نمایشنامه متنی : سد معبر ...

نمایشنامه : سد معبر  .

                              بیر گئنج اوغلان خیاباندا بساط آچیب و پالتار ساتیر .

اوغلان : گل آپار ، گل آپار ، حراج اولدو ، قالماسین ، بایرام گلیر یاز گلیر ، تزه ایلده تزه کوینک یاراشار سیزلره ، گل کی قالمادی ، ساری قیرمیزی

             آغ رنگیده وار ، به به ، گل آپار قالماسین ، حراج اولدو جاماهات ، حراج اولدو ، تورکیه تی شرتی گلدی ها بازارا ...

بیری : نئچه دی جاوان ؟

اوغلان : اوجوز ، یئتدی مین تومن ، گوتو کی گوزه لین سئچیبسن ،،، اودا خوشدو ، رنگیده دوشر اوزوین ، گل آپار حراج اولدو جاماهات .

بیری : اوغلان نه حراجی ، یئتدی مین تومنین نیی حراجدیر ؟

اوغلان : کوکو ، آی دایی او توکاندا بو جینسی یازیب اون بئش مین ، اینانماسان گئد سوروش ، آمما دئمه من یوللادیم قیمت بیلسن .

بیری : نه ایشیم وار اورادا ، او توکانینین ایجاره سین چکیر اوستونه ، سن توکوبسن خیاواندا ساتیرسان .

اوغلان : ائیله اودور اوجوز وئریرم دا ...

بیری : بئش مینه وئر ایکیسین آپاریم .

اوغلان : بئش مینه آلمیشام ، آلتیمین بئش یوز وئر آللاه برکت وئرسین ...

بیری : بئش یوزه آدام آغیز آچماز کی آخی .

اوغلان : آلتی مین وئر گوتور گئد ، تئز اوبیریسیلر بیلممیش ،،، اود ووردوم مالیما جاماهات ، گل آپار حراج اولدو ، ، تی شرته باخ سن آللاه .

بیری : یاللاه ...

اوغلان : برکت ، خوش گلدین گوزوم اوسته ،،، قالماسین ، بایرام گلیر یاز گلیر ، گل آپار ، حراج اولدو تورکیه تی شرتی ،،، گل گوروم .

بیری : بو یاخچیدیر یا بو ؟

اوغلان : اوزون گوتدوقون ، داها او بو ائیلمه گوزوندن دوشر ، آپار گئی کئفین ائیله ،،، گل جاماهات گل .

ایکیمجی : آی بالا قیز پالتاریدا ساتیرسان ؟

اوغلان : ننه او تی شرتلر قیزلار اوچوندور .

ایکیمجی : گوروم هانسی ؟

اوغلان : خیدمتینده دیر .

ایکیمجی : نئچه ؟

اوغلان : یئتدی مین ...

ایکیمجی : اوش مینه وئر گئدمییم اوتایلارا ، قیچیم آغریییر ، وئر آپاریمدا .

اوغلان : ننه بونلار تورکیه تی شرتیدیر ، باهالیدیر .

ایکیمجی : سن باها آلیبسان منه نه اوغول ، من اوش مین وئرجم .

اوچومجو : آی اوغلان ییغیشدیر قاچ ، شهرداریدن گلدیلر ، ییغیشدیر ،،، اویاندان ، اویاندان .

اوغلان : آی ننه تئز اول گوروم ، گلدی ها ، وئر منه گئدیم .

ایکیمجی : اوش مین وئریم ؟                                              1

اوغلان : بابا او تی شرتی وئر ، ایندی یئتیشر ...

ایکیمجی : یئتیشرده یئتیشسیندا ، گل بو پولو گوروم .               

اوغلان : آی هوو ، ایستمدیم ننه ، پولدا اوزویون تی شرتده ، سونرا گلسن بازارا آلتی مین گتیررسن ، من گئتدیم .

ایکیمجی : شوغلوزوممه اولا بیلمرم ، گل پولویون .

اوغلان : گئتدیم من ...

                             دوردومجو اوغلانین الیندن یاپیشیر .

دوردومجو : هارا گئتدین ؟ هله تزه موشترین وار ، نده چاللاشیر ، دایاندا بسدیر .

اوغلان : بیر سیرا بساطیمی پوزوبسان دویمویوبسان ؟ ندیر باخ ؟

دوردومجو : دیله باخ بوندا ، یوخ گل منی وور ...

اوغلان : او سیزین الی ییزدن گلیر ، منیم یوخ ، من کاسیب بیر آدامام ، هارادان تاپاجایام دیه وئرم .

دوردومجو : هان پس دیه اولماسایدی ووراردین ، سن یئکلسن نه اولارسان ؟ لات ...

اوغلان : آی یئکه کیشی آغزیندان دانیش ، من لات اولسایدیم ...

دوردومجو : منله آغیز آغیزا وئرمه گوروم ، آچ گوروم بساطیندا نه وار بو یئکه دانیشیقین .

                             مامورلار ایستییرلر بساطی آلالار اوغلانین الیندن اوغلان وئرمیر .

اوغلان : اولسمده قویمارام بونو آچاسیز .

ایکیمجی : سن مامورسان بالا ؟

دوردومجو : هیه ننه ، اونودا وئر منه .

ایکیمجی : بونو آلمیشام ، بو نه ایش گوروب بوجور دوره لییبسیز بیلسین ؟ اوغورلوق مالی ساتیر ؟

اوغلان : آی ننه نه اوغورلوق مالی ؟ گور آد قویا بیلرسن ؟ بو شهرداری مامورودور ، سدمعبر ائیلمیشم مثلن .

ایکیمجی : واللاه من کی باش قورتارمادیم ، اوغورلوق مالی اولماسا آپارارام ، گل بو اوش مینی آل دئگینن آللاه برکت وئرسین من گئدیم .

اوغلان : آی ننه قوی گوروم باشیما نه داش سالمالیام ، اودا سنین ، پولودا ، گئد ، حالال خوشون اولسون .

دوردومجو : کیسه دن باغیشلییرسان ؟ ننه اونو وئر منه گوروم .

ایکیمجی : نیی ؟ پولو ؟

دوردومجو : پالتاری ، پولو یوخ .

ایکیمجی : دئییرم ائیله گل پولودا وئریم اول ریضاخان ژاندارماسیدا .

دوردومجو : آی ننه نیه به یئکه دانیشیرسان ، گئد .

ایکیمجی : من یئکه دانیشیرام قاناجاقسیز یا سن ؟ اوتانمیر بیر قوجا آروادین اوستونه قیشقیریر ، آخیرزامان اولوبدا ، گل اوغلان سنده پولویون آل

               دئگینن آللاه برکت وئرسین من گئدیم .

اوغلان : خئییر ها ،، ننه آپار دئدیم .

ایکیمجی : پولویون آل سونرا .

دوردومجو : وئر منه آپار .

ایکیمجی : سنه نیه به آخی ؟

دوردومجو : آی قوجا ننه گئد ایشیمیزه یئتیرخ ، گئد .

ایکیمجی : ویی ، آخی سن نه کاره سن منه دئییرسن گئدم ؟ خوشوم گلیر دورموشام ، بورادا صاحابلانیبسیز ؟

دوردومجو : ایلیشدیخ سنه یوخ ؟

ایکیمجی : یوخ بیز سنه ایلیشمیشیخ ، گور کیم چیخدی بیزیم قاباقیمیزا بویون .

دوردومجو : اوتور بونلاری ، اوغلانیدا بساطیلا بیرلیکده میندیرین ماشینا آپاراخ .

اوغلان : من سیزله گلن دئییلم .                                       2

دوردومجو : یوخدا ، یئکلیبسن ؟ کئچ مین ماشینا گوروم .

اوغلان : اولومود آپارا بیلمزسن ، او سیرا اللی مین ضرر ووروبسان بسیمدیر .

دوردومجو : آدام اولمویوبسان کی بوراداساندا ، کئچ ...

ایکیمجی : آی کیشی جاماهاتین اوشاقین اولدوردون ، اوتور اونو .

دوردومجو : کئچ اویانا گوروم سنده .

اوغلان : اوتور منی ، اوتور گوروم .

ایکیمجی : به من دئمیرم بونو بوراخین گئدسین ؟

دوردومجو : کئچ اویانا آی قوجا قادین .

ایکیمجی : تو سنین اوزوین باخ ، اوتان واللاه ، اوتان اول .

دوردومجو : میندیرین ماشینا گوروم سیزده .

اوغلان : آی جاماهات نیه به دوروب باخیرسیز ؟ کومک ائیلیین آخی ؟ من هله هئچ ، بو سیزین ننه ییز اولسایدی دوروب باخاردیز ؟

دوردومجو : قودوخ بالاسی هله میللتی تحریک ائدیر ، جهنلم اول مین ماشینا گوروم .

اوغلان : مینمرم ، اولدورسنده مینمرم ، آی جاماهات کومک ائیلیین بیزه .

بئشیمجی : قارداش سدمعبر ائیلییب دوز ، آپارمالیسان بونو دوز ، داها نیه به اولدورورسن بیلسین ؟

دوردومجو : سیز قاریشمایین ، کئچین گئدین .

اوغلان : یوخ گئدمیین ، بو بیر سیرا زورلا منیم بساطیمی ییغیشدیردی آپاردی ، ایندیده آپارسا بدبخت اولارام .

دوردومجو : بو سیرا هم بساطیین آپاراجام هم اوزویون .

بئشیمجی : اوزونو داها نه اوچون ؟

دوردومجو : آی جانیم من سنین ایشیین باش چکیرم ؟ سنه نه دخلی وار آخی ؟

بئشیمجی : سوروشدومدا .

دوردومجو : سوروشما یوخ ، گئد ایشیین دالیسیجاق گوروم .

ایکیمجی : آی هوو ، بو هاممیلا داوا داوا دئییر ...

اوغلان : بیر یاززیق آدامام ، قویمایین آپارسین بساطیمی ، اوندا واللاه نه ییم وار الیمدن گئدر .

بئشیمجی : آقا سنده بو سیرانی اوتور گئدسین ، داها گلن سیرادان بونو گورسن ایه .

دوردومجو : بو ایشیندن ال چکن دئییل ، اینانمیرسیز سوروشوندا .

بئشیمجی : من سوز وئریرم بودا ایشیندن ال چکه ، دئگینن بورالاردا تاپیلمیاجاقسان .

اوغلان : اولسون او منی داها بورادا گورمز آمما من آجیمدان اولمویجم کی ، اویانلاردا ساتاجایام .

دوردومجو : بویورون ، دئمه دیم ، دوش یولا گئد مین ماشینا گوروم .

اوغلان : آی جاماهات سیز بونا بیر سوز دئیین ، منیم ایندی خیابانلاردا پالتار ساتماق وقتیمدی ؟ من گرک ایندی مدرسه ده اولاردیم ، آخی بیر

             سوروشان اولمویاجاق دردیم ندیر ؟ نیه بورادایام ؟ باخین بونلار منیم بوتون سرمایه مدیرلر ، بو آدام منیم الیمدن آلسا بونلاری من نئجه

             پول قازانیم گئدیم ننه مین داوالارین آلیم ؟ هان ؟ دده م یوخدور ، اولوب گئدیب ، بیر منم بیر ائو آدام ، ننه مده ناخوش ، آخی

             اینصافدیر پولوم الیمدن گئده ؟

دوردومجو : اوزونو نه ووروب تولکو اولوملوقونه .

ایکیمجی : طیفیل بالا ،،، اوتان باخ ، اوتان .

دوردومجو : ننه گئد اویانا گورومدا .

بئشیمجی : سوزلری دوز اولسا ایشین اولماسین ، اوتور ایشین گورسون .

دوردومجو : منه ربطی یوخدور سوزلری دوزدور یا یالان ، منیم ایشیم سدمعبر ائیلینلری ییغیشدیرماقدیر ، پولو یوخدور گئدسین کمیته ...

اوغلان : منیم خوشوم گلیر الیمین چورگین یییم ، آتامین وصیتیدیر منه .    3

دوردومجو : اونودا اوزون بیلرسن .

اوغلان : بیلمیشم کی بورادایامدا .                                

دوردومجو : جاواب وئرمه گوروم ، کئچ گئدخ .

اوغلان : اولومو آپاراجاقسان بویور .

بئشیمجی : باخ گوروم بونو آپاردین ، وساییلین آلدین ، صاباحدان بو پولسوز قالدی گئتدی خیلاف یولا نئجه اولاجاق ؟

دوردومجو : گئدمسیندا .

بئشیمجی : بوجورده سن دئییرسن گئدسیندا .

دوردومجو : آغ ساققال کیشی ، دوش یولا چیخ گئد ، منیم آغزیمی آشما ...

بئشیمجی : شومور دئییلسن کیشی ، آدامدا بیر مورووت اولار .

دوردومجو : منه لازیم دئییل .

بئشیمجی : هاممیا لازیمدیر .

دوردومجو : بونو بوراخسام اوز اوشاقلاریم آج قالار ، بونو ایستییرسن ؟

بئشیمجی : گئدر اویاندا ساتار ، شلوغ اولمویان یئرده .

اوغلان : گئدرم آمما اوندا گرک بیر توکانین قاباقیندا وساییل قویولمویا ، بو دوز دئییر توکانلارین قاباقین ییغیشدیرسیندا .

دوردومجو : بوشلودا چیخدیخ هله ، من اوزوم بیلیرم بو نئجه ...

ایکیمجی : سوزو دوزدوردا ، توکانلارین هاممیسینین قاباقیندا وساییل قویورلار .

بئشیمجی : منده سوزون منطیقی بیلیرم .

دوردومجو : منه بوجور دئییبلر ، اونلار عواریض وئریرلر ، بو نئجه ؟ دور آیاقا گوروم سنده .

اوغلان : وای قولوم ، وای قولوم ، دده ، دده .

ایکیمجی : شوموردور واللاه بو .

بئشیمجی : اوتوردا اونو ، اولدوردون آخی .

                                                                        اوغلان فورصتدن ایستیفاده ائیله ییر و بساطی الینده قاچیر گئدیر .

دوردومجو : توتون اونو ، توتون اونو .

                                            سون .

                    91.05.08