X
تبلیغات
نماشا
رایتل

درام

متنهای دراماتیک

دئرام : پارچالانمیش کوزه ...


دئرام : پارچالانمیش کوزه

آداملار : قارا ، ایلان ، خاتین ، اوبام بی ، قوللوقچولار و جاماهات       .

                                                                          1 . صحنه بیر یئکه مئیداندیر .

                                                                          قارا جاماهاتی ییغیب دوره سینه اونلارا کوزه دن ایلان چیخارتماق ایسته ییر .

قارا : کیم‌ اولا‌ بیلرم ؟ اینسانین بیر کیمسه اولماسینی بیلدیرمک چتین دئییل ، آنجاق دانیشسام بیلرسیز کیمم ، قوجالار تانیا گرک منی ، تانیشام ،

       دوغرولوقلار ، دوزلوکلر ، جسارتلر صاحابی قارا سئییدی کئچن اینسانلار باشاباش تانی ییرلار ، کئچمیش زامانلاردا بو اولکه لرده ایلان اوینادان

       قارا سئیید آدیلا تانیناردیم ، بورالاردان کوچدوم گئتدیم ، چین اولکه سینین خاقانی ایله یولداش اولدوقوم اوچون اورالاردا یاشاییردیم ،

       چوخداندیر گلممیشدیم سیزین یوردویوزا ، ایندی بورادایام ، سیز اوچون یاخچی توحفه لر گتیرمیشم ، نئچه مین بویالی ایلانلار ، ایندی

       ایسته ییرم بیریسین کوزه دن چیخاردام ائشی یه ، بو ایلانین زهریندن بیر دامجی یوز مین نفری اون ثانیه ده او دونیایا یوللویا بیلر ، بونا امینم

       ، آمما ، آمما اونو گورندن قاباق هر بیر نفر گرک بیر قارا پول آتا بو چاناغین ایچینه ، اوغلان گل بونو دولاندیر .      

                                                                          بیر ایگید چاناغی قارادان آلیر و دولاندیریر ، هئچ کیمسه پول وئرمیر .

بیری : اوچ گئد بابا ...

ایکیمجی : نه خوش خیالدی بو ...

اوچومجو : چاناغ دولوسو گورر ؟

بیری : ییغدیغییان شریکیخ ها یولداش ...

ایکیمجی : پول عوضینه اوپوش قبولدور ؟

اوچومجو : بیر دووره ده وور گوروم نه اولور هله ...

قارا : ( اوزونه ) دئییرم اولمویا چوخدان گئددیغیمه گوره تانیمیرام داها بورالیلاری ؟ ( جاماهاتا ) نه اولار ، شک ائیلسز ، پول ییغانداندا قاباق کوزه دن

        چیخاردارام ایلانی ...

                                                                          قارا نئی چالیر ایلانی کوزه دن چیخاردیر .

                                                                          ایلان کوزه دن اوینویا اوینویا چیخیر ائشی یه .

                                                                          ایگید چاناغی قارانین ایشاره سیله دولاندیریر ، پول وئرن یوخ .

بیری : خوشگؤردوک ایلان کاکا ، نه ده پیس ایلاندی هله ...

ایکیمجی : قارینا باخ بوندا ، ایلان دئمه دئگینن آژداها ، گؤزل بالا بویانادا گل ...

اوچومجو : دوزدور چوخ هئیکللی بویوک ایلاندی آمما قییافه سی یاززیق ایلانلارا اوخشاییر ، بو اود اولسا اوزونو یاندیراردا ، بو نئجه اولدوروجو زهری

              داشیما‌لی‌دیر ؟

قارا : ال وورما اونا ، چالسا چاتدارسان ...

بیری : یوخدا ؟! یانی اولرم ؟! پی ...

ایکیمجی : میه ایندی دیریدیر ؟

اوچومجو : بو جهننم یوخ او جهننم ، گل منی چال ...

                                                                          جاماهات ایلان ایله شوخلوق ائیله ییب سونرا داغیلیب گئدیرلر .

                                                                          قارا حئیران حئیران جاماهاتا باخیر .

ایلان : آکیشی بونلاردا پول یوخ قارینلارین دولدورالار ایسته ییرسن سنه پول وئرلر ؟

قارا : ائیله بیل اوخوم داشا دیدی ...

                                                                          قارا بیردن بیره باخیر دانیشان ایلاندی ، اوزون ایتیریب ایسته ییر قاچا .

ایلان : قورخما جانیم ، ساشسایدیم ساخلامازیدیم ایندی یه ، گل اوتور یانیمدا ، خئییر ها ، ندیر ایلان گورمویوبسن ؟ آکیشی سن کی عومور بویو

          ایلان اوینادیرسان ...

قارا : دانیشیرسان ؟

ایلان : به یوخ به اویناییرام ؟! گل اوتوردا .

قارا : آخی ...

ایلان : آخیسی یوخدور ، من دانیشان ایلانام ، گل بورا ، اوتوردا ، بیلیرسن نجور پول قازانماق اولار ؟

قارا : سن کی دئدین بونلاردا پول یوخ قارینلارین دولدورالار ...

ایلان : اوجوردور ، آمما ، بونلار آزدان چوخدان یامان گونلرینه پول گیزلدیبلر ، بیرده گرک پوللولاردان پول چیخارداسان بونلاردان یوخ کی ، بو

         ایشده هر آدامین ایشی دئییل ...                                                                                                                               1

قارا : اولمویا سنین ایشیندیر ؟

ایلان : اینانمیرسان باشارام بوجور ایشلری ؟

قارا : دانیشان ایلاندان هر نه چیخار ، آمما ...

ایلان : ایلک سوزون دوز ، آمما ائیله بیل گرک امین ائلییم سنی ، اوتور باخ .

                                                                          ایلان قارانین نئیین چالیر و جاماهاتی ییغیر دوره سینده اوینادیر .

قارا : بونلارا ایپ باغلاییبسان ؟

ایلان : گوروسندا ، ایپسیزده اویناییرلار .

قارا : باخ بیر سن بونلارا ، نه دینیرلر نه اینیرلر ائیله بوجور مات مات اویناییرلار .

ایلان : ایناندین سوزومه ؟

قارا : اینانماییم ؟

ایلان : باشلایاخ ؟

قارا : نیی ؟

ایلان : پول چیخارتماقیدا ...

قارا : ایستمیرسن کی بونلارین جئبینی بوشالداق ؟

ایلان : ال آپارماق ایله یوخ ، اوزلری گرک ال آتا جیبلرینه پول وئره .

قارا : اولدو ، آمما دئمسن کیمدن اویرنیبسن بو ایشلری سنه یاخین دوشمرم .

ایلان : اولماز سونرا دییم ؟

قارا : ...

ایلان : من عربعلی سئییدین ایلانیدیم ...

قارا : دووا یازان عربعلی ؟ یوخدا ! اولدو ، یاخچی ایندی هارادان باشلامالییک ؟

ایلان : مانقال باشیندان ...

قارا : ...

ایلان : اوجور حئیران حئیران باخما منه ، دونن سن چکیب قورتاراناجاق او گوزل قره نین اییسی کوزه ایچینده اولدوردو منی .

قارا : سن قره نین اییسین تانیدین ؟

ایلان : اییی تانیماق منیم ایشیمدیر ، علی الخصوص سن چکدیغین قره نین اییسی .

قارا : واللاه هر مدل ایلان گورسیدیمده تریاکی ایلان گورممیشدیم ...

ایلان : هله نه اولوب ، گورملیلری بوندان بویانا گورجاقسان ، توش یولا گئدک ...

قارا : دئییرم الی بوش گئدسخ ائوه ، اورادادا مانقال قوروب چکمغه باشلاساق آرواد باشیمیزا توی توتاجاق ها ...

ایلان : قورخما الی بوش گئدمیاجاقسان ، اونادا دئگینن من پاشایام ...

قارا : سن مندن قارا من سندن قارا ، بیزدن پاشا چیخار ؟

ایلان : هندوستان موهاراجاسی تانیتدیرسان چیخار ...

قارا : پاشا منظوروندور ؟

ایلان : نه فرقی وار آخی ، آقا آقادیر ، بری گل .

قارا : کوزه قالدی ...

ایلان : گوتور گئدک آوارا .

قارا : به بو آداملار ؟!

ایلان : اویناماقدان یورولسالار اوزلری اوتوروب گئدرلر ایشلرینین دالیسیجاق .

 

                                                                          2 . صحنه قارانین ائویدیر .

                                                                          2 _ 1 . قارا ایلان ایله گیریر ائوینه و باشلاییر آروادینا سوز اوخوماقی .

خاتین : یوخ کئفین سازدیر ائیله بیل .

قارا : ایسته میه نین گوزو کور .

خاتین : کور اولان یولون ایتیریب ، دئدیم بیلسن .                                                                                                                  2

قارا : گورسنیر .

خاتین : هله بورا باخ بورا ، دره ده قورد آزیدی بیریده ...

قارا : گمی ایله گلدی ...

خاتین : یوخ بو سیرا طییاره ایله گلیر گویلردن ...                                                                                                                  

قارا : آرواد واللاه من سنین عاریف اولماقییان ایمانیم وار ...

خاتین : اوزونسن قارا ، دئدیم بیلسن ...

قارا : یوخ واللاه ، اورکدن دئییرم ، سن عاریف اولماسایدین هارادان بیلجیدین ایلان پاشا طییاره ایله هندوستان اولکه سیندن گلیب بیزیم یوردا ؟

خاتین : قارا گئد اوزوین ، کئچمیشلرده هندوستاندان گلن گمیلری یئر به یئر ائیله ییبلر آمما ایندی داها طییاره سینه یئریمیز یوخ ، ( قارانین بساط

           قورماقینین قاباقین آلیر ) قارا باخ قارنیم دویمامیش بساط بی بساط ، دئدیم بیلسن ...

قارا : اینانمیرساندا سوزومه ، نئیله ییم ، ( اوخویور ) نئینیم لئی نئینیم لئی ، آمما آی آرواد آی آرواد من سنین یئریین اولسایدیم بورادا دورمازیدیم ،

      گئدیب حیاطدا دولانان تویوغون باشین کسیب دریسین سویاردیم ...

خاتین : تزه تاپماجادیردا ...

قارا : گولسن گول ، آمما حیاطادا بیر باش وور قونشولار توتمامیش تویوغو ، ( ایلانا ) اوجور باخما ایلان پاشا بو بیزیم اورمو دنیزی کیمین

        گون به گون قورویان خاتین خانیمیمیزدیر .

خاتین : ایراق سندن سولدوز قوبوسو ، نه کی قورومویوبسان شیرهاشیر داشیر باشدان داشا سویون ، دئدیم بیلسن .

قارا : ائیله اورمو دنیزی دئدیم اوجور بیل ها ، قیرقیرا دوزلا دولو ، دانیشدیکجا دوز توکور ماشالاه .

خاتین : یوخ سن آللاه ، گل اوزوین اوزرلیک سال دوز بایداسی ، ( قاپی یا ساری ) اوشاق چیخ ائشی یه ، یئتیم قالمیش ، اوشاق حسرتی چکنین ...

قارا : آهان آهان ، ایندی قونشولارین آج اوشاخلاری تویوغو توتوب آپارار بیزده ناهارسیز قالاریخ ، آرواد چیخ چوله اونو توتدا .

خاتین : دئییم بیل یالان اولسا سوزون او تویوغون یئرینه اوزویون دری بوغاز ائیلیجاقام ، ویی ، دوغورداندا تویوغ سسی گلیر ، گئدیم گوروم .

                                                                          خاتین چیخیر ائشی یه .

ایلان : دده م وای بو آروادلا نئجه کئچینیرسن ، کوزه ده اولاندا سسین ائشیدمیشدیم ایندی گوردوم بیلدیم نه بئحیا بیر قادیندیر .

قارا : گور نه چکمیشم ایلان یولداش ، گوردا .

ایلان : یاززیقیم گلدی سنه یولداش .

قارا : اوتور اونو ، گل بساطین باشینا .

ایلان : دونن اوخودوقون سوزو اوخو گورک .

قارا : هوم ، ائیله بیل بیز آداملارین ایشی سنده خوش گلیب ها !

ایلان : بو ایشی ییز هه واللاه .

قارا : حوققانی ماشانی بئلیمده برکیتمیشم / آند اولا آللاها تریاکی ترکیدمیشم / حوققا کولووه قوربان / ماشا کومورووه قوربان .

ایلان : جان ، بودور ها ، به به .

قارا : نده گوزل چکیر ایچری نفسی بیزیم ایلان یولداش ، وای وای وای .

ایلان : هوم ، دونیا بودور ها .

قارا : هن سویله گورک آداملاردان نئجه چیخارتمالییخ پوللاری ؟!

ایلان : قورخورسان چکم قاچام تریاکین پولو هدر اولا ؟

قارا : یوخ یولداش ، بیز آداملار یئییب ایچمک اوچون پولسوز قالا بیلمریخ ، توتتدوخ بوگون سن بیر بئناوانین تویوغون ووردون پیشیردیخ یئدیخ

        صاباح الی بئکار گلسک ائوه خاتین یورقان دوششکیمیزی آتار کوچه یه .

ایلان : من ایله یولا گلسن او یئره یئتیرمز ایشلر .

قارا : گورکدا .

ایلان : آمما شرطی وار .

قارا : نه شرطی ؟

ایلان : تاپدیغیمیز قازانجین یاریسی منیمدیر یاریسی سنین .

قارا : اوولن آتمیشی منیم قیرخی سنین ، دوومن هانسی قازانجین ؟ من دئییرم دامدان داما سن دئییرسن جیریقیمی یاما ؟ هانسی پول ایله ایش

       باشلایاجاقسان قازانجی اولا ؟

ایلان : اوولن اللی اللی ، دوومن بو کسب نه پول ایسته ییر نه پارا ، سن پولو دولدور آنبارا ...                                                                3

قارا : یوخدا ؟

ایلان : واللاه .

قارا : توتاق بویله اولسون ، یاخچی سن پولو نئیله ییرسن آخی ایلان یولداش ؟

ایلان : ائشیدمی ییبسن هر گنجین باشیندا بیر ایلان یاتار ، منده سن دئدیغین ایلان پاشا یا ایلان موهاراجا اولاندا گرک بیر گنجیم اولادا .

خاتینین سسی ائشیکدن : آی کیشی او کومورلردن گتیر بو تویوغو کاباب ائیله گوروم ، قوناق الدن گئدر یوخسا .

قارا : بودا ناهاریمیز  ، سنه گرک چوخلو قوللوق ائیلی یم ، ( ائشی یه ) گلدیم آرواد گلدیم .

ایلان : گون او گون اولسون قوللوقچولار قاباقیمیزدا اویناسین قوللوق ائیلسین قارا سئیید یولداش .

 

                                                                          2 _ 2 . قوللوقچولار اوینویا اوینویا و اوخویا اوخویا ائوین دکورون دییشیب و

                                                                                     قارا ایله خاتینا بیر تایدا و ایلانا اوبیریسی تایدا یئمیش گتیریرلر .

قارا : واللاه یاشام بودور ها .

ایلان : راضیسان ؟

قارا : نئجه اولمویوم ، اصلن فیکریمه یئتیشمزیدی دووا یازماقین ها بویله طالعه باخماقین بیر بئله پولو اولا بیلر .

ایلان : هله هاراسیدیر ، سن منی بوتون تانیمییبسان ، ایشلریم دوز گلسه یاخچی گونلر قاباقدادیر .

قارا : اوجورکی من تانیمیشام اینانیرام سوزوین ، آمما جاماهات بیلسه حوققامیزی ...

ایلان : سوس آکیشی ، سوس ، جاماهاتین دردین تاپماق منیله دووا یازماق سنیله ، والسلام شد تامام ، سن من دئدیکلریمی اونلارا دئسن و اونلاری

         مجبور ائیلسن منیم سوزلریم ایله ایشلرین باشا آپارالار یازدیغیمیز دووانین اثری کامیل اولار ، ایشلر هممشه دووا ایله دوز گلر ، بیر

         کیمسه ده بیلمز آرادا بیزیم الیمیز وار ...

قارا : بیرگون ایه بیلسیدیم نئجه ایشلری باشا آپاریرسان ...

ایلان : اوغلان باشین بدنیین آغیرلیق ائیلمسین ، اوز ایشینده اول .

خاتین : ایه بو سوز قانسا ، آکیشی نه ایشین وار ایلان خوجا ...

ایلان : موهاراجا ...

خاتین : هامان ، نه ایشین وار نئجه جاماهاتین باشینا بورک قویور ، یاپیش پولداندا .

ایلان : هانسی بورک ؟ بو جاماهاتین اوزو سئییدلردن دووا ایسته ییرلر ، قارا آقادا بیر نفوذلو سئیید تانینیب بورالاردا ، من بو اورتادا هانسی بورکو

         قویموشام خالقین باشینا ؟

خاتین : قارا سئیید دوننجاق آجیندان ناهاردا یوخودان دوروردو ، او کویده بو محلله ده ایلان اویناتماقدان باشی آیینمیردی واللاه ، بو ایشلری

           هارادان باشاریردی آخی ؟ 

ایلان : یاخچی کی سنین اوزون هاممیا جار سالدین اریم یوخو گوروب نفسی حاققا دونوب ، سن دئییلدین جاماهاتی ییغدین بورا ؟ من بیلیردیم

          یوخسا قارا کی حسن قولونون آروادی دوغا بیلمیر ؟ یا کی ممد کیشی گلینیندن آجیغی گلیر ؟ سن بیزه دئمدین بو گلن قوجا آروادین

          قیزینی ایستدیگی اوغلانین آناسی بینمیر ؟ بیزیم علم غئیبیمیز یوخویدو کی ! هر کس بورا گلدی گئتدین سیررین بیلدین گلدین بیزه

          دئدین بیزده دوواسین یازدیکدا ، بوجور دئییلدی ؟

خاتین : منیم بونلارلا ایشیم یوخ ، فقط بیلیرم ایه بو جاماهاتین عاقلی اولسایدی اوزلری بیلردی سیزین جیزما پوزما کاغاذلاردان هئچ نه چیخماز .

قارا : نه اولدو نه اولدو ؟ بویونجاق معجزه لی دووالار اولدولار جیزما پوزما کاغاذی ؟

ایلان : بوراجاق کی هر نه یازدیک دوز چیخدی و جاماهاتین ایشی یولا دوشدو ، بوجور اولماسایدی بو تشکیلات باشا گلمزیدی .

خاتین : البتده ، منده بیلیرم گوز باغلاماقییزین سوزو یوخ ...   

قارا : ( خاتینا ) یاخچی سنده ، ( ایلانا ) دئییرم الین وار اولسون بو ائو چوخ گوزل تیکیلیب ها ایلان یولداش .

ایلان : ساغلیق اولسون ، بورانیدا ائیله اینتیظار اوتاقی ، دووا یازانلار گلیب بورادا اوتوروب نوبت توتسونلار .

قارا : یاخچی سوزدور ، اوزومده بو پرده نین دالیندا اوتوروب دووالاری یازارام .

خاتین : قارا تزه ائوده جاماهاتین باشینا بورک قویمامیش دئییم کی من اوچ دورد هفته قناری جزیره سینه گئده جاقام ، دئدیم بیلسن .

قارا : جانیم سن تزه هاواییدان گلیبسندا !

خاتین : گلمیشم گلمیشمدا ، نه اولوب کی ! او پیستیکلی مال دوقتورون آروادیندان اسکیک دئییلم کی بیر باتمان ساققیز سالیر آغزینا گفشی یه

           گفشی یه دونیانین دورد دوره سین دولانیر ! دانیشدیراندادا دئییر دوقتور دئییب هارا گئدیرسن گئد جانیم مالیم آشکیم ! دوقتور ! مال

           دوقتوروده اولوب دوقتور بوزامانادا ! واه واه واه ! باخ بیر قارا هله من فضاپیما ایله آیا گئدنلرینده ایچینده آد یازدیرمیشام ...                    4

قارا : اودا سوروجو ایله موباشیر ایله حئسسابدار ایله خییاط ایله ها بویله مششاطه چی ایله هان ؟

خاتین : گوزون کور اولسون ، سن دونیانین وارین ثروتینده ییغدین آمما گوزون اوره گین آچیلمادی کی آچیلمادی .

قارا : نئجه آچیلمادی ، آرواد منده یئر قالدی آچیلماقا ؟

خاتین : سن ایله آغیز آغیزا وئره نین آغلی هوشو یوخدور ...

قارا : دئییرمدا آغیلدان اوزاق گزیر بیزیم ...

خاتین : آغزیمی آچما ایلان خوجانین یانیندا سیرریین آچام ها ! آچیم ؟

قارا : آی جانیم سن هارا گئدجکسن گئددا ، نه سوزوم وار کی ، اولدو ؟

خاتین : نیه اولمور به .

                                                                          خاتین چیخیر ائشی یه .

ایلان : نئچه سیرا دئدیم بوشا جانی یین قورتار ، سوزه باخمادین کی .

قارا : ائیله یاپیشیب مندن قورخورام او دونیادادا آلا الینه منیم ...

ایلان : یاززیق یولداش ، دئدی سیرریین آچاجاق ؟

قارا : نه سیرری ؟! آرواد سوزونون ارزیشی اولماز ، اوتور بابا .

                                                                          بیر قوللوقچو گیریر ایچری یه .

قوللوقچو : آقام ساغ اولسون ، ساسام بی یوخاری ویلایتدن ایسته ییبدیر اوغلونا بیر دووا یازیب گوندرسن .

قارا : گئد دئگینن قارا آقانین دووالاری یوخاری ویلایتین ایشلرین باشا آپارماز ، اورادا کار سالماز .

قوللوقچو : منیم بویوک آقام ساسام بیین اوغلو اوبام بی اوزو گلیب ایندی ایسته ییر گلسین ایچری یه .

قارا : سوزو بیر سیرا دییرلر گئد باشدان ائیله اونو .

قوللوقچو : گوزوم اوسته آقام .

ایلان : قوللوقچو ...

قوللوقچو : بویورون ...

ایلان : گئد بیلسین بیر آز ساخلاشدیر سونرا گتیر بورایا ، باخ بیر ، او پرده نی گوستر دئگینن قارا آقام اونون دالیسیندا جینلرله دویوشمکددیر .

                                                                          قوللوقچو چیخیر ائشی یه .

قارا : سن اوزون دئمیشدین یوخاری ویلایتین آداملاریلا ایشین اولماسین !

ایلان : هر نه یین اوز واقتی وار ، ایندی سنین آدین دولانیب یئددی ویلایتدن کئچیب گئدیب ، داها بوندان بویانا بوتون ویلایتلرین دوواسین یازماقا

         فیکیرلش اوغلان ، دونیانی آلمالییک .

قارا : بو قورخمالی دئییل ؟!

ایلان : منیله اولسان یوخ ، ایندی سوزلریمه قولاق وئر گور نه دئییرم .

قارا : قولاقیم سنده .

ایلان : بوندان بویانا سن اولورسان بویوک آقا ، آقالار آقاسی ...

قارا : بویوک آقا ، آقالار آقاسی ؟!

ایلان : هه ...

قارا : نه گوزل بیر ایش .

ایلان : گرک آدین بوتون ویلایتلرده دولانا ، هاممی گرک سنی مشکل آچان و ایشلر باشا سالان تانییا ...

قارا : میه بوجور دئییل ایندی ؟

ایلان : دانیشما قولاق آس سوزلریمه ، بورالاردا بوجوردور ، گرک بوتون ویلایتلردده بوجور اولا ، اونلارین کی اینامی یوخ سنه گرک ایمان گتیرلر ،

          سن داها اوز ویلایتیین قارا سئییدی دئییلسن ، بویوک مقاملارا یئتیرملیسن ، بونلارا یئتیرمک اوچون گرک بیر یئکه آتدیم گوتورسن ، من

          سنین یئریین اولسام بو ایشی تئزلیکله گوررم ، هر کیمسه ده قاباقیمدا دایانسا ایستسه بو ایش باش توتمویا یولومدان گوتوررم ، اورگیمی

          داشدان ائیلرم کی هئچ اینسانا رحم ائیلمییم ، ایه قرار اولا سنین دووان اثرلی تانینا و بو ایش ایله یوز مین آدام اوله قوی اولسون ، ایه

          قراردی یوز مین اینسان یورد و یوواسیندان سورگون دوشه و بو ایش سنین دووالاریین اثرلی گوستره قوی دوشسون ، ایه یوز مین اوشاق

          قادین قوجا یاززیق ازیلملیدیر قوی ازیلسین ، قانلار توکولسه توکولسون ، باشلار دارا گئدسه گئدسین ، جینایت فیساد هر یئری آلسا آلسین

          ، آژلیق یئرین اوزون دولدورسا دولدورسون ، هر نه پیسدیر قوی اولسون آمما سنین اثرلی دووالارین اثرسیز تانینماسین ، بویله اولارسا بوتون

          آرزیلارییان یئتیررسن ، اوزون هئچ اولادلاریندا یئر اوزونده عومور بویو باش اوجا یاشایارلار ، سوزلریم دورودور ؟                               5

قارا : چوخدا دورو .

ایلان : به آغزین نیه آچیق قالیب .

قارا : بویله سوزلر ائشیدممیشدیم عومور بویو ...

ایلان : ائشیتدین ؟

قارا : هه ، آمما اولاندیر ؟!                                                                                                                                              

ایلان : دئدیم من سنین یئریین اولسام بویله ائیلرم ، قالانین اوزون بیلرسن .  

قارا : نه قورخمالیسان ...

ایلان : سئیید اولسایدیم قورخمالیدیم ، حاییف بو خالق بونو قبول ائیلمز .

قارا : یاخچی کی قبول ائیلمز یوخسا سندن قان اییسی گلیر .

ایلان : البتده بیلیرسن کی سن دئسن مندن قارداشسان قبول ائیلیرلر .

قارا : من دئمرم آخی .

ایلان : عربعلی صاحابیم کوزه نی دوزلدنده نه فیکیرلشیرمیش داها بیلینمز ، او اولوب گئدیب سون ائوینه ، اوزو یاخچی ایدی ، آمما کوزه ده یاشاماق

          گوزل دئییل ، بیر دار ائودیر قبیر کیمی ، دوز کی ایندی سن ایله منیم سوزوموز راست گلیب ال اله وئرمیشیک ایشیمیز دوز گلیب کئف

           ایچیندییک ، آمما صاباحدان کیمین خبری وار ؟ نه بیلیم کی بیری بیرده قایتارمییاجاق کوزه یه منی ؟ الیمدن گلسه او کوزه نی وورارام

           یئره داغیلدارام ، داغیلدماق دئییرم ها ، اوجور کی بلوطلار یوردونون بانوسو اوستام سئیید عربعلی نین یورد و یوواسین داغیناق سالدی ، آی

           پیس خاطیره لر هئی سیزه هئی ...

قارا : سن کی عربعلی سئییدین ایلانیسان نئجه اونون دوشمانی بلوطلار یوردونون بانوسوندان اویرنیبسن اینتیقاما فیکیرلشمگی ؟ هان ؟ اینانمالیدیر

       بو آخی ؟

ایلان : هه ، اویرنمیشم ، اویرتمیشم ، کوزه نین قورخوسوندان آمما هله قورتولمامیشام ، قورتولمامیشام .

قارا : هئچ بویله گورممیشدیم سنی .

ایلان : یاخچی یاخچی حئیران قالما منیم احوالاتیمدا ، سنه بو یئتیرر اویرندیکلریین جاماهاتدا یئر به یئر ائیلییسن ، دور گئدک هله ، ایستمدیک

          سئیید اولماقی جانیم ، ایستمدیک .

 

                                                                          2 _ 3 . اوبام بی قوللوقچو ایله اوتوروبدور اینتیظار اوتاقیندا .

                                                                                     قارا پرده نین دالیسیندا حوققا ماشا ایله یالان جینلرله دویوشور .

قارانین سسی : چولو هولو بولو ، جئبلریم اولسون دولو ، جینلر بوتون ائشیک ، ایندی قیرارام ساغی سولو ...

اوبام بی : بو کیمدیر ؟

قوللوقچو : آقام قارا سئیید .

اوبام بی : نه ایش گورور ؟

قوللوقچو : جینلر ایله دویوشور .

اوبام بی : آقا جددین قوربان قورتار بو ایشی ...

قارانین سسی : کسیلسین سسلر اوتایدان ، قاچسین جینلر بوتایدان ، کیمسدن یوخدور قورخوم ، جین اولوسو چیخیب سایدان !

قوللوقچو : جینلر قیریلدی ها ...

اوبام بی : واللاه یویونمالی اولدوم ، وای دده ...

قارانین سسی : توستو گئدیر یوخاری ، یاندیر جینی بوخاری ، پیشیر اودون اوستونده ، تویوغ کیمین سوخاری !

اوبام بی : بورادان قورتاران اولاجاق منی ؟! بو نه قلطیدی ائیله دیم ! آی هوو ...

قارانین سسی : داها گورر بوگونو ، آی قوللوقچو سوز گوندر اوروس ویلایتین شاهینا اولدو دوشمانی .

                                                                          قوللوقچو چیخیر ائشی یه .

اوبام بی : آقا یورولمویاسان ، آیاقلاریین آلتیندا توپراق اولوم آقا .

                                                                          قارا پرده نین دالیسیندان چیخیر ائشی یه .

قارا : اوغلان کیمسن سن ؟ اولمویا الیمدن قاچان جینلردنسن ؟! آی قوللوقچولار هووی ...

اوبام بی : آقا من نوکرم ، آقا من ایتینم ، آقا رحم ائیله ...

قارا : توتون بو جین بالاسین ...                                                                                                                                          6

اوبام بی : آقا واللاه من آدام اولادییام ...

قارا : تئز منیم مین باتمان قیلینجیمی گتیرین گوروم ...

اوبام بی : مین باتمان قیلینج !!!؟

قارا : یوخ لازیم دئییل ، او مین آغاج اوخ آتان کامانیمی گتیرین ...

اوبام بی : مین آغاج !!!؟                                                                                                                                                 

قارا : اوغلان مین اوجلو نئیزه نی یئتیر منه ...

اوبام بی : یاززیق اولدوم واللاه ...

قارا : تئز گلین گوروم ، به نه اولدوز سیز ؟

اوبام بی : آقا قادایین آلیم آقا ، من قوناقام آقا ...

قارا : نه قوناقی ؟ کیمسن سن ؟

اوبام بی : آقا من ساسام بیین اوغلو اوبام بیم واللاه آقا ...

قارا : گلمه یین ، گلمه یین ، سنینده هئچ قورخون اولماسین داها ، اوز بالامسان ایندی .

اوبام بی : آی سنین نفوذلو دیلیین قوربان اولوم آقا .

قارا : بو ندیر ؟

اوبام بی : وای دده اولدوم ، هانسی آقام ؟!

قارا : ترپشمه گوروم ...

اوبام بی : یاززیق اولدوم ، نه اولوب آقام ؟

قارا : سوس اوغلان سوس ...

اوبام بی : ...

قارا : ( ادا و ایشاره ایله ) هووه هووه پوف ، هووه هووه پوف ، گئد ، گئد ، گئد ، سوزومه قولاق وئر ، بو دانیشان قارا آقادیر ، گئدمسن قویروقویون

       کسه جاقام ...

اوبام بی : قویروقونو !!!؟

قارا : چابالاما اوغلان ...

اوبام بی : آخی ...

قارا : کس سسی یین دئدیم ...

اوبام بی : ...

قارا : دورما ، قایید گئد ، گئد دئدیم ، عوضی توتوبسان ، بو سن آختاردیغین دئییل ، گورسم اونو اوزوم چاغیرارام گلرسن دده سین یاندیرارسان ،

       گئد ، گئد ، گئد ...

اوبام بی : گئتدی آقام ؟؟؟

قارا : چوخ برک طیلیسمه دوشوبسن ، هللیک باشدان ائیلدیم ...

اوبام بی : وای حالیما ...

قارا : منه دایان قورخما .

اوبام بی : آقا یئتیش دادیما سن آللاه ...

قارا : دردین ندیر هله ؟

اوبام بی : ایسته دیغیم قیزین آناسی وئرمیر منه اونو .

قارا : آنلامیر ، سندن بویوک آداما وئرجکدیر ؟

اوبام بی : وئرمیردا .

قارا : هانسی دوشونموین آدامدیر بو ؟

اوبام بی : قیزین آناسی ؟

قارا : به یوخ به منیم خالام .

اوبام بی : او ، او ، بلوطلار ویلایتین بویوک بانوسودور .

قارا : هارانین ؟

اوبام بی : بلوط ...                                                                                                                                                          7

قارا : بو اولان ایش ...

ایلانین سسی ائشیکدن : لاپدا اولان ایشدی ...

اوبام بی : نه اولدو آقام ؟

                                                                          ایلان جینلر پالتاریندا گیریر ایچری یه .

ایلان : نه اولاجاق اوزونو حاضیرلاییر سنین ایشیین دوزلده .                                                                                                     

اوبام بی : وای دده بو کیمدیر ؟ آقام جین گلدی قاچ ...

ایلان : دایان گوروم ، بو جین یاخچی جینلردندیر ، آقا اوجور حئیران قالما بونا دئگینن من یاخچی جینلردنم ...

قارا : هان ؟ جین ؟ یاخچی !

اوبام بی : ( قارایا ) آقا سنه نه اولدو ؟ ، ( ایلانا ) گلمه قاباقا ، گلمه ...

ایلان : قارا ...

قارا : جانا ...

ایلان : آکیشی اوزوین گل گوروم آخی ، بونا دئگینن من یاخچی جینلردنم .

قارا : اوغلان ، بو ، بو جینلر پادشاهیدیر ، ان دیرلی و یاخچی جینلردن بیریدیر ...

ایلان : گوردون قورخماقا هئچ یئر یوخ ، ایندی گئد ویلایتییزه و هاممیا دئگینن توی وار قاباقدا ...

قارا : توی !؟!!!

اوبام بی : جین یولداش سن او بانونو تانیسایدین بو سوزو دئمزیدین ، اونون یوخو هیه اولماز .

ایلان : سنده منی تانیمیرسان اوغلان ، منیم سوزوم سوزدور ، قارا سن تانیتدیر منی بونا .

قارا : دئییرم بودا دوز دئییر ها ، اونون یوخ وئردیغی جاوابی هیه ائیلمک ...

ایلان : قارا ...

قارا : اولار ، کیم دئییر اولماز ، اولار .

ایلان : ائشیتدین .

اوبام بی : ائشیتدیم آمما ...

ایلان : داها آمما مامماسی یوخ ، گئد و تویا حاضیرلان .

اوبام بی : حتمن آخی !؟

ایلان : قورتولموش بیل ایشی .

قارا : مصلحت دئییل هله بیر آز دوزه ؟

ایلان : خئیر ایشده نه دوزمگی ؟

اوبام بی : هیه واللاه خئیر ایشدی .

ایلان : بیلیرمدا ، سن گئد ایشینده اول ، هئچده قورخون اولماسین ، ایشلری تاپشیر بیزه .

اوبام بی : سیزه ؟

ایلان : منظوروم قارا سئیید ایله آلان سئییده .

قارا : آلان سئیید !!!

اوبام بی : او کیمدیر ؟؟؟

ایلان : گئد بوتون آداملارا تامام ویلایتلرده دئگینن تئزلیک ایله قارا سئییدین قارداشی آلان سئیید اوزاقا گئتدیگی سفردن قاییداجاقدیر ، دئگینن

          اونون نفسی حاقدیر ، دئگینن قارا سئیید نه اویرنیب اوندان اویرنیب ، دئگینن او گلیر دوواسی ایله بیزلره یاردیم اولا .

قارا : نمنه ؟

ایلان : دانیشاریک ، قوی بو گئدسین .

قارا : گئدسین ؟

اوبام بی : گئدیم ؟

ایلان : گئدمیرسن شر جینلری چاغیریم گلسینلر ایشی کورلاسینلار ، گورمدین قارا سئیید نئجه اونلار ایله دویوشوردو ؟

اوبام بی : یوخ ، گئدیرم ، گئدیرم ، امرییز یوخ ؟ رخصت وئریرسیز ؟

ایلان : بیرده یادیندا قالسین ایشلرییز دوزلندن سونرا ، او قیز سنین اولاندان سونرا ، گتیررسن بورایا گوبگینده بیر دووا یازارام عومور بویو بانو سنی و

         اونو گوزوندن چوخ ایستر و قیزینی ویلایتینین گلجک بانوسو تانیتدیرار .                                                                               8

اوبام بی : من اولوم ؟

ایلان : سنین اولون نه درده دیجک آخی ؟ یوخ هله دیری قال گورک نه اولور ...

اوبام بی : منظوروم ...

ایلان : گئددا .

اوبام بی : هللیک .                                                                                                                                                       

                                                                          اوبام بی چیخیر ائشی یه .

ایلان : ( مسخره ائدیر ) هللیک ، داش او قیزین باشینا سنه قانیب .

قارا : بیلدین سن اونا نه سوز وئردین ؟

ایلان : اولمویا سن بیلمدین ؟

قارا : آکیشی بلوطلار ویلایتینین بانوسونو هانسی دووا ایله ایسته ییرسن یولا گتیرسن ؟

ایلان : آلان سئییدین دوواسیلا ...

قارا : هانسی آلان سئییدین دوواسیلا ؟!

ایلان : آهان ، ایندی سیرانین باشی یئتیردی منه ...

قارا : نه سیراسی ، نه دوواسی ، سن بو ایشین ایله بیزی دردسره سالدین ، اعتیباریمیزی بادا وئردین ، بو ایش اولان دئییل ، سن اوزونده بیلیرسن

      ایندی گرک چول پالازیمیزی ییغیشدیراق قویاق قاچاق .

ایلان : نه تئز اوزویون ایتیردین ؟

قارا : من اوزومو ایتیرممیشم ...

ایلان : دوز دئییرسن ، باتیریبسان آمما ....

قارا : سن ائیله بیل هئچ بیلمیرسن نلر دانیشدین !؟ نه یالانلار آغزییان گتیردین ؟!

ایلان : قولاق آس گور نه دئییرم ...

قارا : نه دیه جاقسان آخی ...

ایلان : سوزومو کسمه قولاق آس آخماق آدام ...

قارا : ...

ایلان : دئییرسن بلکه کیمسن ؟ هان ؟ واللاه قارالدارام بیلیین بیرکیمسه تانیماز داها ، ائیله گونه سالارام بیلیین بیرکیمسه بیلمز آدامسان یوخسا

         جانیوار ، آکیشی یادیندان چیخیب من کیمم ؟ اوچ گون خوش دانیشدیم اوزوندن چیخدین ؟ اوزوین گولدوم دئدین بلکه دوغما عمواغلو

          اولموشوک ؟ آخماق اوغلو آخماق من ایله اوزویون بیر ترازویا قویورسان ؟ ایندی بونو بیل داها گون منیم گونومدور ، ایندی داها اولمالی

          ایشلر اولمالیدیر ، اوزویون حاضیرلا .

قارا : ...

ایلان : ائشیتدین نه دئدیم ؟

قارا : دئدین ...

ایلان : دئدیز ، بوندان بویانا من ایله بوجور دانیشاجاقسان ، دئدین یوخ ، دئدیز ، دئدیم حاضیرلان ، بیلدین ؟

قارا : آخی نه یه حاضیرلانیم ؟

ایلان : او اوغلانا دئدیگیم سوزلره .

قارا : بیر سیرادا دسن ، دئسز یاخچی باشا دوشرم .

ایلان : ایندی آلان سئیید قاباقیندادیر .......................................................................

قارا : بیلیرسیز من بو ایشه باش وئرن دئییلم .

ایلان : اوندا یالان قارا سئیید اولماقیین هاممی بیلاجاق ...

قارا : یالان قارا سئیید ؟!!!

ایلان : یادیندا خاتین بیر سیرا ایستدی سیرریین آچا ؟؟؟

قارا : خاتین سیزه نه دئییب ؟

ایلان : اوزون بیلیرسن نه دئییب !

قارا : اینانمیرام .

ایلان : به من هارادان بیلمیشم ؟                                                                                                                                       9

قارا : دئییب من سئییدلردن دئییلم ؟

ایلان : تک من بیلسم یاخچیدیر ، یوخسا ایسته ییرسن هاممی بیله ؟

قارا : سیز بو ایشی گورمزسیز ...

ایلان : سن قاباقیمیزی آلاجاقسان ؟ خاتیندا منه ایشلییر ایندی ، سوزون ندیر ؟

قارا : ...

ایلان : بو ایش اولاجاقدیر ، ایندی سن باخ گور نئیلملیسن ، یا من آلان سئیید اولوب ایستدیکلریمی باشا آپاراجاقام یا سنده سئییدلیکدن ال چکیب

          بورالاردان کوچملیسن .

قارا : سون سوزویوزدور بونلار ؟

ایلان : سن کی بیلیرسن من دئدیگیمدن قاییدان دئییلم .

قارا : آمما ...

ایلان : بیلیرم سن مندن و او ایشلردن کی گورجاقام قورخورسان ، آمما قورخان قورخمویان بوجور اولمالیدیر ، بو آرادا من گرک صاحابیم سئیید

         عربعلی نین ائوینین داغیلماقینین اینتیقامین بلوطلار بانوسوندان آلام .

قارا : بوندان قورخوم یوخ ، سیز سئیید تانینساز بلوطلار بانوسونون ائوین ییخماق سیزین سون ایشییز اولمویاجاقدیر .

ایلان : بونون نیی پیس اولا بیلر ؟

قارا : سیز سئییدلرین آدین خارابلارسیز ، دوز من بیر پیس آدام اولدوقوما گوره سئییدلره بیر یاخچی خیدمت ائیلمدیم هئچ بلکه م اونلارین آدیندا

       یاخچیلیکدان سالدیم آمما بونو ایستمرم اونلارین آدلاری بوتون خاراب اولا ، اونلارین آللاهی منی پیس گونه سالار ...

ایلان : داها نه اولسا اولسون ، ایش ایشدن کئچیب ، بوندان بویانا هاممی گورملیدیر کیم نفوذلودور ، کیم دیرلیدیر ، کیم بویوکدور ، داها هئچ

         داریخمالی یئر منی اوزونده ساخلیا بیلمز ، اوز ایلان دریمده ، بو داریخمالی کوزه ده ، یئکه ووجودلار یاشاملاریندا یئکه یئر ایسته ییرلر ، هر

         یئر ایندی منیم اولا گرک ، داغیلدارام داریخمالی زیندانلاری .

                                                                          ایلان کوزه نی آتیر گویه ، کوزه دوشور یئرده تیکه تیکه اولور .

                                                                                                                                                                                                                                                      

                                                                                   سون

                                                                                93.02.15

                                                    آس اولدوز . آس اربایجان . ایری آنا .

تاریخ ارسال: سه‌شنبه 16 اردیبهشت‌ماه سال 1393 ساعت 10:11 ق.ظ | نویسنده: علی قبچاق شاهی | چاپ مطلب
نظرات (0)
برای نمایش آواتار خود در این وبلاگ در سایت Gravatar.com ثبت نام کنید. (راهنما)
نام :
پست الکترونیک :
وب/وبلاگ :
ایمیل شما بعد از ثبت نمایش داده نخواهد شد