دئرام متنی : بیزیم محله ...

دئرام : بیزیم محله .

  ( بر اساس طرحی از شهرام ابراهیم حصاری ) .

                              پئرسوناژلار : عده لت ، دومرول ، موختار ، رجب اله ، قضنفر ، نقداله ،

                                       آجی اوغلان  و فراست   .

                     صحنه لر :  بیر کوهنه محله ایله بیر بازار  .

ایشیق  . 

                                 صحنه 1 : محله .

                                 محله ساکیت و ساکیندیر  .

                                                                                         نقداله و رجب اله و قضنفر بیربه بیر اوزائولرینین پئنجره سیندن

                                                                                         باشلارین چیخاردیب و ائشی یه باخیرلار .

                              آجی اوغلان اوتوروب کوچه ده و اونلار باخاندا اونلارا داش آتیر و

                             گولور و سونرا باشلاییر اونلاری اله سالماق اوچون سوز اوخوماقا ، او

                              سوز اوخویا اوخویا  گئدیر دومرولون قاپیسیندا سسین آتیر باشینا .

                              عده لت آجی اوغلانین سسینه اوز ائویندن چیخیر کوچه یه .

عده لت : آجی ، آی آجی اوغلان ، سسین اوزوین خوش گلیب بالا ؟

آجی اوغلان : سنه خوش گلمیر میه ؟

                                رجب اله باشین پئنجره دن چیخاردیر ائشی یه .

رجی : اونا گئتدیکجه خوش گلجک ...

                                 نقداله باشین پئنجره دن چیخاردیر ائشی یه .

نقدی : خوش گلسه دوققوز سیرا گرک قولاق آساها ...

                                 قضنفر باشین پئنجره دن چیخاردیر ائشی یه .

قضی :  اودا  دالبادال ...

آجی اوغلان : من سیزه لاییق اولان پایی اونا وئرمرم کی ، الی ییزی آلتدان گتیرسز اوچویوزوده گورر ، گلین آششاغایا گوروم قالدیم الینده .

                                   پئنجره لرین اوچوده بیردن باغلانیر .

عده لت : آی دئدین ها ،،، ( سسین آپاریر اوسته ) گلر بیرگون آشیق آسچی بونلارا جاواب وئرمگه دادیما ...

آجی اوغلان : دومرولو چاغیریرام بونلارین حالین توتا قویمورساندا  .

عده لت : دومرول یاتیب ایندی ، دوراندا دئییل ، سنده سسی یین آتما باشی یان کئچ گئد .

آجی اوغلان : عده لت خالا آشیق آسچی نی   نیه هئچ کیمسه محله ده گورمویوب ؟ هن عده لت خالا ...

                                        موختار کوچه نین سونوندان گیریر ایچری یه .

موختار : آی اوغلان بونون نه یاشی وار سن بونا خالا دئییرسن ؟

                                        عده لت گئدیر گیریر ائوینه .                1

آجی اوغلان : موختاردائی کئفین سازدیر ها ، چکیب گلیبسن ائشی یه ها یوخ من اولوم ؟

موختار : جهنلم اول گئد گوروم اوغلان ، یئری گوروم ، دلی یه راست گلدیک بویون ، هاع ...

                                        فراست موختارین سسینه ائویندن چیخیر ائشی یه .

فراست : یئنیده سن بو حورمتلی آغ ساققال کیشینی اله سالدین دلی ؟ یئری گئد ائوی ییزه دا ، خوش گوردوک موختاربی ...

موختار : خوش گونون اولسون فراست خالا ...

فراست : وا ، آی موختاربی سن محله نین آغ ساققالیسان من سنین قیزین ، یوخ ، من سنین آروادین یئرینده اولا بیلرم  ، منه خالا دئمغین ندندیر ؟

آجی اوغلان : نده سوزدورور ، واه واه واه ،،، آبیر حیانی او خالاقیزیندان ، عده لت خالادان ، اویره ن باخ ...

فراست : یوخ سنی باشماق تاییلا وورماسام گئدن دئییلسن .

                                       فراست دوشور آجی اوغلانین دالیسینا .

                                       موختار حسرتله عده لتین قاپیسینا باخا باخا چیخیر ائشی یه .

                              موختارین قاپی یا باخماقیلا اوچ پئنجره بیردن آچیلیر و اوچ باش

                                                                                        چیخیر ائشی یه و موختاری گودور ، موختار گئدندن سونرا پئنجره لر

                                                                                         اوتولور .

                              عده لت چادرا باشیندا زنبیل الینده چیخیر کوچه یه ، کوچه نین خلوت

                                                                                         اولماقیندان امین اولور و دوشور یولا گئده بازارا .

                              نقداله کوچه ده چیخیر عده لتین قاباقینا و اونا سوز اوخویور .

                              عده لت اوتاندیقیندان باشین سالیر آششاغی دینمیر .

                              فراست گیریر کوچه یه نقداله نی توپارلی ییر و قاوالی ییر ، فراست

                              عده لته بوزارا بوزارا گیریر ائوینه .

                              رجب اله کوچه ده چیخیر عده لتین قاباقینا و اونا سوز اوخویور .

                              فراست گلیر کوچه یه رجب اله نی توپارلی ییر و قاوالی ییر ، فراست

                              عده لته بوزارا بوزارا گیریر ائوینه .

                              قضنفر کوچه ده چیخیر عده لتین قاباقینا و اونا سوز اوخویور .

                              فراست گلیر کوچه یه قضنفری توپارلی ییر و قاوالی ییر .

فراست : آی خالاقیزی آشیق آسچی گلن دئییل ، سن گل بونلاردان بیرین سئچ اونلا ائولن قورتولسون گئدسیندا .

عده لت : خالاقیزی به سن نیه ؟ سن کی بیلیرسن آشیق آسچی بیرگون گلجکدیر .

فراست : آشیق گلن دئییل .

                             موختار گیریر کوچه یه ، ایکی خالاقیزینی گورور ، فراستین سوزون

                                                                                        ائشیدیر ، دالدالانیر اونلارین سوزله رینه قولاق وئریر .

عده لت : خئییرسویله مزه دئدیلر خئییر سویله دئدی ...

فراست : خالاقیزی آغزیمی آچما ...

عده لت : وا ...

فراست : سنده بیلیرسن منده ، آشیق آسچی آدیندا آدام یوخدور ، اوزون دوزلدیبسن ، اولسادا  اولوب ، ایندی سنده منه تایسان ، ایکیمیزده دولوق ...

عده لت : گور بونو محله نین آغزینا سالا بیلرسن ؟

فراست : منیم سنیله ایشیم یوخدور آمما موختارکیشی گلسه سنه ساری سالارام ، پیسده سالارام .                                                                 2

عده لت : من موختارین آروادی اولام ؟ اولوموده او آپارا بیلمز ائوینه ، بونا باخ بونا .

فراست : مندن دئمک ...

عده لت : موختاردا سنین ، نقدیده ، رجیده ، او پیس قضیده .

فراست : موختارین بیرتوکون وئرمرم او اوچ پیس قوجانین وار _ یوخونا ...

عده لت : نه کی موختار اوندورد یاشیندا ایگیتدیر ! دئییرم هله موختارین یوخسا موختارین وارلیقینین بیرتوکون وئرمزسن اونلارا ؟

فراست : من موختارین اوزون ایسته ییرم ، اینانمی یاندا کور اولسون جانی چیخسین اولسون .

عده لت : دوز اولسا بویله اولسون ، دوز اولماسا ترسه سی ...

فراست : کور اوزون اولاسان بایقوش ...

عده لت : اولمویا سنده قومروسان ؟

فراست : هم قومرویام همده کهلیک ، هم ترلانام همده تاووس ، هله قوی گئدیم موختارا ...

عده لت : اینشالاه ...

فراست : گئتدا ، نیه به دوروبسان ، ویش ، بازار سنی گوزله ییر .

                                       عده لت چیخیر گئدیر ، فراست گیریر ائوینه .

                                 موختار سوزله ری ائشیدیبدیر ، شنگول اولوبدور ، دالدان عده لتین

                                                                                         گئدمه گینه باخیر .

                              دومرول یوخولو یوخولو ائویندن چیخیر و شککیله موختارین

                                                                                         چیلتیک چالماقینا باخیر .

قارانلیق  . ایشیق  .

                      صحنه 2 : بازار .

بازار  اهلی ( دومرول ، نقداله ، رجب اله ، قضنفر و آجی اوغلان : سوز اوخویورلار ) :

                                                                                             یاندیر اوغلان سن تندیری

                                                                                              یاپیم منده  آغ چوره گی

                                                                                             گتیررم  اله  اوره گی

                                                                                              او  اوره گی    بو  اوره گی !

                                                                                              بوش قالماسین ال لریمیز

                                                                                              ایشلسین دسته رلریمیز

                                                                                              نوخودو ائیلسین  لپه

                                                                                              آی گوزه ل  لپه آی لپه !

                                                                                             کئشگه بیرده  یئل  اسردی 

                                                                                              آپاراردی   یئل  کوله شی

                                                                                              قلبیرله  سئچدیم   لپه نی

                                                                                              سئویره م من نوخود اکنی !

                                                                                             قالالارین  خی مین  قازدیم

                                                                                              مسجیدلرین میناره سین

                                                                                              اوجالدارام اوجا داغ کیمین              3

                                                                                             یئتیررم گویه   هربیرین !

                                                                                              قاوالی  چال کی اویناسین

                                                                                              اوغلانلارلا  قیزلا  گه لین

                                                                                              هاممیمیزین  خوشلوقونا

                                                                                              چال سسی گلسین قاوالین !

                                                                                              آل الی ین بویوک  تویو

                                                                                              شاد  ائیله  شنلی تویو

                                                                                              اویناسین ایگیتله قوجا

                                                                                              چال  دوهولو چال  دوهولو !

                                                                                              اوخویورام  اوره گیمده ن

                                                                                               سئویرم   من  آداخلیمی

                                                                                              گئده ک  آلیم  آی قیز سنه

                                                                                               قیزیل اوزوکله قولباقی !   

                                                                                               دوگمه نی تیکدیم کوینه گه

                                                                                               یاراشیر  ای نینده  یارین

                                                                                               دوگمه لی  پالتار تیکرم

                                                                                               هاممی گئیسین هاممی گئیسین !

                                                                                               تکه ر   گئدر آرابایلا

                                                                                               او اووادا   بو اووادا

                                                                                               دولانار  بیزیم  زامانا

                                                                                               بیزیم    زامانا    زامانا !

                                                                                              زامان دولانسا  چیخار

                                                                                              اولدوز دالیندان آیی میز

                                                                                             گونه ش گئدر اولدوز گلر

                                                                                              ایشیق اولسون چول لریمیز !

                                          عده لت گیریر ایچه ری یه .

هاممی : گل آپار قالمادی .

آجی اغلان : به قالمادی نه یی آپارسین ؟

نقداله : گئد اویانا فوضول ، گور کیم گلیب بازارا ، بیزیم عده لت خانیم ، نه لازیمدیر آی جانیم ؟ دئییرم گئدیب او پیس رجیدن یا شارلاتان قضیدن

            آلمی یاسان ها ...

آجی اوغلان : ایراق سندن نقداله جان ، ایراق سندن .

نقدی : اوغلان گئتدا .

رجب اله : گل بویانا عده لت خانیم ، خوش گلیبسن بیزیم راستایا ، دئسیدین اوزوم گتیرردیم قاپی یا ، نه لازیم سن گلسن او موندار نقدینین یادا او انتر  4

                   قضینین حوجره سینه ؟

آجی اوغلان : ایراق سندن رجب اله جان ، ایراق سندن .

رجب اله : اوغلان گئتدا .

قضنفر : به به عده لت خانیم ، دئسیدین قوربان کسردیم ، بازارا ایشیق سالدین آی خانیم ، دئییرم او یالانچی رجینی اوتور ، نقدیده کی بللیدیر نئجه گوزو

              چیخمیش ایتدی ...

آجی اوغلان : ایراق سندن قضنفر جان ، ایراق سندن .

نقدی : اوغلان گئتدا .

دومرول : عده لت خانیم خوش گوردوک ، حوجره اوزویوزوندور ...

عده لت : هله آچ حوجره نی ،،، دومرول خانی هرکیمسه نین گویولو ایستسه گرک گله بازاردا گوره ، تاپیلمی یان اولدوزدور بولوت دالیندا  .

دومرول : توکومدن یاندیران اولسا قاناد آچیب اوچوب گئدرم یانینا ، چاغیران یوخ بیزی .

عده لت : یوخودان ماجال تاپسا دومرول خان چاغیرانلارین سسین ائشیدر .

دومرول : ...

عده لت : خینا آلماقا گلمیشم ، ساچلاریم آغارمامیش دئدیم آلیم ساخلاییم ، تاپیلماز اوندا .

دومرول : هله اوزامانا چوخ قالیر سیزین قارا ساچلاری ییز آغارا .

عده لت : عومور بویو قیسسا اولار دئییبلر ، یاخچی گونونده عومورو آز ، قورخورام آغارا ساچلاریم سوراغ اولمویا بیزیم اوره ک توتان ...

دومرول : آشیق آسچیدان ؟

عده لت : گلمیشدیم بیر سوز دییم سیزه دومرول خان ...

                                                                 موختار گیریر ایچه ری یه .

هاممی : سلام موختار بی .

عده لت :  سونرا گلرم ، هله گئتدیم .

                                                                 عده لت ایسته ییر گئدسین ، موختار قاباقیندا دورور  .

موختار : هارا بو تئزلیکده عده لت خانیم ؟ قالین هله ، هئچ نه آلماییبسیز کی .

عده لت : سونرا گلرم آلارام موختاربی ...

موختار : آشیق آسچیدان سوز سوراغ نه وار بوگونلر ؟

عده لت : آز چکر اورالاردا قالماغی ، گلر بوگونلر .

موختار : بری گل ایشیم وار سنیله ،،،،،،،،،،،،،،،،،،،،،،،،،،، دومرول گئد ایشی ین ، گلدا به سنده .............................................

عده لت : تئز دئسز گئدرم ، باخین نئجه پیس باخیرلار !

موختار : آنلامیرلار پیس باخیرلار ،،، آمما بیلسلر ایندی یجک باشلارینا یئکه بیر بورک کئچیب بونداندا پیس باخارلار !

عده لت : آنلامیرام ندن دانیشیر موختاربی ...

موختار : منیم کیملیگیمی بیلیرسن ؟

عده لت : باشا دوشمورم !

موختار : باشادا دوشرسن ، من محله نین نه چیسی یم ؟

عده لت : آغ ساققالی !

موختار : بویو دوز ،،،  بو محله ده منیم سوزوم اوسته سوز یوخدور ، گرکدا اولمویا ، ندن خوشوم گلسه خوشا گلملیدیر ، ندن خوشوم گلمسه پیس ،

             هم اوزومه هم اوبیریسی لره ،،،  بیر آدامین حاققی یوخدور سویوندا من دئمه میش ایچه ،،، آنجاق سوزوم کئچیر ،،، چوخدان بویله دیر ،         5

                 بونداندا سونرا گرک بویله قالا ، آنلاییرسان سوزلریمی ؟

عده لت : هاممیسینی یوخ ...

موختار : آنلادارام ، باخ عده لت ، من ایندی یجک دوزدوم گورم سنین او آشیق آسچین نه زامان قاییدیر گلیر ، آزدان چوخدان شک ائیلمیشدیم سن

               یالاندان بو آدی دوزلدیبسن ، قالمیشدیم امین اولام ، ایندی امینم سن بیزه یالان سویله ییبسن ...

عده لت : من سیزه نه یالانی  ...

موختار : قولاق آس ...

عده لت : موختاربی منیم ...

موختار : عده لت بیر کلمه ده دانیشسان ووراجایام آغزی یین اوستوندن ...

عده لت : آخی ...

موختار :  نه آخیسی ؟ هان ؟ دینمه قولاق آس سوزومه ، بیر سوز دئملی دئییلسن داها ، بسدیر یالان ،،،  سن دولسان ، خالاقیزین فراست کیمی ، بیلیرسن

               فراست خالاقیزین منه وورولوبدور ، وورغوندور منه ، آمما منیم گوزوم سنین دالیندادیر ، ایسته سیدیم چوخدان اونو آلمیشدیم ، ایندی داها

               اوزوم ایستدیغیم زاماندیر ، بیلمیشم سنه یئتیره بیلرم ، خوشوم گلیر اوزون اوز قیچینلا گلسن منیم ائویمه ، خوشوم گلیر بیر خانیم کیمی آپارام

               ائویمده سووگولو ائیلی یم سنی ، سنه عاشیقم ، بونلاری دئدیم بیلسن داها آیری باهانان قالمی ییبدیر ، ایندی آنلادین کیم کیمه دیر ؟

عده لت : بو سوزلر هارادان چیخیب ؟ بونلاری دئییبلر منیم ائویمی ییخالار ، منیم اریم آشیق ...

موختار : بسدیر دئییرم یالان سوزلر ، بو سوزلری خالاقیزین دئییبدیر ، یوخ ،  اوزون دئییبسن ، اونلا کوچه ده دانیشاندا اوزوم ائشیتدیم  ...

عده لت : ...

موختار : گورورسن ، داها بسدیر یالان ، گئد ائوه ، گئد سوزلریمه فیکیرلش ، خوشوم گلیر من ایستدیغیم ایش تئز باشا یئتیره ...

عده لت : وای منه ، وای سیزه ...

موختار : شادلیغی یان شووه نمه ، من گئدیرم ، سنده گئد ،،، بودا یادیندا قالسین بو محله منیم قافامدان چیخان فیکیرلرله دولانیر ، خوشوم گلیر آنلی یاسان

               سوزومون ایچی ندیر ،،،،،،، گلرسن آلارام سنی ، گلمزسن سن یوخ سنین خالان قیزین فراستی آلارام عده لت جان ، آمما اوندا سنه چوخا

               باخار ،،،،،،،،،،،،،،،،،،،،،،، نقدی ، رجی ، قضی گلین ایشیم وار سیزیله .....................................

                                                                 موختار چیخیر ائشی یه .

                             نقداله ، رجب اله و قضنفر موختارین دالیسیجاق گئدیرلر .

عده لت : دومرول خان ............................

دومرول : نه اولدو سنه ؟

عده لت : خوشوم گلمی ین بالا گلیر باشیما ...

دومرول : نه دئییردی ؟

عده لت : یاتماقدان واقتین اولسایدی بورا یئتیرمزدی ایشلر ...

دومرول : ...

عده لت : سنی سئویردیم ، اوره کدن ، جانیملا ، محله یه گلنده باخدیم محله موختارلا او اوچ قوجانین الینده ، آنلادیم اونلار دولاندیریر بو محله نی ،

                 ایستدیم قاییدام گئدم ، بیر فراست ساخلادی بیلمی ، بیرده ،،، بیرده ،،، بیلیردیم محله ده دئسم قیزام موختارین الیندن قورتولا بیلمرم ، اونداندا

                 قورتولسام یا نقدی یا رجی یادا قضی صاحابلاناجاقدیر بیله می ، ایستمدیم اونلارین اولام ، ایستدیم گئدم ، گئده بیلمدیم ،،، آخی ،،، آخی ،،

                 دئدیم قالارام ، قالارام یئتیررم بو ،،، دئدیم هاممی یا دییرم آشیق آسچی آدیندا اریم وار ، گئدیب دولانماقا ، بیرگون قاییداجاقدیر ، اوزومه

                 دئدیم ائیله بیرگون بیری اولار اویله یاراتدیغیم آسچی اولار ، آس ائللرینین آشیقی اولار ،،،،،،،، گئدنده سنی گوردوم ، سنی گورنده دئدیم

                 اوزودور ، آختاردیغیم اوغلان بودور  ، آمما سنین یاتماقدان ماجالین اولمادی سوزلریمی ائشیدن ، اولمادی ، اولمادی ..........................

دومرول : سن منه آغلاییرسان ؟

عده لت : ایندی موختار بیلیب ارسیزم ، ایسته ییر منی اله گتیره ،،،،،،، ایندی بیلمیرم نه ایش گرک گوروم ،،، کئشگه سنی گورمویردیم ، کئشگه  ، اوندا

                گلدیغیم کیمی راحات چیخیب گئدردیم ،،،، وای منه ، وای ،،،  ایندی داها سوزوم یوخ گئد یات ....                                               6

                                                                 عده لت چیخیر ائشی یه .

دومرول : عده لت ،،، عده لت خانیم ..........................................

آجی اوغلان : ایلک دئدیغین عده لتده چوخ سوز واریدی ها دومرول خان ، دئمه بیلمه دیلر  ( آغزیلا توی هاواسی چالیر ) ....

قارانلیق   .  آل  ایشیق  .

                                                        صحنه 3 : محله   .

                                 موختار و اوچ یولداشی : قضی ، رجی و نقدی دانیشیرلار . 

موختار : عده لت بو محله یه باش آششاغی و خانیملار کیمی گلدی ، هاممی اوندان و اونون نیجابتیندن خوشو گلدی ، بویونه جکده آبیر حیا ایله بیزیم

              محله ده قالدی ، بویون بیر سوزلر ائشیدمیشم ، دوز اولسا وای بیزیم محله نین حالینا ، او بورانی فیسادا چکر ، اونا اوچ گون فورصت وئرمیشم

              آشیق آسچی هارادا اولسا تاپا گتیره ، گتیره بیلمسه اوندان بوشانا ، بو ایشدن سونرادا آیری ایش گوره بیلمز ، من بو سوزلری اونا دئمیشم ، او

              ایستسه یالان دانیشا یا قاراچیلیق سالا دوز اولمویان سوزلری منیم آغزیمدان چیخمیش سایا گرک قاباقیندا دوراسیز ، آخی بوجور اولسا یانی کی

              او ایسته ییر منیم قاباقیمدا دورا ، منیله قاباق قاباقا دورا ،  اونون منله دوشمغینین تاوانی محله ده آبیرسیز اولماقی و ترسه ائششکه مینمه غیدیر ،،،

              آمما ایه آدام اولا و او یالان آشیقدان بوشانا اونون قوللوقوندا اولاجاییک ،  او بوشانسا بیر نئچه موددت اوزوم اونو صیغه ائیلرم سونرادا سیرایلا

              سیز ، صاحابسیز قویماریک قالا ، اولمه میشیک کی بیر دول آرواد تک قالا اوز باشینا ، صاحابسیز ، ارسیز ، اوندا بیزیم اوزوموزه سوز گلر ،،،

              دئییم بیله ییزه دئدیکلریم گرک سونا چاتا ، خوشوم گلمیر بو ایشلردن آیری ایش باشا یئتیره ،،، خوشوم گلمیر آرا قاریشا ، بیلدیز نه اولدو ؟           

ایشیق  .

                             نقداله ، رجب اله و قضنفر بیر تومار اللرینده اوخویورلار .

نقداله : عده لت خانیم سنه موختاربی اوچ گون فورصت وئرمیشدی ...

فراست : ساق اولسون موختاربی .

رجب اله : فورصت وئرمیشدی گئده سن  اری یین تاپیب گتیره سن ...

فراست : سوز بوندادیر ها ، یاشاسین موختاربی .

قضنفر : و بو ایشی گوره بیلمسن اوندان بوشاناسان .

فراست : سیزده ساق اولون بو تومار اوخوماقلا ، اینشالاه بوشانار گلر سیزین بیری ییزین آروادی اولار  .

نقداله : بوگون اوچ گون فورصت قورتولدو ...

فراست : قورتولاجایدی دا .

رجب اله : و سن اری یین تاپیب گتیره بیلمدین .

فراست : تاپمالی اولسایدی بیزیم الیمیزی پیشیک یئمیشدی ؟

قضنفر : بیز گلمیشیک سنی اوندان بوشاندیراک  و سنی ...

نقداله : و سنی ...

رجب اله : و سنی ...

اوچو بیرلیکده : و سنی اوزوموزه  ( موختارین ایچری یه گیرمگین گورورلر )  یانی یوخ ، موختارا آلاق .

فراست : کول باشی ییزا بو تومار اوخوماقلا  .

                                 موختار گیریب ایچری یه .

موختار : سوزون ندیر ؟

عده لت : من بو اولکه دن گئدیرم .

فراست : آهان ، بودور ها ، دوزوده بودور آی خالاقیزی  .

موختار : اولمادی ، سن بیزه یالان سویله ییبسن و گرک تاوان وئره سن ، من گئدیرم سیز بیلیرسیز نه ایش گرک گوره سیز  ،،، فراست خانیم منیله گل . 7

فراست : ویی ویی ویی ، قلبیم یاتماسا یاخجیدیر واللاه ، گلیم آقام گلیم ...

                                                                 موختار و فراست چیخیرلار ائشی یه .

قضنفر : حوکم بودور سن گرک اوز آبیرسیز اولماقی یین محله آداملارینا آچیب دی یسن ...

نقداله : سونرا ترسه ائششکه مینه سن ...

رجب اله : و سونرا محله ده دولاناسان ...

عده لت : رحم ائیله یین منه ، منیم هئچ کیمسه م یوخدور ، آخی بو نئجه قانوندور ؟ نئجه حوکمودور ؟

اوچ کیش بیرلیکده : قولاق آسسان سویله ریک سنه ، قولاق وئر ( اوخویورلار ) :

          اولسا خائین خانا هرکس

          یا اولوم وار ، یادا محبس

          بیرده سیزدن چیخماسین سس

          اوغورو بیدینلر !

          بوگوندن بیرجه اینسان

          خانا قارشی ائدسه عوصیان

          یا اولوم وار ، یادا زیندان

          عفو ائدیلمز خائین اینسان

          وئرمه ریک بیز بیرده فورصت چیخسین عوصیانلار

                                خی یانت پرور اینسانلار

          بو یولسوز اوغورو نادانلار

                                بو جاهیل ، بو قودورقانلار

          کسیلسین ، محو ائدیلسینلر !

           خی یانت چیخسا بیرکسدن

          الیندن یا دیلیندن

          محو ائدیلسین ، محو ائدیلسین ، محو ائدیلسینلر !

                              آجی اوغلان گلیر ایچری یه .

آجی اوغلان : اده حاییف دئییل سیز کوراوغلو اوپئراسیندان سوز اوخویاسیز ؟! واللاه حاییفدیر ،،،، ایندی کی سیز اوخودوز ، قولاق وئرین جاوابا :

               آخ نئجه من گولمه ییم بوجور آخماق سوزلره

                               دلی ائدیب عده لت ، سالیب سیزی دوزلره

                               عده لتین اوستونه گوندریبدیر اوچ عسگر ؟!

                               عده لتی توتماغا کیفایتدیر بیر نفر !!!

قضنفر : اوغلان آجی گئد ...

نقداله : گئد جهنلم اول ...

رجب اله : گئد و بیزه دولاشما ...

قضنفر : یوخسا ...

نقداله : نه گورسن ...

رجب اله : اوزوندن گوروبسن ...

قضنفر : بیز حیرسلنسک ...

نقداله : سنی آرادان گوتوره ریک ...

رجب اله : یانی سنه چوخا باخار ،،، اوزونده هئچ بیلمزسن هارادان یئییبسن ...                                                                               8

قضنفر : ایندی آدام اول گئد ...

نقداله : گئد ...

رجب اله : نیه به دوروب بایقوش کیمی بیزه باخیرسان بایقوش ...

آجی اوغلان : دورموشام بویوووزا باخیرام ، دوغروداندا گرک آنالاریزا تبریک دی یم سیزی دوغماقلارین گوره  ، دئدیز هارادادیرلار آنالاری ییز ؟

                               قضنفر ، رجب اله و نقداله دوشورلر آجی اوغلانین دالیسینا .

                            آجی اوغلان قاچیر ائشی یه .

                            دومرول گیریر ایچه ری یه و اوچ کیشینین قاباقیندا دورور .

اوچ کیشی بیرلیکده : هان ؟ نه دیر باخ ؟ یئنیده تاپیلدین !؟

دومرول : ساقلیق ، منده ائشیتدیم نه اولوبدور ...

اوچ کیشی بیرلیکده : ائشیتدین کی ائشیتدین ، ایندی نه اولسون کی ؟

عده لت : دومرول خان سن قایید گئد ...

اوچ کیشی بیرلیکده : ائشیتدین !؟

عده لت : من ایسته میره م سن منه کومه ک ائیلی یسن !

اوچ کیشی بیرلیکده : دا گئددا ...

دومرول : من گلدیم سیز کومه ک ایستسز سیزه ...

اوچ کیشی بیرلیکده : پس بوجور ، آمما بیزه هئچ نه لازیم دئییل ، گئد سن ایشی یین دالیسیجاق باخ .

دومرول : نه دئسز ائیلرم ، منیم بوندان آجیغیم گلیر ، اوگون بو منه دئدی مندن نیفرتی وار ، ایندی منده ایسته ییرم زهریمی بونا توکه م ...

عده لت : ایندی کی بو گلیب بورایا سیزه یاردیمچی اولا من راضی اولدوم ائششکه مینه م دولانام محله نی ...

دومرول : سوزون دوزو ایسته ییردیم سیزین بو ایشلری بوجور تئز باشاآپارمقی تبریک دی یم و بو ایشی ، یانی ، عده لتی که بیزیم محله نین

                باش آششاغی اولماقین ایسته ییردی اوزوم میندیره م ائششکه و محله ده دولاندیرام .

اوچ کیشی بیرلیکده : اوغلان گئتدا ...

قضنفر : بیز اوزوموز بونون ترتیبین وئرریک ...

رجب اله : بیز ایشیمیزی باشاریریک ...

نقداله : ایشیمیزده دوزدور ها ، بیر چئشمه گورسته ریم ؟

دومرول : یوخ ساخلا گوسته ر او ،،، او سیزی سئومی ینلره ،،، باخین من بیلیرم سیزین ایشی ییز دوزدور ،،، آمما بو بیر قادیندیر ، سیز بونون باشینا نه ایش

                گتیرسز حاقلیسیز آمما محله ده بونو دئمزلر ، محله ده دی یجکلر سیزین مورووتی ییز اولمادی و بیر قادینا رحم ائیله مدیز ، سیز بونو وئرین

                 منیم الیمه ، من آپارارام و سیز دی ینی ائیلرم ، سیزین آدی ییز خاراب اولماز منیمده اوره ییم سووویار ...

اوچ کیشی بیرلیکده : نئجه ؟!!!!!!!!!  هن ! هن ! هن !

نقداله : یاشا ...

رجب اله : یاشا ...

قضنفر : یاشا ...

عده لت : یوخ منی تاپشیرمایین بونون الینه ، یوخ ...

دومرول : بیزیم تووله ده بیر ائششک وار ، عده لت گئد و مین اونا ، منده گلیرم سنیله اونو دولاندیرام ، دوش یولا .

                                                                 عده لت و دومرول گیریرلر دومرولون ائوینه  .

رجب اله : حاییف اولدو ...

قضنفر : دوغروداندا ...

نقداله : بتر بیر ...

قضنفر : سوس اوغلان ...                                                              9

رجب اله : حیاسیزلیک هر یئری آلدی باخ ...

قضنفر : یاخچی تئز قاباقین آلدیک هله ...

نقداله : اده سیز نه دانیشیرسیز ؟ ایچریده دانیشدیغی ییزلاردان نئچه سین دئییم ؟

رجب اله : اوغلان اوز سوزلری یین بیزیم آدیمیزا وورما ...

قضنفر : عالم و آدم بیلیر من نئجه یاخچی آدامام ...

نقداله : پس عده لتین یاخچی یئرلریندن دانیشان منیم بابامیدیدا ؟

قضنفر : بابان قالسا هیه ...

رجب اله : قالماسادا  !!!

نقداله : ووی ؟!

قضنفر و رجب اله : واللاه ...

                                 بیر آتین آیاقلارینین قاچماق سسی گلیر ، سونرا ، جاماهاتین سسی :

جاماهاتین سسی : دومرولدور ،،،،،، اودا عده لت خانیمدیر ...

نقداله : ائیله بیل قورتولدو ...

قضنفر : هن دا قورتولدو ...

رجب اله : آخی ...

نقداله : ایندی جاماهاتین گولمغینین سسی گلر ...

قضنفر : گولمک و عده لتی مسخره ائیلمکلری نین سی ...

رجب اله : آخی ...

                                                                                      آجی اوغلان گیریر ایچری یه .

آجی اوغلان : دومرول ایله عده لت دال قاپیدان چیخدیلار   بیر آت ایله گئتدیلر .

قضنفر : آیری آیری ...

رجب اله : آت اوسته ده یوخ ...

نقداله : اششک اوسته ...

آجی اوغلان : آت اوسته ...

اوچ کیشی بیرلیکده : اششک اوسته ،،، دومرول بیزی اونا ساتماز .

آجی اوغلان :  دومرولو یاشاتدی ، دومرولو بویوتدو بیر قارامان خالق ، دومرولده امک ایتیرمدی ، باخین توزا ، دومرولون آتی قاچیر عده لتده دالیندا

                        اوتوروبدور ،،، اوچدو قوش ، الی ییزدن چیخدی سفیه لر .

اوچ کیشی بیرلیکده : دلی باشلادین یئنیده ؟

آجی اوغلان : گئتدیلر و گوزدن ایتدیلر ،،،،، سیزده دورون بورادا سفیه له یین ،،، ایندی موختار گلر آناییزی ...

اوچ کیشی بیرلیکده : اده کس سسی ییندا ، کس ...

                                   اوچ کیشی دوشورلر آجی اوغلانین دالیسینا .

                                       سون  .

        90.08.22