قیسسا ناغیل : قوشلار ...

قیسسا ناغیل : قوشلار ... 

اوشاقلار  بیربیر ، ایکی ایکی ، نئچه نئچه    اوینویا اوینویا   گیردیله ر   بوستانا . نئچه سی    اوخویوردولار  ، نئچه سی    ال اله   وئرمیشدیله ر ، نئچه سیده   هاممیدان    قاباقدا   گئدیب    یئتیشمیشدیله ر  ، خانیم موعه للیم    قاباقدان    دئمیشدی    هارادا    ییغیشیب    اوتوراجاقلار .

هاوا   چوخ   گوزه ل   و گوی  آچیقیدی ، اورادا _  بورادا   آق بولوتلار    واریدی   آمما   دئمه ک    اولاردی   گوزه ل   گونیدی . یاشیل   چیمه نله ر   گونون    آلتیندا    پاریلدی ییردیلار  ، فه وواره له رده     سویو    آتیردیلار    گویه . قوشلار   آغاجلارین    اوستونده   اوتوموشدولار    اوخویوردولار .  گونون   شه کیلی    دوشموشدو    گوله    و   گول   اورادا   پاریللی ییردی .

اوشاقلار    چوخ    سئوینیردیله ر کی   گه لیبدیله ر   بیر   بویله    گوزه ل    بوستانا . اونلاردا    قاریشمیشدیلار   قوشلارا    ماهنی    اوخویوردولار  . خانیم موعه للیم     هاممیدان   سونرا   یاواش یاواش    گه لیردی ، نئچه   اوشاقدا   اونون   یانیندا   گه لیردیله ر . هاممی    یئتیشمیدیله ر    او  یئره  کی   گه ره ک    اورادا    ییغیشیب  اوتوراردیلار . اوشاقلار     اورادا  _ بورادا    اوتوردولار . نئچه سی   ته خت    اوسته ،  نئچه سی    یئرده ، نئچه سی   آغاج   آلتیندا  ، ها بویله   اوبیریسیله رده    اویاندا _ بویاندا   اوتورموشدولار  .

خانیم موعه للیم    هامینی   اوتورداندان    سونرا   باخیب   اونلارا    گولدو ، اوشاقلاردا   اونلا   بارابار  گولوردوله ر . خانیم موعه للیم   سونرا   باشلادی   اوشاقلارا   دانیشماقی .  او    اولو   تانرینین   آدین    دی یه نده ن    سونرا   اوشاقلارا    دئدی  ،،، آی   مه نیم     گوزه ل    چیچه کله ریم ، نارداناله ریم ، نازلاریم ، گوزه ل    بالالاریم     بو    بوستان    بو   یاز   هاواسیندا    چوخ    گوزه ل   بیر   یئردی    اویناماقا ، گه زمه قه ، دولانیب    هاوا    عه وه ض    ئله مه قه ، آمما    بونلاردان    قاباق   مه ن    سیز  گول له ریمی    ییغدیم    بو  موجه سسه مه نین    آلتینا   کی   بیر   ناغیل   دی یه م   سیزه    کی   سیزده    بیله سیز   تانری    بیزله ره    نه له ر   وئریب   و  بیزله ر    اونون    وئردیکله رینه    نئی نه مه لی ییک   ، تانری    یئری    گویو   بیزله ر    اوچون    یارادیب   کی   بیز     اینسان   بالالاری    بو   یارانمیش    دونیادا   یاشی یاق    و   اوز    یاشاماقیمیزلا    بو   حه یاتین    گوزه للیکله رینی     چوخالداق  ، تانری    هه ر   نه مه نه کی    بیزه   یارادیب    گوزه لدیر ، بیزده   گه ره ک    او   یاراددیقی    گوزه للیقی    گوره ک   و   اویره شه ک    کی    تانری    ته کین    گوزه للیک   یاراداق .

خانیم موعه للیم   باخدی    اوشاقلارا ، اوشاقلار  هاممیسی    اونون   سوزله رینه    قولاق   آسیردیلار . او   سوزونون   دالیسین    توتوب   دئدی ،،، مه نیم   ماراللاریم    بو   بوستاندا   گوزه ل    گول له ر  وار ، گوزه ل  آغاجلار    و    گوزه ل   چیمه ن    وار ،  قوشلاری   گوزه لدیر ، گولونون    سویو   آچیقدیر   ، بونلاری   تانریمیز     گوزه ل    یارادیبدیر ، آمما     اونون    یاراددیقلاریندان    سونرا    بورادا    بیر    آیری     گوزه للیکله ر     واردیر   کی    آداملار   اونلاری    دوزه لدیبله ر  ، بو   ایشیق سالان   چیراغلاری ، بو سو  لوله له رین ، بو   اوبالاری   آداملار   دوزه لدیبله ر ، هاممیدان   یاخشیدا  کی   اونلارین   هونه رین    گوسته ریر    بو   موجه سسه مه له ردیر   کی    مه ن    ایسته ییره م    سیزه    اونلاردان    دانیشام  ، هونه ر   اینسانلار   اوچون   بویوک   بیر   شه ره فدیر ، هونه رلی    اینسان   تانریدان   بیر  نیشانه سی  واردیر ، اودا   یارادماقدیر  کی  هونه رلی    اینسان   اونو   تانریدان   اویره نیبدیر   و    باشاریر  .

خانیم موعه للیم    سونرا    اوشاقلاردان    ایسته دی ، بیربیر    موجه سسه مه له ره   باخالار . اوشاقلار   اونلارا   باخاباخا    خانیمدان    دانیشیب   و   اوز   سوآللارین    سوروشوردولار ، خانیم موعه للیمده    اونلارین    جاوابلارین    وئریردی .

خانیم موعه للیم   بیر   موجه سسه مه نی   گوسته ردی   و   اوشاقلاردان    سوروشدی    بونلار   نه یین    موجه سسه مه سیدیر ؟ اوشاقلار   هاممیسی   بیرده ن     دئدیله ر   بونلار   بیر   قارتال   ایله   ایلاندیر   کی   بیربیریله    ساواشیرلار   ، اوسته کی    قارتالدیر   و اونون    قیچینا    دولاشان    ایلان  ،،،،،، خانیم موعه للیم    اونلارا    ساغ اولون    دئدی    و   اونلاردان    ایسته دی  کی   بو  موجه سسه مه نین   ناغیلینا  قولاق    آسالار ، اوشاقلار   ناغیل   آدین   ئشیده نده    سئویندیله ر    و   هاممیسی    ییغیشدیلار   کی     ناغیلی   ئشیده له ر  ، خانیم موعه للیم   اونلارا   قارتال   ایله    ایلانین    ناغیلین   بوجور    باشلادی  ...

بیری    واریدی    بیری   یوخیدی     تانریدان   سونرا    هئچ کیمسه   یوخیدی ، بیر  گوزه ل   مئشه   واریدی  کی   او  مئشه ده   هه ر    قوشدان      1   واریدی ، او   مئشه   قوشلارین   مئشه سیدی ، او  مئشه ده   گووه رچین ، بایقوش ، قارقا ، بولبول ، قیرقی ، بیلدیرچین ، قارتال ، طاووس ، آغاج ده له ن ،  و   سئرچه    بیربیرین   یانیندا   صولح و صه فایلا    یاشی ییردیلار ، اونلاری   غه می   که ده ری    فیکیرله ری   یوخیدی ، اونلار   اوز   مئشه له رینده    حه یاتدان     لیذذه ت    آپاریردیلار    و   گوزه ل    گوزه ل    سوزله ر    اوخویوب     بیربیرله     اوینویوردولار .

بیرگون     بولبول    گولو   اوپدو    دئدی   مه ن   گئدیره م   گولده ن    سو   ایچه م    آخی   چوخ   سوسوزام ، گولده    اونو    اوپدی    دئدی   گئد    و     اوزونده نده     موواظیب    اول ، بولبول    گولده ن    آیریلیب    و   یولا   دوشدو    گئددی . یولدا    قوشلاری    گوروردو   و   اونلارلا    دانیشیب   و     حاللارین    سوروشوردو . گووه رچینی    گوردو    گویده    مایاللاق    آشیر ، بایقوش    آغاج   اوسته   اوتوموشدو ، قارقا    قاریللی یا   قاریللی یا    گئدیردی ، قیرقی   توولو   اوچماقدایدی ، بیلدیرچین   اومموشدو   اوزونده   فیکیر   ئلی ییردی ، قارتال   قانادلارین   یاغلی ییردی ، او   بولبوله    دئدی    ایسته ییره م   گویون   سونونا   قه ده ر    اوچام ، بولبولده    اونا   دئدی    بو   ایش    سه نه     لاییقدیر ، طاووس   آینا   قاباقیندا    اوزونه   باخیردی ، آغاج ده له ن    چوخلی   سه س    سالمیشدی   آخی   آغاجی   ده لیردی ، سئرچه ده    بوغدا    ده نه سی    ییغیردی ،، بولبول    گئده گئده    اونلاری    گوروردو    و    گاهداندا      اونلارلا     دانیشیردی .

بولبول    گئددی     یئتیشدی    گولون    اوستونه  .  ایسته دی    سو   ایچه ، آمما    بیرده فعه    گوردو    سودا    بیر   شه کیل    دوشوبدیر ، باشین   قووزادی   باخدی    گولون    اوتایینا ، چه کیلدی   دالا ، قورخموشدو ، نه فه سله ری    سایی یا    دوشدو ، آخی    بیرده نه    یئکه    ایلان   اوتورموشدو   سویون   باشیندا    گولون    اوبیریسی    طه ره فینده ،، عه جه ب    حیکایه تیدی    بو ، آخی   اوزاماناجاق    گورسه نمه میشدی    قوشلار   مئشه سینه   بیر    آیری    حئیوان    گه له ، اودا    ایلان ، یئکه    بیر    ایلان .

بولبول    ایسته دی   ایلان   اونو    گورمه میشده ن   قاباق    قاییدا   قاچا   گئده ، آمما   اوز   اوزو  ایله   دئدی    هارا   قاچیم   گئدیم ؟ مه ن    گه ره ک   اوبیریسی    قوشلاری    گوره م    و   اونلارا   دی یه م    نه   اولوبدیر ، گه ره ک     بو    ایلانی    بورادان    قاوالی یاق ، بورا    بیزیم    مئشه دیر    و    ایلان   بورادا   بیزله ری    یئمه کده ن    سونرا    بیزه   خئیری   اولابیلمه ز   .  ایلان    ئله    اوجور   اورادا    اوتورموشدو ، بولبول    اوزونه    دئدی   نه ده    پیسدیر ، نه ده     یئکه دیر  ، گئدیم    یولداشلاریمی    چاغیریم   گه لسینله ر    بونو   قاوالی یاق .

بولبول    یولا   دوشدو    قاییددی  کی    قوشلارا   دی یه    نه   گوروبدیر . یولدا    نئچه    سئری    ییخیلدی ، دوردو  آیاقا    اوچدو ، قانادلاری   نئچه   آغاجا   ده یدی    یارالاندی    آمما   او   گئدیردی ، آخی   ایلان   اورادا   قالسایدی   داها    اوندا   مئشه    قوشلار   مئشه سی   قالمازیدی  ، او    اوز   اوزونه    فیکیرله شدی     ایلان    آجیخاندان    آجیخانا    اونلاری    توتوب    یی یه جه کدی ، بولبول    نه   گوجو   واریدی  اوچوردو   کی   بو  ایشین اولمامازدیقینا   گوره    گئده   و قوشلاری   باشا   سالا .

بولبول    گئده نده   سئرچه نی   گوردو  و   اونا   دئدی کی    نه   اولوبدیر ، سئرچه    قورخدو   و   قاچدی   گئددی   یواسیندا   گیزله ندی   .  بولبول   ته عه ججوب    ئله دی   آمما   دورمادی   یولونو   توتدو  گئددی . آغاج ده له نی    گوردو    اونادا  دئدی   نه   اولوبدیر    آمما    او   دئدی   آجام   قوی   قارنیمی    دولدوروم   سونرا   سه نله    گه لیم   گئده ک    قوشلارا   دی یه ک ، بولبول    دورمادی   آخی     دورسایدی    آغاج ده له ن    دویا    اوندا    بئواقت    اولاردی ، گئددی ، یئتیشدی    طاووسا ، سوزونو    اونا   دئدی ، طاووس   آینا   قاباقیندایدی   دئدی    قوی    گوزه ل   قانادلاریما   دویون جاق   باخیم   گه لیم ، او    اوز    قانادلارین   آچدی   و   اونلارا    باخیب    قانادلارینین   گوزه ل لیقینه     حئیران     اولموشدو ، بولبول    گوردو   او    بو   تئزدیقه    گه له ن      ده ییل    یولا   دوشدو   گئددی ، اوچدو   گویه   گئده   قارتالی    گوردو   اوچوبدیر   گویده دی  ،  قارتال   چوخ    اوجادا   اوچوردو    بولبول   اونا   یئتیشمه دی ،  قاییددی   مئشه نین    ایچینه   بیلدیرچینی   گوردو ، بیلدیرچین    هه له ده   فیکیر   ئلی ییردی ،  بولبول    فیکیرده ن   چیخالدیب    اونو  بیله سینه    دئدی کی   نه    گوروبدیر ، بیلدیرچین    دئدی   کاش   بیلدیر   اولاردی    آخی    اوندا    مه ن     گه له ردیم    سه نله    گئده ک   اونو  قاوالی یاق  ، ایه ر    اوبیریسی   ایلده    اولسایدی    گه له ردیم    اوزامانلار   مه نیم    ایگیت اولان    زامانیمیدی  ، بولبول    گوردو   بیلدیرچین   کئچمیشله رین    فیکیرینده ن    چیخا   بیلمیر    اونو   اوتوردو   یولا   دوشدو   گئددی    یئتیشدی   قیرقی یا ، قیرقی   اونون   سوزله رینه    قولاق   آساندان    سونرا    اونا    دئدی    بو   قونشو   مئشه ده   بیر   دووشان   گوردوم   تولو   قاچیردی ، او   مه نی    گویده    گوردو   دئدی   مه نیم   توووم    سه نده ن    چوخدیر ، گئدیره م   اونا   گوسته ره م   توولو   گئدمه ک   بیر   قوشلار  مئشه سینین    قوشلارینا   یاراشیر    اوندان    سونرا   گه لیم   گئده ک   اوزوم    ایلانی   قاوالارام  ، قیرقی    قونشو   مئشه یه   ساری    گئده نده    بولبولون   اوره گی   توتولموشدو   دورمادی    گئددی ، قارقا   سوز   اوخویوردو  اوز  اوزونه ، بولبول   اونادا   دئدی   نه    اولوبدیر    و   اوندان    ایسته دی    جار   سالا    هاممی نی    ییغا   آمما   قارقا   دئدی    مه نیم    سه سیم   خوش    ده ییل   دور   بیر  آز    اوخویوم    سه سیم   خوش   اولسون   اوندا    سه ن   دی یه نی   ئلی ییم   آخی   ایندی   سه سیمی     ئشیده نله ر    بیله مه   گوله رله ر ، بولبول   گوردو   واقت    کئچیر   و   بئواقت    اولور  ، دورمادی    یئنیده    گئددی ، او       2    یئتیشمیشدی    بایقوشا ، بایقوش    اونا   دئدی    قارقاینان   اونون    دانیشیقین    ئشیدیبدی   آمما   بولبول ایله   گئده    بیلمه ز   آخی   اونون     نه ظه رینه    هئچ   ایشین    فایداسی    یوخویدی    و   ایلان    اوز   ایشین    گوروب   و قوشلاری    بیربیر    یی یه جه یدی  ، بولبول   اونودا   اوتوردو   گئددی    گووه رچینین    یانینا    و   دئدی    ایلان    گه لیب    که سیب    گولون    اوستون   گه ل   گئده ک   بیر  ایش   گوره ک  ، گووه رچین   دئدی   مه نی    اینسانلار   به یه نیبله ر   آپارالار    ساخلی یالار   اونا   گوره    گه ره ک   مایاللاق  آشماقیم    کامیل    اولا ، مه نیم    وه قتیم    یوخدی    گئد   اوبیریسیله ری    آپار ، مه ن   بورادان    گئده جه یه م    اینسانلارین    ائوینه  ، اوزویوز    بیله رسیز    بورادا   ایلان لا    قالاسیز   یوخسا    یوخ .

بولبولون    اوره گی    توتولموشدو     آغلادی . چوخ   آغلادی . مئشه    گوزه للیقین    اونون    گوزونده    الده ن    وئرمیشدی . بیلمیردی   نه  ئله سین . داها   هئچ کیمسه   قالمامیشدی    گئده    اوندان    کومه ک     ایستی یه . ایسته ر    ایسته مه ز    یولا   دوشدو ، بیلمیردی    هارا   گئدسین ،  مه عیوس     اولموشدو ، اوره گی   قان   اولموشدو ، آغلاماقدا    اوره گین    سووودموردو ، بیرده ن    یادینا   دوشدو   قارتال   اونا    بیرسوز   دئمی ییب ، فه قه ط    بونون   الی   اونا      یئتیشمه میشدی .  باخدی   گویه ، قارتال   اوجا اوجا    اوچوردو ، یئر   قیچی    آلتیندا ، قانادلارین   آچمیشدی    هاوادا    گئدیردی    اویانا بویانا . بولبول اوز   ته صمیمین    توتدو . قانادلاری    یورولموشدو   آمما    او   اوچدو . اوج   آلدی . چوخ   قاناد   ووردو . داها   بیر   یئره   یئتیشدی کی   اورادان     اوسته   گئده نمه دی . اورادا   قاناد   چالدی    و    باشلادی   قارتالین   آدین    چاغیرماقا ، چیغیردی   چیغیردی   چیغیردی ، چوخلی   چیغیردی ، بوغازیندان   قان    آچیلدی ، آمما   او   چیغیرماقدان    قالمادی ، یئنی ده    قاناد   چالدی   گویده  قالا  و چیغیرا ، داها   نه فه سده ن   دوشموشدو   آمما    ایشینده ن    ال    چه کمیردی  ، او   مئشه یه   گوره ، یولداشی    گوله    گوره    و   اوزونه    گوره    چاللاشیردی . سه سی    توتولموشدی .  یاواش یاواش    گوزله ری    قارالدی . داها   هئچ   یئری    گوره   بیلمیردی ، بولبول    هه له ده    قاناد   چالیب   قارتالی    چاغیریردی .

قارتال    گویو   دور    وورموشدو    چونوردو ، بیرده ن   گوردو   آششاقیدا    بولبول    گویده ن    قاناد   وورمویا وورمویا    گه لیر   یئره . اوز اوزونه    دئدی   بولبولون     باشینا    نه   گه لیب ؟ اونا    نه   اولدو   دوشدو   یئره ؟ کاش    اونا    هئچ   نه   اولمویا ،  گئدیم    گوروم  ، او   اوزاق    گوره ن    گوزله ری  ایله    اویان بویانا   باخدی . قارتال    گوردو کی   بولبول   گول    طه ره فینده    دوشدو ، اوچدو    اویانا    گئددی .  قارتال    تئزلیکده گولون    اوستونه    یئتیشمیشدی .

 بولبول   هوشدان    گئده نده ن     سونرا    دوشموشدو   گوله    و   سو    اونو    هوشا   گه تیرمیشدی  . بولبول    یاواش یاواش     اوزونو   سودان    چیخاردیردی    ئشی یه .

قارتال   گولون    اوستونده ن    بیر   دوور    ووردو ،   بولبولو    گوردو    دیریدی  ، ایسته دی    قاییدا    گئده    آمما    بیرده ن  بیره   گوزو   ساتاشدی    ایلانا . ایلاندا    قارتالی    گورموشدو ، اوزونو   حاضیرلامیشدی .

هئچ    سه س    گولده    یوخویدی ، بیرجه   قاناد   سه سی   فیس فیس    سه سی  ایله   بیرلیکده    گه لیردی .

بولبول   یارالانمیشدی . زور  ایله    گوزله رین    آچدی    باخدی    گولون    اوتایینا  .

ایکی    حئیوان    بیربیرینه   دولاشمیشدیلار . اوسته   قارتال  ،  التیندا    ایلان  .

آی    مه نیم    اوشاقلاریم    بیر   هونه رلی    آدام    بو   صه حنه نی    اوز   ذئهنینده    بو   شه کیلده     موجه سسه مه یه    دونده ریب .

مه نیم    گوزه ل له ریم    بیزیم   بویونکی   ناغیل   بورادا    سونا   یئتیردی  ،   گویده ن   چوخلی    آلما    دوشدو ، هه ر   بیر  نه فه ره    بیری    یئتیشیر ، آغزی ییز    هه ممه شه    دادلی   قالسین .

اوشاقلار   ناغیلی    ئشیدیب    چوخلی    خوشلاری   گه لمیشدی .   ایندی    موجه سسه مه یه    آیری   گوز  ایله    باخیردیلار . قارتال   اونلارین    گوزونده    یئکه لمیشدی .

آخشام    بوستاندان    ائوه    قاییداندا     اوشاقلار    بیر   نه فه ری    گوردوله ر   بیر   قانادی   یارا   بولبولو    سالیب     قه فه سه    آپاریر . بولبول   غه ملی   بیر   ماهنی    اوخویوردو . بولبولون   سه سی   توتولموشدو .

اوشاقلار   بولبولون    حه سره تله    موجه سسه مه یه    باخماقین    گوردوله ر .                                    سون  .