اولاجاق ؟

گئده نده   بیلیره م   گویده   اوچوجام

قانادیم  آچیلیب  نئجه   اوچماسین !

خه یالین  مئیدانین   آتلا   چاپاجام

آتچیلار  یاباندا   نئجه   چاپماسین ؟

گوروشله ر  اولاجاق  رویامدا  بوگون

گوروشده   ال له ریم  الده   اویناسین !

رویامدا  گئده جه م  گولزارا  قوناق

گولزاردا   بولبولون  قانی   آخماسین !

باغلاردان  ده ره جه م   آلمانی  ناری

وئره جه م  یاریما  یئمیش  قالماسین !

گویله رده  بولود ته ک   یاغمور  اولاجام

داغلاردا  چیچه کله ر  سوسوز  یانماسین !

یانقاغدان   آلاجام  بالاجا  بیر اوپوش

بورجو  وار  بیله مه   بورجو  باتماسین !

گوره سه ن    اینجیدسه م   قاچار  یانیمدان ؟

اینجیدمه م   بیله سین  قاچان  اولماسین !

اوزومده ن   گئده جه م   گوزون  گوره نده

گوزومده  به به ییم   یاشلا  اویناسین !

گوزونده  وار  اونون   پارلاق   اولدوزلار

گوزله ریم   گونه شه   نئجه   باخماسین !

به سیمدیر   گوروشو   یورقون  چاغیمدا

سوزومو   دی یه جه م    نیسگیل   قالماسین !

تئلینه   چه که جه م    داراق  گوروشده

ساچیندان ساچینا  تئلله ر   اویناسین !

تئلینده   قارانلیق   گئجه له ر  یاتیب

گئجه ده   یول بیلمه ز   نئجه   ایتمه سین ؟ 

آلاجام    کامیمی  لالا   دوداقدان

بال   سوزه ن   دوداقدان   کیمدیر   اوپمه سین ؟

گئده نده  بویله دیر  بیلیره م  حالیم

خه یالدا   کیم   دئییر  ایچیم   کئچمه سین !

گه له نده   اولاجاق   احوالیم  خاراب

کیمسه له ر  بونو  کاش  یالان   بیلمه سین !

ته جروبه   گوسته ریب   گه لمه ز  اولاجاق

گوزله ره   گورسه نمه ز   نئجه   ایتمه سین ؟

گه لمه سه   بو  سیرا   کوسه جه م  اوندان

کونولوم  یارادیر  نئجه   کوسمه سین ؟!

گوزه لیم   گه ل   قورتار  مه نی   دارلیقدان

ایشیمه  قوی  بوگون    ائلله ر  گولمه سین !