حورمتلی اوخوجولار،بیلدیگینیزه گوره جومه آخشامی ۱۶/۸/۱۳۹۲-جی گونش ایلی "ماراغا" شهرینده "ماراغا ادبیات حالقاسی(آلما)"- نین امکداشلیغیلا یئدی عنوان شعر توپلوسو بیرلیکده یایینلاندی؛هابئله بیر اوزل مراسم ده ؛بو کتابلاردان اورتوک گوتورولدو(رونمایی اولوندو).
بو مراسیم اوچون ماراغا شهریندن و باشقا بولگه لریمیز اوزللیکله:تهران، تبریز،شهریار،کرج،مغان،بیناب و آیری شهرلردن شاعیر،یازار و ادبیات تنقیدچی لری دعوت اولونموشدو.
حورمتلی اوستادیم دکتور حسین محمدخانی(گونئیلی) ایله بیرلیکده بو تورن ده اشتراک ائتدیک.دئمه لی شاعیرلریمیز "شیدا - نونهال(خزر)" - ین "هرنه دن یازیرام؛سندن دانیشیر" شعر مجموعه سی،شاعیر "رضا وعیدی(آرتان) - نین "آغریلیق" باشلیقلی شعر توپلوسو،"رضا محمدی(رها)" - نین "کروان کئچر" عنوانلی شعر توپلوسو،"رقیه وعیدی(گونش)" خانیمین "آلمادان بیر دیش" باشلیقلی شعر مجموعه سی و هابئله "رشید حسین نژاد(ائیواز)" - ین "هورمجک " عنوان دا شعر کتابلاریندان بو تورن ده اورتوک گوتورولدو.
اونجه دن آد چکدیگیم بو بئش عنوان شعر کتابلاری حاقدا آچیقلاما یازمیشدیم،کی "رصد" گونده لیگینین اوزل سایی سی عنوانین دا باشقا یازیلان آچیقلامالارلا بیر یئرده یایینلاندی.
بو اثرلری یاییلان شاعیرلریمیزه تبریک دئیرک،اونلارین سونرا کی اثرلرینین یولونو گوزله ییریک.ماراغا و تبریز سفرلری اساسیندا نئچه مقاله حاضیرلامیشام؛گلن قونولاردا یایاجاغام اینشاالله.
بو قونودا ایللر بویو بوندان اونجه تانیش اولدوغوم،و شعرلرینی قارشیلادیغیم،شیدا - نونهال(خزر) - ین "هر نه دن یازیرام؛سندن دانیشیر " کتابی اوزره آچیقلامانی تقدیم ائدیرم.
درین سایقی لارلا
عسگر علیائی کلیان(یاشیل)
۱۳۹۲/۸/۲۰ - جی گونش ایلی- کرج
"هر نه دن یازیرام،سن دن دانیشیر" کتابی حاقدا آچیقلاما
یازان:مهندس عسگر علیائی کلیان(یاشیل)
کرج شهری ۱۹/۸/۱۳۹۲- جی گونش ایلی
ماراغا شهری و اونا عایید اولان اسکی تاریخ،او،شهری آذربایجانیمیزدا اوزل و اوستون بیر شهر تانیتمیش دیر.کئچمیش لردن اونا باغلی اولان"رکن الدین اوحدی مراغه ای"،"بولود قاراچورلو(سهند)"،"ذاکر کریمی"،میرزا حسین کریمی"،"حیدر عباسی(باریشماز)"،"عباسقلی اکبری(فقیر)" ،"رضا پاشازاده"،"رضا نویدی آذر(پیمان)" و چوخلو آدلیم و تانینمیش عالیم وشاعیرلری آد چکمک اولار.
شیدا- نونهال(خزر) تخلوصو ایله تانینان شاعیریمیز،۱۳۵۶- جی گونش ایلی نین ایلک گونلرینده،ماراغا شهرینده دنیایا گوز آچدی.او،تحصیلینی اوز شهرینده بویا-باشا وورموش،ایندی اوز شهرینده حقوق فاکولته سینین کارشناس لاریندان ساییلیر.او،ایللر دیر ،مطبوعات ساحه سینده و هابئله مجازی دنیادا، ادبیات(اوزللیکله آذربایجان ادبیاتی) ایله ماراقلانمیش و تورکی دیلینده چئشیدلی شعرلر و بعضا تنقیدی،تحلیلی مقاله لر یازمیش دیر.
دئدیگیم کیمی اونون بیر چئشیدلی و گوزل شعر توپلوسو "هر نه دن یازیرام؛سن دن دانیشیر" آدیلا ماراغا شهرینده نئچه ایل بوندان اونجه یارنان "ماراغا ادبیات حالقاسی(آلما)" –نین امکداشلیغی ایله ایشیق اوزو گورور.شیدا- نونهال(خزر) خانیم دا،باشقا شاعیرلریمیز کیمی اوزونه عایید اولان اوزل یئنی لیکلرله،ادبیاتیمیزین چئشیدلی قونولاریندا طبعینی سیناماقدا دیر.او،بوتون گونئی آذریجان شاعیرلرینه و محتشم خالقینا تانینمیش بیر شاعیر دیر.اونون شعرلری یاریش لاردا بعضا اوزونه اودول قازانمیش دیر.
شاعیرین خیال دونیاسی داها دا گوجلو دور.او،چوخلو قوشقولاریندا خیال یئلکنینی مینرکن،خیالی عالملری سئحر ائدیر.اونون شعرلری لیریک،سئوگی،وطن،انتظار،وصال،فراق ایله هیجران و باشقا موضوعلاردان عبارت دیر.دئمه لی او،بوتون بیر دوزگون وطن عاشیقی کیمی هر نه یی کووره ک کونلو ایله دویور.
او؛ هیجرانی دا قیناییر و اوندان گیلئیلی اولدوغونو بیر لیریک غزلینده بئله دیله گتیریر:
"فراقین قدیمی ایدی،ساغالماز کونلومون دردی
وصالیندان اوزاقلاندیم،سنه آرتیق ماراقلاندیم."
و یا هیجرانی آرادان قالدیرماق اوچون بئله یازیر:
"سوپورور یوللارینی هر گئجه یاتماز خیالیم
یاردیم اول،هیجرانی بیچ،الده اوراق؛آغرین آلیم"
و هابئله انتظار ساحه سینده عرفان لا دولو شعرینده بیر دوزگون و یول گوزله ین شیعه کیمی؛ امام زمان(عج)- ین فرجی اوچون بئله سویله ییر:
"قارانلیق یوکسه لیب گویلره سنسیز
هاچان گله جک سن؟دوغولا سحر
هر جمعه اومودا دالیر ائل – اوبا
دیرچله عدالت،بوغولا کدر"
و بیر یئرده ده بئله قمله آلیر:
"هر جمعه نغمه میز قهره دوندو
آناملا- آتامین قنوتلاریندا
گون باتدی،یئر اوزو کدره دوندو
باخیشلار آسیلدی بولوتلاریندا"
(خزر)- ین شعرلرینده اولان سئوگی و محبت،ایناملا دولو ایستک داها دا گوجلو دور.بو سئوگی و ایسته یی چوخلو شعرلرینده گورمک اولور:
"من سنه گووندیم؛سن بنووشه نه
بیلیرسن،عزیز دیر؛سئون،سئونه"
و باشقا بیر یئرده یئنه ده اونون انتظار و حسرتله دولو شعرلرینی دویماق ممکن دیر:
"بیلیرم دونیانی من دولانسامدا
گوزلریم هریاندا سنی گزه جک!"
یئنه اوز سئوگی سینی حسرتلرده آختاریر!دونه – دونه اونون بویونا اوخشاییر،اوره یی سئحر ائدن قوشقولار قوشور!:
"سیغینماز بنووشه م،چوله – چمنه!
هارداسان دایاغیم،دایانام؛یئنه!
ایللردی ایچیمده سوروشورام هئی ...
ابدی حسرتیم نه اولدو سنه؟!"
او،چتینلیکلره چاتان یئرده،هئچ زامان بیریندن گیلئیلی اولماییر و بئله دئییر:
" سوس (خزر)- یم قوی سوووشسون بو قادا
نه ائلی وار نه آدی وار آرادا"
شاعیریمیزین وطنه اولدوغو سئوگی سی،اوجسوز- بوجاغسیز دیر.او،چوخلو شعرلرینده نیسگیللی وطن حاقدا اولمز اثرلر یارادیر.بیر شعرده بوتون وارلیغینی وطنی بیلیر!و نه گوزل یازیر:
"دیریم وارسا،قبول ائت سیغینیم قوینونا یار،
سن کیمی بیر وطن اولماز بو وطنسیزدن اوتور"
و بیر یئرده یئنه آنا تورپاغینین عصمتلی و مقدس اولدوغونو داغلارا خطابا بئله قلمه آلیر:
"سسله نرم داغلار،داغلار آداغلار
قوچاقلاردان سوز آچارام ائل آغلار
کوکسوم یانار،داغلار یارامی باغلار
قوربان اولوم عصمتلی تورپاقلار!"
دئمه لی (خزر) شاعیریمیزین شعرینده شیفاهی خالق ادبیاتیمیز اوزره دیرلی شعرلره توش گلیریک.او،ائلینی،دیلینی و کولتورونی آرتیق بیر محبتله سئویر.ساز حاقدا بئله سویله ییر:
"سن منیم سوزوم سن،نغمه م؛آوازیم
ائلیمسن،دیلیم سن،گرایلی سازیم"
و یا بیر سربست شعرینده بئله ایز قویور:
"اوزاق دان روح کویرلدیرن اوزان سسی
"دیلغمی"،"یانیق کرمی"،
یالنیز آغیر هاوادان
یاخینلاشیرام سنه... "
شاعیر بیر ایستکلی و قایغی گوتورن آنا کیمی،آنا محبتینی ده، شعر دیلینده بالاجا قیزی اولان "صدف" – ه بیر دویغولو شعرینده بئله گوستریر:
"گله جه یین اوغور اولسون،آنان وئریر خیر دعا
سئوینجیدن گولور آتان،قوروب اوجاق ایستی یووا
هله ده بیر تر بنووشه م "صدف" – بالام،کوکلای بالام
آی خیردا بوی فیدان بوتام؛گله جک ده پولاد قالام"
او،بو شعرده بوتون ائولادلاریمیزا اوزللیکله صدف قیزیمیزا آیدین بیر گله جک آرزولاییر . صدفین و هابئله اونون کیمی بالالاریمیزین گله جه یینی آلینماز بیر پولاد قالایا بنزه دیر.منجه تکجه بو شعرده اولان گوزللیکلر و اوندا گلن اویود،تمثیل لر شاعیرین رئال و حقیقت دالینجا دولانان دونیاسینی بیزه گوسته ریر.و هابئله بیر لیریک غزلینده بئله قلمه آلیر:
"کوچه نیزدن اوتورم یار،یئنه منسیزدن اوتور
آما بیر قوشدا گلیب،اوتمه دی،سنسیزدن اوتور"
دئمه لی او شعرینده "خزر" دنیزی " ایله "آراز" چایی نی دا خالقیمیزین دایاغی و هده له نمه ین بیر تاریخی بیلیر:
"(خزر) نیشانلی "آراز" – ا باغلی یام."
او،"قارتال"- لاری اوجالاردا اوزگور اوچماغی اوچون سئویر و "قارغا" – لاردان اوزاق گزیر!بئله قوشقو قوشور:
"بیلیرسن ندندیر سئویرم سنی؟!
درینلیک بوغولوب؛گورنده سنین
قایالار اونونده سجده یه دوشور
قارتالیم ذیروه دیر سنین مسکنین"
وصالا یول آچماق اوچون دونه – دونه ترلان طبعی جوشا گلیر ،بیر ده بئله یازیر:
"بولاق گوزلرینده ،بویلودور سنه
وارلیغین سئل کیمی کونلومو ییخیر
باخیرام یولونا،یولوندا ایز یوخ ...
قوجامان کوچه لر سنسیز داریخیر!"
اونون اوره یی اوزو دئمیشکن خزر دنیزی کیمی دورو،گئنیش و بیر شاعیر اوره یی کیمی هیچ کیمسه نین مشقتلره توش گلمه سینی ایستمه ین،بیر اوره ک دیر.نییه کی اوزو بئله یازیر و بو شعرین بیر میصراع سینی دیرلی کتابینا آد سئچیر :
" (خزره) چئوریلر اوره ییم هردن
سئومه رم باشیندا نه دومان،نه چن
من سنی اونودا بیلمیرم ندن؟!
قوینونا کورپه تک قولوم ساریشیر
هر نه دن یازیرام؛سندن دانیشیر."
نهایت ده رمانتیک وخیالی بیر قوشقوسو ایله بو قیسا آچیقلامایا سون قویوروق:
" دویغومو داراییر خایالین سنین
تئلینده دولاشان شانه لر کیمی."
دئمه لی شیدا – نونهال(خزر)- ین شعرلرینده اولان یئنی لیکلر و آرتیق گوزللیکلر اینسانی فیکره دالدیریر.اونون بو اوتوز عنوانلی شعر توپلوسوندا گلن شعرلر؛ادبیات پوئزیامیزین چئشیدلی نمونه لرینی احتوا ائدیر.اوره کدن سئودیگیم و اثرلرینی دونه –دونه اوخودوغوم،(خزر) شاعیریمیزه درین ناییلیتلر و آرتیق باجاریلار و سئویملی اوخوجولارینا آیدین گونلر دیله ییرم.
قایناق:رصد گوندلیگینین اوزل سایی سی