن کیان گلنده منیله سوزلش ، او دئسین بلکه م بیز بیربیرله دوز دئمیریک ، سنی

                  اوتورسه اوز باشی یان سن گئدیب ایشلری باشا آپارا بیلرسن ، عکسلری گوتوررسن گئدرسن سولدوزا ، اورادا بو عکسلری داغیلدارسان

                  بیلینه نه اولوبدور ، نلر گلیبدیر باشیمیزا ، بویله اولماسا ، سولدوزلولار بیلمسه لر نه اولوب ، توفنگلری قالار توپراقلار آلتیندا ، بیردن 7

                  گوررلر دموکراتلار کومالالار کوتولر آدام اولدورنلر بو یوردا هوجوم گتیریب آلدیلار ائویمیزی ائشی ییمیزی ، اوندا داها هئچ ایش

                  گورمک اولماز ، آنلادین ایندی ؟

آسلی : یاخچی سنده کیانا دئگینن ال چکدین سوزلریندن ...

آناگون آس : کیان زیرنگ آدامدیر ، اوندا اینانماز کی هئچ سنه ده شک ائیلیر ، اوندا ایشلر الیمیزدن چیخار .

آسلی : نئجه یاززیق اولدوک ، نئجه بدبخت ...

آناگون آس : اوتور بو سوزلری ، ایندی آغلاماق سیزلاماق چاغی دئییل ، دئدیغیم سوزلریمی آنلادین ، اولدو ، به نیه آغلاییرسان هله ؟

آسلی : من گئدسم سنین باشی یان نه گلجک ؟

آناگون آس : منه فیکیرلشمه ، یوردوموزا فیکیرلش ، من اولسمده اولموشم ، بلکه م اولوم دووول اولا چالینا خالق اویانا .

آسلی : یازیق باجی قوربانین اولوم ...

آناگون آس : آغلاما باجیم آغلاما .

آسلی : بوندان سونرا الیمدن بیر ایش گلمیر .

آناگون آس : قورتار ، کیان ایله قوچو گلیر ، باشلا .

آسلی : اولسمده کیاندان ال چکمرم ، او منیم اریمدیر ، باشیمین تاجیدیر ، کیانسیز منیم نه گونوم ، سنده شئیطانین ائششگیندن دوش ، ال چک

          بو ایشلردن ، قان سالما یوردوموزا .

                                  کیان ایله قوچو گیریلر ایچری یه .

کیان : یوخ جانیم ائیله بیل بیزیم آرواد عاقیللیمیش ، یاشا واللاه ، نه اولدو یولا گلدی ؟

آسلی : بو آدام اولان دئییل .

کیان : قوچو آناگون آسی توتون توفنگین الیندن آلین ، آپارین سالین طوولیه ، باغلایین قالسین اورادا .

                                  قوچو زورلا توفنگی آناگون آسدان آلیر .

آناگون آس : باجیم آسلی به سن نیه ؟

آسلی : من کیاندان اوزاق قالا بیلمرم .

آناگون آس : آسلی سندن اورگیمده کدر یوخ ، سن کیانین الینین آلتینداسان ، بیر ایش الیندن گلمیر ، آمما کیان سنه بیر سوز دئییرم گور نه زامان

                 دئمیشم بونو ، اونلارین گلمغی سنین ایشلرینله دالا دوشمویجاق کی هئچ بلکه م سن بو ایشلرینله او ایشی قاباقادا سالدین ، اونلار

                  گلنده بورایا اوولده سنین تکین آداملارین جانین آلاجاقلار ، بو منیم سون سوزومدور ، بونودا بیل هئچ زینجیر آزاد اینسانلاری اوزونده

                  هممشه لیق ساخلیا بیلمز ، من آسآدلیقیم اوچون هر ایش گورجاقام .

کیان : چوخ توولو گئدیرسن ...

آناگون آس : بئواقتدیر ، بوندان توولو گرک گئدردیم ، حاییف اولمادی .

کیان : آپارین بیلسین ، بو باشلانمیش توفان گرک یاتا ، آسلی سنده گئد ائوه .

                              9 . خان تخت اوسته تک ایشیق آلتیندا اوتوروبدور رادیویا قولاق آسیر .   

خان : یوخ جانیم هئچ سوز دئمدی بیزیم اولکه دن ، دونیانی قاتدی قاریشدیردی آمما بیزدن هئچ نه دئمدی ، آی سنین او ذات و سودوین لعنت

         اولسون پیس آدام ، کوپک اوغلو کوپک مین دونه یالان دانیشدی ، دوزلریده واریدی البتده ، یانی گرکده اولاردی ، اوزلری یازیبدا ، بورادان

         باخاندا بونو بیلیر آدام ، آمما هردنده اولور بیری بونلار یازان جیزیقلاردان چیخسین ائشی یه اوزو ایشلرینه یازی یازسین ، گوروم بیر سوز

         دئمیجکدیر بیزیم خارابا قالمیش اولکه دن ؟!

                              10 . کیان اوتوروبدور تخت اوسته قلیان چکیر .

                                   یاشار اوتوروب یئرده گئدیب فیکیره .

کیان : قارداشیم سنین آداخلین بیزی یاززیق ائیلمک ایسته ییردی ، گرک قاباقی آلیناردی .

یاشار : منده عکسلری گورنده قانیم جوشا گلدی ، نئجه اولار آداملارین بویله راحات باشلارین کسلر ؟ هانسی دین ، هانسی مذهب ، هانسی

          اینسانیت بونو دئییر ؟

کیان : منده بیلیرم دوز ایش گورمویوبلر ، آمما قانین قاباقی قان دئییل ، بیرده بیزده او گوج یوخ اونلارلا ساواشاق ، سن بیلمیرسن بو کندین

         نقده یدن یا اورمودان نقدر فاصیله سی وار ؟

یاشار : میه قراردی اونلار هاممی قوشونلارین بیزیم کنده یوللویالار ؟ نئچه سی گله بیلر میه بورایا ؟                    8

کیان : واللاه بیللاه اونلار گلسه نلری وار یولا سالاجاقلار ، قورخما دئگینن ییرمی اوتوز مین توفنگچی .

یاشار : توتاق بویله دیر ، اوندا گرک قول اولاق اونلارا ؟

کیان : بیز ایشیمیز اولماسا گلمزلر .

یاشار : به او عکسلری نه اوچون قوچو ایله یوللویوبلار ؟

کیان : گورسلر باش قوشمادیک اوتوررلر .

یاشار : من سنین تکین فیکیرلشمیرم ، آنجاق منیمده آناگون آس ایله سوزوم یولوم بیردیر .

کیان : سنین بویوگون منم ، سن آنلاسان سوزلریمی اونون دالیسینا دوشمزسن بو کندی خارابا قویاسیز ، مندن سوز ائشید یاشام گوزلدیر ، کورلاماق

         اونو آمما راحات ، کورلامایین بو گوزل یاشامی ، بو گوزل اولکه نی .

یاشار : ذیللتله یاشاماق هئچ نیه دیمز .

کیان : بو سوزلردن هئچ نه چیخماز ، عاصی آداملار ساق باش گورا آپارمازلار .

یاشار : بئگوناه آبآسین سولئیمانین قانی توکولوب ، بونا نئجه گوز یومماق اولار آخی ؟

کیان : اونلارا گوز یومما ، آغلا ، آمما من دئییرم اونلار باهانادیر ، آناگون آسین آشکی سنین گوزلری یین کور ائیله ییب سن گورمورسن هارایا

         گئدیرسن !

یاشار : میه هارایا گئدیرم .

کیان : آژداهانین آغیزینا .

یاشار : بیری گرک اولا آژداهانین قانین توکه اولدوره یا یوخ ؟

کیان : بو آژداها ناغیللار آژداهاسی دئییل راحات اوله هاممیمیزی اولدورر ...

یاشار : بویله اولسادا اولسون .

کیان : آخی نیه ؟

یاشار : خالق اوچون آشک اوچون اولمک شرفدیر .

کیان : اوتانما آشکیدان آرتیق دانیش .

یاشار : من آناگون آسا یاردیم ائیلمکدن کئچمرم .

کیان : کس سسی یین داها ، گلن وار ائیله بیل .

یاشار : من گئتدیم آناگون آسی قورتارام آپارام ائوه ، اونون توفنگی یئرده قالمالی دئییل قارداشیم .

کیان : دایان ، سنین بو ایشه هئچ حاققین یوخ .

                                   یاشار چیخیر ائشی یه .

                                   قوچو گیریر ایچری یه .

کیان : هان قوچو نه خبر ؟ چوخ توولو گلیرسن ؟

قوچو : آللاه سنین گوناهلاریندان کئچمسین ...

کیان : سن کیمیله بویله دانیشیرسان ؟

قوچو : کوتو آدام سنیله .

کیان : کس سسی یین گوروم بو نئجه دانیشماقدیر .

قوچو : سن کس سسی یین آخماق آدام ، سن کس سسی یین ...

کیان : اوغلان دوروب وورارام اولرسن ...

قوچو : جهنلم اول داها ، آی کیشی کندی سالدین قارالار ایچینه دانیشیرساندا هله ؟ نئجه اوزومو آلداتدیم سنین اوچ تومن قارا پولویان ...

کیان : نه اولوب ؟ بو سوزلر ندیر ؟

قوچو : نه اولاجایدی هان ؟ اولان اولدو ، اولدو ، اولدو .

کیان : دانیش منده بیلیم نه اولوبدا ...

قوچو : آناگون آس ...

کیان : آی هوو نئجه ایلیشمیشیک بو آداما ...

قوچو : داها قورتولدو ، قورتولدو ...

کیان : نمنه قورتولدو ، آی یئکه کیشی به سن نیه آغلاییرسان ؟

قوچو : قارداشی اوجور ، اوزو بوجور ، آی کیفیر دونیا سنه لعنت اولسون ، آی آناگون آس ، آناگون آس ...                                                   9                                                                

کیان : او نه ؟ آناگون آس نه ؟

قوچو : اولدو اولدو اولدو .

کیان : ...

قوچو : منده اینانمیردیم ، منیمده دیلیم توتولدو گورنده ، وای وای وای ...

کیان : دانیش گوروم آخی نئجه ؟

قوچو : طووله نین پنجره سیندن ایسته ییرمیش چیخا ائشی یه ، الین باغلادیغیم ایپ دولاشیر بوینونا بوغور بیلسینی ، سن اولدوردون اونو سن ...

کیان : یاززیق قیز ، ایندی نئجه گئدیم ائوه باخیم آسلینین اوزونه ؟ وای قارداشیم یاشار ، اونا نه دئییم ، وای وای وای ...

قوچو : یاشارا بیلمیرم گرک نه دییسن آمما آسلی بورالاردا دئییل ...

کیان : سن نه دئمک ایسته ییرسن ؟

قوچو : آسلی مینیب آتا سوروب سولدوزا ، بوتون عکسلریده اوزویله آپاریبدیر .

کیان : نه زامان ؟

قوچو : بیلمیرم ، آروادیم گورموشدو توزو دومان اولوب قارخیب گویه .

کیان : اولا بیلمز بو ، نئجه اولا بیلر ، بو چوخ گولمه لیدیر ، یوخ چوخ آغلامالیدیر ، گولوم یوخسا آغلاییم ؟

قوچو : سنه نه اولدو ، کیان کیان ، بیری گلسین کومکه ، آی جاماهات ...

                                                                                   سون .

                                                                                92.07.30